Paka-so 28
28
Agbamịẹapụ Asụa-aị Gbin Ḅẹ Ḅara
(Pks 39.1-7)
1“Í iyimbere Erọnị na, ori owiapụ-awọmẹ Nadabụ na, Abihu na, Ẹlịyeza na, Itama na ọkị-ḅo ị́ ḅụụ kpekimaa, Izirẹlịapụ ma ḅụ. Ini agbamịẹapụ ḅara ḅụ fịrịmẹnjị ị̀ pịrị ḅa. 2Ị́ agbamịẹapụ fịafịa opu akapa gbin í iyimbere Erọnị pịrị ḅa, ebube nyana na iḅi na gotẹ. 3Ị́ ẹkwẹn ḅara-ḍịn apụ mamgba tẹ ịnyọ nyana wararị apụ — inima tẹ arị inetẹ anị mịẹ ḅẹ ḅioḅẹngbọ kẹ pịrị tẹ apụ ma — pịrị ḅa, mịnẹ ini Erọnị akapa ma gbin ọ̀ pịrịị, kẹ ọ̀ mịẹ fịafịama sikima ị̀ agbamịẹ mẹ pịrị ḅẹ ḅara. 4Mịna opu akapa ma anie kapa ma tẹ ịn gbin ḅẹ akapa ma: ekpe-gbaịn-kapa na, ẹfọdị nwẹn-sịn kapa na, vọrọrọ-kapa na, ḅirimatẹ kapa na, tọpịtẹ-ḅịtẹ-sun na, pịkị ḅiri-ponoye na; ịn fịafịa opu akapa gbin í iyimbere Erọnị na, ori owiapụ-awọmẹ na pịrị ḅa, tẹ ini agbamịẹapụ ḅara kẹ fịrịmẹnjị ị̀ pịrị ḅa. 5Golu na, bulo tọrụ na pọpụlụ nwẹn-sịn tọrụ na, awụ tọrụ na sụa ḅịtẹ ḍori iri kẹ ḍori aḅịtẹ na, iḅi ḍoritẹ lọkọ-ḅịtẹ na mie ini ọkị tẹ kẹ arị gbin ḅarịye.”
6“Ẹfọdị nwẹn-sịn kapa mẹ ịn kẹ anị gbin ḅarịye anie golu na, bulo tọrụ na, pọpụlụ nwẹn-sịn tọrụ na, awụ tọrụ na sụa iḅi aḅịtẹ na iḅi ḍoritẹ lọkọ-ḅịtẹ na, tẹ ḅara-ḍịn apụ iḅiọkụ anị ḅirima ḅa. 7Anị apana-ḅọrọma-ḅịtẹ maa apakịrị nyana ḅa kẹ maa apana ma ḅụ sụa, mịẹtẹ arị ḅo gboloma ḅẹ ḅara. 8Anịsakị ḅara-ḍịn apụ iḅiọkụ ḍori ḅiri-ponoye mẹ anị ọgọnọ gbana tẹ anị pono ḅọrọ ḅa, kapa mẹ na anị na gbọrụ ḅara mie ịn kẹ anị kọrị ḅarị ḅara, gbọrụ ḅịtẹ ḅara, pịkị gbọrụ tọrụ — golu na, bulo tọrụ na, pọpụlụ nwẹn-sịn tọrụ na, awụ tọrụ na iḅi ḍoritẹ lọkọ-ḅịtẹ na. 9Ị́ nwẹnị ịn kẹ ọnịkịsị nwẹn-sịn yori-yoritẹ ḍụḅarị maa apakịrị ọkị tẹ Izirẹlị oyi maa owiapụ-awọmẹ finji ma ẹrẹ sọkị sụa ḅa arị ọgọnọ ḅụ. 10In wẹrịtẹ iyi ḅara ḅụ sonio ẹrẹ kẹ gbọrụ ḍụḅarị ọgọnọ ḅụ kẹẹ, pịkị osi sonio ẹrẹ ma kẹ osi ḍụḅarị ọgọnọ ḅụ kẹẹ, 11Gulu ọgọnọ ẹrẹ sụa ḅara-ḍịn tẹ ḅọ sụa ye sime-ḅara anie ị́ kẹ maa aḍụḅarị ma ọgọnọ Izirẹlị owiapụ-awọmẹ ma ẹrẹ ma sọkị sụa ḅarị ḅara; ị́ golu sọ sara ẹrẹ ma sụa wararị aḍụḅarị ma suku na agara ma na ikelema-koro ḅa. 12Ị́ maa aḍụḅarị ma kẹ ẹfọdị nwẹn-sịn kapa mẹ ḅụ simearị apana-ḅọrọma-ḅịtẹ ma ḅụ oḅolo ḅa, Izirẹlị owiapụ-awọmẹ ma kẹ ḅiokoroma aḍụḅarị ḅara ḅụ. Mị ḅara, Erọnị ịn kẹ ḅiokoroma ḅara kẹ ori apana ọgọnọ ḅụ ịna ẹrẹ ma dogi ḅa KỊNỊNYANAḄỌ ḅe tọrọkọ ḅụ. 13Í golu kẹ tarị suku sụa ẹfẹrẹ ḅara tẹmẹ ḅa. 14Tẹ karakara golu kẹ maa parịtẹ ḍigi sime-ḅara sime ikoli tẹmẹẹ, tẹ arị kẹ sukutarị aị ma ḅụ oḅoloo.”
Ekpe-gbaịn-kapa Mẹ Gbin Ḅẹ Ḅara
(Pks 39.8-21)
15“Ḅara-ḍịn apụ aka kẹ kọrị ekpe-gbaịn-kapa mịẹ Sịḅịda-Agbamịẹḅọ ḅe pịrịị, ọ̀ kẹ Tamụnọ ḅịḅị gbela ḅẹ ye ḅẹrẹkọn sakị ḅụ. Í golu tọrụ na, bulo tọrụ na, pọpụlụ nwẹn-sịn tọrụ na, awụ tọrụ na sụa ye-ḍori-aị na lọkọ-ḅịtẹ na kẹ anị kọrị ḅa, ẹfọdị nwẹn-sịn kapa mẹ kọrị ḅara ḅụ. 16Anị ḅẹ nangwọ na, finjima na gbasị tẹ maa aḅụụ iko ḅa; anị ḅẹ nangwọ ḅara gbọrụ ẹnzụ, anị ḅẹ finjima ḅara gbọrụ ẹnzụ. 17Inia ise ị́ nwẹn kẹ anị ḅụ yela aḍụḅarị dẹẹ ḅa; tarị ise ḅụ ịn kẹ Sadisi na, tọpazị na kabọnịkụlụ na sịn aḍụḅarị. 18Maaịn karama ise ḅụ ịn kẹ ẹmiralịdị na, safaya na, damịnị na sịn aḍụḅarị. 19Tẹrẹị karama ise ḅụ ịn kẹ jasịnịtị na ageti na, amẹtisiti na sịn aḍụḅarị. 20Ini karama ise ḅụ ịn kẹ bẹrịlị na, ọnịkịsị na, jasịpa na sịn aḍụḅarị; í golu sọ suku mẹ na agara ma na ḅụ sara ḅa. 21Izirẹlị owiapụ-awọmẹ ma ẹrẹ ma wẹrịtẹ sime-ḅara mie arịḅẹ oyi maa aḍụḅarị finji ma ọgọnọ ịna ẹrẹ ma sime ḅarị ḅara; arị elekima sụa ḅara kẹ ịn kẹẹ ẹrẹ sime-ḅara sime ḅa; oyi maa furo finji ma, gbọrụ ḍụḅarị, gbọrụ ḍụḅarị ọgọnọ ḅụ anị ḅẹ ẹrẹ sọkị sọ ḅa. 22Gwa-a karakara golu ị́ nwẹn kẹ parịtẹ ḍigi sime-ḅara sime ikoli tẹmẹ ekpe-gbaịn-kapa mẹ pịrị ḅa. 23Golu kẹ maa anụnụma tẹmẹ tẹ kẹ ekpe-gbaịn-kapa mẹ pịrịị, tẹ maa anụnụma ma kẹ ekpe-gbaịn-kapa mẹ ḅẹ ọgọnọ ḅẹ maa akaka ma ḅụ sụa, 24tẹ maa golu-golu aḍigi ma kẹ ekpe-gbaịn-kapa mẹ ḅẹ maa anụnụma ma ḅio suu oḅoloo, maa ịkọlị ma ḅụ. 25Ḍigi ma ḅẹ kunoma asịḅị ma, ị́ kẹ suku sụa ẹfẹrẹ ḅara sime ye mẹ ḅụ oḅolo ḅa, tẹ mie ḅụ anị kẹ ẹfọdị nwẹn-sịn kapa mẹ ḅẹ apana-ḅọrọma-ḅịtẹ ma tọrọkọ ḅụ oḅolo ḅa. 26Anịtẹso í golu kẹ maa nụnụma tẹmẹ ḅa, tẹ arị kẹ ekpe-gbaịn-kapa mẹ ḅẹ suku da anga mẹ ḅẹ maa asịḅị ma ḅụ sụa ḅa anị ḅẹ ḅioju ẹfọdị nwẹn-sịn kapa mẹ palị ḅụ. 27Ị́ pịkị maa golu anụnụma tẹmẹ ḅa, tẹ arị kẹ tọrọkọ ḅụ ẹfọdị nwẹn-sịn kapa mẹ ḅẹ apana-ḅọrọma-ḅịtẹ ma suku ḍori wararị ḅiri-ponoye mẹ ọgọnọ-jụ anị bịanma anga ḅụ sụa ḅa. 28Bulo-bulo ḍigi kẹ ekpe-gbaịn-kapa mẹ ḅẹ anụnụma ma kẹ ẹfọdị nwẹn-sịn kapa mẹ ḅẹ anụnụma ma ḅụ kpọọ, mịẹtẹ anị ẹfọdị ḅiri-ponoye mẹ ọgọnọ gbana, tẹ mịẹtẹ ekpe-gbaịn-kapa mẹ ẹfọdị mẹ ḅụ sime tẹ jike ḅịa ḅara. 29Mie ḅụ Erọnị ḅẹrẹ pẹlẹ sakị ḅẹ ekpe-gbaịn-kapa mẹ ḅụ Izirẹlị owiapụ-awọmẹ ma ẹrẹ ma dogi ḅa ori ekpe ọgọnọ ḅụ ọ̀ Fịafịa Yọ mẹ sọ-muarị sakị ḅụ kẹ sakị mamgba KỊNỊNYANAḄỌ ḅe ḅiokoroma ḅẹ ḅara. 30#Kịẹ 27.21; Dit 33.8; Ẹzị 2.63; Neh 7.65Ḅẹrẹkọn sakị ḅẹ ekpe-gbaịn-kapa mẹ ḅio mie í Yurimu mẹ na Tumimu#28.30 Yurimu na Tumimu na nwẹn-sịn aị ma anie agbamịẹapụ kẹ Tamụnọ ḅịḅị ḅiiarị maa aị. Ẹbịsịya arị ḍụḅarị maa apakịrị kịkarị. mẹ na kẹ sụa ḅarịye, tẹ arị Erọnị ekpe ọgọnọ sime ḅa, ọ̀ sọ KỊNỊNYANAḄỌ ḅe tọrọkọ mu sakị; mị-ḅara ḅụ Erọnị sakị mamgba Izirẹlịapụ ma ḅẹrẹkọn mẹ dogi ḅa ori ekpe ọgọnọ KỊNỊNYANAḄỌ ḅe tọrọkọ ḅụ.”
Agbamịẹapụ Ja Asụa-aị Gbin Ḅẹ Ḅara
(Pks 39.22-31)
31“Vọrọrọ-kapa mẹ tẹ ẹfọdị nwẹn-sịn kapa mẹ suku-ḅio simearị ye mẹ, bulo-bulo ḅịtẹ mie ị́ kẹ kapa mẹmgba gbin ḅarịye. 32Sịḅị mẹ kẹ suu toluma ḅarị kapa-pọkọ mẹ fongolo-koro tẹ ini ḍori ikelema-koro ḅa mịẹtẹ anị kaan ḅịa ḅara. 33Kapa suku mẹ ḅụ ị́ bulo tọrụ na, pọpụlụ nwẹn-sịn tọrụ na, awụ tọrụ na sụa iḅi aḅịtẹ kẹ omburo mgbọlụ kịkama mịẹ tẹ kẹ sụa ikelema-koro tẹ omburo ogboku ḅụ gbọrụ golu-golu mgbịrịmgba kẹ suku mẹ sụa ikelema-koro ḅa. 34Gbọrụ golu mgbịrịmgba, gbọrụ omburo mgbọlụ, gbọrụ golu mgbịrịmgba, gbọrụ omburo mgbọlụ ọgọnọ ḅẹ nangwọtẹ kapa mẹ suku ḅụ sọ ikelema-koro ḅa. 35Erọnị anị sụa ḅa ọ̀ kọrịnama sakị ḅụ, anịsakị ọ̀ mẹnjị Fịafịa Yọ mẹ sọ KỊNỊNYANAḄỌ ḅe tọrọkọ muarị sakị ḅụ na, ọ̀ paka-ḅoarị sakị na ḅụ arị fie tẹ kịnị naa ḅa, anieofori ò ḅofa fịị.”
36“Pẹmpẹmtẹ-golu-kịranị tẹmẹẹ, tẹ sọkị sụa ḅara ḅụ anị ọgọnọ kẹẹ, ‘Wẹrị Fịafịama KỊNỊNYANAḄỌ Ḅe Pịrị Ye.’ 37Bulo-bulo ḍigi kẹ anị kẹ tọpịtẹ-ḅịtẹ-sun mẹ tọrọkọ ḅụ kpọọ. 38Anị Erọnị fụḅara-ḅọkọ ḅụ sime ḅa, mịẹtẹ yẹrị KỊNỊNYANAḄỌ ḅe Izirẹlịapụ ma kẹ ḅo ị̀ pịrịarị fịafịa ḍiepịrị-aị ma daa-ọkị ḅẹ ḅara, tomi ma agba mẹ mịẹarị sakị ịn mịẹ-irima nyanam ḅẹsọ.”
39“Iḅitẹ lọkọ-ḅịtẹ kẹ kapa ḍori Erọnị pịrịị, tẹ pịkị anị kẹ tọpịtẹ-ḅịtẹ-sun mịẹ ọ̀ pịrịị; tẹ ḅara-ḍịn apụ iḅiọkụma ḅirimatẹ ḅiri-ponoye mịẹ ọ̀ pịrịị.”
40“Erọnị owiapụ-awọmẹ ma kụma, ị́ kapa na, ḅiri-ponoaị na, sun na gbin ịn pịrị ḅa; ebube nyana na iḅi na gotẹ ị́ arị gbin ịn pịrị ḅa. 41Anịsakị ị́ kapa ma kẹ í iyimbere Erọnị na ori owiapụ-awọmẹ na sụa ḅa, tẹ fịafịa-pulo kẹ ịna asịḅị sara, tẹ ḅara kẹ ịna asịḅị gbana, tẹ ịn mịẹ fịafịama sikima wẹrị ḅa, mịẹtẹ ini agbamịẹapụ ḅara kẹ fịrịmẹnjị ị̀ pịrị ḅarị ḅara. 42Ị́ lọkọ-ḅịtẹ kẹ ḅụọ-sụa-akapa gbin ịn pịrị ḅa kẹ ịna paụtẹ oju-meni gbaịn; arị ḅiri ogbo ḅụ ideri-mu ḅụọ-ẹtẹnẹ la ḅa. 43Erọnị na, ori owiapụ-awọmẹ na arị sụa ḅa ịn Kobiri Akpụrụ-warị mẹ ḅio sọ-muarị sakị, anịanịa, ịn fịafịa yọ mẹ ḅio sọ-mu agbamịẹ-anga mẹ kpeki fịrị mẹnjị ḅarị sakị ḅụ; anieofori ịn ḅofa mịẹ-irima ọkị-ḅo ini ọgọnọ gbana tẹ fịị. Mie mẹ anie sime mu ḅẹẹ-sakị ḅẹẹ-sakị la Erọnị na, ọ̀ ḅọrọ tẹso ọkụma, sime ò furo-ḅẹ-apụ na pịrị ḅẹ kẹẹ korotẹ oloko.”
Currently Selected:
Paka-so 28: KBTP
Highlight
Share
Copy
Want to have your highlights saved across all your devices? Sign up or sign in
(C) The Bible Society of Nigeria
