Suku-saakị 24
24
Ịn Ẹrẹḅọ Ḍọkị Ayịzịkị Pịrị Simem
1Mịọkụ Ebira-amụ omongi tẹ tọnwa akụra ọ̀ sịḅị ḅọrọ tẹ; anịsakị KỊNỊNYANAḄỌ ḅe ye mamgba ḅụ Ebira-amụ boma tẹ. 2Ebira-amụ nwẹnị ọ̀ fịrịmẹnjịḅọ, ọ̀ warị mẹmgba ḅụ omongiḅọ tẹịn ḅọ, tẹ ọ̀ nyana aị mẹmgba ḍikiḍikiarị ḅio-koruḅọ ḅẹẹ, “Ị́ ḅara kẹ ị̀ aḅụọ-ẹtẹnẹ suku-ḅio suu,#24.2 Mị mịẹye mẹ fieye, Ọḅọkụ fị. 3anịsakị arị ị́ mịẹtẹ ị́ KỊNỊNYANAḄỌ ḅe, So na Kiri mẹ na tẹmẹ Tamụnọ ḅe ḅụụ ḅụ ye karị ḅa, mịnẹ, í Kenanị ḅẹ eremịna-awọmẹ inima tẹ arị ogbo-ḅio angarị apụ ma ḅụ ẹrẹḅọ sime ì owiḅọtụḅọ pịrị ḅịa, 4kụma í so ì opu sịẹ ḅụ à paka-furo mu ḅa tẹ ẹrẹḅọ sime ì owiḅọtụḅọ Ayịzịkị pịrị ḅa.”
5Fịrịmẹnjịḅọ ḅe nwẹnị ò gbela, “Ẹbịsịya ẹrẹḅọ ma ì ḍuka mị ama mẹ ḅo ḍụkụ ḅịa, anị ọkụma arị í owiḅọtụḅọ ḅe kẹ pịkị ama mẹ tẹ í simetẹ ḅo ama mẹ mu ḅẹ?”
6Ebira-amụ nwẹnị ọ̀ ḅẹẹ, “Ẹrị mịnẹ ị́ ì owiḅọtụḅọ ḅe kẹ pịkị anịanga mu-a ḅara kẹ anị mịẹ. 7KỊNỊNYANAḄỌ ḅe, So-ḅio ḅẹ Tamụnọ ḅe tẹ ị̀ ḍa ḅe warị na, àrị iyi ama mẹ na ḅio ị̀ ọkị ḅọ ḅe, oriḅe tẹ ẹkwẹn ị̀ pịrịm, ‘Mị ama mẹ à kẹ í furo-ḅẹ-apụ pịrị ḅa’ nwẹn ḅẹẹ ḅara kẹ ye karị ị̀ pịrị ḅọ ḅe, ori ori enjẹlị kẹ tarị ị́ tọrọkọ fịrịma ḅa, tẹ ị́ anịjụ gbọrụ ẹrẹḅọ sime ì owiḅọtụḅọ ḅe pịrị ḅa. 8Kụma ẹrẹḅọ ma í ḍuka ḅo ḅẹ ḅii-a ḅẹḅẹ, anịrẹ mie ị̀ karịye mẹ ḅarị ị́ ọlọ-a; ì owiḅọtụḅọ ḅe kịngẹ kụma ị́ ọ̀ kẹ pịkị anịjụ mu nyana-a.” 9Mie ḅụ fịrịmẹnjịḅọ ḅe ọ̀ ḅara kẹ ọ̀ sịḅịdaḅọ Ebira-amụ ḅụọ-ẹtẹnẹ suku-ḅio suu tẹ mị ḅẹrẹ mẹ gbolomaye kẹ ye karịm.
10Anịtẹso fịrịmẹnjịḅọ ḅe Ebira-amụ ike-sụa-anama ḅụ oyi ọkị, tẹ ọ̀ sịḅịdaḅọ ḅara ḅụ ja sẹlẹ-ọkị na-iḅi aḍiepịrị-aị mamgba kẹ sụa ọkịm. Ọ̀ nwẹnị saakị tẹ so Mẹsopotemịya, Nahọ opu ama mẹ mu. 11Ḅoḅiri-so ereme paka-mu minji ḍuu-ḍuu sakị la tẹso, opu ama mẹ ḅio paka-ḅo anga ḅụ, ọ̀ nwẹnị ike-sụa-anama ma mịẹtẹ ịn suḅe mẹ suku kparakị. 12Ọ̀ nwẹnị tẹkẹ, “Yei KỊNỊNYANAḄỌ, ị̀ sịḅịdaḅọ Ebira-amụ Tamụnọ, mịmgba mịẹ ị̀ mịẹye mẹ iḅi ị̀ pịrị arị ị́ tẹkẹm, tẹ í jike-a ḅẹlẹma kẹ ị̀ sịḅịdaḅọ Ebira-amụ ḍie. 13Ḍikii, ngụngụḅa minji mẹ suku à sịẹsime wararị, anịsakị opu ama mẹ ḅẹ owiapụ ma iyi eremịna-awọmẹ ma minji ḍuu ḅẹ ḅoarị. 14Yee ẹrẹḅọtụḅọ ma tẹ à ḅẹẹ ḅa, ‘Àrị ị́ tẹkẹm, í jongo mẹ da-koromaa, mịẹtẹ à minji ḅuu ḅarị ḅara’ kẹ ḅẹẹ tẹ ‘Ḅuu, anịsakị à minji kẹ ị́ ike-sụa-anama ma pịrị ḅuu ḅa’ ḅẹẹ ẹrẹḅọtụḅọ ma — yee arị ẹrẹḅọ ma tẹ ị́ tọn ị́ fịrịmẹnjịḅọ Ayịzịkị pịrị ẹrẹḅọ ma sọ. Miemẹ ḅụ à nimi ḅa mịnẹ ị́ í jike-a ḅẹlẹma mẹ kẹ ị̀ sịḅịdaḅọ ḅe ḍie tẹ.”
15Tẹrẹmẹ ọ̀ tẹkẹ fama, Ribeka árị apana ọgọnọ á minji sụa jongo na tolu-paka tẹẹ. Árị anie Bẹtụwẹlị ẹrẹḅọtụḅọ, ori ḅe tẹ Ebira-amụ iyimbere Nahọ na ọ̀ ta Milika iyi ḅọ ḅe. 16Ḍiki-tọrụ ḅụ árị anie iḅi-fịtẹ ḅụụ-gboloa iriawọ-tụḅọ. Á nwẹnị ideri ngụngụḅa mẹ mu, tẹ á jongo mẹ ḍuu ḅinma tẹ iwo ḅo. 17Anịtẹso fịrịmẹnjịḅọ ḅe nwẹnị arị na bịama ḅẹ tẹ mangị mu, tẹ ḅẹẹ, “Àrị ị́ tẹkẹm í jongo mẹ ḅio minji kalịye kẹ ị̀ pịrị à ḅuu.”
18Á nwẹnị ḅẹẹ, “Ị̀ nyanaḅọ, ḅuu,” tẹ á nwẹnị fọnya arị apana ọgọnọ á jongo mẹ iderima-ḅo tẹ ḅara kẹ ọlọ tẹ kẹ ọ̀ pịrị ḅuum. 19Á minji mẹ kẹ ọ̀ pịrị ḅuu fama tẹso, á nwẹnị ḅẹẹ, “À ḍuu ị́ ike-sụa-anama ma sọ pịrị ḅuu nwenii ịna furo ḅin ḅa.” 20Mie ḅụ á nwẹnị jongo mẹ ḅio sime minji mẹ kẹ minji sụa nama pịrị ḅuu ye mẹ ḅio sara, tẹ pịkị mangị mu suḅe mẹ ḅio ḍuu, ḍuu ḅo ori ike-sụa-anama mamgba pịrị ḅuu famam. 21Owiḅọ ḅe nwẹnị yaụ-sime tẹ nimi ḅẹ ḅii KỊNỊNYANAḄỌ ḅe ori igoni mẹ mịẹtẹ anị lọkọlọkọ tẹ ḅoto.
22Ike-sụa-anama ma minji mẹ ḅuu furo ḅinma fama tẹso, owiḅọ ḅe nwẹnị golu iku-tọn-ye mẹ ḅẹ gbọrụ ye kẹ maa anga ḍiya ḅẹ gbọrụ pakịrị kẹ á nini sụa, pịkị golu iku-tọn-ye mẹ ḅẹ golu oyia akpo kẹ mịẹ maa ḅara sụa aị kẹ arị maa ḅara-kọngọ sụa, 23tẹ nwẹnị ḅẹẹ, “Sisi, í iyi ḍaḅọ ḍuko ị̀ pịrị. Ị́ ḍa warị ḅụ wa sime ḅẹ ḅio emi?”
24Á nwẹnị ọ̀ pakịrị, “Yẹrị anie Bẹtụwẹlị, Milika iyi Nahọ pịrị owiḅọtụḅọ ḅe ẹrẹḅọtụḅọ.” 25Á nwẹnị pịkị ḅẹẹ, “Asịra na, nama fị-fị ja afịaị na sọ ḅin wararị, sime ḅẹ ḅio sọ emi.”
26Owiḅọ ḅe nwẹnị sịḅị-tuu, tẹ sunsin KỊNỊNYANAḄỌ ḅe pịrị, 27tẹ ḅẹẹ, “Boma sime KỊNỊNYANAḄỌ ḅe pịrịị, anie ị̀ sịḅịdaḅọ Ebira-amụ tẹkẹarị Tamụnọ ḅe tẹ amịna jike-a ḅẹlẹma ḅụ ḅioḅẹngbọ-kẹ-sịrẹrẹ-niḅi ḅara kẹ ò mininiye mịẹ ị̀ sịḅịdaḅọ pịrị tẹ ḅọ ḅe. Yẹrị kụma KỊNỊNYANAḄỌ ḅe etela mẹ kẹ ì ḍie ḅo ị̀ sịḅịdaḅọ ḅe amịnapụ warị la tẹ.”
28Anịtẹso iriawọ-tụḅọ ma nwẹnị mangị ma-mu mịna aị ma ḍuko á iyingi warị ḅẹ apụ pịrị. 29Ribeka Lebanị nwẹn sin gbọrụ owiḅọ mịnaḅọ nyanam tẹ Lebanị nwẹnị mangị paka ngụngụḅa mẹ suku owiḅọ ḅe dama-mu. 30Ori ori mbịra oju nini-sụaye mẹ na ḅara-kọngọ ḅirima-aị ma na ẹrịm, tẹ ori mbịra Ribeka ẹkwẹn-aḅịḅị ma naam, “Mị-ḅara mie owiḅọ ḅe ẹkwẹn ị̀ pịrị ḅara” naa tẹso, ọ̀ mẹnjị owiḅọ ḅe dama-mum tẹ ẹrịm ori ike-sụa-anama ma akaka sịẹsime wararị ngụngụḅa mẹ suku. 31Tẹ nwẹnị ḅẹẹ, “Yei KỊNỊNYANAḄỌ ḅe boma tẹ ḅọ, ḅo warị sọọ. Í tiegotẹ etela-ogbo sịẹsime ḅẹ? Kẹ gotẹ ọkọ ḅẹẹarị, à warị mẹ tẹlẹma tẹ, tẹ pịkị sime anga tẹlẹma ike-sụa-anama pịrị tẹ.”
32Mie ḅụ owiḅọ ḅe ḅo warị mẹ sọm; tẹ Lebanị nwẹnị ike-sụa-anama ma ọgọnọ sime aị ma sin koroma tẹ kẹ ike-sụa-anama ma pịrị fị gotẹ osuka na, nama fị-fị ja afịaị na kẹ ọ̀ pịrịm, pịkị ori na, owiapụ ma tẹ ori na emi apụ ma na kẹ ịna aḅụọ-suku sịkịrị ḅẹ minji na kẹ ọ̀ pịrịm. 33Anịtẹso ịn nwẹnị ọ̀ fị ḅẹ fịye tẹlẹma ọ̀ tọrọkọ gbana; kụma ọ̀ nwẹnị ḅẹẹ, “À ye fị ḅịa nwenii arị ì oku mẹ ḍuko ḅa.”
Lebanị nwẹnị ḅẹẹ, “Ḍuko mẹnjịmaa.”
34Mie ḅụ fịrịmẹnjịḅọ ḅẹ nwẹnị ḅẹẹ, “Yẹrị anie Ebira-amụ fịrịmẹnjịḅọ.” 35KỊNỊNYANAḄỌ ḅe gburo-gburoma ị̀ sịḅịdaḅọ ḅe boma tẹ, tẹ ò ḅo opuḅọ sọ tẹ; ori anana ogbo-ogbo na, oḅori amẹẹ na, opu anama ogbo-ogbo na, seleḅa na, golu na, owiapụ-afịrịmẹnjịapụ na eremịna-afịrịmẹnjịapụ, ike-sụa-anama na, yedogi-anama kẹ ọ̀ pịrị ḅinma tẹ. 36Anịsakị Sera, ị̀ sịḅịdaḅọ ḅe ta ma arị omongi sakị ḅụ gbọrụ owiḅọtụḅọ iyi ì sịḅịdaḅọ ḅe pịrịm; tẹ ori mie ori ọ̀ nyana aị mamgba kẹ pịrị ḅọ. 37Ị̀ sịḅịdaḅọ ị̀ mịẹtẹ à ye karịm, tẹ ḅẹẹm, “Ị́ Kenanị ḅẹ eremịna-awọmẹ inima tẹ arị ogbo-ḅio angarị apụ ma ḅụ ẹrẹḅọ sime ì owiḅọtụḅọ pịrị ḅịa, 38kụma í so ị̀ ḍa warị na, à paka-furo na mu ḅa, tẹ ẹrẹḅọ sime ị̀ owiḅọtụḅọ pịrị ḅa.”
39À nwẹnị ị̀ sịḅịdaḅọ ḅe gbela, “Ẹbịsịya ẹrẹḅọ ma ì ḍuka-ḅo ḍụkụ-a kụma?”
40Ọ̀ nwẹnị ị̀ pakịrị, “KỊNỊNYANAḄỌ ḅe, oriḅe tẹ ọ̀ tọrọkọ ḅụ à mẹnjị ḅọ ḅe ori enjẹlị kẹ ị́ ḅụụ sụa fịrịma tẹ ị́ etela mịẹ lọkọlọkọma ḅa; tẹ ị́ ị̀ paka-furo na, ị̀ ḍa warị na ḅụ gbọrụ ẹrẹḅọ sime ḅo ì owiḅọtụḅọ pịrị ḅa. 41Anịrẹ ị̀ karị ye mẹ ḅarị í ọlọ ḅịa í ḅo ị̀ paka-furo la sakị; tẹ ini á kẹ ị́ pịrị ḅịa ḅẹḅẹ, ị́ karị ye mẹ ḅụ í so tẹẹ.”
42“Mịmgba à ḅo ngụngụḅa mẹ suku lam, tẹ tẹkẹm, ‘Yei KỊNỊNYANAḄỌ, ị̀ sịḅịdaḅọ Ebira-amụ Tamụnọ, ị́yẹrị etela mẹ tẹ à mẹnjịarị ye mẹ mịẹ lokolokomam ḅẹḅẹ mịọkụ, 43Ḍikii, àrị ngụngụḅa minji mẹ suku sịẹsime wararị. Yee iriawọ-tụḅọ ma tẹ paka-ḅo minji ḍuu ḅarị ḅọ árịma tẹ à ḅẹẹ ḅa, “Àrị ị́ tẹkẹm í jongo ḅio minji kalịye kẹ ị̀ pịrị à ḅuu,” 44tẹ ị̀ ḅẹẹ ḅarị ḅọ, “Ḅuu, anịsakị à pịkị ḍuu ị́ ike-sụa-anama sọ pịrị ḅuu ḅarị ḅọ ma,” yee árị anịḅọ ma tẹ KỊNỊNYANAḄỌ ḅe tọn ị̀ sịḅịdaḅọ ḅe owiḅọtụḅọ ḅe pịrị ḅọ ma sọ.’
45“Tẹrẹmẹ àrị ì ḅioḅẹngbọ ḅụ kọn-arị tẹkẹ mẹ kọn pẹlẹ, Ribeka arị apana ọgọnọ á minji ḍuu jongo na paka-ḅo tẹ, tẹ ideri-mu ngụngụḅa mẹ ḅio minji mẹ ḍuum. Tẹ à nwẹnị á ḅẹẹ, ‘Àrị ị́ tẹkẹm, minji kẹ ị̀ pịrị à ḅuu.’ 46Á nwẹnị fọnya árị apana ọgọnọ á jongo mẹ da-koroma tẹ ḅẹẹ, ‘Ḅuu, anịsakị à pịkị ḍuu í ike-sụa-anama ma sọ pịrị ḅuu ḅa.’ À nwẹnị ḅuu, á nwẹnị pịkị ị̀ ike-sụa-anama sọ pịrị ḅu. 47Anịtẹso à nwẹnị á gbela, ‘Ị́yẹrị tụḅọ ẹrẹḅọtụḅọ?’ Á nwẹnị pakịrị, ‘Yẹrị Bẹtụwẹlị, Milika iyi Nahọ pịrị owiḅọtụḅọ ḅe ẹrẹḅọtụḅọ.’ Mie ḅụ à gulu mẹ kẹ á nini sụa, tẹ pịkị ḅara ḅirima aị ma kẹ árị aḅara kọngọ sụam. 48Anịtẹso à nwẹnị ị̀ sịḅị-tuu, tẹ sunsin KỊNỊNYANAḄỌ ḅe pịrị, tẹ KỊNỊNYANAḄỌ, ị̀ sịḅịdaḅọ Ebira-amụ Tamụnọ ḅe bomam, ori ḅe tẹ ị̀ sịḅịdaḅọ ḅe paka-furo ḅụ ẹrẹḅọtụḅọ sime ị̀ sịḅịdaḅọ ḅe owiḅọtụḅọ pịrị gotẹ karakara etela kẹ ì ḍie ḅọ ḅe. 49Mịọkụ tẹrẹmẹ, ọ́ nwẹnị ọ̀ kẹ ye-sịn ḅara na, karakara ḅara na kẹ ị̀ sịḅịdaḅọ ḅe na mịẹ ḅarị ḅẹḅẹ, ó ḍuko ị̀ pịrịị, pịkị ọkọ-a sọ, ó ḍuko ị̀ pịrịị, mịẹtẹ à tọrụ pịkị ama-ḅara, anịanịa ere-ḅara da ḅẹ ḅara.”
50Anịtẹso Lebanị na, Bẹtụwẹlị na nwẹnị pakịrị, “Mị mịẹye mẹ KỊNỊNYANAḄỌ ḅe ḅara ḅụ ḅom; wa inetẹ siye, anịanịa iḅiye ẹkwẹn ị́ pịrị ḅịa. 51Ḍikii, anie Ribeka ị́ tọrọkọ; árị ọkịị, tẹ árị na soo, tẹ yee á KỊNỊNYANAḄỌ ḅe ḍuko tẹ ḅara ḅụ ị́ sịḅịdaḅọ ḅe owiḅọtụḅọ ḅe sime-ẹrẹḅọ sọ.”
52Ebira-amụ fịrịmẹnjịḅọ ịna ẹkwẹn-aḅịḅị ma naa tẹso, ọ̀ nwẹnị KỊNỊNYANAḄỌ ḅe Tọrọkọ ọ̀ ḅụụ kẹ kiri pịrị tẹ sịḅị-tuu. 53Tẹ fịrịmẹnjịḅọ ḅe nwẹnị seleḅa na golu na kẹ mịẹ ḅiriaị na, ḅịtẹ na pakama-ḅo tẹ arị kẹ Ribeka pịrị; ọ̀ pịkị yela ḅiriaị kẹ arị iyimbere na, á iyingi na sọ pịrịm. 54Tẹ ori na, owiapụ ma tẹ ori na sime apụ ma na fị-na-ḅuu-nam, tẹ anịjụ sime ene-ḅaam. Dede-ḅio ịn mono saakị tẹso, ọ̀ nwẹnị ḅẹẹ, “Ị̀ kẹ pịkị ị̀ sịḅịdaḅọ fịrịmaa.”
55Kụma arị iyimbere na, á iyingi na nwẹnị ḅẹẹ, “Yee tụḅọ ma paa wamịnị na kẹlẹ sime, iderima tẹịn sakị oyi aḍin pembe ye sime, anị sakị mẹ ḅọrọ sakị arị inetẹ so ḅa.”
56Kụma ọ̀ nwẹnị ịn ḅẹẹ, “KỊNỊNYANAḄỌ ḅe ị̀ mẹnjị mẹ mịẹ kpaịnmatẹ nwẹn ḅẹẹ sakị, ọ́ ḅarị ị̀ ọlọ wẹrịma ọ́ wẹrịso à so, mịẹtẹ arị ị̀ sịḅịdaḅọ ḍọkụma-mu ḅẹ ḅara.”
57Ịn nwẹnị ḅẹẹ, “Wa tụḅọ ma sịn tẹ á gbela ḅa.” 58Ịn nwẹnị Ribeka sịn ḅo, tẹ á gbela,
“Ị́ ḅị tomḅọ ḅe na so ḅẹ?”
Á nwẹnị pakịrị, “Àrị ori na so ḅa.”
59Mie ḅụ ini ịna ịyịmbara Ribeka na, á ḍikiḍiki sime ẹrẹḅọtụḅọ na, Ebira-amụ fịrịmẹnjịḅọ na ori na ḅo owiapụ na fịrịma pịkị tẹ in som. 60Ịn nwẹnị Ribeka boma tẹ á ḅẹẹ,
“Wamịna ịyịmbara, kịnị ẹndẹ-ẹndẹ, na kịnị puku-puku na iyingiḅọ sọọ!
Anịsakị yee í furo-ḅẹ-apụ
inima tẹ ịn ḍiki-ḅioḅuarị apụ ma ama mẹ nyana ọkị!”
61Anịtẹso Ribeka na, á fịrịmẹnjị-eremịna-awọmẹ na saakị tẹ ike-sụa-anama ma ọgọnọ dọkụma owiḅọ ḅe ḍuka-mum; mị-ḅara mie fịrịmẹnjịḅọ ḅe Ribeka ọkị so ḅara.
62Mị sakị mẹ ḅụ, Ayịzịkị Biya-lahayi-royi suḅe mẹ wẹrịso tẹ mu Kenanị suku-jụ ḅụ anga tẹẹ. 63Gbọrụ ḅoḅiri-so ḅụ, Ayịzịkị ye kẹ ḅiokoroma ḅẹ tẹ piri etela ḅụ ḅụọ-sụn-arị ogbo, ọ̀ tọrụ saakị tẹ ḍiki kụma, tomi ike-sụa-anama ọgọnọ ḅoarị. 64Ribeka sọ nwẹnị á tọrụ saakị ḍiki, tẹ Ayịzịkị ẹrị. Á nwẹnị ike-sụa-nama ḅe ọgọnọ koro kiri-ḅio sịẹ, 65tẹ nwẹnị Ebira-amụ fịrịmẹnjịḅọ ḅe gbela, “Tọrọkọ-jụ piri etela mẹ ḅụ mẹnjịma wa dama-ḅoarị ḅọ ḅe tụḅọ?”
Fịrịmẹnjịḅọ ḅe nwẹnị pakịrị, “Anie ị̀ sịḅịdaḅọ Ayịzịkị ḅee.” Anie ḅụ á nwẹnị á tọrụ-gbaịn-ḅịtẹ mẹ kẹ á tọrụ gbaịn. 66Tẹ fịrịmẹnjịḅọ ḅe ọ̀ mịẹ tẹ aị mamgba ḍuko Ayịzịkị pịrị famam.
67Anịtẹso Ayịzịkị Ribeka ọkị-ḅo ò iyingi Sera anga sime akpụrụ-warị mẹ ḅio suum, tẹ Ribeka ọkị tẹ á ḅo ọ̀ ta sọm; tẹ ori á ḅelemam. Mị-ḅara mie Ayịzịkị dedema nyana ḅara ò iyingi fịị tẹso.
Currently Selected:
Suku-saakị 24: KBTP
Highlight
Share
Copy
Want to have your highlights saved across all your devices? Sign up or sign in
(C) The Bible Society of Nigeria
