Suku-saakị 15

Tamụnọ Ebiramụ Na Jen Ọḅọkụ Fịm

1Mịna aị ma ḅọrọ tẹso, KỊNỊNYANAḄỌ ḅe nwẹnị ịkịan ḅụ ẹkwẹn Ebiramụ pịrị, “Ḅalafa ma, Ebiramụ. Yẹrị anie ị́ ekpeke tẹ ọhọm ḅio ị́ ḍụa ḅarị ḅọ. À pịkị opu gbẹẹ-ye kẹ ị́ pịrị ḅa.”

2Kụma Ebiramụ nwẹnị ḅẹẹ, “yei KỊNỊNYANA-TAMỤNỌ, í tiye kẹ ị̀ pịrị ḅẹ, kẹ gotẹ ọkọ ḅẹẹarị, amụ à paa tụḅọ nyana-a? Ì ḍuu fị ḅarị ḅọ anie ḅị Damasịkọsị ḅẹ Ẹlịyeza ḅe” 3Ebiramụ nwẹnị pịkị ḅẹẹ, “Amụ ị́ gbọrụ tụḅọ sọ kẹ ị̀ pịrị-a, anịẹrẹsị ị̀ warị ḅio iyi wararị omoniḅọ anie ì ḍuu fị ḅarị ḅọ.”

4KỊNỊNYANAḄỌ ḅẹ nwẹnị pịkị ẹkwẹn Ebiramụ pịrị, “Ḅị omoniḅọ Ẹlịyeza ḅe í ḍuu fị ḅịa; í soku-ḅẹ owiḅọtụḅọ mie í ḍuu fị ḅarị ḅọ.” 5#Rom 4.18; Hib 11.12Tẹ ọ̀ nwẹnị ọ̀ pakama etela-ogbo ḅo tẹ ḅẹẹ, “Tọrụ saakị so ḍiki tẹ lolia ma kịẹn, í inetẹ arị kịẹn ḅarị ḅẹḅẹ.” Anịtẹso ọ̀ nwẹnị ọ̀ ḅẹẹ, “Mị-ḅara mie í furo-ḅẹ-apụ la ḅarị ḅara.” 6#Rom 4.3; Gal 3.6; Jem 2.23Tẹ ọ̀ nwẹnị KỊNỊNYANAḄỌ ḅe minini tẹ ori anị kẹ karakara kịẹn ọ̀ pịrịm.

7Anịtẹso ọ̀ nwẹnị ọ̀ ḅẹẹ, “Yẹrị anie KỊNỊNYANAḄỌ ḅe tẹ Babịlonịya ḅẹ opu ama Họ ḅụ ị́ pakama-ḅo ḅọ, mị ama mẹ kẹ ị́ pịrị nyana ḅẹ ẹrẹsị.”

8Kụma ọ̀ nwẹnị gbela, “yei KỊNỊNYANA-TAMỤNỌ, ndẹẹ à nimi ḅarị ḅara mịnẹ àrị anị nyana ḅẹ?”

9Ori nwẹnị ọ̀ ḅẹẹ, “Tẹra akụra sịḅị ḅụ ḅọrọ tẹ amụ iyi-a gbọrụ asambịrịma nambulo na, tẹra akụra sịḅị ḅụ ḅọrọ tẹ gbọrụ ịyọrọ oḅori na, tẹra akụra sịḅị ḅụ ḅọrọ tẹ gbọrụ ejimina na, olosịkịya gbọrụmgbọ, na asambịrịma nwẹẹrẹsị gbọrụmgbọ na ọkị-ḅoo.” 10Ebiramụ nwẹnị mịna aị mamgba ọkị-ḅo ọ̀ pịrị, tẹ arị kẹ maaịn-maaịn pẹlẹ, tẹ sịḅị da anga na, etemi da anga na kẹ jen-jen dama koromam kụma feni amẹẹ ma ori ịn kẹ maaịn-maaịn pẹlẹ-a. 11Ẹdẹlẹ afeni nwẹnị fiin ideri-ḅo ọkpa ma ọgọnọ sịẹ-sịẹ tẹ Ebiramụ ịn deem.

12 # Job 4.13,14 Ịrụa mẹ tuuideriarị ogbo opu mono nwẹnị Ebiramụ ọkị, tẹ ḅalafama opu kanakana nwẹnị ọ̀ gbaịn. 13#Pks 1.1-14; Fịr 7.6Anịtẹso KỊNỊNYANAḄỌ ḅe nwẹnị Ebiramụ ḅẹẹ, “Tụkụma ḅara ḅụ nimii mịnẹ í furo-ḅẹ-apụ mu ama tẹ ini nyana-a ama ḅụ igoniapụ ḅara kẹ anga tẹ omoni-sọ tẹ ịn kụra gbọrụ ẹndẹ kẹ ịn ponoma ḅa. 14#Pks 12.40,41; Fịr 7.7Kụma à fomu-ḅara kẹ anị opu sịẹ mẹ tẹ ini omoni fịrị mẹnjị anga mẹ pịrị ḅa, anịsakị aniemẹ ḅọrọ tẹso, ọkụma, ịn gburo-gburo ngọ nyana tẹ kẹ paka-ḅo ḅa. 15Ị́yẹrị kụma, dein ḅụ í so ị́ aḍapụ ma ḍọkụma-mu ḅa ị́ kpọọ lama tẹrẹmẹ mie ini í ḍiḅi ḅarị ye. 16Inia ḅụọ-ḅẹ-atomi karama apụ ḅụ mie ịn pịkịma mịanga ḅo ḅarịye kẹ gotẹ ọkọ ḅẹẹarị, Amọrayịtị apụ ma amụ ịn mịẹarị iri-aị ma mịẹ karama-a ẹrẹsị.” 17Ịrụa biin tẹ ene mẹ furu tẹso, onwi turee-tureema paka-ḅoarị ḅẹlẹ na kọrịarị fịnị-ḅẹlẹ na nwẹnị ịn pẹlẹ dẹẹ wararị anama ma ogboku ḅụ mẹnjị-ḅọrọ. 18#Fịr 7.5Anị ene mẹ ḅụ, KỊNỊNYANAḄỌ ḅe Ebiramụ na gbọrụ ọḅọkụ fịm tẹ ḅẹẹm, “Mị ama mẹ à kẹ í furo-ḅẹ-apụ pịrịm, Ijiputi ḅẹ tọrụ mẹ ḅụ ọkị mu Opu Tọrụ mẹ la, ọkị mu Yuferetisi tọrụ mẹ la, 19Kinatị apụ ma ama-o, Kenazị furo-ḅẹ-apụ ma-o Kadimoni furo-ḅẹ-apụ ma-o, 20Itayịti apụ ma-o, Pẹrịzayịtị apụ ma-o, Lẹsẹrẹtẹ ịn kẹ Rẹfayimu sin tụndụ ogboku mẹ-o, 21Amọrayịtị apụ ma-o, Kenanị ḅẹ apụ ma-o, Gagasayịtị apụ ma-o, Jebusayịtị apụ ma ama ma sọ.”

Currently Selected:

Suku-saakị 15: KBTP

Highlight

Copy