Paka-so 35

Ịnyọsara-Ene Mẹ Ḅẹ Oloko Ma

1Mozizi Izirẹlịapụ ma tomina-ogbo mẹmgba kobirim tẹ nwẹnị ịn ḅẹẹ, “Mịna aị ma mie ọ́ mịẹ ḅarị aị ma tẹ KỊNỊNYANAḄỌ ḅe tọn ọ́ pịrị tẹ aị ma: 2#Pks 20.8-11; 23.12; 31.15; 34.21; Lẹv 23.3; Dit 5.12-14Sonio aḍin mie ọ́ kọrịnama kọrị ḅarịye kụma sọnọma aḍin karama ene mẹ ḅụ ọ́ fịafịa Ịnyọsara-Ene mẹ ḅẹ tẹmẹ-la ịnyọsara nyana KỊNỊNYANAḄỌ ḅe pịrị ḅa; ḅẹḅọ-ḅẹḅọ tẹ anị ḅụ ḅẹ kọrịnama kọrị ḅọ kọrị ḅọ, ini mḅọ ḅaa ḅa. 3Ịnyọsara-Ene mẹ ḅụ ọmịna sime ayọ mamgba ḅụ fịnị kịngẹ sọ ọ́ tọnọ ma.”

Mozizi Tomi Ma Aḅara Kẹ Akpụrụ-Warị Mẹ Nama Ḅẹ Aị Ḅiim

(Pks 25.1-9)

4Mozizi nwẹnị Izirẹlịapụ ma tomina-ogbo mẹmgba ḅẹẹ, “Miemẹ anie ye tẹ KỊNỊNYANAḄỌ ḅe tọn tẹ ye: 5Ọmịna ogbo-ḅio ḅụ ọmịnị agba mịẹ aị ọkị mu KỊNỊNYANAḄỌ ḅe pịrịị; ye pịrị sarasara ḅioḅẹngbọ nyanaḅọ-nyanaḅọ, yee mḅọ KỊNỊNYANAḄỌ ḅe agba mịẹ aị ḅụ golu na, seleḅa na, ojo na, 6Bulo tọrụ na, pọpụlụ nwẹn-sịn tọrụ na, awụ tọrụ na sụa iḅi aḅịtẹ na, iḅi lọkọ-ḅịtẹ na; oḅori oju ḅẹ isuke na, 7kẹ ọlọ-akpa mịẹ ḅara tẹlẹmatẹ ejimina oju-apara na, oḅori oju-apara na; akasiya nwẹn-sịn sịn na, 8tọnjọ tọnjị pulo na, fịafịa-pulo mẹ na, kụnụarị kụnụaị mịẹ ẹnyị ma na, 9Ọnịkịsị nwẹn-sịn aḍụḅarị na ja aḍụḅarị tẹ ịn kẹ Sịḅịda-Agbamịẹḅọ ḅe ẹfọdị nwẹn-sịn kapa na ekpe-gbaịn-kapa na ḅụ dẹẹ ḅarị aḍụḅarị na.

Akpụrụ-warị Mẹ Ngwongwo Ma

(Pks 39.32-43)

10“Yee ọmịna ogbo-ḅio ḅụ ịnyọ nyana tẹ inetẹ ḅọ, inetẹ ḅọ ḅo tẹ mịẹ ḅẹ tẹ KỊNỊNYANAḄỌ ḅe tọn tẹ aị mamgba mịẹ: 11Akpụrụ-warị mẹ, anị ḅẹ ye-gbaịn-aị na; anị ḅẹ ye-sụka-aị na amasịn ma na; anị ḅẹ ẹngbẹsẹ ma na ḅeriaị ma na; anị ḅẹ otolo ma na; 12Ọḅọkụ-Igbe mẹ na anị ḅẹ nangwọtẹ asịn ikiḅa ma na; Ọḅọkụ-Igbe mẹ ḅịḅị-gbaịnye mẹ na, kiki-pẹlẹ-ḅịtẹ mẹ na; 13dẹbịlẹ mẹ na anị ḅẹ nangwọtẹ asịn ikiḅa ma na, anị ḅẹ ngwongwo mamgba na; kẹ agba mịẹ KỊNỊNYANAḄỌ ḅe pịrị fịturu mẹ na; 14tọnjọ-sịẹmaye mẹ na pịkị sime bele mẹ pịrị ḅẹ ye mẹ na, anị ḅẹ ngwongwo na, anị ḅẹ atọnjọ ma na, tọnjọ ḅio sụa tẹ bele mẹ pịrị ḅẹ pulo mẹ na; 15kụnụaị dọkịma edeni mẹ na, anị ḅẹ nangwọtẹ asịn ikiḅa na, fịafịa-pulo mẹ na, kụnụaị ma na, sime ḅọkọ kpọ pịrị ḅịtẹ Akpụrụ-warị mẹ ḅụ na, 16dọkịma-agba mịẹ edeni mẹ na anị ḅẹ ojo fịnị apakịrị dẹẹ anga mẹ na, anị ḅẹ nangwọtẹ sịn ikiḅa ma na, anị ḅẹ ngwongwo na; ḅara sịkịrị opu ẹfẹrẹ mẹ na anị ḅẹ suku na, 17nụngọ mẹ kikima aḅịtẹ ma na, anị ḅẹ ḅeriaị na, arịḅẹ otolo na, anị ḅẹ onu mẹ ogigo-ḅọkọ kpo ḅịtẹ mẹ na; 18Akpụrụ-warị mẹ ḅẹ adolịa na nụngọ mẹ ḅẹ adolịa na arịḅẹ aḍigi na; 19sụa tẹ Fịafịa Yọ mẹ ḅio kọrịnama kọrị ḅẹ iḅiọkụ kọrị tẹ iḅi opu akapa ma na, Erọnị agbamịẹḅọ ḅe fịafịa opu akapa ma na, ori owiapụ-awọmẹ ma, agbamịẹapụ ḅara ḅụ ịna kọrịnama opu akapa na.”

Tomi Ma Kẹ Akpụrụ-Warị Mẹ Nama Ḅẹ Aị Kẹ-ḅom

20Anịtẹso Izirẹlịapụ ma tomina-ogbo mẹmgba Mozizi sime anga ḅụ som. 21Tẹ ọrụḅọ-ọrụḅọ amịna ḅioḅẹngbọ jike ḅọ, jike ḅọ na, ọrụḅọ-ọrụḅọ amịna tẹmẹ sukuruma ḅọ, sukuruma ḅọ na KỊNỊNYANAḄỌ ḅe agba mịẹ aị ma ọkị-ḅom kẹ Kobiri Akpụrụ-warị mẹ ḅụ kọrịnama kọrị na, anị ḅẹ afịrị mamgba na, Fịafịa opu akapa ma gbin na pịrịm. 22Mị-ḅara mie ịn ḅo ḅara, owiapụ na ereme na: inweni-mgba tẹ pịrị pọkọ-tarị ḅioḅẹngbọ sụa apụ mamgba kapa ḅirima aị na, ḅerisụa-aị na, ẹrẹ sọkị sụa wararị agolu na, ḅarasụa-aị na, pọkọsụa-aị na, kẹ ye mịẹ na-iḅi kịrị-kịrị aị mamgba ọkị-ḅom, owiḅọ goḅọ-goḅọ golu agbamịẹ-aị wẹrị sikima KỊNỊNYANAḄỌ ḅe pịrịm. 23Anịsakị owiḅọ nwẹn-sịn owiḅọ tẹ ḍọkị-ẹrịm mḅọ bulo tọrụ sụa iḅi ḅịtẹ, anịanịa pọpụlụ nwẹn-sịn tọrụ sụa iḅi ḅịtẹ anịanịa awụ tọrụ sụa iḅi ḅịtẹ, anịanịa iḅi lọkọ-ḅịtẹ, anịanịa oḅori oju ḅẹ isuke, anịanịa, kẹ ọlọ akpa mịẹ ḅara tẹlẹmatẹ ejimina, anịanịa oḅori oju apara nyanam nwẹn ḅẹẹ ḅọ, ḅẹẹ ḅọ arị ọkị-ḅom. 24Ọrụḅọ-ọrụḅọ tẹ inetẹ seleḅa, anịanịa ojo nyana ḅọ nyana ḅọ, KỊNỊNYANAḄỌ ḅe agba mịẹ ye ḅara ḅụ anị ọkị-ḅom; anịsakị ọrụḅọ-ọrụḅọ tẹ ḍọkị-ẹrịm mḅọ akasiya nwẹn-sịn sịn nyanam, tẹ anị mịẹye ḅụ sọ ḅa nwẹn ḅẹḅọ-ḅẹḅọ anị ọkị-ḅom. 25Ereme mamgba tẹ ịnyọ nyana tẹ ye ḍori ḍin apụ ịna aḅara kẹ ḍori bulo tọrụ na, pọpụlụ nwẹn-sịn tọrụ na, awụ tọrụ na sụa iḅi aḅịtẹ na, ḍoritẹ iḅi lọkọ-ḅịtẹ na ọkị-ḅom. 26Ereme mamgba tẹ ḅioḅẹngbọ jike tẹ ịnyọ nyana apụ oḅori oju ḅẹ isuke mẹ ḍorim. 27Tọrọkọ tarị apụ ma ọnịkịsị nwẹn-sịn aḍụḅarị na ja aḍụḅarị na kẹ ẹfọdị nwẹn-sịn kapa mẹ na ekpe-gbaịn-kapa mẹ na ḅụ dẹẹ pịrị aị ma ọkị-ḅom, 28pịkị kẹ tọnjọ mẹ tọnjị ḅẹ pulo na, fịafịa-pulo mẹ na, kụnụarị kụnụaị ma mịẹ ḅẹ ẹnyị ma na. 29Izirẹlịapụ ma ḅẹ owiapụ na, ereme na mamgba inima tẹ ḅẹẹye-ḅẹẹye ọkị-ḅo kọrịnama mẹ tẹ KỊNỊNYANAḄỌ ḅe Mozizi ḅụ tọnm anị kọrị nwẹn ḅẹẹ kọrịnama mẹ gotẹ amịna ḅioḅẹngbọ sukuruma apụ ma ye ọkị-ḅo KỊNỊNYANAḄỌ ḅe pịrịm tọn ḅụụ pịrị agba mịẹye ḅara ḅụ.

Akpụrụ-warị Mẹ Nama Ḅẹ Ḅara-ḍịn Apụ Ma

(Pks 31.1-11)

30Mozizi nwẹnị Izirẹlịapụ ma ḅẹẹ, Ḍikii, KỊNỊNYANAḄỌ ḅe gbọrsịḅị ẹrẹ go ḅara ḅụ Bẹzalẹlị, anie Yuri owiḅọtụḅọ pịkị Họ taa-owiḅọtụḅọ Juda furo-ḅẹ-ḅọ ḅe sịn tẹẹ; 31tẹ ọ̀ Tamụnọ Tẹmẹ ḅe kẹ ọ̀ ḅụụ ḅio suu ḅinma tẹẹ, pịkị inetẹ ye mịẹ kụrọ na, yefieye naa na, ye ḍawọ ḍịn na, kẹ ye mamgba mịẹ tẹlẹma ḅẹ aka na, 32ḅara kẹ ye sime na-iḅi ḅara mịẹ pakama-ḅo na, golu na seleḅa na ojo na kẹ kọrịnama kọrị aka na, 33kẹ kọrịnama kọrị ḅara kẹ ḍụḅarị pẹlẹ aka na, sịn kẹ kọrịnama goyegoye na kura ḅara kara aka na kẹ sụa tẹẹ. 34Anịsakị KỊNỊNYANAḄỌ ḅe ye mịẹ ḅẹ ḅara kẹ tẹmẹ kẹ ori na, Oholiyabụ, Ayisamakị, Danị furo-ḅẹ-ḅọ ḅe owiḅọtụḅọ ḅe na ḅụụ suu tẹ, kẹ ye tolumaa. 35Ori ịn kẹ inetẹ kọrịnama ḅara, ḅara goyegoye kọrị ḅarị ịnyọ kẹ ịn pịrị ḅinma tẹ, ḅara akanịḅọ kọrịnama, anịanịa ye sime na-iḅi ḅara mịẹ pakama-ḅo ḅọ kọrịnama, anịanịa iri kẹ kapa ekpe ḅirimaḅọ kọrịnama bulo tọrụ na, pọpụlụ nwẹn-sịn tọrụ na, awụ na sụa aḅịtẹ ḅụ na, ḍoritẹ iḅi lọkọ-ḅịtẹ na ḅụ anịanịa ḅịtẹ-ḍoriḅọ ḅẹ kọrịnama, kọrịnama-kọrịarịḅọ anịanịa ye sime na-iḅi ḅara mịẹ pakama-ḅo ḅara-ḍịnḅọ kọrịnama.

Currently Selected:

Paka-so 35: KBTP

Highlight

Copy