Ịmaakị 1

Ịjọọnụ Ọhwọzenyi ô tenyi ẹtẹ zi Ijeesu

(Imt 3.1-12; Irk 3.1-18; Ịjọ 1.19-28)

1Aanị énube ọyịza Ijeesu Ikirisiti Ozi Ohomorihi meme nyima nị, 2#Ịma 3.1anka ọ́nịsẹ nịnị mẹ̀ chẹrẹ ẹ ka, “Re, ọnụtụ amị yị, maa tụ́ ọọ dọ ọvịdị awụ, di ò nee tenyi oze zí wu.” 3#Ayị 40.3Â nyị ọza ịnya aanị ana yà ịnị ụnọmị ana aa nọọ ka, “Tenyi oze Ananyị yị tịtẹ yọ nịnị, tenyi oze anị, dị ọ̀ vọrọ ẹtẹẹtẹrẹ!” 4Ịjọọnụ ọhwọzenyi ọ vavẹ, ộ nọ ịnị ụnọmị, dị aa kà ịrẹyị Ohomorihi yị aza nị, dị ọ ka, “Ro ịnẹ varẹma hụụnị ebira odivi awụ nịnị, dị ma mẹ̀ ọyịhwọzenyi yị wụ nịnị, dị Ohomorihi ọ̀ vagu wu ịnị ịvị awụ nịnị!” 5Dị avaba Anijudiya nịnị ẹnịrị Anijerusarẹmị nịnị aa nọ ịzị Ịjọọnụ yà nị. Ẹ màa dọ irenu ịvị ẹnịnị, dị Ịjọọnụ aa mẹ ọyịhwenyii yị wa ini Okuha Ịjọdanị nị. 6#2 Ohi 1.8Ịjọọnụ ô chire awuru anaa sị ẹyị ịnyaakụmị hí ịta anị. Dị ọ rẹ sị ịtụmpaha mẹ ụbaja ọnị ọ sị sụ́ ọtẹ nị. Akụvarịva ọnịrị ẹhụ ọ vị ịsọyịrị anị nị. 7Ọ màa kà ịrẹyị Ohomorihi, dị ọ ka, “Â nyị ọza ịnya aanị ana vaa vẹ ị́rẹma amị. Ọza ọnọọ ọ nyị ụkata hu mi ẹtẹẹtẹrẹ nị. Mẹ yị hyakụ yà ọza ana vọrọ ka ò nyima dị ọ̀ ngwa adava hụụnị ahụ anị. 8Ẹmị aa sị enyi mẹ ọyịhwenyii yị wụ nịnị, ama ọnị vị ana vaa sị Ụhwẹ Ọnịnị mẹ̀ ọyịhwọzenyi yị wụ nịnị.”

Échu mẹmẹ zama Ijeesu re

(Imt 3.13—4.11; Irk 3.21-22; 4.1-13; Ịjọ 1.32-34)

9Ẹkụhị ọnya Ijeesu ộ hụrẹ ẹkụra Ịnazarẹtị ịnị ẹtẹ Igariri vẹ. Ịjọọnụ ộ mẹ̀ ọyịhwọzenyi yọ ini Okuha Ịjọdanị. 10Íjeesu mẹ̀ yị jịnẹ hụụnị enyi vẹ kẹnẹ, di o re ka ihinẹba aa naa hi ẹtẹ, dị Ụhwẹ Ọnịnị ee chí vẹ anka arivadi avọọ, di o ve kú ọọ nị. 11#Oyn 22.2; Ahẹ 2.7; Ayị 42.1; Imt 3.17; 12.18; Ịmk 9.7; Irk 3.22Dị ọngwẹ ọnya hụrẹ ẹbẹẹba vẹ ka, “Ẹwa vị Ozi emi oni mi sì ịrẹyị anị nị, ịnẹ amị ô hine tù wu ẹtẹẹtẹrẹ.” 12Obooboro ọnọọ dị Ụhwẹ Ọnịnị sị Ijeesu nọ ịnị ụnọmị nị. 13Ijeesu ộ yà ịzọọ pooro, ộ mẹ̀ ẹkụhị ẹbẹẹva ịzọọ. Dị Echu na zama a re nị. Uye ịnị avị nịnị vị ana rẹ yà ịzọọ bẹẹ, ama anggẹẹrị nịnị aa mẹ ozi ahụụ yị Ijeesu nị.

Ijeesu ộ hị́ ozube ivovo ẹẹna

(Imt 4.12-22; Irk 4.14-15; 5.1-11; Ịjọ 1.35-51)

14Ịrẹma anaa sị Ịjọọnụ za tụ́ ịnị ẹngwa, dị Ijeesu va ngụ Igariri, dị aa kà enube ọyịza Ohomorihi nị, 15#Imt 3.2dị ọ ka, “Ụmẹ o si tù, ọ sị vọ chee, dị ịjọva Ohomorihi ọ̀ vẹ. Ro ịnẹ varẹma hụụnị ebira odivi awụ nịnị, dị ụ wa dọ enube ọyịza wụ́ nịnị!” 16Ịjị aa parahu ụtọ irehu Igariri, di o re Ịsayịmọnị ọnịrị Andụrụ ọyịnyara anị, e mèe ne ọhaa ngụ enyi, agụvị ka ozube ivovo ẹ vị nị. 17Dị Ijeesu kà a yị wa ka, “Vẹ, dị waa dụ mị ịrẹma nịnị! Mị vaa vara wụ nịnị aza anaā kụ́ azaa vẹ, anka ụ mẹ̀ẹ̄ kụ́ ivovo avọọ.” 18Obooboro ọnọọ dị ẹ và ọha ẹnịnị hi ẹtẹ, dị ẹyaa dụ ọ ịrẹmaa na nị. 19Ọ mẹ̀ rẹ da zị chee, di o re Ijemiisi, ozi Izebedi ọnịrị ọyịnyara anị Ịjọọnụ nị. Ẹnịnị vị ana yà ịnị ẹpa ẹnịnị, dị ẹyaa gẹ ọha ẹnịnị nị. 20Dị ọ wụsẹ hị́ wa nị, dị ẹ navọ ada ẹnịnị ọnịrị anụkọrọ anị tụ́ ịnị ẹpa ọnọọ, dị ẹyaa dị ụ ọọ ịrẹmaa na nị.

Ijeesu ộ nyị ọda

(Irk 4.31-37)

21Ẹnịnị ẹ va ngụ Ikapanawumi. Ẹ́kụhị ụhwọtụ mè yi tù kẹnẹ, dị Ijeesu ngụ ini irehi ahẹkẹ Aniju, dị aa sị ịsaa zụ̀ aza nị. 22#Imt 7.28,29Oze ana aa zịị zụ̀ wa ịsa vị ene hí wa irenu, agụvị ka aa zụ̀ wa ịsa anka ọza ana nyị ọda avọọ; ọ yị zụ̀ wa ịsa anka ọ́zwọzọda nịnị mẹ̀ẹ̄ zụ̀ aza ịsa. 23Â nyị ọnọrụ ọnya aanị ana yà ini irehi ahẹkẹ Aniju ọnọọ, ộ nyị ụhwẹ echu. Di o nowu tụ́ ẹba, 24dị ọ ka, “Navọ yị hẹẹ, sẹ jị gẹ ẹyịrị ẹwụ, Ijeesu Anịnazarẹtị? Ụ wáá vẹ ka wa va wụ yị nị? Mâ yẹ ọza ọnị ụ vị; ẹwa vị Ọza Ọnịnị Ohomorihi nị.” 25Dị Ijeesu tụ́ ọọ ohuvọ dị ọ ka, “Ụsẹ mẹ hẹẹ, dị ụ wa jịnẹ hụụnị ẹngụ ọnọrụ ọnọọ!” 26Dị ụhwẹ echu ọnọọ henyi ọnọrụ ọnọọ jigi-jigi, di o nowu zẹtẹ, dị ọ jịnẹ hụụnị ẹngụ anị nị. 27O si hí avaba aza ẹnẹẹ irenu ẹtẹẹtẹrẹ; agụvị avọọ dị ẹyaa họ̀ ẹngụ use ka, “Ẹngụ ịrẹyị sẹ vị ọnọnị aanị? Ịrẹyị ọwọọwa wáá rẹẹ yị? Ọnọrụ ọnọnị ộ sị ụkata mẹ ọda tụra ụhwẹ echu nịnị ịrẹsụ, ệ wụ́ chire e.” 28Aza ệ wụsẹ sị ịrẹyị Ijeesu wụ́, dị ẹ na aa kà a ngụ ẹkụra Igaririi zịịzị nị.

Ijeesu ộ mẹ̀ aza ụkụ

(Imt 8.14-17; Irk 4.38-41)

29Ẹ mẹ̀ yị hụụnị irehi ahẹkẹ Aniju ọnọọ kẹnẹ, dị ẹ nọ ini eehi Ịsayịmọnị ọnịrị Andụrụ nị, ẹnịrị Ijemiisi beri Ịjọọnụ ẹ zị na nị. 30Ọnyị ose Ịsayịmọnị vị ọnị ọvanggoro za, dị ọ hụtẹtẹ nị. Dị ẹnịnị wụsẹ kà a yị Ijeesu nị. 31Dị ọ vẹ, dị ọ sị ụvọ gẹ ọnẹẹ ọnọọ kwẹẹtẹ nị. Dị ọvanggoro anị ọnọọ ộ wụsẹ ta, dị o sì wa ọzọga nị. 32Ịjị oruva si tù, ọ́ yị mẹ̀ sị ngụ ẹtẹ, dị aza kụ́ avaba ọnịkụ ọnịrị aza ana nyị ụhwẹ echu nịnị ká Ijeesu vẹ nị. 33Avaba anẹkụra ẹnẹẹ ệ wara gụ enoze irehi oni Ijeesu yà. 34Ijeesu ộ mẹ̀ aza ọrụrụ-ọrụrụ ụkụ irenyi-irenyi ana za wa. Dị ọ rẹ dụ ụhwẹ echu ọrụrụ-ọrụrụ jịnẹ hụụnị ẹngụ aza nị. Ọ yị zẹẹ ka ụhwẹ echu ẹnẹẹ ẹ̀ kà ịsọnyị-ịsọnyị, agụvị ka ệ yẹ Ijeesu.

Ijeesu ộ kà ịrẹyị Ohomorihi ịnị ẹtẹ Igariri

(Imt 4.23; Irk 4.42-44)

35Ẹnẹnẹ eyinẹhẹ anị, ẹ́tẹ mèe yii vee hweyi kẹnẹ dị Ijeesu kwẹẹtẹ, dị ọ jịnẹ nọ aha ọnya aanị ịzị aza ẹ̀ yị yà nị, dị ọ na mẹ̀ aduwa ịzọọ nị. 36Dị Ịsayịmọnị ọnịrị anda ẹnịnị ee sì ọọ zị nị. 37Ịjị e si oo re, dị ẹ kà a yọ ka, “Avaba aza ee sì wu ọ.” 38Ama dị Ijeesu kà a yị wa ka, “À vẹ ya nọ ịnị ẹkụra ana vọ kara yị aanị, dị ma rẹ na kà ịrẹyị Ohomorihi yị wa bẹẹ; agụvị ka ụvị avọọ mị vẹ nị.” 39#Imt 4.23; 9.35Dị aa ngụ ẹtẹ Igariri zịịzị nị, dị aa kà ịrẹyị Ohomorihi ini irehi ahẹkẹ Aniju ẹnịnị, dị aa dụ ụhwẹ echu nịnị jịnẹ hụụnị ẹngụ aza nị.

Ijeesu ộ mẹ̀ ọnịkwọbanyị ọnya ụkụ anị

(Imt 8.1-4; Irk 5.12-16)

40Â nyị ọnịkụ ọbanyị ọnya ana ká Ijeesu vẹ, dị ọ jị idinku ku ẹtẹ, dị aa dá ịpẹẹ yọ nị. Dị ọ ka, “Wèe sì, wa nyẹngụ mẹ ụkụ amịị mị.” 41Ayị anị ộ vá Ijeesu ẹtẹẹtẹrẹ. Dị ọ tana ụvọ anị, dị ọ sị kanyị ọọ nị, dị ọ ka, “Mê sì de, ụkụ awụ ọ̀ ta!” 42Ọ mẹ̀ yị kà a kẹnẹ, dị ụkụ ọbanyị ọnọọ wụsẹ ta hụụnị ẹngụ anị nị. 43Ijeesu ô hú ọọ ụvọ ẹtẹẹtẹrẹ ka ọ̀ wụsẹẹ na; 44#Ire 14.1-32Dị ọ rẹ kà a yọ ka, “Re ka wẹ yị kà a yị ọza ọnyọọnyị o! Sị ẹngụ awụ na zụ̀ ohirẹsụ irehi Ohomorihi, ka â mẹ wụ ụkụ; dị ụ wa na mẹ ịsị Imosiisi kà a ka wa mẹ”. 45Ama dị ọnọrụ ọnọọ na, dị ọ naa kà a yị aza ọrụrụ-ọrụrụ, dị aa kà a zịịzị nị. Agụvị avọọ Ijeesu ọ yị kụkụ nyẹngụ va ngụ ịnị ẹkụra ini eyigede, dị ọ na yà ịzị aza ọ̀ yị yà nị. Aza vị ana aa yịị hara hụrẹ avaba aha nee tù ọọ ịzọọ.

Currently Selected:

Ịmaakị 1: EBTP

Highlight

Copy