Suku-saakị 48

Jekọbụ Iferemu Na Manasẹ Na Bomam

1Sakị kẹlẹ ḅọrọ tẹso, ịn nwẹnị ḍuko Josẹfụ pịrị, “Ḍikii, ị́ ḍa obiarị.” Mie ḅụ ọ̀ nwẹnị ori maa owiapụ-awọmẹ Manasẹ na, Iferemu na ọkị ọ̀ ḅụụ sụa tẹ Jekọbụ dama-mu. 2Tẹ ịn nwẹnị anị ḍuko Jekọbụ pịrị, “Í owiḅọtụḅọ Josẹfụ í ḍiki ḅẹ ḅo tẹ.” Anịtẹso Izirẹlị nwẹnị ori ịnyọ gbalakị tẹ tụkụtẹ lẹgị-sime monoye mẹ ọgọnọ. 3#Suk 28.13,14Tẹ Jekọbụ nwẹnị Josẹfụ ḅẹẹ, “Kụrọmamgba Nyana Tamụnọ ḅe ḅụụ pakama ì ḍiem Luzu ḅụ Kenanị ḅẹ ama ḅio ḅụ, tẹ ì boma, 4tẹ ị̀ ḅẹẹm, ‘Ḍikii, àrị ị́ mịẹtẹ ị́ awọ iyi tẹ lolo-kama ḅa; anịsakị arị ị́ ḅụụ ḅụ tomi-kụlọkụlọ pakama-ḅo ḅa, tẹ mị ama mẹ kẹ í furo-ḅẹ-apụ pịrị tẹ ini anị nyana gbamaso ḅa ị́ ḅọrọtẹ so sakị.’ ”

5“Anịsakị mịọkụ ị́ maa owiapụ-awọmẹ ma tẹ Ijiputi ama ḅụ ini iyi ị́ pịrị tẹrẹmẹ arị Ijiputi ḅụ ị́ ḍọkụma-ḅo apụ ma anie ì nye; Iferemu na, Manasẹ, na ì nye so ḅa, Rubẹnị na, Simiyọnị na ì nye sọ ḅara. 6Anịsakị ịna ọḅụjụ ini iyi ị́ pịrị ḅarị apụ ma anie í nye; ini owiapụ-amịnapụ ẹrẹ ḅụ mie ini ịna ḍuu fị ḅarị ye. 7#Suk 35.16-19Kẹ gotẹ ọkọ ḅẹẹarị, Padani (Mẹsopotemịya) ḅụ à simetẹ ḅoarị sakị, kẹ mịẹtẹ à kururu ḅụ Resẹlị etela mẹ ḅụ fịịm Kenanị ama ḅụ, paa Ẹfịratị ḅụ ala wararị anga ḅụ; tẹ arị á kẹ Ẹfịratị (anie Bẹtịlịhẹmụ) mu etela mẹ akaka ḅụ ḍiḅim.”

8Izirẹlị Josẹfụ owiapụ-awọmẹ ma ẹrị tẹso, ò nwẹnị gbela, “Mịna apụ ma tọ apụ?”

9Josẹfụ nwẹnị ọ̀ ḍa pakịrị, “Ini anie ì owiapụ-awọmẹ, inima tẹ Tamụnọ kẹ mị yọ ḅụ ị̀ pịrị tẹ apụ ma.”

Tẹ Jekọbụ nwẹnị ḅẹẹ, “Àrị ị́ tẹkẹm, ini ọkị-ḅo ị̀ pịrịị, mịẹtẹ àrị ịn boma ḅẹ ḅara.” 10Mịọkụ Izirẹlị omongi la ḅara ḅụ ori atọrụngbọ ḅutuḅutu tẹ, anie mịẹtẹ ọ̀ ḅarị inetẹ ye ẹrị-a. Anie ḅụ Josẹfụ ini ọkị-ḅo ò kpekimam, tẹ ịna ḅịḅị nọnjị, tẹ ịn kẹ ò kuḅu ḅio suum. 11Izirẹlị nwẹnị Josẹfụ ḅẹẹ, “À ḅarị ị́ tọrụkuḅu ẹrị kẹ ḅiotọn-a, anịsakị ḍikii, Tamụnọ ḍụkụ tẹ àrị ị́ awọmẹ sọ ẹrị tẹẹ.” 12Anịtẹso Josẹfụ ọ̀ ḅụọ-ẹtẹnẹ ḅụ awọmẹ ma ọkịm, tẹ ọ̀ nwẹnị ọ̀ sịḅị-tuu mu kiri lama tẹ tọrụkuḅu kẹ iḅo.

13Josẹfụ nwẹnị ini maa apụ ma ọkị, ori ama-ḅara kẹ Iferemu ọlọ tẹ kẹ Izirẹlị ere-ḅara anga pịrị, tẹ ori ere-ḅara kẹ Manasẹ ọlọ tẹ kẹ Izirẹlị ama-ḅara anga pịrị, tẹ nwẹnị ini ọkị-ḅo ò kpekima. 14Kụma Izirẹlị ori ama-ḅara sụn-pakama tẹ kẹ Iferemu kalatụḅọ ḅe sịḅị ọgọnọ gbanam, tẹ ori ere-ḅara saḅama tẹ kẹ Manasẹ tarị tụḅọ ḅe sịḅị ọgọnọ gbanam.

15Anịtẹso ọ̀ nwẹnị Josẹfụ boma tẹ ḅẹẹ,

Tamụnọ ḅe, oriḅe tẹ ị̀ aḍapụ

Ebira-amụ na, Ayịzịkị na tọrọkọ ḅụ mẹnjị ḅọ ḅe,

Tamụnọ ḅe tẹ ị̀ ḍumo mẹmgba ḅụ

etela kẹ ì ḍie ḅo mịmgba la ḅọ ḅe,

16Enjẹlị ḅe tẹ si-aị mamgba ḅụ ị̀ ḍụa-ḅọrọma ḅọ ḅe,

ḍọkọḍọkọ-awọmẹ ma bomaa!

anịsakị inima ḅụụ ḅụ ị̀ ẹrẹ na,

ị̀ aḍapụ Ebira-amụ na, Ayịzịkị na ẹrẹ, ḍumo-sime gbamaso!

Anịsakị yee ịn ḍụḅa ḅo inweni-ogbo sọ

tomikiri mẹ ḅẹ ogboku ḅụ.

17Josẹfụ ẹrị tẹso, mịnẹ ọ̀ ḍa ori ama-ḅara kẹ Iferemu sịḅị ọgọnọ gbana ye mẹ anị nwẹnị ọ̀ ḅụụ sii; tẹ ọ̀ nwẹnị ọ̀ ḍa ḅara kẹ Manasẹ sịḅị gbana ḅẹ gotẹ Iferemu sịḅị ḅụ anị sịn. 18Tẹ Josẹfụ nwẹnị ọ̀ ḍa ḅẹẹ, “Ọkọ-a, ị̀ ḍa, ḅieḅe anie tarị tụḅọ, ị́ ama-ḅara kẹ ọ̀ sịḅị ọgọnọ gbanaa.”

19Kụma ọ̀ ḍa ḍụkụ-a, tẹ nwẹnị ḅẹẹ, “À nimim, ì owiḅọtụḅọ, à nimim. Manasẹ sọ ḅo amịna tomi kụlọ sọ ḅa, anịsakị ori sọ gburo-gburo ḅa anịsọ ori iyimbere kalatụḅọ ḅe ḍụḅa ọ̀ nẹngị ḅa. Kalatụḅọ furo-ḅẹ-apụ ḅo opu asịẹ ogbo sọ ḅa.”

20 # Hib 11.21 Mie ḅụ anị ene mẹ ḅụ ori ịn bomam, tẹ ḅẹẹm, “Izirẹlị ọ́ kẹ boma sọma tẹ ye karị ḅa. Ịn ḅẹẹ ḅa, ‘Tamụnọ ọ̀ kẹ Iferemu mịẹ ḅara na Manasẹ mịẹ ḅara na kẹ ọ́ mịẹ.’ ” Mị-ḅara mie Jekọbụ Iferemu kẹ Manasẹ tọrọkọ sịẹma ḅara. 21Anịtẹso Izirẹlị nwẹnị Josẹfụ ḅẹẹ, “Ḍikii, à fịị ḅẹ-yearị, kụma Tamụnọ ị́ na sime ḅa, tẹ pịkị siin ị́ kẹ ị́ aḍapụ ama mẹ ḅo ḅa. 22Anie mẹ sikima, à kẹ ị́ owiapụ-amịnapụ ma pịrị ḅẹ nakara, à Sẹkẹmụ kẹ ị́ pịrịm aniemẹ tẹ arị ì okologie na, ị̀ iboli na kẹ Amọrayịtị apụ ma ḅara ḅụ ọkị ye mẹ.”

Currently Selected:

Suku-saakị 48: KBTP

Highlight

Copy