Lẹvitikọsị 6

1 # Kịẹ 5.5-8 KỊNỊNYANAḄỌ ḅe nwẹnị Mozizi ḅẹẹ, 2“Ḅẹḅọ-ḅẹḅọ nwẹnị ye kẹ ḅara ḅụ sụa anịanịa wẹrị kpaịnma ḅụ mḅọ minini ḅara mịẹ-a tẹ furu, anịanịa mingirima, anịanịa tọrụ pọnjị ḅụ oḅori kẹ mḅọ na kpeki tẹ angarị ḅọ sịn ḅụ KỊNỊNYANAḄỌ ḅe na tụḅụrụ tẹ si mịẹ, 3anịanịa tarị sakị ḅụ fa ye ḍọkị-ẹrị tẹ anị ḅụ iruo kọn tẹ ye paka-a ḅara kẹ ye karị, tẹ ḅẹẹye-ḅẹẹye tẹ tomi mịẹarị aị mamgba ḅụ, tẹ arị ḅụ si mịẹ-mịẹ, 4mḅọ si mịẹ tẹ ḅo ḅẹrẹ-ḅarasii nyana tẹ ḅẹẹ sakị, mḅọ mḅọ furu ḅụ ọkị ye mẹ, anịanịa kẹ mḅọ tọrụ pọnjị ye mẹ pịkịma-ḅo ḅa, anịanịa aniemẹ tẹ mḅọ kẹ mḅọ ḅara ḅụ sụa ye mẹ, anịanịa fa ye mẹ tẹ mḅọ ḍọkị-ẹrị ye mẹ ọkị-ḅo ḅa, 5anịanịa ḅẹẹye-ḅẹẹye tẹ mḅọ anị paka-a ḅara kẹ ye karị ye karị ye sọ mḅọ anị gbẹẹ ḅinmaa, tẹ anị kẹ sọnọa akiri ḍiya ḅẹ gbọrụ kiri kẹ sụa ye mẹ sime pịrị ḅọ mẹ pịrị ḅa mḅọ ḅẹrẹ-ḅarasii agba mẹ mịẹ ḅarị eneḅaka ḅụ. 6Anịsakị mḅọ nwẹnị ọkị-ḅo KỊNỊNYANAḄỌ ḅe pịrị ḅarị anana-ogbo ḅio mḅọ ọkị-ḅo ḅẹkụ ḅụụ ḅụ ofori ḅẹrẹ-ḅarasii agba mịẹ ejimina ḅe tẹ mḅọ la ye nimim mịnẹ ọ̀ ḅẹrẹ-ḅarasii agbamịẹ ejimina la-la ye lam nwẹn ḅẹẹ ejimina ḅe ọkị-ḅo agbamịẹḅọ ḅe pịrị ḅa; 7tẹ agbamịẹḅọ ḅe nwẹnị KỊNỊNYANAḄỌ ḅe tọrọkọ ḅụ ḅẹrẹ fama mḅọ pịrị ḅa, tẹ Tamụnọ si wẹrịso mḅọ pịrị ḅa mịna aị ma ḅụ ḅẹẹye-ḅẹẹye tẹ mḅọ mịẹ tẹ anị ḅụ ḅo ḅẹrẹ-ḅarasii nyana ḅarịye ḅụ.”

Bebe Ḅara Kẹ Dọkịmarị Agba Ma

8KỊNỊNYANAḄỌ ḅe nwẹnị Mozizi ḅẹẹ, 9“Dọkịma-agba mịẹ ḅẹ oloko ma tọn Erọnị na ori owiapụ-awọmẹ na pịrịị.” Ịn ḅẹẹ, “Agbamịẹ-anga mẹ ḅẹ ọpọ mẹ ḅio mie dọkịma-agba mẹ bebe ḍin mẹmgba kẹ dọkị nwenii ḅo dede-ḅio la ḅarịye agbamịẹ-anga mẹ ọgọnọ ḅụ, anịsakị agbamịẹ-anga mẹ ḅẹ fịnị mẹ biin ḅịa tẹ kọrịma mu ḅa anị ọgọnọ ḅụ. 10Agbamịẹḅọ ḅe amịna opu vọrọrọ-kapa mẹ sụa tẹ pịkị ikiḅa-kapa mẹ sụa ḅa; ọ̀ nwẹnị agbamịẹ-anga mẹ ọgọnọ ḅụ fọọn ma tẹ dọkịma-agba mẹ ḅụ fịnị mẹ dọkịma pakama-ḅo aị ma tan tẹ arị kẹ agbamịẹ-anga mẹ akaka sara ḅa. 11Anịtẹso ori ori opu kapa mẹ sin tẹ jen opu kapa sụa ḅa tẹ kobiri-ogbo mẹ ḅio fọọn ma dogi paka mu fịafịatẹ fun ofori anga ḅụ sara ḅa. 12Agbamịẹ-anga mẹ ọgọnọ ḅụ fịnị sakị mẹmgba kọrị ḅa, tẹ biin ḅịa. Dede goyegoye agbamịẹḅọ ḅẹ fịnị tọnọ ḅa, tẹ dọkịma-agba mịẹye mẹ kẹ anị ọgọnọ ọrụtọn ḅara gbana ḅa, tẹ nwẹnị dein-pịrị-agba mịẹ ye mẹ ḅẹ ḅẹlẹkị mẹ kẹ anị ọgọnọ gbana tẹ dọkịma ḅa. 13Fịnị agbamịẹ-anga mẹ ọgọnọ sịkọpẹlẹ-a ḅara kẹ kọrị ḅa; anị biin ma.”

Mgbọlị-Afịaị Agba Ma

14“Miemẹ anie mgbọlụ agba mịẹ oloko mẹ. Erọnị owiapụ-awọmẹ ma KỊNỊNYANAḄỌ ḅe tọrọkọ ḅụ anị mịẹ ḅa, agbamịẹ-anga mẹ tọrọkọ ḅụ. 15Gbọrụḅọ mgbọlụ agbamịẹ iḅiọkụ gbẹẹtẹ fịlawa mẹ ḅụ ḅara-kuḅu ḅin ḅarịye na, anị ḅẹ pulo mẹ na ịn kẹ fịranịkịnịsẹnịsị sịn kụnụaị ma tẹ ịn kẹ mgbọlụ agbamịẹye mẹ ọgọnọ sara ye mẹ na kẹ sụa ọkị ḅa, tẹ anị ḅẹ ḅiokoroma kiri ḅara ḅụ agbamịẹ-anga mẹ ọgọnọ ḅụ miemẹ dọkịma ḅa, KỊNỊNYANAḄỌ ḅe ḅụụ-ḅẹlẹarị kụnụ. 16Anịsakị anị ḅụ kirikọn-ye mẹ Erọnị na, ori owiapụ-awọmẹ na anị fị ḅa; sunmaye kẹ sụa-a ḅara ḅụ ini anị fị ḅa Fịafịa Yọ mẹ ḅẹ gbọrụ anga ḅụ, Kobiri Akpụrụ-warị mẹ ḅẹ nụngọ mẹ ḅụ; anịjụ mie ini anị fị ḅarịye. 17Ịn sunmaye kẹ anị na sụa fọị ma. Fịnị ḅụ mịẹ ị̀ pịrị agba mẹ ḅẹ ye ḅụ, ịna ḍiekiri ḅara ḅụ arị anị kẹ ịn pịrị tẹ. Miemẹ anie fịafịa-tẹịn ye, si sin agba mẹ na, ḅẹrẹ-ḅarasii agba mẹ na pembe ḅara. 18Erọnị awọmẹ ma ḅụ owiḅọ goḅọ-goḅọ inetẹ anị ḅẹ ye fị ḅa, anị wẹrịtẹ fịnị ḅụ mịẹ KỊNỊNYANAḄỌ ḅe pịrị agba ḅụ ọmịna ḅụọ ḅụ tọn koroma oloko sọ gbamaso mu ḅụọ-fa-ḅụọ-paka la ḅara ḅụ. Ḅara kẹ arị lama ḅọ lama ḅọ, ḅo fịafịa ḅọ sọ ḅa.”

19KỊNỊNYANAḄỌ ḅe nwẹnị Mozizi ḅẹẹ, 20“Miemẹ anie agba mẹ tẹ Erọnị na ori owiapụ-awọmẹ na kẹ agbamịẹapụ sọma ene mẹ ḅụ mịẹ KỊNỊNYANAḄỌ ḅe pịrị ḅarị agba: iḅiọkụ gbẹẹtẹ fịlawa gbọrụ kala akpa pembeye kẹ oyia akiri ḍiya ḅẹ gbọrụ kiri kẹ sakị mamgba mịẹarị agba ḅara ḅụ mịẹ KỊNỊNYANAḄỌ ḅe pịrị ḅa; anị kẹ maa anga ḍie, gbọrụ anga dede, osi anga ḅoḅiri. 21Mgbọlị agba mịẹye pembe ḅara kẹ ị́ iḅiọkụ anị pikiri tẹ pulo kẹ pẹmpẹmtẹ ye-fọị-ikulele ọgọnọ ḅụ anị kẹ pakịrị-pakịrị fọị tẹ ọkị-ḅo ḅa, tẹ anị kẹ KỊNỊNYANAḄỌ ḅe ḅụụ-ḅẹlẹarị kunu ḅara ḅẹ agba mịẹ ḅa. 22Erọnị owiapụ-awọmẹ ma ḅụ Sịḅịda-Agbamịẹḅọ kiri ọkị nwẹn ḅẹḅọ-ḅẹḅọ sime gbamaso oloko sọ ḅara kẹ anị kẹ agba mịẹ KỊNỊNYANAḄỌ ḅe pịrị ḅa. Bebe agbamịẹye mẹmgba dọkị-kpịrịkpịrị fama ḅa. 23Agbamịẹḅọ mịẹ agba goyegoye gbọrsịḅị dọkị-kpịrịkpịrị fama ḅa. Ini anị fị ma.”

Nimiatẹ Mịẹ Si Siin Agba

24KỊNỊNYANAḄỌ ḅe nwẹnị Mozizi ḅẹẹ, 25“Erọnị na ori owiapụ-awọmẹ na ḅẹẹ, ‘Mie mẹ anie nimiatẹ mịẹ si siin agba mịẹ oloko mẹ. Ịn dọkịma-agba mịẹ nama ḅe ḅaarị anga mẹ ḅụ, mie ịn pịkị si siin agba mịẹ nama ḅe sọ ḅaa ḅarị anga KỊNỊNYANAḄỌ ḅe tọrọkọ ḅụ. Miemẹ anie fịafịa-tẹịn agba. 26Agbamịẹḅọ ḅe tẹ anị kẹ si sin agba mẹ mịẹ ḅọ ḅe mie anị pẹị ḅarị ḅọ; Kobiri Akpụrụ-warị mẹ nụngọ ḅụ, fịafịa yọ ḅụ mie ò sime tẹ anị pẹị ḅarị anga. 27Ḅara kẹ anị ḅẹ meni lama ḅọ lama ḅọ, fịafịa ḅọ sọ ḅa; anị ḅẹ ọmbie fuku mu kapa la-laa, anị kapa mẹ tẹ anị fuku mu la kapa mẹ, fịafịa yọ ḅụ mie anị sịkịrị ḅarịye. 28Aram-ḅẹlẹ mẹ tẹ ịn kẹ anị sọ ye mẹ ini anị ḅaa ḅa; kụma ini anị kẹ ojo ḅẹlẹ ḅio sọ-sọọ, ịn ye kẹ iḅiọkụ anị guro tẹ minji kẹ anị sịkịrị ḅa.’ ”

29“Agbamịẹapụ ma ogbo ḅio ḅụ owiḅọ goḅọ-goḅọ inetẹ anị ḅẹ nama pẹị ḅa. Miemẹ anie fịafịa-tẹịn ye. 30Kụma si sin agbamịẹye tẹ ḅụụ ḅụ ini ọmbie ọkị-ḅo tẹ kẹ Kobiri Akpụrụ-warị mẹ ḅio Fịafịa Yọ mẹ ḅụ si-wẹrịso ḅẹrẹ fama ye ḅụ ịn nama ọkị pẹị ma; ịn fịnị kẹ anị dọkịma ḅa.”

Currently Selected:

Lẹvitikọsị 6: KBTP

Highlight

Copy