Oyinyima 14

Abụramị ọ na dọ Ịrọọtị tụ́

1Ịnị ụmẹ ọnya â nyị ohinọyị ẹẹna ẹnyị aanị. Ẹnịnị ẹ vị Amịrahwẹrị ohinọyị Ịbabịrọnị, Ariyoki ohinọyị ẹkụra Erasa, Ikedoromeri ana vị ohinọyị ẹkụra Erami ne beri Itidari ana vị ohinọyị anẹkụra Igoyimi. 2Ẹkụhị ọnya di ohinọyị ẹẹna ẹnẹẹ vabẹ dị ẹ kụ́ ịrẹkụ ne tù ohinọyị ẹẹhị ọsa nị. Ohinọyị ẹẹhị ẹnẹẹ ẹ vị Ibera ohinọyị Isodọmị, Ibirisa ohinọyị Igomora, Isinabi ohinọyị Adima, Isemeberi ohinọyị Izeboyimi ne beri ohinọyị Ibera. Ibera a rẹẹ̄ hị́ Izowa. 3Ohinọyị ẹẹhị ẹnẹnị ẹnị ẹ rẹ vabẹ ini ozi ana aā hị́ Isidimi nị ịzọọ ọ kụkụ aa hị́ òkū anọ-anọ nị. 4Ohinọyị ẹẹhị ẹnẹnị ệ vịdị hẹkẹ ohinọyị ana aā hị́ Ikedoromeri mẹ ịrayị ẹwụrẹva. Ịnị ana tụ́ ọ ịrayị ẹwụrẹta dị ẹ ka ẹnị ẹ yị kụkụ hẹkẹ ẹ nị. 5Ịnị ana tụ́ ọ ịrayị ẹwụrẹna, di Ikedorayoma ana vị ohinọyị ne beri ohinọyị ana vọ ọnị ọnịrịị vabẹ kụ́ ọkụrẹkụ ẹnịnị, dị ẹ na rị Irehwayimi ene hi ịnị ẹtẹ Asiterọtị-Ikanayimi ọnịrị Izuzimi ene hi ịnị ẹtẹ Ihami beri Emimi ene hi Ịsavẹ-Ikiriyatayimi. 6Ẹ rẹ rị Anihori ịnị ataba ịda ẹnịnị ana aā hị́ Ataba Ịsẹyị huu na ngụ Eriparani ana na gụrị ịnị ụnọmị. 7Dị ẹ vavọọ vavẹ dị ẹ va ngụ Enisipati ana aā hị́ Ikadesi, dị ẹ vavọọ rị ẹtẹ Anamarẹkị ọnịrị Anamọrị ana ra hi Ihazazoni Ịtama.

8Di Ohinọyị Anisodọmị ọnịrị ohinọyị Anigomora ne beri ohinọyị Anibera ana a rẹẹ̄ hị́ Izowa ẹnị rẹ kụ́ ịrẹkụ ẹnịnị di ẹ yaa nọ Isidimi nị. Aza ene e ne 9pè kụ̀ ịrẹkụ yị: Ikedoromeri ohinọyị Anerami, Itidari ohinọyị Igoyimi, Amịrahwẹrị ohinọyị Ịbabịrọnị ne beri Ariyoki ohinọyị Erasari. Ohinọyị ẹẹna ee pè ohinọyị ẹẹhị kụ̀ ịrẹkụ avọọ nị. 10Ini ozi ana aā hị́ Isidimi ịzị ẹ yà aa kụ̀ ịrẹkụ aanị, ọ̀dà dụmẹ-dụmẹ vị ana gwẹtẹ ini imisi ene hi ịzọọ. Óhinọyị Anisodọmị ọnịrị ohinọyị Anigomora mèe zwe, dị ẹ na ngụ imisi ẹnẹẹ dị ẹnị ana vọ sị zwe nọ ịnị ataba nị. 11Dị ọnịvị ẹnịnị hàrà ogu Anisodọmị ọnịrị Anigomora, dị ẹ rẹ kụ́ ịsọyịrị ẹnịnị di e si hu nị. 12Aza ẹnẹẹ ẹ rẹ za Ịrọọtị ozi ọyịnyara Abụramị ana ra Isodọmị, dị ẹ kụ́ ogu anị vaka a dị ẹ yaa na nị.

13Dị ọza ịnya ana vụrị há ịnị ịrẹkụ ọnọọ va kà a yị Abụramị Anihiburu ọnọọ nị. Ịjọnọọ Abụramị ọnị vị ana ra ọgụrị ọchị aroni. Imamire Anamọrị ọ nyị ọchị ẹnẹẹ nị. Imamire ọnịrị ẹyịnyara anị ana aā hị́ Esikori ọnịrị Aneri ẹnị vị ogu Abụramị. 14Abụramị mẹ̀ maanị wụ́ ka a raà za ozi ọyịnyara anị ịnị ịrẹkụ dị ọ kụ́ aza anị ọnị ọ raà zụ eyi ịrẹkụ dị ọ kụ́ wa aa na nị. Aza ẹnẹẹ vị ana a ma ini eehi ịda anị. Ẹnịnị vị ịrẹkẹẹchẹhị tụra ẹwụrịhịnta. (318) Dị ẹ dị ụ aza ẹnẹẹ huu na ngụ Ịdaanị nị. 15O mè tụ́ ịzọọ, ịjị ẹtẹ si hozi dị ọ gà ezi ahụ anị dị e pè aza ẹnẹẹ kụ̀ ịrẹkụ, dị ọ rị wa nị. Dị ọ dị ụ wa na huu na ngụ Ihoba eyi ẹbẹẹba Ịdamasịkọsị. 16Dị ọ dọ avaba ogu ọnị ọnịvị ẹnẹẹ kụ́ vavẹ nị. Ọ rẹ sị Ịrọọtị ozi ọyịnyara anị beri ogu anị ọnịrị anyẹnẹẹ beri aza ana vọ ana a vịdị za.

17Abụramị mẹ̀ và hụrị ịrẹkụ aa vẹ ẹ mẹ̀ si Ikedoromeri huna, di ohinọyị Anisodọmị na gẹrị ọ ini ozi ana aā hị́ Ịsavẹ nị (ọnị ọ vị ka ini ozi ohinọyị). 18#Ihib 7.1-10Di Imerikizẹdẹkị ohinọyị ẹkụra Ịsarẹmị ọnị rẹ vẹ nị. Ọnị vị ohirẹsụ irehi Ohomorihi ana nẹba hu keekere. Ộ za ịbụrẹẹdị ọnịrị eche. 19Dị ọ mẹ̀ aduwa yi Abụramị dị ọ ka, “Ohomorihi ọgọdọgọdọ ọnị ụvọ ọza è yi mè tù ana mẹ ẹbẹẹba ọnịrị ẹhẹ ọ̀ navọ ó zee yị Abụramị. 20Ohomorihi ana nẹba hu keekere ana mẹ ka ò huna ọnịvị anị aanị vị ana aza vaa gā.” Dị Abụramị sị agẹẹwụ avaba ịsa ọnị ọ kụ́ aa vẹ dị ọ sị yọ nị. 21Di ohinọyị Anisodọmị kà a yi Abụramị dị ọ ka, “Sị aza mị, dị wa kụ́ ogu ẹnịnị.” 22Dị Abụramị ka: Eyiye, ọnị ộ vịdị raà sị́ Ẹnẹyịmavara Ohomorihi ana nẹba hu keekere ana mẹ ẹbẹẹba ọnịrị ẹhẹ hị́ eku, 23ka ọnị ẹ yị vaa sị owu ihihine ọnya àa vị obo adava. Ọ kà a yị nyị ịsa anị ikonya ọnị ọnị aa sị. Ọ kà ọ yị va naa kà a ka ọnị mẹ ka Abụramị ọ̀ nyị ụbanyị nị. 24Ọ kà a yi nyị ịsị ọnị aa sị, à yị vị ịsa ana ozwọọmụha ẹnịnị sị rị ọnịrị ịsa ene tù ogu ẹẹta ana saasa ọnị aanị. Ọ kà ọ navọ Aneri ọnịrị Esikori ne beri Imamire ẹ̀ kụ́ ene èe tù wa.

Currently Selected:

Oyinyima 14: EBTP

Highlight

Copy