Paka-so 40

Ịn Akpụrụ-warị Mẹ Pike Tẹ Anị Finjim

1KỊNỊNYANAḄỌ ḅe nwẹnị Mozizi ḅẹẹ, 2Tarị akalụ mẹ ḅẹ tarị eneḅaka ḅụ mie ị́ Kobiri Akpụrụ-warị mẹ pike sịẹma ḅarịye. 3Oyia Oloko simearị Ọḅọkụ-Igbe mẹ kẹ anị ḅio suu, tẹ kiki-pẹlẹ-ḅịtẹ kẹ anị kikimaa. 4Dẹbịlẹ mẹ ọkị-ḅo suu, tẹ anị kẹ ọrụtọn ḅara ḅụ anị tẹlẹma wẹrịị. Pịkị tọnjọ-sịẹmaye mẹ ọkị-ḅo suu, tẹ anị ḅẹ atọnjọ ma kẹ anị ọgọnọ sịẹma. 5Kụnụaị dọkịma golu-golu agbamịẹ-anga mẹ ọkị-ḅoo, tẹ anị kẹ Ọḅọkụ-Igbe mẹ tọrọkọ koroma, tẹ Akpụrụ-warị mẹ ḅẹ kiki-pẹlẹ-ḅịtẹ mẹ kẹ anị tọrọkọ kikii. 6Dọkịma-agba mịẹ edeni mẹ kẹ Kobiri Akpụrụ-warị mẹ ḅẹ ḅọkọ mẹ tọrọkọ ḅụ koroma, 7tẹ ḅara sịkịrị opu ẹfẹrẹ mẹ kẹ Kobiri Akpụrụ-warị mẹ na, agbamịẹ-anga mẹ na ogboku koroma, tẹ minji kẹ anị ḅio sụa. 8Ị́ nwẹnị nụngọ gbori aị ma kẹ nụngọ mẹ gbori-ikelemakoro tẹ onu-ḅọkọ mẹ kiki ḅarị ḅịtẹ mẹ kẹ anị gbaịn ḅa.

9Anịtẹso ị́ sịḅị ọgọnọ sara pulo mẹ ọkị tẹ kẹ Akpụrụ-warị mẹ ọgọnọ na, anị ḅio simearị aị mamgba na anị ḅẹ ḅirima aị mamgba na ḅụ sara tẹ arị mịẹ fịafịama ḅa, tẹ anị nwẹnị ḅo fịafịa ḅa. 10Ị́ pịkị dọkịma agbamịẹ-anga mẹ na, anị ḅẹ ngwongwo mamgba na sọ ḅụ sara, tẹ agbamịẹ-anga mẹ mịẹ fịafịama tẹ, agbamịẹ-anga mẹ fịafịa ḅa. 11Ị́ pịkị ḅara sịkịrị opu ẹfẹrẹ mẹ na, anị ḅẹ suku mẹ na sọ ḅụ sịḅị ọgọnọ sara pulo mẹ sara, tẹ anị mịẹ fịafịama ḅa.

12“Anịtẹso ị́ Erọnị na, ori owiapụ-awọmẹ na ọkị-ḅo ḅa Kobiri Akpụrụ-warị mẹ ḅẹ ḅọkọ mẹ tọrọkọ ḅụ, tẹ minji kẹ ịn sịkịrị ḅa, 13tẹ fịafịa opu akapa ma kẹ Erọnị sụa, tẹ pulo kẹ ọ̀ sịḅị ọgọnọ sara, tẹ ọ̀ mịẹ fịafịama ḅa, mịẹtẹ ori agbamịẹḅọ ḅara kẹ fịrịmẹnjị ị̀ pịrị ḅẹ ḅara. 14Ị́ pịkị ori owiapụ-awọmẹ sọ ọkị-ḅo tẹ kapa kẹ ịn sụa, 15tẹ í pulo kẹ ịna asịḅị sara ḅa, ị́ wẹrịtẹ pulo kẹ ịna ḍaḅọ sịḅị sara ḅara, mịẹtẹ ini agbamịẹapụ ḅara kẹ fịrịmẹnjị ị̀ pịrị ḅẹ ḅara anịsakị pulo kẹ ịna asịḅị sara mẹ nwẹnị ini ọkị-ḅo agbamịẹ kọrịnama ḅio suu mu ḅẹẹ-sakị ḅẹẹ-sakị la ḅa ịna aḅụọ mamgba ḅụ.”

16Mị-ḅara mẹ mie Mozizi mịẹ ḅara, KỊNỊNYANAḄỌ ḅe wẹrịtẹ tọn ọ̀ pịrị ḅara, anị ḅara mie ọ̀ mịẹ ḅara. 17Maaịn karama kụra mẹ ḅụ, tarị akalụ mẹ ḅụ ḅẹ tarị eneḅaka mẹ ḅụ ini Akpụrụ-warị mẹ pike sịẹmam. 18Mozizi Akpụrụ-warị mẹ pike sịẹmam; ori anị ḅẹ sukutarị aị ma koromam, tẹ anị ḅẹ maa asịn ma sịẹma tẹ ḅọrọma asịn ma sụam, tẹ pịkị anị ḅẹ ḅeriaị ma sịẹmam. 19Ọ̀ nwẹnị akpụrụ ḅịtẹ mẹ finjima Akpụrụ-warị mẹ gbaịn, tẹ kẹ akpụrụ ḅịtẹ mẹ gbaịn-arị ye mẹ kẹ anị gbaịn koromam, KỊNỊNYANAḄỌ ḅe wẹrịtẹ tọn Mozizi pịrị tẹ ḅara. 20Ọ̀ nwẹnị ḅụụ ḍie-pakamaye (maa ḍụḅarị apakịrị) ma ọkị tẹ kẹ Ọḅọkụ-Igbe mẹ ḅio sụa, pịkị nangwọtẹ asịn ikiḅa ma kẹ Ọḅọkụ Igbe mẹ ḅẹ anụnụma ma ḅio suu, tẹ Ọkụrụkụrụ Emine (anie ḅịḅị-gbaịnye) mẹ kẹ Ọḅọkụ-Igbe mẹ ḅịḅị gbaịnm. 21Ọ̀ nwẹnị Ọḅọkụ-Igbe mẹ ọkị-ḅo Akpụrụ-warị mẹ ḅio suu, tẹ kiki-pẹlẹ-ḅịtẹ mẹ kẹ kiki-pẹlẹ tẹ kẹ Ḅụụ Ḍie-pakama, Ọḅọkụ-Igbe mẹ kikimam; KỊNỊNYANAḄỌ ḅe wẹrịtẹ tọn Mozizi pịrị tẹ ḅara.

22Ọ̀ nwẹnị dẹbịlẹ mẹ kẹ Kobiri Akpụrụ-warị mẹ ḅio suu tẹ kẹ ọgọnọ-jụ da pakịrị anga, kiki-pẹlẹ-ḅịtẹ mẹ ḅụ paka-ḅo ḅụ koroma, 23tẹ kẹ agba mịẹ KỊNỊNYANAḄỌ ḅe pịrị fịturu mẹ kẹ anị ọgọnọ ọrụtọn ḅara gbanam, KỊNỊNYANAḄỌ ḅe wẹrịtẹ tọn Mozizi pịrị ḅara. 24Ọ̀ tọnjọ-sịẹmaye mẹ kẹ Kobiri Akpụrụ-warị mẹ ḅio suum, tẹ dẹbịlẹ mẹ na dama-dama ḅụ Ọḅọkụ Igbe koko Akpụrụ-warị mẹ ḅẹ suku-jụ da pakịrị anga ḅụ anị koromam, 25tẹ KỊNỊNYANAḄỌ ḅe tọrọkọ tọnjọ ma tọnjị sịẹmam, KỊNỊNYANAḄỌ ḅe wẹrịtẹ tọn Mozizi pịrị tẹ ḅara. 26Ọ̀ nwẹnị golu-golu agbamịẹ-anga mẹ kẹ Kobiri Akpụrụ-warị mẹ ḅio kiki-pẹlẹ-ḅịtẹ mẹ tọrọkọ koroma, 27tẹ anị ọgọnọ kụnụaị dọkịmam KỊNỊNYANAḄỌ ḅe wẹrịtẹ tọn Mozizi pịrị tẹ ḅara. 28Ọ̀ pịkị Akpụrụ-warị mẹ ḅẹ ḅọkọ kpọ ḅịtẹ mẹ kẹ anị sime kiri ḅụ kpọọm. 29Ọ̀ nwẹnị pịkị dọkịma agbamịẹ-anga mẹ kẹ Akpụrụ-warị mẹ ḅọkọ ḅụ koroma, tẹ dọkịma-agba mẹ na, mgbọlụ agba mẹ na mịẹm KỊNỊNYANAḄỌ ḅe wẹrịtẹ tọn Mozizi pịrị tẹ ḅara. 30Ọ̀ ḅara sịkịrị opu ẹfẹrẹ mẹ kẹ Kobiri Akpụrụ-warị mẹ na, agbamịẹ-anga mẹ na ogboku koroma tẹ minji kẹ anị ḅio sụam kẹ ḅara sikiri gotẹ. 31Anị mie Mozizi na, Erọnị na ori owiapụ-awọmẹ na, kẹ ịna aḅara na, ịna aḅụọ-suku na sịkịrịarị ye; 32ịn mẹnjị Kobiri Akpụrụ-warị mẹ sọ-muarị sakị na, ini agbamịẹ-anga mẹ muarị sakị na ḅụ, ini ịna aḅara na, ịna aḅụọ-suku na sịkịrịarị, KỊNỊNYANAḄỌ ḅe wẹrịtẹ tọn Mozizi pịrị tẹ ḅara. 33Ọ̀ nwẹnị nụngọ mẹ gbori Akpụrụ-warị mẹ na, agbamịẹ-anga mẹ na ikelema-koro, tẹ nụngọ mẹ ḅẹ onu-ḅọkọ mẹ kpọ kikima ḅịtẹ mẹ kpọọm. Mị-ḅara mie Mozizi kọrịnama mẹ kọrị fama ḅara.

KỊNỊNYANAḄỌ Ḅe Ebube Akpụrụ-warị Mẹ Ḅinm

(Kịẹ 9.15-23)

34 # 1 Ama 8.10,11; Ayị 6.4; Izi 43.4,5; Mịẹ 15.8 Anịtẹso oḅuto nwẹnị Kobiri Akpụrụ-warị mẹ gbaịn, tẹ KỊNỊNYANAḄỌ ḅe ebube mẹ nwẹnị Ọḅọkụ Igbe mẹ koko wararị anga mẹ ḅin. 35Tẹ Mozizi inetẹ ḅarị Kobiri Akpụrụ-warị mẹ ḅio sọ-mu-a gbala oḅuto mẹ gbọrsịḅị anị ọgọnọ ḅụ simem tẹ KỊNỊNYANAḄỌ ebube mẹ Ọḅọkụ Igbe mẹ koko wararị anga mẹ ḅinm ẹrẹsị. 36Ịna mẹnjị mẹmgba ḅụ, Akpụrụ-warị mẹ ọgọnọ oḅuto kpo mẹ saakị iwo sakị, iwo sakị Izirẹlịapụ ma mẹnjị tọrọkọ mum; 37kụma oḅuto kpo mẹ saakị-a ḅẹḅẹ, anịrẹ ịn mẹnjị tọrọkọ mu ḅịa nwenii anị ene mẹ tẹ oḅuto kpo mẹ saakị iwo ene, ene la ḅa. 38Kẹ gotẹ ọkọ ḅẹẹarị, ịna amẹnjị mamgba ḅụ KỊNỊNYANAḄỌ ḅe oḅuto kpo mẹ eneḅaka ḅụ Akpụrụ-warị mẹ ọgọnọ ḅụ simem, anịsakị ḍin ḅụ fịnị anị ḅio ḅụ kọrịm, Izirẹlị ḅẹ warị-warị mamgba tọrụ-ogbo ḅụ.

Currently Selected:

Paka-so 40: KBTP

Highlight

Copy