Jọnị 14
14
Jizọsị Anie Ḅọrọ Mu Ḍaḅọ Ḅe La La Etela Mẹ
1Jizọsị nwẹnị ḍuko ịn pịrị, “Ọ́ ḅụụ-ḅalaḅala nyana tẹ ọmịna aḅioḅẹngbọ pikirima ma. Ọ́ Tamụnọ ḅụ minini nyana-a, pịkị ị̀ ḅụụ sọ. 2Ị̀ Ḍa warị tọnwa aḅio emi, tẹ à sime-yọ tẹlẹma ọ́ pịrị ḅẹ muarị. Ọkọ-a namịna à miemẹ ḍuko ọ́ pịrị ḅịa. 3Tẹ à sọ-mu tẹ sime-yọ mẹ tẹlẹma ọ́ pịrị tẹ ḅẹḅẹ, à pịkịma-ḅo ọmịnị ọkị ị̀ ḅụụ pịrị ḅa, mịẹtẹ ọmịnị à sime anga sime ḅarị ḅara. 4Ḅọrọ mu à muarị anga mẹ la-la etela mẹ ó nimi wararị.”
5Tọmọsị nwẹnị ọ̀ ḅẹẹ, “KỊNỊNYANAḄỌ, wa í muarị anga nimi-a sakị ndẹẹ wa inetẹ mu anị la ḅẹ etela mẹ nimi ḅẹ ḅara?”
6Jizọsị nwẹnị ọ̀ pakịrị, “Yẹrị anie etela mẹ, karakara mẹ, pịkị ḍumo mẹ; gbọrụḅọ-sọ mu Ḍaḅọ ḅe la la-a, mḅọ ị̀ ḅụụ ḅọrọ sikima.” 7Ọ̀ nwẹnị ịn ḅẹẹ, “Mịọkụ ọmịnị ì nimi tẹ ḅara, ọ́ pịkị ị̀ Ḍa ḅe sọ nimi ḅa, tẹ mịọkụ saakị mu ọmịnị ó nimi wararị, tẹ pịkị ori ẹrị tẹ.”
8Filipu nwẹnị ọ̀ ḅẹẹ, “KỊNỊNYANAḄỌ, Ḍaḅọ ḅe kẹ wa ḍie; anie sikima wa jen ḅii-a.”
9Jizọsị nwẹnị pakịrị, “Filipu, àrị ọmịnị-mgba na sime alama tẹ mẹ sọ ị́ paa ì nimi-a? Ị̀ ẹrị tẹ ḅọ, ẹrị tẹ ḅọ Ḍaḅọ ḅe ẹrị tẹ ḅẹ sakị, ị́ paa tiegotẹ pịkị ḅẹẹarị, ‘Ḍaḅọ ḅe kẹ wa ḍie’? 10Filipu, í minini-a, mịnẹ à Ḍaḅọ ḅe ḅụụ ḅio emi, tẹ Ḍaḅọ ḅe pịkị ị̀ ḅụụ ḅio emi ḅara? Jizọsị nwẹnị ọ̀ ḍukamẹnjịapụ ma ḅẹẹ, À kọn ọ́ pịrị tẹ ẹkwẹn ma ì soku-ḅẹ ẹkwẹn-a. Ḍaḅọ ḅe tẹ ị̀ ḅụụ ḅio simearị ḅọ ḅe ḅarana amịna kọrịnama kọrịarị. 11À ḍuko sakị, mịnẹ Ḍaḅọ ḅe ḅụụ ḅio àrị emi, tẹ Ḍaḅọ ḅe pịkị ị̀ ḅụụ ḅio emi mẹ mininii. Yẹrị ḅarana ḍukoarị mẹ ẹrẹsị ó minini-a ḅẹḅẹ, à kọrịarị akọrịnama ma gotẹ ó mininii. 12À karakara mẹ ḍuko ọ́ pịrịarị: Ì minini ḅọ, minini ḅọ à kọrịarị akọrịnama ma kọrị ḅa, inn, mịna aị nẹngị aị sọ mḅọ kọrị ḅa, à so Ḍaḅọ ḅe ḍọkụma-muarị ẹrẹsị. 13Tẹ ọmịnị ị̀ ẹrẹ ḅụ ḅii ye, ḅii ye à mịẹ ọ́ pịrị ḅa, mịẹtẹ tomi Tụḅọ ḅe ḅụ ḅọrọ tẹ Ḍaḅọ ḅe ebube mẹ ẹrị ḅẹ ḅara. 14Ọmịnị ị̀ ẹrẹ ḅụ ị̀ ḅara ḅii ye, ḅii ye arị arị mịẹ ḅa.
Jizọsị Fịafịa Tẹmẹ Ḅe Minini Ò Ḍukamẹnjịapụ Ma Pịrịm
15“Ọmịnị ị̀ ḅẹlẹmarị ḅẹ kụma ọmịnị ì oloko ma koko ḅa. 16Tẹ à Ḍaḅọ ḅe tẹkẹ tẹ ò jen Ḅarasụaḅọ kẹ ọ́ pịrị ḅa, tẹ ori ọmịnị na sime gbamaso ḅa. 17Ḅị Tẹmẹ ḅe anie Tamụnọ gboloma karakara mẹ mịẹfinji ọ́ pịrị ḅarị ḅọ. Tomikiri mẹ inetẹ ọ̀ daa-ọkị ḅịa; anị inetẹ ori ẹrị ḅịa, pịkị ò nimi ḅịa ẹrẹsị. Kụma ọmịnị ò nimi wararị; ori ọmịnị na simearị tẹ pịkị ọmịna ḅụụ ḅio emi ẹrẹsị.
18“À so ḅẹ sakị, àrị ọmịnị ngẹrị sime ḅẹ ḅara kẹ ó koroma so ḅịa; à pịkị ọ́ ḍọkụma-ḅo ḅa. 19Boowa kala-sakị ḅụ tomikiri mẹ ḅarị jen kẹ ị̀ ẹrị ḅịa, kụma ọmịnị ị̀ ẹrị ḅa, tẹ à ḍumo wararị ẹrẹsị ọmịnị sọ ḍumo ḅa. 20Anị ene mẹ ḅụ, ó nimi ḅa mịnẹ àrị ị̀ Ḍa ḅe ḅụụ ḅio emi, tẹ ọmịnị pịkị ị̀ ḅụụ ḅio emi, anie yẹrị sọ ọmịna ḅụụ ḅio ḅụ emi gbọrụ ḅara mẹ.
21“Ì oloko ma ọkị tẹ arị ḅẹẹ ḅara mịẹarị ḅọ, mịẹarị ḅọ anie ị̀ ḅẹlẹmarịḅọ, ị̀ Ḍa ḅe ị̀ ḅẹlẹmaḅọ, ḅẹlẹmaḅọ ḅẹlẹma ḅa, yẹrị sọ mḅọ ḅẹlẹma tẹ ị̀ ḅụụ mịẹfinji mḅọ pịrị ḅa.”
22Judasị (anie Judasị Isikarịyọtị ḅe ori-a-o) nwẹnị ḅẹẹ, “KỊNỊNYANAḄỌ, anị tiegotẹ inetẹ ọkọ mịẹ ḅẹ, mịnẹ ị́ ị́ ḅụụ mịẹfinji wa pịrị tẹ ḅarị mịẹfinji tomikiri mẹ pịrị ḅịa mẹ?”
23Jizọsị nwẹnị ọ̀ pakịrị, “Ị̀ ḅẹlẹmarịḅọ goḅọ-goḅọ ì tolumaye mẹ koro ḅara ḍiki mịẹ ḅa. Ị̀ Ḍa ḅe mḅọ ḅẹlẹma ḅa, ị̀ Ḍa ḅe na ị̀ na mḅọ ḍọkụma-ḅo tẹ mḅọ na anga ḅa. 24Ị̀ ḅẹlẹma-aḅọ goḅọ-goḅọ pịkị ì tolumaye mẹ koro ḅara ḍiki mịẹ-a. Anịsakị ọ́ naa tẹ tolumaye mẹ ì nye-a, kụma Ḍaḅọ ḅe tẹ ị̀ kẹ fịrịma ḅọ ḅe ḅara mie anị ḅo ye.
25“À miemẹ ḍuko ọ́ pịrị tẹ à paa ọmịnị na emi sakị. 26Ḅarasụaḅọ ḅe, anie Fịafịa Tẹmẹ ḅee, Ḍaḅọ ḅe ị̀ ẹrẹ ḅụ kẹ fịrịma ḅẹ ḅọ ḅe, ye goyegoye kẹ ó toluma ḅa, tẹ pịkị mịẹtẹ ọmịnị à ḍuko ọ́ pịrị tẹ aị mamgba kẹ ḅiokoroma ḅa.
27“Ḍuu tẹ à koroma-so ọ́ pịrịarị ye anie dein; ì soku-ḅẹ dein mie à kẹ ọ́ pịrịarị ye. À tomikiri mẹ pịrị-pịrị ḅara pịrị-a. Ọ́ ḍụkụ tẹ ḅụụ-ḅalaḅala ọmịna aḅioḅẹngbọ pikirima ma, ọ́ pịkị ḅalafa ma. 28À ḍuko ye ọ́ naa tẹ, ‘À soarị, kụma à pịkị ọ́ ḍọkụma-ḅo ḅa.’ Ọmịnị ị̀ ḅẹlẹmam ḅẹ kụma, mimgbe ó ḅioḅẹlẹ tẹ mịnẹ à so Ḍaḅọ ḅe ḍọkụma-muarị, ori ị̀ nẹngịm ẹrẹsị. 29À miemẹ ḍuko ọ́ pịrị tẹ mịọkụ ḅụ, tẹrẹmẹ ye mẹmgba paka sakị la, mịẹtẹ anị paka sakị ó minini ḅarị ḅara. 30À ḅarị inetẹ ọmịnị na ẹkwẹn alama ḅịa, mị tomikiri mẹ ḅẹ ḅẹrẹtọnḅọ ḅe ḅoarị ẹrẹsị. Ị̀ ḅụụ ọ́ kụrọ nyana-a, 31kụma tomikiri mẹ nimi-a so ḅịa, mịnẹ à Ḍaḅọ ḅe ḅẹlẹmarị, anie mịẹtẹ àrị ọ̀ tọn ị̀ pịrị ye, pịrị ye mịẹarị.
“Ó ḅo wa mịanga so.
Currently Selected:
Jọnị 14: KBTP
Highlight
Share
Copy
Want to have your highlights saved across all your devices? Sign up or sign in
(C) The Bible Society of Nigeria
