Suku-saakị 41
41
Josẹfụ Amadaḅọ Fero Aḍawọ Puum
1Bebe maa akụra ḅọrọ tẹso, Fero ḍawọm mịnẹ ori ịn kẹ Nayịlị nwẹn-sịn tọrụ mẹ akaka ḅụ sịẹsime wararị, 2Nayịlị tọrụ mẹ ḅio tim-timtẹ ḍụḅatẹ sọnọma ịyọrọ anambulo nwẹnị paka-ḅo, tẹ ịn nwẹnị osuka ma ḅio sime tẹ ye kọn fị. 3Anịtẹso ja mgbe-mgbe-mgbe sụatẹ nwọnị-nwọnịtẹ sọnọma ịyọrọ anambulo nwẹnị pịkị paka-ḅo Nayịlị tọrụ mẹ ḅio, tẹ nwẹnị Nayịlị tọrụ mẹ akaka ḅụ osi ịyọrọ anambulo ma akaka ḅụ sịẹsime. 4Tẹ mgbe-mgbe-mgbe sụatẹ nwọnị-nwọnịtẹ sọnọma ịyọrọ anambulo ma nwẹnị tim-timtẹ ḍụḅatẹ sọnọma ịyọrọ anambulo ma pẹị fama. Anịtẹso Fero nwẹnị naa-saakị. 5Ọ̀ nwẹnị pịkị mono tẹ maaịn karama sakị kẹ ḍawọ: Sụa gbịsị-gbịsịtẹ kpọọtẹ sọnọma mgbọlị-fịye gbọrụ mbịaka-sịn ḅụ sụa wararị. 6Anịtẹso nwọnị-nwọnịtẹ okiringa fẹrụ ofuro kpatụmatẹ sọnọma mgbọlị-fịye nwẹnị pịkị osi-aị ma pono sụa paka-ḅo, 7tẹ kpatụtẹ sọnọma mgbọlị-fịye ma nwẹnị sọnọma kpọọtẹ sụa gbịsị-gbịsị wararị mgbọlị-fịye ma sama-mẹnị. Fero nwẹnị naa-saakị tẹ ẹrị mịnẹ ḍawọ mie ọ̀ kọn ye. 8#Dan 2.2Mie ḅụ dede-ḅio ò ḅioḅẹngbọ ọ̀ ḅụụ-fụkamam, tẹ ọ̀ nwẹnị fịrịma Ijiputi ḅẹ majịkị-mịẹapụ mamgba na, anị ḅẹ ye-nimi apụ mamgba na sịn-ḅo, tẹ Fero ọ̀ kọn ḍawọ ḍuko ịn pịrịm, kụma gbọrụḅọ tẹ inetẹ anị fieye puu-finji Fero pịrị ḅọ ofori.
9Anịtẹso sịḅịda iru-sụaḅọ ḅe nwẹnị Fero ḅẹẹ, “Àrị ị̀ amịẹ-irima kẹ ḅiokoromam mịmgba. 10Fero ori afịrịmẹnjịapụ ḅụụ ịganị nyana tẹ yẹrị na, fịturu mịẹ sịḅịdaḅọ ḅe na kẹ ye-yọ ḍikiḍiki ọmụapụ ma sịḅịdaḅọ ḅe warị ikoli ḅio suu sakị, 11ori na, yẹrị na gbọrụ ḍin mẹ ḅụ ḍawọ kọnm, ọrụ amịna fieye, fieye nyana wararị aḍawọ. 12Hiburu ḅẹ gbọrụ asambịrịma owiḅọtụḅọ wamịnị na anịjụ simem, ye-yọ ḍikiḍiki ọmụapụ ma sịḅịdaḅọ ḅe fịrịmẹnjịḅọ; tẹ wa ḍawọ ma ḍuko ọ̀ pịrị tẹso, ọ̀ wamịna aḍawọ ma puu wa pịrịm, tẹ nwẹnị ọrụḅọ-ọrụḅọ kọn ḍawọ mẹ fieye puu-finji ḅụọ-ḅụọ pịrị. 13Anịsakị ọ̀ wẹrịtẹ puu wa pịrị ḅara mie anị pịkị paka ḅara; ini ị̀ pịkịma ị̀ kọrịnama kọrị kiri ḅụ koromam, tẹ ịn sịḅịda fịturu-mịẹḅọ ḅe kpọ-ḅaam.”
14Anịtẹso Fero fịrịma tẹ Josẹfụ sịnm tẹ ịn fọnya, fọnya ikoli-warị mẹ ḅio ọ̀ pakama-ḅom tẹ ori, ori mpọrị sẹịn fama tẹ ori akapa ḍima fama tẹso, ò mu Fero tọrọkọ sịẹsimem. 15Fero nwẹnị Josẹfụ ḅẹẹ, “À gbọrụ ḍawọ kọn tẹ, anịsakị gbọrụḅọ tẹ inetẹ anị fieye puu-finji ḅọ ofori; anịsakị ini anị ḍuko ị̀ pịrị tẹ arị í gbolomaye naa tẹ mịnẹ ị́ ḍawọ naa kụma ị́ inetẹ anị puu ḅa.”
16Josẹfụ nwẹnị Fero pakịrị, “Anị ị̀ ḅụụ ḅio ofori, Tamụnọ Fero na iḅi ḅarị pakịrị-ḅịḅị kẹ ọ̀ pịrị ḅa.”
17Anịtẹso Fero nwẹnị Josẹfụ ḅẹẹ, “À ḍawọm à Nayịlị tọrụ mẹ akaka ḅụ sịẹsime wararị, 18tẹ tim-timtẹ ḍụḅatẹ sọnọma ịyọrọ anambulo Nayịlị tọrụ mẹ ḅio paka-ḅo tẹ osuka ma ḅio sime tẹ ye kọn fịm. 19Anịtẹso ja mgbe-mgbe-mgbe sụatẹ nwọnị-nwọnịtẹ sọnọma ịyọrọ anambulo paka-ḅom. Ijiputi ama mẹmgba ḅụ jene-jene amụ wa gbala-gbala ọkọ sime aị ẹrị-a. 20Mgbe-mgbe-mgbe sụatẹ nwọnị-nwọnịtẹ ịyọrọ anambulo ma nwẹnị tarị paka-ḅo sọnọma tim-timtẹ ḍụḅa-ḍụḅatẹ ịyọrọ anambulo ma pẹị sin fama, 21kụma ini ịn pẹị fama tẹso, ye mẹ gbọrụḅọ-sọ inetẹ nimi ḅịa mịnẹ ini ịn pẹịm, kẹ gotẹ ọkọ ḅẹẹarị, sukuyọ-saakị ḅụ ịn nwọnị tẹ simearị mgbe-mgbe-mgbe ḅara mẹ mie ịn paa simearị ḅara. Anịtẹso à naa saakịm. 22À pịkị jen kẹ ḍawọm, tẹ gbọrụ mbịaka-sịn ḅụ so-pakarị sụa-gbịsị-gbịsịtẹ kpọọtẹ sọnọma mgbọlị-fịye ẹrịm. 23Anịtẹso samụnọtẹ, nwọnịtẹ, okiringa fẹrụ ofuro kpatụmatẹ sọnọma mgbọlị-fịye nwẹnị pịkị osi-aị ma pono paka-ḅo. 24Tẹ nwọnị-nwọnịtẹ aị ma nwẹnị sọnọma iḅi aị ma sama-mẹnị fama. Àrị anị ḍuko majịkị-mịẹapụ ma pịrịm, kụma ịna aḅụụ gbọrụḅọ tẹ inetẹ anị fieye ḍuko ị̀ pịrị ḅọ ofori.”
25Anịtẹso Josẹfụ nwẹnị Fero ḅẹẹ, “Fero kọn maa aḍawọ ma gberie fiem; Tamụnọ ọ̀ mịẹ ḅẹ-yearị ye mịẹfinji Fero pịrị tẹẹ. 26Sọnọma iḅi-fịtẹ ịyọrọ anambulo ma anie sọnọma akụra, anịsakị sọnọma iḅi-fịtẹ mgbọlị-fịye ma sọ pịkị sọnọma akụra; ḍawọ ma gberie. 27Nwọnịtẹ mgbe-mgbe-mgbe sọnọma anambulo ma tẹ ịn ḅọrọ tẹso, paka-ḅo aị ma anie sọnọma akụra; anịsakị firi famatẹ okiringa fẹrụ ofuro kpatụmatẹ sọnọma mbịaka ma sọ pịkị ịnụ sọnọma akụra. 28À ḍuko Fero pịrị ḅara anie anị sime-ḅara, Tamụnọ ọ̀ mịẹ ḅẹ-yearị ye kẹ Fero ḍie tẹ. 29Ijiputi ḅẹ ama mamgba ikelema-koro ḅụ fịaị gburo-gburoma ḅụọ ḅọrọma oku ofori ḅara kẹ sọnọma akụra ḅụ paka ḅin ḅa. 30Kụma arị sọnọma akụra ma ḅọrọ sakị, sọnọma akụra ḅụ ḅụkọ-ịnụ nwẹn-sịn ḅuru-ḅa paka ḅa tẹ Ijiputi ḅẹ ama mamgba ḅụ jua afịaị ma tomina ḅioḅọrọ ḅa; ịnụ mẹ ama mẹ gbaịn-koro tẹ ye sima ḅa. 31Anịsakị ḅin sime afịaị ma, ịnụ mẹ tẹ anị pono ḅo ye mẹ ẹrẹsị kịnị ḅarị ama mẹ ḅio anị nimi ḅịa, kẹ gotẹ ọkọ ḅẹẹarị, anị kpọma kịnị kururuma lama ḅa. 32Anịsakị Fero maa asakị kẹ gbọrụ ḍawọ mẹ kọn ye mẹ fiearị mịnẹ Tamụnọ paka ḅarịye mẹ tọn-pẹlẹ tẹ, anịsakị ala-a sakị ḅụ anị paka ḅa. 33Anịẹrẹsị yee Fero mịọkụ ye-nimi tẹ, ye ḅio sime ye lekiri, tẹ tọnwa ẹkwẹn kọn-a ḅara kẹ amịna tọn ye nimi tẹ mịẹ ḅarị ḅọ tọn tẹ kẹ Ijiputi ama mẹ ḍikiḍikii. 34Yee Fero saakị tọrụ kẹ ama mẹ ḅio ye ḍiki ikelema ḅarị apụ tọn mịọkụ, tẹ fịaị ḅin ḅarị sọnọma akụra ma ḅụ Ijiputi ama mẹ ḅụ paka-ḅo ḅarị afịaị ma kẹ sọnọa akiri ḍiya ḅẹ gbọrụ kiri ọkị. 35Yee ịn mịna iḅi akụra ma tẹ ḅoarị aị ma ḅẹ afịaị mamgba kobiri, tẹ Fero kụrọ ḅụ, fị ḅarị afịaị kobiri, kobiri koroma tẹ yee ini arị koko kpaịnma opu ama ma ḅụ. 36Anị fịye mẹ ḅụụ-wẹrịma fịye sọ ama mẹ pịrị ḅa ịnụ sọnọma akụra ma tẹ ḅo Ijiputi ama mẹ la ḅarịye mẹ ḅụ mịẹtẹ ịnụ mẹ ḅio ama mẹ fịị fa fama ḅịa ḅara.”
In Josẹfụ Kẹ Ijiputi Ḅẹ Gọvịna Mịẹm
37Mị tọn wẹrị ye mẹ Fero na ori afịrịmẹnjịapụ mamgba na ḅụụ iḅi lamam. 38Tẹ Fero nwẹnị ori afịrịmẹnjịapụ ḅẹẹ, “Wa inetẹ ḅị tomḅọ ḅe pembema tomḅọ tẹ Tamụnọ Tẹmẹ ḅụụ ḅụ emi ḅọ ḍọkị-ẹrị ḅẹ?” 39Mie ḅụ Fero nwẹnị Josẹfụ ḅẹẹ, “Tamụnọ mie mẹmgba kẹ í ḍie tẹ nwẹn ḅẹẹ sakị í sikima kụma jụmọ tẹ ye-nimi tẹ, ye ḅio sime ye lekiri, tẹ tọnwa ẹkwẹn kọn-a ḅara kẹ amịna tọn ye nimi tẹ mịẹ ḅẹ jụmọ ofori. 40#Fịr 7.10Ị́ ḅẹrẹtọn ị̀ warị pịrị ḅa, anịsakị ị̀ atomi mamgba ịna aḅụụ kẹ ị́ tọn ịn pịrị ọrụ ḅụ wẹrị ḅa, emine mẹ gbolomaye ngẹrị ḅụ mie à ḍụḅa ị́ nẹngị ḅarị ye.” 41Tẹ Fero nwẹnị Josẹfụ ḅẹẹ, “Ḍikii arị Ị́ kẹ ḅẹrẹtọnḅọ mịẹ Ijiputi ḅẹ ama mamgba pịrị tẹ.” 42#Dan 5.29Anịtẹso Fero nwẹnị ọ̀ ḅara-tụngbalị ḅụ amadaḅọ elekima simearị gulu sịn tẹ kẹ Josẹfụ ḅara-tụngbalị sụa, tẹ nwẹnị iḅi lọkọ-ḅịtẹ kẹ gbin wararị opu akapa kẹ ò ḅirima, tẹ golu-golu pọkọsụaye kẹ ọ̀ pọkọ sụa; 43tẹ ori ọ̀ mịẹtẹ ori amadaḅọ ḅe maaịn karama kirimẹnjị-arụ ḅụkụlọ tẹ dọkụm; tẹ kịnị ọ̀ tọrọkọ sime tẹ olokum, “Ọmịnị ọmịna aḅụọ-kụkụ kẹ kparakịị.” Mị-ḅara mie ori ọ̀ kẹ ḅẹrẹtọnḅọ mịẹ Ijiputi ḅẹ ama mamgba pịrị ḅara. 44Miemẹ sikima, Fero pịkị Josẹfụ ḅẹẹm, “Yẹrị anie Fero, anịsakị ị́yẹrị minini-a sime-ogbo, Ijiputi ḅẹ ama mamgba ḅụ ḅara saakị, anịanịa ḅụọ saakị ḅarị kpọkpọ gbọrụ tomḅọ sọ ofori.” 45Tẹ Fero nwẹnị ẹrẹ kẹ Josẹfụ sịn Zafẹnatị-Paniya, tẹ ọ̀ nwẹnị Pọtifẹra, Oni anie pịkị Hẹlịyopolisi opu ama mẹ ḅẹ agbamịẹḅọ ẹrẹḅọtụḅọ Asẹnatị kẹ ọ̀ pịrị sime. Mie ḅụ Josẹfụ mẹnjị paka mu Ijiputi ḅẹ ama mamgba la famam.
46Josẹfụ sịḅị kụra suei ḅọrọ tẹso, ọ̀ Fero, Ijiputi ḅẹ amadaḅọ fịrị sọm, tẹ Josẹfụ Fero tọrọkọ sime tẹ mẹnjị-mẹnjị paka mu Ijiputi ḅẹ ama mamgba la-la ikelema-korom. 47Fịaị paka sọnọma akụra ma ḅụ, kiri mẹ tọnwa ḅara kẹ fịaị pakama-ḅo lamam, 48tẹ fịaị ma paka ḅin sakị, sọnọma akụra ma ḅẹ afịaị mamgba ori arị kobirim Ijiputi ḅẹ ama ḅio, tẹ opu ama ma ḅio fịaị koko, koko wẹrịm; opu ama ma goyegoye ikelema-koro aḍụọ ma ḅio paka-ḅo afịaị ma ọ̀ kẹ opu ama mẹ ḅio koko wẹrịm. 49Josẹfụ ḍụḅa ḅụratẹ ḅara kẹ fịaị kokom, mgbọlụ tọrụ akaka ḅụ onwi sara ḅin ḅara ḅin nwenii ori anị tọn tẹ anị ḍụḅa la ḅara nimi dasịẹmam, kẹ gotẹ ọkọ ḅẹẹarị, ịn ḅarị inetẹ anị tọn-a.
50Tẹrẹmẹ ịnụ kụra mẹ ḅo la, Josẹfụ maa owiapụ-awọmẹ nyanam, inima tẹ Asẹnatị, Ọnị ḅẹ agbamịẹḅọ Pọtifẹra ẹrẹḅọtụḅọ ma iyi ọ̀ pịrị apụ ma. 51Josẹfụ ẹrẹ kẹ tarị tụḅọ ḅe sịnm Manasẹ#41.51 Manasẹ fiearị ye, Mịẹtẹ Anị Kẹ Ḅioḅọrọma tẹ ḅẹẹm, “Tamụnọ ị̀ mịẹtẹ arị ị̀ atọrụsiẹrị mamgba na, ị̀ ḍa warị mẹmgba na kẹ ḅioḅọrọma tẹẹ.” 52Ọ̀ kẹ maaịn karama ḅọ ḅe sịn ẹrẹ Iferemu#41.52 Iferemu fiearị ye, Awọ Nyana tẹ ḅẹẹm, “Tamụnọ ị̀ mịẹtẹ àrị awọ nyana tẹ ị̀ ḅụụ-fụka ama mẹ ḅio.”
53Tọnwa afịaị paka sọnọma akụra ma tẹ Ijiputi ama mẹ tọrụ-ḅẹlẹma sakị mẹ ḅo kunomam; 54#Fịr 7.11tẹ ịnụ sọnọma akụra suku-saakị sọ-ḅom, Josẹfụ wẹrịtẹ ḅẹẹ ḅara. Ama mamgba ḅụ fịye kụrọarị ịnụ emi, kụma Ijiputi ḅẹ ama mamgba ḅụ fịye emi. 55#Jọn 2.5Fịye kụrọ mẹ ḅo Ijiputi ḅẹ ama mamgba la tẹso, tomi ma fịye gotẹ owu Fero pịrịm; tẹ Fero nwẹnị Ijiputi-ḅẹ-apụ mamgba ḅẹẹ, “Ó Josẹfụ ḍọkụma-muu, ò ḍuko ọ́ pịrị ye, pịrị ye, ọ́ mịẹ.” 56Mie ḅụ ịnụ mẹ wasama mu ama mamgba gbaịn-koro tẹso, Josẹfụ nwẹnị fịaị koko awarị mamgba finji, tẹ fịaị kẹ Ijiputi-ḅẹ-apụ ma dẹrị, gbala fịye Ijiputi ama mẹ ḅio kụrọ lama tẹ ẹrẹsị. 57Anie sikima, tomikiri mẹmgba Josẹfụ ḅara fịye fẹẹ ḅẹ Ijiputi ḅom, gbala tomikiri mẹmgba ikelema-koro ḅụ ịnụ mẹ kụrọ ḅakam ẹrẹsị.
Currently Selected:
Suku-saakị 41: KBTP
Highlight
Share
Copy
Want to have your highlights saved across all your devices? Sign up or sign in
(C) The Bible Society of Nigeria
