Ịmaakị 9

1Ijeesu ộ kà a yị wa ka, “Ịzẹyịza, m maa kà a yị wụ nịnị nị, â nyị aza ẹnyị ana jẹẹ ịzẹnị, ana ahịka e yi vee sú pooro di è re, Óhomorihi mẹmẹ vaa mẹ ohinọyị anịị beri ụkata.”

Ezirẹma ẹẹta ee re igirima Ijeesu

(Imt 17.1-13; Irk 9.28-36)

2 # 2 Ipi 1.17,18 Ịrẹma ẹkụhị ịhịnọnyị, dị Ijeesu sị Ipita ọnịrị Ijemiisi beri Ịjọọnụ nọ ịrẹsụ ataba ọnẹba ọnya aanị nị. Ẹnịnya kẹnẹ ẹ yà ịzọọ nị. Dị a vara Ijeesu ẹngụ éyi ẹnịnị nị. 3Dị awuru anị kụkụ aa vwẹtẹ sẹnẹ-sẹnẹ nị. Ẹ yị nyị ọza ịnya ịnị ẹhẹ ọnọnị, ana zụ vavọọ mẹ ka ịsa ọ̀ vwẹtẹ. 4Di e vene re ka Erija ọnịrị Imosiisi ệ vẹ nị. Dị ẹnịrị Ijeesu aa kà ịrẹyị nị. 5Dị Ipita kà a yị Ijeesu ka, “Nda, ộ da zoza ka yâ yà ịzẹnị. Jẹẹ ya jị ajẹngụ ẹẹta tụ́ ịzẹnị: ọnyara ọ̀ọ vị áawụ, dị ọnya vị Ímosiisi, dị ọsa vị Éerija.” 6Ipita ọ yị yẹ ịsa a vọrọ ka ọ̀ kà, agụvị ka angwa ee hí wa ẹtẹẹtẹrẹ. 7#Imt 3.17; Ịmk 1.11; Irk 3.22Dị eguhi ọnya aanị dà và kú wa nị. Dị ọngwẹ ọnya hụụnị eguhi ọnọọ vẹ ka, “Ozi emi oni mi sì ịrẹyị anị yị, waa wụ́ ịrẹyị anị nịnị!” 8Kẹnẹ, dị ẹ kana eyi nị, e yi kuku re ọza ọnyọọnyị, ẹ yị vị Ijeesu ọnịnya kẹnẹ. 9E mèe chíi hụụnị atabaa vẹ, di o hú wa ụvọ ka asị ẹ kà a yị ọza ọnyọọnyị ịsa enee re aanị pooro dị ọnị Ozi ọza onigirima ọ̀ ha hụụnị isu. 10Dị ẹnịnị sị ịrẹyị ọnọọ tẹ ịnịnẹ ẹnịnị nị. Dị ẹyaa họ̀ ẹngụ ka, “Sị ẹ vị iruvo ọyịha hụụnị isu kẹ?” 11#Ịma 4.5; Imt 11.14Dị ẹ họ̀ Ijeesu use ka, “Sị ẹ vẹ dị ọzwọzọda nịnị kà a ka Erija ọ vịdị vaa vẹ nị?” 12Dị Ijeesu ka, “Ịzẹyịza, Erija ọ vịdị vẹ nị, ka ọnị ọ̀ va sị avaba ịsa tụ́ udi anị. Ama sị ẹ vẹ dị a maanị chẹrẹ ẹ ka Ozi ọza onigirima vaa rị ụya irenyi-irenyi, di e re yi ọọ tịtẹ? 13Dị ma kà a wụ, Erija ọ zị vẹ da, dị ẹ mẹ̀ ịsa ene zé wa eyi hi ọọ nị, anka Íwe Ohomorihi mẹ̀ kà a ini oze anị.”

Ijeesu ộ dụ ụhwẹ echu hụụnị ẹngụ ozi ọnọrụ ọnya

(Imt 17.14-21; Irk 9.37-43)

14Ịjị ẹ vavẹ ve tù ezirẹma anị ana vọ, di e re ka ọkọnị aza gụ kara wa nị. Dị ọzwọzọda ẹnyị ee pe wa nyị ahankata nị. 15Aza mè yi re Ijeesu kẹnẹ, o si hí wa irenu ẹtẹẹtẹrẹ, di e wuse zwe na gẹrị ọọ, dị ẹ kụ́ ọọ nị. 16Dị ọ họ̀ wa use ka, “Sị ụ waa nyị ahankata anị nịnị?” 17Dị ọza ịnya ịnị ọkọnị aza ẹnẹẹ ka, “Nda, ozi emi mị sị vẹ ịdị awụ nọ, ộ nyị ụhwẹ echu ene gu ọọ irenu. 18Ọ̀ọ sị ọọ za, dị aa jị ọọ kú ẹtẹ, di ee kú irenu, dị aa rị anyị, dị ọ sị tana geri-geri. Dị mị ka ezirẹma awụ ẹ̀ dụ ụhwẹ echu ọnọọ jịnẹ nị, ama ẹ yị nyẹngụ dụ ọọ.” 19Dị Ijeesu ka, “Sị ẹ vẹ dị ẹwụ nịnị anụmẹ ọgọnị ọ̀ yị dọ wụ́ vụrụ-vụrụ aanị? M mẹmẹ kụkụ vaa yà ịdị awụ nịnị kùu hu aanị? Ịzị mị vaa sị ẹngụụ dọ ịrẹyị awụ nịnị nee tù? Sị ozi ọnọọ vẹ!” 20Dị ẹ sị ọọ ká Ijeesu na nị. Ụ́hwẹ echu ọnọọ mè yi re Ijeesu kẹnẹ, dị ọ sị ozi ọnọọ za, dị ọ hyẹdụ nya ẹtẹ, di ee muna ẹtẹ, di ee kú irenu nị. 21Dị Ijeesu họ̀ ada anị use ka, “Ye re ụmẹ ọnọọ hụrẹ maanị sị yà rị ọọ?” Dị ọ ka, “Ọ mẹ̀ hụrẹ vị ozweyi yọ nị. 22Ụpọsa-ụpọsa ọ sịị̄ sị ọọ ne ngụ ịra, ọnịrị ini enyi, ka ọnị ọ̀ wụ ọọ nị. Ama àa nyị ịsị ụ zụ mẹ, vayị ayị, dị ụ wa mẹ ọgụvọ yị!” 23Dị Ijeesu ka, “Sị ụ waa kà kẹ, màa nyẹngụụ? Ọza ana àa sị ayị tụra mị, ọ nyẹngụ mẹ avaba ịsa bemi-bemi.” 24Dị ada ozi ọnọọ wụsẹ nowu zẹtẹ, dị aa ká ẹgọ, dị ọ ka, “Nda, mâ sị ayị tụra wụ de; gụ mị ụvọ dị ma sị ayị tụra wụ hu avọọ!” 25Íjeesu mè re ka aza wusee zwee vẹ, dị ọ mẹ da yị ụhwẹ echu ọnọọ nị, dị ọ ka, “Ẹwụ ụhwẹ, eneē gu ọza irenu ọnịrị ụtọ, maa mẹ̀ ọdaa wụ, jịnẹ hụụnị ẹngụ anị, asị ụ kụkụ varẹma ngụ ịnị ẹngụ anị!” 26Dị ụhwẹ echu ọnọọ nowu zẹtẹ, di o henyi ozi ọnọọ jigi-jigi, dị ọ jịnẹ hụụnị ẹngụ anị nị. Dị ozi ọnọọ sị mẹẹ anka oku avọọ nị. Dị aza ka ô wusu nị. 27Dị Ijeesu sị ụvọ gẹ ẹ ụvọ kwẹẹtẹ, dị ọ jẹẹ nị. 28Ịjị Ijeesu sị ngụ ini eehi ọnya, dị ezirẹma anị tangwa were họ̀ ọ ka, “Sị ẹ vẹ dị ẹyị ẹ̀ yị zụ dụ ụhwẹ ọnọọ jịnẹ?” 29Dị Ijeesu kà a yị wa ka, “Ẹ yị nyị ịsị a zụ sị dụ ẹngụ ọnọnị jịnẹ, ẹ̀ yị vị aduwa (ọnịrị awẹ ọyịba).”

Ijeesu ọ rẹ kà ịrẹyị isu anị

(Imt 17.22-23; Irk 9.43-45)

30Ijeesu ọnịrị ezirẹma anị ệ hụụ ịzọọ, dị ẹ zị oze Igariri na para hu nị. O yi sì ka ọza ọnyọọnyị ọ̀ yẹ ịzị ẹnị yà, 31agụvị ka vị aa zụ̀ ezirẹma anị ịsa nị. Dị ọ kà a yị wa ka, “A vaa sị ẹmị Ozi ọza onigirimaa chire aza ụvọ, dị ẹ wụ̀ mị; ẹ̀ẹ sị mị wụ, ịhyẹgwẹta anị dị mị rẹ ha hụụnị isu.” 32Ama ẹnịnị ẹ yị yẹ ịsa aa kà; angwa ee hí wa, ọ yị họ̀ ọ use.

Ene vị ene hu kere-kere?

(Imt 18.1-5; Irk 9.46-48)

33E ve si tù Ikapanawumi. Dị ẹnịnị ngụ ini irehi ọnya nị. Dị Ijeesu họ̀ wa ka, “Sị ụ waa nyị ahankata anịị vẹ óze nịnị?” 34#Irk 22.24Ẹnịnị e yi tụ́ ohi, agụvị ka ẹ màa vẹ óze, ê pe ẹngụ nyị ahankata ka ene hu ịnị ẹnịnị. 35#Imt 20.26,27; 23.11; Ịmk 10.43,44; Irk 22.26Dị Ijeesu yaayịtẹ, dị ọ hị́ ezirẹma anị ẹwụrẹva, dị aa kà ịrẹyịị yị wa nị, dị ọ ka, “Ọza ene èe sì ka ọnị ọ̀ vị ọdọvịdị, â vọrọ ka ọ̀ sị ẹngụ anị tụ́ udi ọdịrẹma, dị ọ̀ rẹ vị ozi ahụ avaba aza.” 36Ịjọnọọ dị ọ va sị ozi ọnya aanị jẹẹ ịnị akakana ẹnịnị nị. Dị Ijeesu há ụvọ kara a nị, dị ọ kà a yị wa ka: 37#Imt 10.40; Irk 10.16; Ịjọ 13.20“Ọza ana àa dọ ẹngụ ezi eweyi ẹnẹnị pe ẹngụ agụvị ịrẹha amị, ẹmị ọ rẹ dọ pe ẹngụ avọọ nị. Ọza ana àa dọ mị pe ẹngụ, ẹ yị vị ẹmị gẹdẹ-gẹdẹ ọ dọ pe ẹngụ, ama ọza ana tụ́ mị vẹ ẹhẹ ọ dọ nị.”

Ọza ẹnẹ ẹ̀ yị bàrà yị, ẹ yị rị ọọ ọ yà nị

(Irk 9.49-50)

38Ịjọọnụ ộ kà a yị Ijeesu ka, “Nda, yê re ọza ịnya ana aa sị ịrẹha awụụ dụ ụhwẹ echu nịnị ị jịnẹẹ hụụnị ẹngụ aza, (ama ọ yị dụ yị zịịzị); dị ị kà a yọ ka ọ̀ navọ nị, agụvị ka ọ yị dụ yị zịịzị.” 39Dị Ijeesu ka, “Naavọ, agụvị ka ẹ yị nyị ọza anaā sịị ịrẹha amịị mẹ̀ ụkọrọ ohyozirenu, ana kụkụ wụsẹ nyẹngụ kà ịrẹyị odivi amị; 40#Imt 12.30; Irk 11.23agụvị ka ọza ẹnẹ ẹ̀ yị bàrà yị, ẹ yị rị ọọ ọ yà nị. 41#Imt 10.42Ịzẹyịza m maa kà nị, ọza ana àa ká enyi ako ọnya yị wụ nịnị ka we hú ọọ, agụvị ka wâ vị Íikirisiti nịnị, ẹ yị zụ nyị ka ọ yị vaa rị ọgụ anị.”

Asị ụ mẹ ọza ka ọ̀ mẹ ịvị!

(Imt 18.6-9; 5.13; Irk 17.1-2; 14.34-35)

42“Ọza ana àa mẹ ka ọnya ini ezi eweyi ana dọ mị wụ́ aanị, ọ̀ mẹ ịvị, ọ yaanị dahi hu yọ ka à sị ịrẹtọkwayị ọbanyị, dị ẹ̀ kuru ọọ gẹ ẹ ọrọkọ, di è ne e ngụ oku. 43#Imt 5.30Àa vị ụvọ awụ ọ mẹ ka wa mẹ ịvị nị, jị ọọ ne ta! Ộ dahi ka wa vị ọjavụ ụvọ dị ụ wa yàra pooro, hu ka wa nyị ụvọ ẹyịva, dị ụ wa nọ ini ẹkụra, ịzị ịra ò yi mē mi 44[di ikukurumi anị ò yi mē sú, dị ịra ò yi mē mi] 45Àa vị ahụ awụ ọ rẹ mẹ ka wa mẹ ịvị nị, jị ọọ ne ta! Ộ dahi ka wa vị ọjavụ ahụ, dị ụ wa yàra pooro, hu ka wa nyị ahụ ẹyịva, dị ụ wa nọ ini ẹkụra 46[ịzị ikukurumi anị ò yi mē sú, dị ịra ò yi mē mi] 47#Imt 5.29Àa vị eyi awụ ọ mẹ ka wa mẹ ịvị nị, tụ̀ ọọ ne ta! Ộ dahi ka wa sị eyi ọnya ngụ ịzị Ohomorihi yà aa mẹ ịjọva, hu ka wa nyị eyi ẹyịva, dị ụ wa ngụ ini ẹkụra, 48#Ayị 66.24ịzị ikukurumi anị ò yi mē sú, dị ịra ò yi mē mị. 49A vaa sị ịraa mẹ ka ọzọza ò hine anka anọ avọọ. 50#Imt 5.13; Irk 14.34,35Anọ ô hine, ama ọ̀ọ sị uhine anị ne ta, sị a kụkụ aa sịị vara a ka ò hine? Nyị uhine véné anọ nịnị, di u we dudu ra vabẹ ịnị ẹngwọọrọ nịnị!”

Currently Selected:

Ịmaakị 9: EBTP

Highlight

Copy