Oyinyima 9

Ohomorihi ộ mẹ̀ ọkatịtẹ yị Inowa

1 # Oyn 1.28 Ohomorihi ka o vee zee yị Inowa ọnịrị ezi anị dị ọ ka, “Ẹ̀ẹ ma, dị ẹẹ rụrụ, dị ẹ chaka hi avaba ẹhẹ nịnị. 2Ọ rẹ ka avaba uye nịnị inomi ọnịrị ivovo nịnị vị ene vee hí angwa Inowa Ọ kà ọnị ọ raà kụ́ wa chire e ụvọ. 3Ọ kà ọ nyẹngụ aa rị wa anka ọ mẹ̀ raa rị avị nịnị. Ọ kà ọnị sị wa yọ ka ọ̀ọ rị wa. 4#Ire 7.26,27; 17.10-14; 19.26; Ọda 12.16,23; 15.23Ọ kà ama asị ọ rị uye ana yị yà ịnị anị, agụvị ka ịnị ụhwẹ yà nị. 5Ọza ọ̀ọ wụ̀ ọza, maa họ̀ ọ oponu anị nị. Àa nyị uye ana wụ̀ ọza, vị ọnị raa họ̀ ọ oponu anị nị. 6#Kụra 20.13; Oyn 1.26Ọ rẹ ka Inowa ọ yẹ ka ọnị Ohomorihi vị ana mẹ ọza vene ẹngụ anị. Agụvị avọọ ọza ọ̀ọ wụ̀ ọza, vị a raa wụ ọnị ẹkẹhị anị nị. 7#Oyn 1.28Ama ẹnyị, ẹ̀ẹ ma ezi dị ẹẹ rụrụ. Ẹ nyayịnẹ rụrụ hi ẹhẹ ẹtẹẹtẹrẹ.” 8Di Ohomorihi va kà a yị Inowa ọnịrị ezi anị dị ọ ka: 9“Ọ kà ọnị aa kà ọkatịtẹ ọnya yị ọ beri ezi ẹnịnị ọnịrị ụnanka ẹnịnị. 10Ọ kà ọnị ọ sị avaba ịsị ẹ nyị ụhwẹ, inomi nịnị, ịsụpa eehi, ọnịrị avaba uye ịnị avị tụ́ ịnị ịrẹyị ọnọọ ọ kà a ka avaba ịsị ọnịrị Inowa jịnẹ hụụnị ẹpa ọnọọ vẹ yà ịnị anị beri ụnanka ose ẹnẹẹ.” 11Ọ kà ọnị ọ kà a tịtẹ ka, “Pàá dị ẹhẹ ọ̀ kara ụpa, ọnị ọ mā vana sị ọhaara enyi wụ̀ avaba ịsị e hi ẹhẹ. A mā vana nyị ọhaara enyi ana vaa kụ́ avaba ẹhẹ.” 12Di Ohomorihi rẹ ka, “Re, apọtẹrẹwa ọkatịtẹ ọnị ọnị pè e ọnịrị avaba ịsị aā tụ́ ụhwẹ kà tịtẹ yị ọnị ụnanka ẹnịnị vaa sị yẹ nị. 13Ohomorihi ka ọnị ộ sị ọgaazị tụ́ ịnị eguhi. Ọnị ọ vị apọtẹrẹwa ọkatịtẹ ọnị ọnị pè anẹhẹ kà tịtẹ nị. 14Ịhị ọnị ọ̀ọ mẹ ka orihi ò ká eyi, dị ọgazị hụrẹ tụ́ ịnị eguhi nị, 15ọnị vaa tamayị ọkatịtẹ ọnị ọnị pè e ọnịrị avaba ịsị ẹẹ̄ tụ́ ụhwẹẹ kà. Enyi ọ yị kụkụ vaa vara ọhaara dị ọ va kụ́ avaba ịsị ẹẹ̄ tụ́ ụhwẹ. 16Ịjị ọgazị ọ̀ọ hụrẹ tụ́ ịnị eguhi, ọnị vee re e dị ọnị tamayị ọkatịtẹ anị zịna-zịna ọnị ọnị Ohomorihi pè avaba ịsị ẹ nyị ụhwẹ ene hi ẹhẹ ka.” 17Di Ohomorihi rẹ ka Inowa, apọtẹrẹwa ọkatịtẹ ọnị ọnị pè avaba ịsị ẹẹ̄ tụ́ ụhwẹ ene hi ẹhẹ kà tịtẹ ka ọnị vaa mẹ̀ ẹ yị wa ọ vị ọnọọ nị.

18Ezi Inowa ana jịnẹ hụụnị ẹpa ọnọọ yị: Isemi, Ihami ọnịrị Ịjahwẹtị. Ihami ọ vị ada Ikanaani nị. 19Ẹnị ẹyịta ẹnẹnị ẹ vị ezi Inowa nị. Ịpa ẹnịnị avaba anẹhẹ chị hụrẹ nị. 20Inowa vị ọkụrịkụ. Ọnị ọ vịdị dà aarẹ di o chire ọchị ana aā hị́ ịvayịnị tụ́ ịnị aarẹ anị nị. 21Ẹkụhị ọnya ộ hú eche ana a sị ẹtụtụ ọchị ọnọọ mẹ, di eche aa mẹrị ọ nị. Dị ọ tụ́ ẹngụ anị ahwaahụ dị ọ sụtụ ịnị ajẹngụ anị nị. 22Ịjị Ihami ana vị ada Ikanaani ọnị maanị re ahwaahụ ada anị, dị ọ na kà a yị ẹnẹbẹnị anị ẹẹva ene hi ẹhẹ nị. 23Di Isemi ọnịrị Ịjahwẹtị ọnị na sị ịta, dị ẹ gana a kú ịza ẹnịnị dị ẹ sị ịrẹma-ịrẹma ngụ ajẹngụ dị ẹ sị ịta ọnọọ ne kú ahwaahụ ada ẹnịnị nị. Ẹnịnị vị ana và eyi kà ẹhẹ, e yi re ahwaahụ ada ẹnịnị. 24Ịjị eche si hà Inowa eyi, dị a ka yọ ịsị ozi anị ana vi ozweyi mẹ̀ ẹ. 25Dị ọ ka, “O du wu ku, ẹwụ Ikanaani.” Ọka ọ ta ọnị ọ vaa vị ọvavẹtẹ ọrịhị ẹyịnyara anị. 26Di Inowa rẹ ka, “Ọ kụ̀ Ẹnẹyịmavara ana vị Ohomorihi Isemi avọ. Ikanaani vị ana vaa vị ọrịhị ẹnịnị. 27Ohomorihi vaa mẹ ka Ịjahwẹtị ọ yara, dị ụnaka anị ọnịrị Isemi ẹ̀ ra vabẹ, di Ikanaani ọ̀ vị ọrịhị ẹnịnị.”

28Inowa ộ vana mẹ ịrayị ịrẹkẹẹchẹhị tụra ẹvarẹwụ (350) ịrẹma ọnị ọhaara kụ́ ẹhẹ. 29Avaba ịrayị ọnị Inowa mẹ ẹhẹ dị o ve sú vị akanarẹchẹhị tụra ẹvarẹwụ (450).

Currently Selected:

Oyinyima 9: EBTP

Highlight

Copy