Imatiwu 24

Ijeesu ka o yi vee kù di irehi Ohomorihi ò wú

(Ịmk 13.1-2; Irk 21.5-6)

1Ijeesu ộ jịnẹ hụụnị irehi Ohomorihi vẹ, dị ezirẹma anị ká a vẹ ka ẹnị ẹ̀ sị zụ̀ ọọ, a mẹmẹ dà irehi Ohomorihi nị. 2Dị Ijeesu kà a yị wa ka, “U wee re avaba irehi ẹnẹnị nịnị? Ịzẹyịza m maa kà wụ nị, ẹ yị nyị ịrẹta ikonya ana a vaa navọ tụ́ ịrẹsụ ọsa. Vi e vee wú waa ha saka-saka nị.”

Apọtẹrẹwa ẹzẹtẹ ẹhẹ

(Ịmk 13.3-23; Irk 17.23-24; 21.7-24)

3Ijeesu ộ nọ ịrẹsụ Ataba Orivi, dị ọ na yaayịtẹ ịzọọ nị. Dị ezirẹma anị tangwa ká a vẹ dị ẹ ka, “Kà ẹ yị ụmẹ ọnị ịsa ẹnẹnị vaa sịị mẹ. Sị ẹ vị apọtẹrẹwa ana vaa sị zụ̀ ka waa vaa vaavẹ, ọnịrị ka ẹhẹ raa vaa ta?” 4Dị Ijeesu tụ́ ohi, dị ọ ka, “Si eyi pe ẹngụ awụ nịnị, oo! Asị ụ zẹẹ ka à sị wụ nịnị nyeeyi! 5Aza ẹnyị vaa rị ịrẹha amị, dị ẹ vẹ dị ẹ ka ẹnị ẹ vị Ikirisiti nị, dị ẹnịnị vene aza ọrụrụ-ọrụrụ. 6Ụ vaa wụ́ ekuku ịrẹkụ nịnị ọnịrị ụha ịrẹkụ nịnị, ama asị ụ zẹẹ ka ayị awụ nịnị ọ̀ vazi! Ẹ yị zụ nyị ka ọ yị vavọọ yà, ama ẹzẹtẹ ẹhẹ ọọ̀ yị vẹ. 7Anẹkụra ẹnyị vaa kwẹẹtẹ tù ọsa, dị ẹkụra ohinọyị ẹnyị rẹ kwẹẹtẹ tù ọsa. Ụngwẹ vaa kụ̀, ẹtẹ vee henyi jigi-jigi aha ọrụrụ-ọrụrụ. 8Avaba ẹsẹnị aa sịị zụ̀ ka vị ụyọrị sẹsẹ nyima avọọ nị. 9#Imt 10.22Ịjọnọọ a vaa za wụ nịnị dị a ka à sị ụya rị wụ nịnị, dị a wụ wụ nịnị. Avaba anẹhẹ vaa nyị ịhyẹrẹ awụ nịnị agụvị amị. 10Aza ọrụrụ-ọrụrụ vaa hyẹdụ hụụnị ẹdọwụ ẹnịnị. Ịjọnọọ di eyee sì iruvo ẹngụ, dị ẹ rẹ yaa kụ́ ayị ẹngụ. 11Ọnịsẹ ireche nịnị vaa vẹ, di e vene aza ọrụrụ-ọrụrụ. 12Agụvị ka ịvị vaa banyị ẹnẹmẹhị, aza ọrụrụ-ọrụrụ ẹ yị kụkụ sì ịrẹyị aza a mẹ̀ vọrọ. 13#Imt 10.22Ama ọza ana àa sị ẹngụ dọ ọ pooro ne tù ẹzẹtẹ, ọnị a vaa dọ ọ há nị. 14A vaa kà enube ọyịza ịjọva Ohomorihi ịnị avaba ẹhẹ, agụvị dị ọ̀ vị ivenu yị avaba anẹhẹ; ịjọnọọ ọgọnị, dị ẹzẹtẹ ẹhẹ vẹ. 15#Ịda 9.27; 11.31; 12.11Agụvị avọọ, u vee re ‘Ịsa Odivi aha ọnịnị ịzị ẹ yị vọrọ’ ọnị Ịdanịyẹrị ọnịsẹ kà ịrẹyị anị. (Ọza ana àa kà iwe ọnọnị, ò re ka ọnị ộ yẹ ịrẹyị ọnọnị!) 16Ịjọnọọ aza ana aa yà Ijudiya, è zwe nọ ịrẹsụ ataba! 17#Irk 17.31Ọza ana àa yà ịrẹsụ irehi, asị o chí nọ ini eehi na sị ịsọnyị-ịsọnyị! 18Ọza ana àa rẹ yà ịnị aarẹ, asị ọ varẹma nọ ini eehi na sị awuru anị! 19Ọ vaa daa divi yị ọnịrẹẹ nịnị ọnịrị aza ana sị ozi rị ụvọ ịnị ụmẹ ọnọọ. 20Waa mẹ̀ aduwa nịnị ka asị ịrẹyị ẹnẹẹ mẹ ịnị ụmẹ ọgụ, asị ọ rẹ vị ụmẹ ẹkụhị ụhwọtụ! 21#Ịda 12.1; Ẹtẹ 7.14Agụvị ka ịhị ọnọọ ụya ene vee chí hi ẹtẹ, ẹ̀ yị vịdị vavọọ nyị ụya da, Óhomorihi mẹ̀ hụrẹ mẹ ẹhẹ pooro ve tù ọyaanị. A mā rẹ vana vavọọ nyị ị́rẹma anị. 22Ẹ̀ yị vị Ohomorihi nyị hụụnị ẹkụhị ẹnẹẹ, ẹ yị hyakụ nyị ọza ikonya ana aa há. Ama agụvị aza oni Ohomorihi sị nyị, ộ nyị hụụnị ẹkụhị ẹnẹẹ. 23Ụmẹ ọnọọ ọza ọ̀ọ kà a wụ nịnị ka: ‘Re, Ikirisiti yọ!’ à vị ka ‘Re ọnị ọ yà ịzọsọọ avọọ nọ!’—asị ụ dọ ọ wụ́! 24Agụvị ka onireche nịnị ana ka ẹnị vị ikirisiti, ọnịrị ọnịsẹ ireche nịnị vaa kwẹẹtẹ, dị ẹyaa mẹ̀ ụkọrọ ohyozirenu ẹbanyị-ẹbanyị, agụvị ẹ̀ nyẹngụ si vene aza oni Ohomorihi sị nyị, ẹ̀ẹ zụ mẹ̀ ẹ. 25Re, mee vịdị jintu sị ọọ kà wụ nịnị! 26#Irk 17.23,24Agụvị avọọ, ọza ọ̀ọ kà a wụ nịnị ka: ‘Re, Ikirisiti ọ yà ịnị ụnọmị avọọ nị’, asị ụ nọ ịzọọ nịnị! Ẹ̀ẹ rẹ kà a ka: ‘Ọ yà ini aku ịzọsọọ’, asị ụ dọ ọ wụ́ nịnị! 27Ẹmị Ozi ọza onigirima vị ana vaa vaavẹ anka ị́nyanya mẹ̀ẹ̄ rị hụrị eyi ọnị ọyịị̄ zịị hụrẹ na ngụ ịzị ọọ̄ zịị naa ngụ ẹtẹ avọọ. 28#Irk 17.37Agụvị ka ịzị oku ọ̀ọ yà, ịzọọ ụ́ba nịnịị̄ kụ́ụ gụ nị.”

Ọyị vaavẹ Ozi ọza onigirima

(Ịmk 13.24-31; Irk 21.25-33)

29 # Ayị 13.10; Ijow 2.10,31; 3.15; Ẹtẹ 6.12; Ayị 13.10; Ezk 32.7; Ijow 2.10; 3.15; Ayị 34.4; Ẹtẹ 6.13 “Ịjị ụmẹ ụyọrị ẹnẹnị ọ̀ọ ta kẹnẹ, ọyị vee hozi, ụhwẹ ọ yị kụkụ vaa vwẹtẹ, dị ụzọmị nịnị jị hụụnị ihinẹba, dị ụkata ẹbẹẹba re henyi. 30#Ịda 7.13; Iza 12.10-14; Ẹtẹ 1.7Ịjọnọọ, dị a nyị apọtẹrẹwa ẹmị Ozi ọza onigirima ẹ́bẹẹba. Dị avaba anẹhẹ aa jị òrèrè, di e re ka ẹmị Ozi ọza onigirima aa vẹ ini eguhi ẹbẹẹba beri ụkata ọnịrị igirima. 31Dị ọpanyị ọbanyị ọnya sụ́ ịrẹyị, dị mị tụ́ anggẹẹrị amị nịnị ka ẹ̀ nọ avaba ẹhẹ, dị ẹ̀ na kụ́ avaba aza amị gụ hụrẹ avaba aha ịzị ẹhẹ ọnịrị ẹbẹẹba na ta hi.

32“Agụvị avọọ, sị ọchị ezu zama ịrẹyị ọnọnị re nịnị: Ịjị àa há avọ, di ee nyị avị nị, wâ yẹ nịnị ka ị̀rẹ̀sụ̀ aa vẹ. 33Avọọ gẹdẹ-gẹdẹ, wèe re ịsa ẹnẹnị nịnị, yẹ nịnị ka maa vaa vẹ, mâ hyakụ va sị ngụ enoze bẹẹ. 34Ịzẹyịza m maa kà a wụ nịnị nị, aza ene hi ẹhẹ booro aanị, ẹ yị vaa taa hụụnị ẹhẹ, dị avaba ịsa ẹnẹnị ẹ̀ mẹ. 35Ihinẹba ọnịrị ẹhẹ vaa ta, ama àa vị ịrẹyị amịị yọ, o yi vee vú.”

Wee zí nịnị!

(Ịmk 13.32-37; Irk 17.26-36; 12.42-46)

36“Ama ẹkụhị ọnọọ ọnịrị ụmẹ ọnọọ gẹdẹ-gẹdẹ ẹ yị nyị ọza ana yẹ. Anggẹẹrị nịnị ene hi ẹbẹẹba ẹ yị hyakụ yẹ, Ozi Ohomorihi ọnị ụvọta ọ yị hyakụ rẹ yẹ bẹẹ, ẹ̀ yị vị Ada amị ọnịnya kẹnẹ. 37#Oyn 6.5-8Ịhị ẹmị Ozi ọza onigirima àaa vẹ, vị ọ vaa yà anka ụmẹ Inowa avọọ nị: 38Dị ọhaara enyi ọnọọ va kụ́ ẹhẹ, aza vị ana aa rị, di eyee hú, dị ẹyaa nyị ọnẹẹ, dị ẹyaa sị ozii gà ọnọrụ. Avọọ ẹ mẹ̀ mẹ pooro ne tù ẹkụhị oni Inowa ngụ ẹpa nị. 39#Oyn 7.6-24Ama aza ana vọ ẹ yị yẹ ịsị aa vẹ pooro dị ọhaara enyi ọnọọ vẹ, dị ọ va kụ́ avaba ẹnịnị. Avọọ ọ mẹ̀ rẹ vaa yà, ịhị ẹmị Ozi ọza onigirima àaa vẹ nị. 40Ịhị ọnọọ aza ẹnị ẹẹva vaa yà ịnị aarẹ, dị a sị ọnya, dị a navọ ọsa. 41Anyẹnẹẹ ẹẹva vaa yà aha ọnya, di e dudu aa kwọ ịsa, dị a sị ọnya, dị a navọ ọsa. 42Agụvị avọọ wee zí nịnị, agụvị ka wẹ yị yẹ ụmẹ ana Ananyị yị aa sịị vẹ. 43#Irk 12.39,40Dị ụ wa yẹ nịnị ka adarehi ọ̀ọ yẹ ụmẹ oni oyi vaa sị vẹ, vị ọ yaanị ee sere ẹtẹ nị, dị ọ yị yaanị zẹẹ ka oyi ọ̀ chaka ọnị irehi. 44Agụvị avọọ ẹwụ nịnị ọ̀ rẹ vavọọ zị́, agụvị ka Ozi ọza onigirima vị ana vaa vẹ ịnị ụmẹ oni wè yi ro nịnị. 45Ẹnẹ vị ozi ahụ ọnịrẹyịzẹyịza ana yẹ ịrẹyị, ọnị ọga anị vaa sị ezi ahụ ana vọ chire ụvọ ka ọ̀ọ sị ịsọyịrịị yị wa ịnị ụmẹ ana vọrọ? 46Ọga anị ọ̀ọ vẹ di o ve tù ka ọ vavọọ aa mẹ nị, ozi ahụ ọnọọ vaa daa jẹ. 47Ịzẹyịza m maa kà a wụ nịnị nị, ozi ahụ ọnọọ ọ́ga anị vaa kụ́ avaba ogu anịị chire ụvọ nị. 48Ama àa vị ozi ahụ odivi ọnọọ kà a ka: ‘Ọga amị ee kù ọyịvẹ’, 49di o nyima di ee tụ́ ezi ahụ ana vọ, dị aa rị dị ọnịrị ohweche nịnị ee hú eche nị, 50dị ọga ozi ahụ ọnọọ vana vẹ kẹnẹ, ẹkụhị ọnya oni ò yi zí ọ eyi, ọnịrị ịnị ụmẹ ọnị ọ̀ yị yẹ. 51Dị ọga anị za a, dị ọ sẹ̀ ẹ rugu-rugu, dị ọ sị ọgụ ọmọzakụyẹ yọ. Ịzọọ di ee nowu, dị aa rị anyị.”

Currently Selected:

Imatiwu 24: EBTP

Highlight

Copy