Suku-saakị 13

Ebiramụ Na Lọtị Na Puam

1Mie ḅụ Ebiramụ nwẹnị ọ̀ ta na, ò nyana aị mamgba na, pịkị Lọtị na kẹ ọ̀ ḅụụ sụa tẹ Ijiputi ḅụ mẹnjị paka-so Kenanị suku-jụ mu. 2Mịọkụ Ebiramụ iḅiọkụ opu nama na, seleḅa na, golu na ngọ-kọn lamam. 3Tẹ ọ̀ nwẹnị Kenanị suku-jụ mẹ ḅụ paa mẹnjị ma-mu Bẹtẹlị jụjụ-ḅio la. Ò mu Bẹtẹlị na Ayị na ogboku lam, anie suku-saakị ḅụ ò sime-sime anga mẹ, 4anie pịkị tarị-pịrịpịrị-ḅụ ọ̀ gbọrụ agbamịẹ-anga nama anga mẹ. Ebiramụ nwẹnị anịjụ sunsin KỊNỊNYANAḄỌ ḅe pịrị.

5Lọtị ḅe tẹ Ebiramụ ḅụụ sọ tẹ ori na mu ḅọ ḅe sọ anana ogbo-ogbo na, ja anama ogbo-ogbo na, akpụrụ-awarị na nyana saram, 6mịẹ mẹ mịẹtẹ ama mẹ ḅarị inetẹ ini maa apụ ma anga gboloma mẹ dogi-a; gbala ịn nyana aị ma gburo-gburo la ḅara ẹrẹsị ịn ḅarị inetẹ anga gboloma ḅẹ ọkụ ofori, 7anịsakị Ebiramụ opu anama ogbo-ogbo ma ḍikiḍikiarị apụ ma na, Lọtị opu anama ogbo-ogbo ma ḍikiḍikiarị apụ ma na ịgbanịya nyana ma ḅọrọarị. Anị sakị mẹ Kenanị ḅẹ apụ ma na, Pẹrịzayịtị apụ ma na ama mẹ ḅio angarị.

8Anịtẹso Ebiramụ nwẹnị Lọtị ḅẹẹ, “Yee ịgbanịya ḅarị yẹrị na, ị́yẹrị na, pịkị ị̀ anama ḍikiḍikiapụ na, ị́ anama ḍikiḍikiapụ na ogboku paka ma, kẹ gotẹ ọkọ ḅẹẹarị, yẹrị na ị́yẹrị na mịnapụ. 9Bebe amakiri mẹ ị́ tọrọkọ ofori? Ị̀ ḅụụ ḅụ ị́ ḅụụ puu-ḅelemaa. Í ere-ḅara anga ọkị-ọkị, àrị ama-ḅara anga ọkị ḅa, anịanịa ị́ ama-ḅara anga ọkị-ọkị, àrị ere-ḅara anga ọkị ḅa.” 10#Suk 2.10Tẹ Lọtị nwẹnị ori atọrụngbọ saakị tẹ ẹrị mịnẹ Jodanị tụndụ ogboku mẹ anga mamgba ḅụ minji iḅiọkụ sara yọkọ-yọkọ wararị, anị KỊNỊNYANAḄỌ ḅe ḍụọ mẹ ḅio sime-ḅara pembe ḅara, Ijiputi ama mẹ ḅụ Zoha da-mu pakịrị mẹ sime-ḅara; miemẹ anie tẹrẹmẹ KỊNỊNYANAḄỌ ḅe Sọdọmụ na, Gomora na ḅaa guluguluma fama sakị la. 11Mie ḅụ Lọtị Jodanị tụndụ ogboku mẹmgba sẹlẹ-ọkị amịna ḅụụ pịrịm, tẹ Lọtị nwẹnị igoni mẹ kẹ ịrụa-saakịarị-anga mẹ da-mum; mị-ḅara mie ịn jụmọ-jụmọ ḅụ puu ḅele ḅara. 12Ebiramụ Kenanị ama mẹ ḅio angam, Lọtị nwẹnị tụndụ ogboku mẹ ḅẹ opu ama ma ogbo-ḅio anga tẹ ori akpụrụ-awarị Sọdọmụ jụjụ-ḅio lama. 13Mịọkụ Sọdọmụ ḅẹ apụ ma anie si-sịḅịḅio-sụapụ, KỊNỊNYANAḄỌ ḅe ḅụ gburo-gburotẹ opu si mịẹ apụ.

Ebiramụ Mẹnjị-so Hẹbụrọnị Mum

14Lọtị ọ̀ ḅụụ puu ḅele tẹso, KỊNỊNYANAḄỌ ḅe nwẹnị Ebiramụ ḅẹẹ, “Ị́ atọrụngbọ saakị tẹ í simearị anga mẹ ḅụ saakị ḍiki tọrọkọ-jụ ḅio na, suku-jụ na, ịrụa-saakịarị-anga mẹ na, ịrụa-ideriarị-anga mẹ na da-muu; 15#Fịr 7.5kẹ gotẹ ọkọ ḅẹẹarị, kiri mẹ tẹ ị́ tọrụngbọ kẹ ẹrị anga mamgba à kẹ ị́yẹrị na, í furo-ḅẹ-apụ na pịrị gbamaso ḅa. 16Àrị í furo-ḅẹ-apụ mịẹ tẹ ịn kiri-ḅio ḅẹ fọọn ḅin ḅara ḅin ḅa, anie ḅụ kịnị inetẹ kiri-ḅio ḅẹ fọọn mẹ kịẹn-kịẹn, í furo-ḅẹ-apụ sọ kịnị inetẹ kịẹn ḅa. 17Saakịị, kiri mẹ ḅẹ nangwọ na, anị ḅẹ finji na mẹnjịị, kẹ gotẹ ọkọ ḅẹẹarị, àrị anị kẹ ị́ pịrị ḅa.” 18Mie ḅụ Ebiramụ ori akpụrụ-warị siinm, tẹ ḅo Mamụrẹ ḅụ simearị ịn kẹ oku nwẹn-sịn opu asịn ma tẹ Hẹbụrọnị ḅụ simearị aị ma kpeki tẹ ọ̀ nwẹnị anịanga ḅụ gbọrụ agbamịẹ-anga nama KỊNỊNYANAḄỌ ḅe pịrị.

Currently Selected:

Suku-saakị 13: KBTP

Highlight

Copy