Lẹvitikọsị 1

Bebe Ḅara Kẹ Dọkịma Agba Ma

1Gbọrụ ene ḅụ, KỊNỊNYANAḄỌ ḅe nwẹnị Kobiri Akpụrụ-warị mẹ ḅụ sime tẹ Mozizi sịn tẹ ḅẹẹ, 2“Ẹkwẹn Izirẹlịapụ ma pịrịị, tẹ ịn ḅẹẹ, ‘Ḅẹẹ owiḅọ owiḅọ agbamịẹye ọkị-ḅo KỊNỊNYANAḄỌ ḅe pịrị ḅẹ sakị, mḅọ opu anama ogbo ḅio ḅụ, anịanịa mḅọ anana, anịanịa oḅori ogbo ḅio ḅụ mie mḅọ agbamịẹye mẹ ọkị-ḅo ḅarị ye’. 3Mḅọ dọkịma agbamịẹye mẹ nwẹnị opu nama ogbo-ḅio mẹ ḅụ paka-ḅo ye ḅẹḅẹ, ḅẹkụ ḅụụ ḅụ ofori owi mie mḅọ kẹ agba mẹ mịẹ ḅarịye Kobiri Akpụrụ-warị mẹ ḅọkọ mẹ ḅụ mie mḅọ agba mẹ mịẹ ḅarịye mịẹtẹ KỊNỊNYANAḄỌ ḅe tọrọkọ ḅụ ori agba mẹ ọkị ḅarị ḅara. 4Mḅọ amịna ḅara kẹ dọkịma agbamịẹye mẹ sịḅị ọgọnọ gbana ḅa, tẹ KỊNỊNYANAḄỌ ḅe anị ọkị ḅa, tẹ anị kẹ mḅọ asi sịkịrị sin tẹ ḅẹrẹ-fama ye sọma ḅa. 5Anịtẹrẹmẹ mḅọ KỊNỊNYANAḄỌ ḅe tọrọkọ ḅụ owi-nambulo ḅe ḅaa ḅa, tẹ Erọnị owiapụ-awọmẹ, agbamịẹapụ ma ọmbie mẹ kẹ KỊNỊNYANAḄỌ ḅe pịrị ḅa, tẹ nwẹnị ọmbie mẹ kẹ agbamịẹ-anga mẹ tẹ Kobiri Akpụrụ-warị mẹ ḅọkọ ḅụ simearị ye mẹ ḅụụ sara ikelema-koro ḅa. 6Mḅọ nwẹnị dọkịma agbamịẹ nama ḅẹ oju apara ẹsị, tẹ nama mẹ kẹ pakịrị, pakịrị keni ḅa. 7Erọnị agbamịẹḅọ ḅe owiapụ-awọmẹ ma nwẹnị agbamịẹ-anga mẹ ọgọnọ fịnị-apakịrị ma kẹ ọrụtọn koroma tẹ fịnị tọnọ ḅa. 8Erọnị owiapụ-awọmẹ, agbamịẹapụ ma nwẹnị pakịrị ma tẹ agbamịẹ-anga mẹ ọgọnọ simearị fịnị mẹ ọgọnọ kenitẹ nama mẹ na, sịḅị mẹ na, ḅẹlẹkị mẹ na kẹ dẹẹ ḅa ọrụtọn ḅara ḅụ. 9Kụma nama ḅe furo ḅio paka-ḅo aị ma na, ḅụọ ma na mḅọ minji kẹ arị sịkịrị ḅa, tẹ agbamịẹapụ ma bebe nama mẹmgba dọkịma ḅa agbamịẹ-anga mẹ ọgọnọ, dọkịma-agba ḅara ḅụ, fịnị ḅụ mịẹarị agba, KỊNỊNYANAḄỌ ḅe ḅụụ-ḅẹlẹarị kụnụ.”

10“Dọkịma agba gotẹ ọ̀ pịrị ye mẹ nwẹnị anana na oḅori na ogbo-ḅio ḅụ ḅo anana, anịanịa oḅori ḅẹḅẹ, mḅọ ḅụụ ḅụ ḅẹkụ ofori owi nama kẹ agba mẹ mịẹ ḅa. 11KỊNỊNYANAḄỌ ḅe tọrọkọ ḅụ agbamịẹ-anga mẹ ḅẹ ọgọnọ-jụ da pakịrị anga ḅụ mḅọ nama ḅe ḅaa ḅa, tẹ Erọnị owiapụ-awọmẹ, agbamịẹapụ ma nama ḅe ọmbie mẹ kẹ agbamịẹ-anga mẹ ḅụụ sara ikelema-koro ḅa. 12Mḅọ nama ḅe keni tẹ sịḅị mẹ na, ḅẹlẹkị ma na pakama-ḅo ḅa, tẹ agbamịẹapụ ma arị kẹ ọrụtọn koroma ḅa fịnị apakịrị ma tẹ agbamịẹ-anga mẹ ọgọnọ tọnọ wararị fịnị mẹ ḅio. 13Kụma nama ḅe furo ḅio paka-ḅo aị na, ḅụọ ma na mḅọ minji kẹ arị sịkịrị ḅa tẹ agbamịẹapụ ma arị kẹ sụa bebe nama ḅe kẹ agba mẹ mịẹ, tẹ agbamịẹ-anga mẹ ọgọnọ anị dọkịma ḅa. Miemẹ anie dọkịma agba, fịnị ḅụ mịẹarị agba, KỊNỊNYANAḄỌ ḅe ḅụụ-ḅẹlẹarị kụnụ.”

14“Mḅọ mie KỊNỊNYANAḄỌ ḅe pịrịarị dọkịma-agba mẹ nwẹnị feni kẹ mịẹ agba ḅẹḅẹ, anịrẹ mḅọ nwẹẹrẹsị anịanịa asambịrịma olosịkịya ọkị-ḅo ḅa. 15Agbamịẹḅọ ḅe anị kẹ agbamịẹ-anga mẹ ḅo ḅa, tẹ kọngọ mẹ fangala anyịma tẹ sịḅị mẹ kanị sin tẹ agbamịẹ-anga mẹ ọgọnọ anị dọkịma ḅa, anịsakị agbamịẹḅọ ḅe nwẹnị oju mẹ pọnjị tẹ anị ḅẹ ọmbie mẹ kẹ agbamịẹ-anga mẹ akaka ḅụ sara ḅa. 16Ò feni ḅe fịye-koko-akpa na, pịkọ ma na kẹ agbamịẹ-anga mẹ ḅẹ ịrụa-saakịarị-anga ḅẹ fọọn sara anga mẹ ḅụ sara ḅa. 17Ọ̀ ḅara kẹ feni ḅe kanị finji ḅa pamba ma ḅụ, kụma ọ̀ pamba ma kanị-siin ma, anịsakị agbamịẹḅọ ḅe nwẹnị fịnị apakịrị tẹ tọnọ wararị fịnị mẹ ḅio anị dọkịma ḅa agbamịẹ-anga mẹ ọgọnọ ḅụ. Miemẹ anie dọkịma-agba, fịnị ḅụ mịẹarị agba, KỊNỊNYANAḄỌ ḅe ḅụụ-ḅẹlẹarị kụnụ.”

Currently Selected:

Lẹvitikọsị 1: KBTP

Highlight

Copy