Lẹvitikọsị 8
8
In Erọnị Na Ori Owiapụ-Awọmẹ Ma Na Kẹ Agbamịẹapụ Sọmam
(Pks 29.1-37)
1KỊNỊNYANAḄỌ ḅe nwẹnị Mozizi ḅẹẹ, 2“Erọnị na, ori owiapụ-awọmẹ na kẹ ọ̀ ḅụụ sụa ọkịị pịkị opu akapa ma na, fịafịa-pulo mẹ na, si siin agba mịẹ owi-nambulo ḅe na, maa ejimina ma na, sunmaye sọ-a fịturu kana mẹ na ọkịị; 3tẹ Kobiri Akpụrụ-warị mẹ ḅẹ ḅọkọ mẹ ḅụ tomina-ogbo mẹmgba sịn ḅo kobirii.”
4Mozizi KỊNỊNYANAḄỌ ḅe tọn ọ̀ pịrị ḅara mịẹm; tẹ tomina-ogbo mẹ Kobiri Akpụrụ-warị mẹ ḅẹ ḅọkọ mẹ ḅụ kobirim. 5Tẹ Mozizi nwẹnị tomina-ogbo mẹ ḅẹẹ, “Miemẹ anie ye mẹ tẹ mịẹ ḅarịye tẹ KỊNỊNYANAḄỌ ḅe tọnm mịẹ nwẹn ḅẹẹ ye.”
6Mozizi nwẹnị Erọnị na, ori owiapụ-awọmẹ na ọkị-ḅo tẹ minji kẹ ịn sịkịrị. 7Ọ̀ nwẹnị suku-ḅio ḅẹ kapa mẹ kẹ Erọnị sụa, tẹ ḅiri kpọ ḍiki mẹ kẹ anị kpọ; ọ̀ nwẹnị vọrọrọ-kapa mẹ kẹ pịkị ọ̀ sụa tẹ anị ọgọnọ ḅụ ẹfọdị nwẹn-sịn kapa mẹ kẹ ọ̀ sụam, tẹ nwẹnị aka ḍin ḅara kẹ ḍori wararị agbamịẹapụ karakara kapa mẹ ḅẹ ḅiri-ponoye mẹ kẹ ò ḅiri pono. 8Ọ̀ nwẹnị ekpe-gbaịn-kapa mẹ kẹ Erọnị ekpe gbaịn, tẹ nwẹnị Yurimu mẹ na Tumimu#8.8 Yurimu na Tumimu na nwẹn-sịn aị ma anie agbamịẹapụ kẹ Tamụnọ ḅịḅị ḅiiarị maa aị. Ẹbịsịya arị ḍụḅarị maa apakịrị kịkarị. mẹ na kẹ anị ḅio sụa. 9Ọ̀ nwẹnị tọpịtẹ-ḅịtẹ-sun mẹ kẹ ọ̀ sịḅị sure, tẹ nwẹnị tọpịtẹ-ḅịtẹ-sun mẹ tọrọkọ ḅụ, golu-golu ẹfẹrẹ, fịafịa ama-da sun mẹ kẹ gbanam, KỊNỊNYANAḄỌ ḅe wẹrịtẹ tọn Mozizi pịrị ḅara.
10Anịtẹso Mozizi fịafịa-pulo mẹ ọkịm, tẹ nwẹnị anị kẹ Akpụrụ-warị mẹ na, anị ḅio simearị aị mamgba na ọgọnọ sara tẹ arị mịẹ fịafịama sikima wẹrịm. 11Ọ̀ sọnọma asakị kẹ pulo mẹ ḅụ kẹlẹ kẹ agbamịẹ-anga mẹ asanam kẹ agbamịẹ-anga mẹ mịẹ fịafịama ḅụ ori anị asana ḅara ḅụ, anị ḅẹ ngwongwo mamgba na, ḅara sịkịrị opu ẹfẹrẹ mẹ na anị ḅẹ suku na, sọ ori asanam. 12Tẹ ọ̀ nwẹnị fịafịa-pulo mẹ ḅụ kẹlẹ kẹ Erọnị sịḅị ọgọnọ ḅụ sara kẹ ọ̀ mịẹ fịafịama sikima wẹrị ḅụ. 13Mozizi pịkị Erọnị owiapụ-awọmẹ ma ọkị-ḅom, tẹ kapa kẹ ịn sụa, ḅiri-ponoaị kẹ ịna ḅiri pono, tẹ sun ma kẹ ịn sure tẹ kpọọm, KỊNỊNYANAḄỌ ḅe wẹrịtẹ tọn Mozizi pịrị ḅara.
14Anịtẹso ò si siin agbamịẹ owi-nambulo ḅe ọkị-ḅom tẹ Erọnị na, ori owiapụ-awọmẹ na nwẹnị ịna aḅara kẹ si siin agba mịẹ owi-nambulo ḅe sịḅị ọgọnọ gbana. 15Mozizi nwẹnị ọ̀ ḅaa, tẹ ọmbie mẹ ọkị, tẹ nwẹnị ọ̀ ḅara-tụngbalị kẹ anị gbọn-gbọn tẹ kẹ agbamịẹ-anga mẹ ḅẹ ịfalị ma lama kana-koro, tẹ agbamịẹ-anga mẹ ḅụ pilema ye siinm. Ọ̀ nwẹnị kirikọn ọmbie mẹ kẹ agbamịẹ-anga mẹ ḅẹ suku ḅụ sara, tẹ anị mịẹ fịafịama sikima wẹrị, kẹ ḅẹrẹ fama anị pịrị ḅẹ ḅara.
16Ọ̀ nwẹnị ḅẹlẹkị mẹmgba tẹ ịla ma ọgọnọ sime ye mẹ na, pụmbụra mẹ ḅụ sụa-paka ye mẹ na, maa san-akpa ma na arịḅẹ ḅẹlẹkị na ọkị, tẹ Mozizi arị dọkịmam agbamịẹ-anga mẹ ọgọnọ ḅụ. 17Kụma KỊNỊNYANAḄỌ ḅe wẹrịtẹ tọn Mozizi pịrị ḅara owi-nambulo ḅe ḅụ kirikọn apakịrị ma, na ori ḅẹ oju apara na, ò meni na, ọ̀ pọkụ-muaị na kobiri-ogbo mẹ ḅụ ori arị kẹ paka mu fịnị kẹ arị dọkịmam.
18Anịtẹso Mozizi dọkịma agbamịẹ ejimina ḅe ọkị-ḅom tẹ Erọnị na, ori owiapụ-awọmẹ na ịna aḅara kẹ ejimina ḅe sịḅị ọgọnọ ḅụ gbanam. 19Mozizi nwẹnị ọ̀ ḅaa, tẹ ọmbie mẹ kẹ agbamịẹ-anga mẹ oju ḅụ sara ikelema-koro. 20Ejimina ḅe keni tẹso, Mozizi nwẹnị sịḅị mẹ na, eleke-eleke ma na, ḅẹlẹkị mẹ na dọkịma. 21Ịn minji kẹ ịla ma na, ḅụọ eleke ma na sịkịrị fama tẹso, Mozizi nwẹnị dọkịma-agba ḅara kẹ bebe ejimina ḅe dọkịma agbamịẹ-anga mẹ ọgọnọ ḅụ; miemẹ anie kụnụarị agba, fịnị ḅụ mịẹ KỊNỊNYANAḄỌ ḅe pịrị agba, KỊNỊNYANAḄỌ ḅe wẹrịtẹ tọn Mozizi pịrị ḅara.
22Anịtẹso ọ̀ nwẹnị osi ejimina ḅe ọkị-ḅo, ḅara kẹ sịḅị ọgọnọ gbana ejimina ḅe; tẹ Erọnị na, ori owiapụ-awọmẹ na ịna aḅara kẹ ejimina ḅẹ sịḅị ọgọnọ gbanam. 23Mozizi nwẹnị ọ̀ ḅaa, tẹ ori ọmbie mẹ ḅụ kẹlẹ ọkị tẹ kẹ Erọnị ama-ḅara anga ḅẹ ḅeri mẹ ọgọnọ-jụ tan, pịkị kẹ ori ama-ḅara ḅe opu aḅara-tụngbalị mẹ ọgọnọ tan, pịkị kẹ ori ama-ḅara anga ḅẹ ḅụọ mẹ ḅẹ opu ḅụọ-tụngbalị mẹ ọgọnọ tan. 24Ịn nwẹnị Erọnị owiapụ-awọmẹ ọkị-ḅo, tẹ Mozizi ọmbie mẹ ḅụ kẹlẹ, kẹlẹ ọkị-ọkị tẹ kẹ ịna ama-ḅara anga ḅẹ aḅeri ma ọgọnọ-jụ tan, pịkị kẹ ịna ama-ḅara ḅẹ opu ḅara-tụngbalị ma ọgọnọ tan, pịkị kẹ ịna ama-ḅara anga ḅẹ aḅụọ ma ḅẹ opu ḅụọ-atụngbalị ma ọgọnọ tanm. Mozizi nwẹnị kirikọn ọmbie mẹ kẹ agbamịẹ-anga mẹ akaka ḅụ sara ikelema-koro. 25Anịtẹso ọ̀ nwẹnị ḅẹlẹkị mẹ na, ḅẹlẹkị atemi mẹ na, ịla ma ọgọnọ sime ḅẹlẹkị mamgba na, pụmbụra mẹ ḅụ sụa-paka wararị ye mẹ na, maa san-akpa ma na arịḅẹ ḅẹlẹkị ma na kẹ sụa na, ama-ḅara anga ḅẹ ḅụọ-ẹtẹnẹ mẹ na ọkị, 26tẹ sunmaye sọ-a afịaị kana tẹ KỊNỊNYANAḄỌ ḅe tọrọkọ simearị ye mẹ ḅio ḅụ sunmaye sọ-a kịkị gbọrụ pakịrị na, pulo kẹ tan wararị fịturu gbọrụ kpo na, ḍọkọḍọkọ ịkịka gbọrụ pakịrị na ọkị tẹ arị kẹ ḅẹlẹkị ma na, ama-ḅara anga ḅẹ ḅụọ-ẹtẹnẹ mẹ ọgọnọ gbana; 27tẹ nwẹnị mịna aị mamgba kẹ sikima Erọnị na, ori owiapụ-awọmẹ ma na aḅara-ḅio sụa, KỊNỊNYANAḄỌ ḅe tọrọkọ sikima mịẹarị karakara agbamịẹ-aị ḅara ḅụ. 28Anịtẹso Mozizi nwẹnị ịna aḅara ḅụ arịmgba ọkị, tẹ kẹ dọkịma agbamịẹye mẹ na sụa dọkịma agbamịẹ-anga mẹ ọgọnọ ḅara kẹ agbamịẹapụ sịḅị gbana agbamịẹye ḅara ḅụ; ḅụụ-ḅẹlẹma kụnụ, fịnị ḅụ mịẹ KỊNỊNYANAḄỌ ḅe pịrịarị agba. 29Mozizi nwẹnị ndo mẹ ọkị, tẹ KỊNỊNYANAḄỌ ḅe tọrọkọ anị sikima karakara agba mịẹ pịrịm; miemẹ anie Mozizi ḍiekiri ḅara kẹ sịḅị ọgọnọ gbana ejimina ḅe ḅụ KỊNỊNYANAḄỌ ḅe wẹrịtẹ tọn Mozizi pịrị ḅara.
30Anịtẹso Mozizi nwẹnị fịafịa-pulo mẹ ḅụ kẹlẹ ọkị, pịkị ọmbie mẹ tẹ agbamịẹ-anga mẹ ọgọnọ sime ye mẹ ḅụ kẹlẹ ọkị, tẹ anị kẹ Erọnị na, ori opu akapa na ọgọnọ asana, pịkị anị kẹ Erọnị owiapụ-awọmẹ ma na, ịna opu akapa ma na ọgọnọ sọ asanam. Mị-ḅara ḅụ ori Erọnị na, ori opu akapa na, ori owiapụ-awọmẹ na, ori owiapụ-awọmẹ ma opu akapa na kẹ ọ̀ ḅụụ sụa mịẹ fịafịamam.
31Mozizi nwẹnị Erọnị na, ori owiapụ-awọmẹ na ḅẹẹ, “Ọ́ nama mẹ sọọ Kobiri Akpụrụ-warị mẹ ḅẹ ḅọkọ mẹ ḅụ, tẹ ọmịnị anịjụ sime tẹ ḅara kẹ sịḅị ọgọnọ gbana agbamịẹ-aị sụa kana mẹ ḅio simearị fịye mẹ kẹ nama mẹ na ḅalịị, à wẹrịtẹ tọn ḅara, ‘Erọnị na ori owiapụ-awọmẹ na anị fị ḅa.’ 32Anịsakị ọ́ fịnị kẹ nama mẹ na, fịye mẹ na ḅụ kirikọn-ye mẹ dọkịma ḅa. 33Anịsakị Kobiri Akpụrụ-warị mẹ ḅẹ ḅọkọ mẹ ḅụ sọnọma aḍin ḅụ ọ́ pụpụrụ ma, nwenii ḅara kẹ ọmịna asịḅị gbana ene ma ḅo kara ḅa, kẹ gotẹ ọkọ ḅẹẹarị, ḅara kẹ ọmịna asịḅị gbana mẹ sọnọma aḍin ọkị ḅa. 34Mịmgba mẹ ḅụ anị wẹrịtẹ mịẹ tẹ ḅara KỊNỊNYANAḄỌ ḅe tọn tẹ si-wẹrịso ḅẹrẹ fama ọ́ pịrịị. 35Sọnọma aḍin ọ́ nwẹn kẹ Kobiri Akpụrụ-warị mẹ ḅọkọ ḅụ ḍin na, ene ḅaka na sime ḅa, KỊNỊNYANAḄỌ ḅe tọn tẹ ḅara mịẹ ḅụ, anieofori ó ḅofa fịị, kẹ gotẹ ọkọ ḅẹẹarị, anị ḅara mie ịn tọn ị̀ pịrị ḅara.” 36Tẹ Erọnị na ori owiapụ-awọmẹ na mịẹ nwẹn ḅẹẹ aị tẹ KỊNỊNYANAḄỌ ḅe Mozizi ḅụụ ḅụ tọn aị mamgba mịẹ famam.
Currently Selected:
Lẹvitikọsị 8: KBTP
Highlight
Share
Copy
Want to have your highlights saved across all your devices? Sign up or sign in
(C) The Bible Society of Nigeria
