Suku-saakị 7
7
Tamụnọ Opu Minji Kẹ Tomikiri Famam
1Anịtẹso KỊNỊNYANAḄỌ ḅe nwẹnị Noha ḅẹẹ, “Ị́yẹrị na, ị́ warị-suku mẹmgba na opu arụ mẹ ḅụkụlọọ, kẹ gotẹ ọkọ ḅẹẹarị, mị ḅụọ-ḅẹ-atomi ma ḅụ ị́yẹrị kịngẹ mie ị̀ tọrọkọ karakara wararị ḅọ. 2Fịafịatẹ anama ḅụ owi-na-ịyọrọ-na sọnọma, sọnọma ọkị sụa ḅụkụlọọ, anịsakị fịafịa-a anama ḅụ owi-na-ịyọrọ-na maaịn-maaịn kẹ sẹịn, 3anịsakị pịkị So-tọrụ ḅẹ afeni ma ḅụ sọ owi-na-ịyọrọ-na sọnọma, sọnọma ọkịị, mịẹtẹ feni kịrị-kịrị ma ḍumo-sime tẹ tomikiri mẹmgba ḅụ ịna pembema feni iyi-iyi sara ḅẹ ḅara. 4Kẹ gotẹ ọkọ ḅẹẹarị, mịmgba ḅẹ sọnọma ḍin ḅụ, arị eneḅaka amesi na, ḍin amesi na kẹ eene kẹ tomikiri mẹ fịrịma ḅa; tẹ ye goyegoye tẹ à tẹmẹ tẹ kẹ kiri mẹ ọgọnọ koroma tẹ ye goyegoye ọfịn sin fama ḅa.” 5Tẹ Noha KỊNỊNYANAḄỌ ḅe tọn ọ̀ pịrị tẹ aị mamgba mịẹm.
6Opu minji mẹ ḅo tomikiri mẹ gbaịn sakị Noha sịḅị kụra gbọrụ ẹndẹ oyia asi finji (600) ḅọrọ tẹ. 7#Mat 24.38,39; Luk 17.27Tẹ Noha na, ori owiapụ-awọmẹ na, ọ̀ ta na, ori owiapụ-awọmẹ sime-ereme na ọ̀ ḅụụ sọ tẹ arụ mẹ ḅụkụlọm, ini opu minji mẹ ḅụ ḅọrọma ḅẹ ḅara. 8Fịafịatẹ anama na, nama tẹ fịafịa-a aị na, feni amẹẹ na, ye goyegoye tẹ kiri mẹ ọgọnọ ikiriarị ye goyegoye ḅụ, 9maaịn-maaịn, owi-na-ịyọrọ-na Tamụnọ tọn Noha pịrị ḅara ḅụ Noha ḅụụ sọ tẹ opu arụ mẹ ḅụkụlọm 10Tẹ sọnọma aḍin ma ḅọrọ tẹso, opu minji mẹ ḅẹ minji mẹ saakị saram.
11 #
2 Pit 3.6
Noha ḍumo ḅụ kụra gbọrụ ẹndẹ na oyia asi finji (600) karama kụra mẹ ḅẹ maaịn karama akalụ mẹ ḅẹ tẹra aḍin fa si karama ene mẹ, anị ene mẹ ḅụ mie pokolo fatẹ ngụngụḅa mamgba kan sara, tẹ So ma ḅẹ ikiḅa-aḅọkọ ma finji ye, 12tẹ eene eneḅaka amesi na ḍin amesi na kẹ tomikiri mẹ ḅụ saram. 13Anị gbọrụ ene mẹ ḅụ Noha na, ori owiapụ-awọmẹ Sẹmụ na, Hamụ na, Jafẹtị na, Noha ta na, ori tẹra owiapụ-awọmẹ ma sime-ereme ma ịna ḅụụ sọ tẹ opu arụ mẹ ḅụkụlọm; 14ini na piri-ḅio simearị nama kịrị-kịrị ma goyegoye na, opu anama kịrị-kịrị mamgba na, ikiriarị ye goyegoye tẹ kiri mẹ ọgọnọ simearị kịrị-kịrị ye goyegoye na, kịrị-kịrị afeni ma ḅẹ ḅara, ḅara goyegoye na. 15Meni tẹ ḍumo pịrị ọwụ mẹ sararị aị mamgba arịḅẹ maaịn, maaịn Noha ḅụụ sọ tẹ opu arụ mẹ ḅụkụlọm. 16Anịsakị ini tẹ Tamụnọ tọn ọ̀ pịrị ḅara ḅụ meni sụa tẹ ḅụkụlọ aị mamgba owi-na-ịyọrọ-na; tẹ Tamụnọ ḅọkọ mẹ gbaịn ọ̀ pịrịm.
17Opu minji mẹ kiri mẹ ọgọnọ sịkọpẹlẹ-a ḅara kẹ ḍin amesi kẹ serim, tẹ minji mẹ ḅo kọpụ tẹ opu arụ mẹ foinma tẹ anị kiri mẹ ọgọnọ ḅụ saakị gelem. 18Minji mẹ tomikiri mẹ gbaịnm, tẹ anị kiri mẹ ọgọnọ gburo-gburo lama tẹ opu arụ mẹ minji mẹ tọrụ tẹịnm. 19Minji mẹ tomikiri mẹ gbaịn tẹ owolo mie la ḅara ḅụ bebe so mẹ suku-ḅio simearị gele, geletẹ tụndụ mamgba gbaịn famam. 20Minji mẹ tụndụ ma gbaịn tẹ si aḅụọ-kuḅu (7 m) pembe ye kẹ arị asịḅị ḅilemam. 21Anịsakị ḍumo tẹ kiri mẹ ọgọnọ mẹnjị sime meni sụa aị mamgba — feni amẹẹ na, opu anama na, piri-ḅio-ḅẹ anama na, ikiriarị aị tẹ kiri mẹ ọgọnọ ikiri sime aị mamgba na, tomḅọ goḅọ-goḅọ na sombi fịịm.
22Samụnọtẹ kpongbo-kiri mẹ ọgọnọ sime tẹ nini ḅio ḍumo pịrị ọwụ mẹ sararị ye goyegoye sombi fịịm. 23Ḍumo wararị ye goyegoye tẹ tomikiri mẹ ḅụ sime-sime ye goyegoye — tomi na, nama na, ikiriarị aị na, So-tọrụ fiin-arị afeni na — ori ọfịn siin famam; tomikiri mẹ ḅụ ori ịn ḅaa gulugulumam. Noha na ori na opu arụ mẹ ḅio sime apụ na ngẹrị mie kirikọn yee. 24Tẹ minji mẹ ḍin sọnọma asi oyi finji (150) kẹ kiri mẹ ọgọnọ kọpụ tẹ simem.
Currently Selected:
Suku-saakị 7: KBTP
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
(C) The Bible Society of Nigeria