Paka-so 14
14
Awụ Tọrụ Mẹ Saḅa Mẹ
1Anịtẹso KỊNỊNYANAḄỌ ḅe nwẹnị Mozizi ḅẹẹ, 2“Ḍuko Izirẹlịapụ ma pịrịị, ini ọḅụ pịkị mu Payị-ayịrọtị tọrọkọ ḅụ ịna akpụrụ-warị pikee, Migidọlị na, Tọrụ mẹ na ogboku ḅụ Balị-zẹfọnị tọrọkọ ḅụ; ọ́ Tọrụ mẹ akaka ḅụ anị na saḅama tẹ sime ḅa. 3Kẹ gotẹ ọkọ ḅẹẹarị, Fero Izirẹlị ḅẹ apụ ma gbolomaye ḅụ ḅẹẹ ḅa, ‘Ini ama mẹ ḅio irima-irimarị; ịkpa mẹ ịn kiki tẹẹ.’ 4Anịsakị à Fero ḅioḅẹngbọ kụrọma ḅa, tẹ ori ịn ḍuka ḅa, anịsakị à Fero na, ori ọmụ-ogbo mẹmgba na ḅụ ḅọrọ tẹ ebube nyana ḅa; anịsakị Ijiputi ḅẹ apụ ma nimi ḅa mịnẹ yẹrị anie KỊNỊNYANAḄỌ ḅee.” Tẹ ini ọkọ mịẹm.
5Ịn ḍuko Ijiputi ḅẹ amadaḅọ ḅe pịrịm mịnẹ tomi ma ḍumo-mangị kọn tẹ nwẹn ḅẹẹ tẹso, Fero na, ori afịrịmẹnjịapụ na ḅioḅẹngbọ nwẹnị ḍima Izirẹlị ḅe apụ ma pịrị, tẹ ịn nwẹnị ḅẹẹ, “miemẹ tẹ wa mịẹ ye mẹ ḅọrọ tiye, mịnẹ wa Izirẹlị wẹrịso tẹ ịn so tẹ ḅarị fịrịmẹnjị wa pịrị-a ye mẹ?” 6Mie ḅụ ori ò kirimẹnjị-ọmụarụ tẹlẹma tẹ ori ọmụ-ogbo ọkị ọ̀ ḅụụ sụam. 7Ọ̀ nwẹnị iḅitẹịn ọmụ-arụ maa ẹndẹ oyia asi finji (600) sẹlẹ-ọkị, na Ijiputi ḅụ simearị ja ọmụ-arụ na arịḅẹ ọmụ-alapụ mamgba na ọkị. 8Tẹ KỊNỊNYANAḄỌ ḅe nwẹnị Fero Ijiputi ḅẹ amadaḅọ ḅe ḅioḅẹngbọ kụrọma tẹ ori Izirẹlị ḅẹ apụ owu-ḅara-iḅiapụ ḅara kẹ mẹnjịma soarị apụ ma ḍukam. 9Ijiputi-ḅẹ-apụ ma ịn ḍukam, Fero asụ na, kirimẹnjị-ọmụarụ mamgba na, ori asụ dọkụ apụ na ori ọmụ-ogbo na, ịn ḍuka ma-mu Payị-ayịrọtị akaka, Balị-zẹfọnị tọrọkọ ḅụ ịn lam.
10Fero sọma-ḅo kpekim, tẹ Izirẹlịapụ ma tọrụ saakị tẹ Ijiputi-ḅẹ-apụ ma mẹnjịma ịn dama-ḅoarị ḅara mẹ ẹrị tẹso, ịn gburo-gburotẹ ḅalafa nyanam; tẹ Izirẹlịapụ ma nwẹnị oloku-oloku owu KỊNỊNYANAḄỌ ḅe pịrị. 11Ịn nwẹnị Mozizi ḅẹẹ, “Anie gbala Ijiputi ḅụ ḍuḅu ḅarị ofori mie í gotẹ wa dogi-ḅo ịkpa mẹ ḅio ḅaa ḅẹ ḅo ye? Ị́ nwẹn kẹ Ijiputi ḅụ wa pakama-ḅo ye mẹ ị́ tiye mịẹ wa pịrị tẹ? 12Mie Ijiputi ḅụ wa ị́ ḅẹẹm, ‘Wa wẹrịso tẹ wa fịrịmẹnjị Ijiputi-ḅẹ-apụ ma pịrị,’ ḅẹẹ ye mẹ anị-a? Kẹ gotẹ ọkọ ḅẹẹarị, mimgbe fịrịmẹnjị Ijiputi-ḅẹ-apụ ma pịrị mẹ, iḅi kẹ ḅo ịkpa mẹ ḅio fịị mẹ nẹngị tẹ.”
13Mozizi nwẹnị tomi ma pakịrị, “Ọ́ ḅalafa ma, ọ́ sịẹ-kụrọọ, tẹ tọrụngbọ kẹ KỊNỊNYANAḄỌ ḅe ḅọrọma mẹ tẹ mịmgba ọ̀ kọrị ọ́ pịrị ḅarịye mẹ ẹrịị: kẹ gotẹ ọkọ ḅẹẹarị, Ijiputi-ḅẹ-apụ ma tẹ ọ́ mịmgba ẹrịarị apụ ma ọ́ gbala-gbala ḅarị jen-maaịn kẹ ini ẹrị ḅịa. 14KỊNỊNYANAḄỌ ḅe owu mẹ sọ ọ́ pịrị ḅa, anịsakị ọmịnị nyana tẹ mịẹ ḅarịye anie jike-a ḅara kẹ sịẹ-kụrọ.” 15KỊNỊNYANAḄỌ ḅe nwẹnị Mozizi ḅẹẹ, “ó tiegotẹ owu-owu ì sịn-arị? Ḍuko Izirẹlị ḅẹ apụ ma pịrị ịn mẹnjị tọrọkọ-tọrọkọ muu. 16Ị́ mkpara mẹ saakị tẹ ị́ ḅara sụn-pakama tọrụ mẹ da tẹ anị ḍiemaa mịẹtẹ Izirẹlị ḅẹ apụ ma inetẹ samụnọtẹ kiri ọgọnọ ḅụ mẹnjị tọrụ mẹ tolu-ḅọrọ ḅẹ ḅara. 17Anịsakị àrị Ijiputi-ḅẹ-apụ ma aḅioḅẹngbọ kụrọma ḅa mịẹtẹ ini ịn ḍuka sọ-mu ḅẹ ḅara, anịsakị à Fero na, ori ọmụ-ogbo mẹmgba na, ò kirimẹnjị-ọmụarụ ma na, ori asụ-dọkụapụ ma na ḅụ ḅọrọ tẹ ebube nyana ḅa. 18Tẹ à Fero na, ò kirimẹnjị-ọmụarụ ma na, ori asụ-dọkụapụ ma na ḅụ ḅọrọ tẹ ebube nyana sakị, Ijiputi-ḅẹ-apụ ma nimi ḅa mịnẹ yẹrị anie KỊNỊNYANAḄỌ ḅee.”
19Anịtẹso Tamụnọ enjẹlị ḅe tẹ Izirẹlị ọmụ-ogbo mẹ tọrọkọ tarị sime ḅọ ḅe nwẹnị mu ịna ọḅụjụ sime; tẹ ịna tọrọkọ sime oḅuto kpo mẹ mẹnjị mu ịna ọḅụjụ simem, 20tẹ nwẹnị Ijiputi ḅẹ ọmụ-ogbo mẹ na, Izirẹlị ḅẹ ọmụ-ogbo mẹ na ogbo puu. Oḅuto mẹ nwẹnị kanakana sọ Ijiputi-ḅẹ-apụ ma pịrị, kụma anị bele sọ Izirẹlịapụ ma pịrịm, tẹ bebe ḍin mẹmgba ḅụ ọmụ-ogbo ma jen mu jen kpeki-a.
21Anịtẹso Mozizi ọ̀ ḅara sụn-pakama tọrụ mẹ dam tẹ KỊNỊNYANAḄỌ ḅe nwẹnị ịrụa-saakịarị-anga anga ḅụ kụrọ fẹrụ fiema ḅo tọrụ mẹ sukuruma ọḅụ da bebe ḍin mẹmgba ḅụ, tẹ mịẹtẹ minji mẹ ḍiema, tẹ tọrụ mẹ nwẹnị samụnọ ḅọ kpongbo-kiri mịẹ. 22#1 Kọr 10.1,2; Hib 11.29Tẹ samụnọtẹ kpongbo-kiri ọgọnọ ḅụ Izirẹlị ḅẹ apụ ma mẹnjị tọrụ mẹ ogboku sọ-mum, tẹ minji mẹ nwẹnị gbala warị-anga sọ ịn pịrị ịna ama-ḅara na, ere-ḅara na ḅụ. 23Ijiputi-ḅẹ-apụ ma ịn ḍukam, Fero asụ ma na, ori asụ-dọkụapụ na, ò kirimẹnjị-ọmụarụ mamgba na ịn ḍuka ma-mu tọrụ mẹ ogboku lam. 24Ene-ḅaa ḅẹ-yearị ogbo, KỊNỊNYANAḄỌ ḅe nwẹnị kọrịarị fịnị-ḅẹlẹ mẹ ḅio na, oḅuto kpo mẹ ḅio na ḅụ ḍiki iderima tẹ Ijiputi ḅẹ ọmụ-ogbo mẹ ẹrị tẹ nwẹnị bẹkẹma tẹmẹ-naịn-naịn kẹ Ijiputi ḅẹ ọmụ-ogbo mẹ pịrị; 25ịna kirimẹnjị-ọmụarụ ma aḅụọ kẹ lịka ḅio ḍiḅi ḅụ, anie mịẹtẹ ịn ḅarị sarama mẹnjị-a; tẹ Ijiputi-ḅẹ-apụ ma nwẹnị ḅẹẹ, “Ó yee wa Izirẹlị tọrọkọ ḍumo-mangị kọn, kẹ gotẹ ọkọ ḅẹẹarị, KỊNỊNYANAḄỌ ḅe mie Ijiputi-ḅẹ-apụ ma na owu mẹ sọ ịn pịrịarị.”
26Anịtẹso KỊNỊNYANAḄỌ ḅe nwẹnị Mozizi ḅẹẹ, “Ị́ ḅara sụn-pakama tọrụ mẹ daa, mịẹtẹ minji mẹ pịkị-ḅo Ijiputi-ḅẹ-apụ ma na, ịna kirimẹnjị-ọmụarụ ma na, ịna asụ-dọkụapụ ma na gbaịn ḅarị ḅara.” 27Mie ḅụ Mozizi ọ̀ ḅara sụn-pakama tọrụ mẹ dam, tẹ ene mẹ finji-koro ḅo dede-ḅio la tẹso, tọrụ mẹ pịkịma-ḅo anị sime, sime-ḅara simem; Ijiputi ḅẹ apụ ma ḍumo-mangị kọn ḅụ okin so ḅẹ yem, kụma KỊNỊNYANAḄỌ ḅe ịn kẹ tọrụ mẹ ogboku gbin sunm. 28Minji ma pịkịma-ḅom, tẹ kirimẹnjị-ọmụarụ ma na, asụ-dọkụapụ ma na, Fero ọmụ-ogbo mẹmgba tẹ ịn ḍuka-mu apụ ma na gbaịn-korom tọrụ mẹ ḅio; ịna ḅụụ ḅụ kpọkpọ gbọrụḅọ-sọ kirikọn-a. 29Kụma Izirẹlịapụ ma tọrụ mẹ ḅio samụnọtẹ kpongbo-kiri ọgọnọ mẹnjị-tolum, minji mẹ ịna ama-ḅara na, ịna ere-ḅara na ḅụ gbala warị-anga sọ ịn pịrị ḅara ḅụ.
30Mị-ḅara mie KỊNỊNYANAḄỌ ḅe wẹrịtẹ Ijiputi-ḅẹ-apụ ma ḅara ḅụ Izirẹlịapụ ma ḅọrọma ḅara anị ene mẹ ḅụ; tẹ Izirẹlịapụ ma Ijiputi-ḅẹ-apụ sombi fịtẹ-apụ ma ọkpa ma tọrụ mẹ akaka jia sime wararị mẹ ẹrịm. 31Izirẹlịapụ ma gburo-gburotẹ kọrịnama tẹ KỊNỊNYANAḄỌ ḅe kẹ Ijiputi-ḅẹ-apụ ma ẹngbẹsẹ ye mẹ ẹrị tẹso, tomi ma KỊNỊNYANAḄỌ ḅe ḍiki-ḅalafaam; tẹ KỊNỊNYANAḄỌ ḅe na, ọ̀ fịrịmẹnjịḅọ Mozizi na ḅụụ minini nyanam.
Currently Selected:
Paka-so 14: KBTP
Highlight
Share
Copy
Want to have your highlights saved across all your devices? Sign up or sign in
(C) The Bible Society of Nigeria
