ALA IROM 7

Ang O-ju Ẹjẹẹ O-bwu Ẹga nya Ahụ Bala Ọrụ

1Anụ anyadam ẹ-ẹpwụ nya ịKịrayịsị, m jam ya ẹla ọlẹ tanụ lala angị jẹ́ ang chajị nya ehile ọọwa wuu ene-ene lẹ. Ánụ́ jẹ́ yẹkẹẹ, ụka ọlẹ ká ọngịnyị ehe nyị jam hịhị ẹ-ẹpwụ nya odehe ọlẹ kem, ọngọọwa nyaa kaa ji ekpeleji nya ehile ọkpakpa ba lẹ ka? 2Ang o-ju ẹjẹẹ nya ọọwa ri yẹkẹẹ, ehile kaa wu ọnyang ahụ kpa e-ekpeleji nya ọrụ nyamwụ, jaabwọ myị́ abwọ ká ọrụmwụ ọọwa á ri ehe kaka ba odehe ọlẹ. Ma, ọ́ tị ri ká ọrụ-ahụ ọọwa á gbu ene lẹ aalẹ, ehile ọhẹ-lọhẹ á kaa wu ọnyang ọọwa kpa e-ekpeleji nya ọrụmwụ ọọwa ọlẹ kọ gbu tụtụm kaka. 3Ịnyịnyị, ọ ka la lẹ, ó-ri ká ahụ ọọwa, á tị wuleji rụ kaka rwọ ọrụ ọkịla lụka ọlẹ ká ọrụ nya ọgbanyẹ nyamwụ á gbu lẹka aalẹ, ehile nya ụya ọhọhọ wu ọnyang ọọwa lẹ. Ma, ọ́ tị ri ká ọrụmwụ á gbu ene lẹ aalẹ, ọnyang ọọwa gbocho bwu ẹpwụ nya ehile ọọwa lẹ, ó-ri kọ rwọ ọrụ ọkịla rwọrwọ lụka ọọwa aalẹ, eje nya ụya ọhọhọ á ka jẹ́-ẹ woo kaka. 4Chajị nya ọọwa lẹ, anụ anyadam ẹ-ẹpwụ nya ịKịrayịsị, anụ ayịdang tịtị gbu ẹ-ẹga ká ehile ji bwula igu nya ịKịrayịsị ọlẹ kanụ gbu ịnyịnyị tọọ lẹ. Chajị kanụ ka yẹ ri ịhụ nya ịKịrayịsị ọngọlẹ kọ wuleji bwula igu, chajị kahị ka jẹ́-ẹ bwu lọọ nwụ́ ugbe ọnyịịla ẹ-ẹpwụ nya ọhịhị nyahị ha Ohe Oluhye lẹ. 5Chajị, ụka ọlẹ kahị juwa hịhị ẹ-ẹpwụ nya ọhọbịrị ọhọhọ ene kahị jẹ́ Ohe Oluhye lẹ, ahị kaa họ ụma nya ang inyibyi ịnyị myị́ ịnyị ịlẹ wuu ká imyi nya ịnyịrọ nyahị á byihi ya, ahị nyị họ mẹ, bwula ọlẹ ká ehile juwa tụụhị ọnụ nya ịhọbịrị ịịwa ịhọhọ. Ọọwa lẹ, ahị mwọọgịlẹ, juwa kpa ẹga nya ugbinyịrọ nyahị myị ẹrụ ha igu ogbugbu bwula ịhọbịrị ịhọhọ nyahị ịịwa lẹlẹ. 6Ma, lẹẹlẹẹ lẹ, ahị tị gbocho bwu ẹpwụ nya ehile ọọwa lẹ. Chajị, ahị gbugbu ẹ-ẹga nya ehile ọọwa ọlẹ kọ wuhi ju agba ene-ene lẹ. Chajị kahị ka myịmyị jẹ́-ẹ juwa e-ekpeleji nya ehile onyogo ọọwa ọlẹ kị da ju ụ-ụpwụ hahị kaka. Ma, kahị ka jẹ́-ẹ jam la ọhịhị onyeewe nya Olegu Ịgọgọ nya Ohe Oluhye ugbẹnyị lẹ.

Ehile Bala Ọhọbịrị Ọhọhọ

7Ee lẹ, anyị, ahị tị́ ka ya wẹ mẹ? Ehile nya Ohe Oluhye ri ang onyobyi lẹ? Ịgọgọ ẹnẹnẹhẹ! Ehile ọọwa á ri ang onyobyi ka. Ma, ọ́ tị ri ká ehile ọọwa á ji ka, ịnọ, ḿ ka jẹ́-ẹ jẹ́ ang ọlẹ kị wụrụ ọhọbịrị datị ka. Chajị, ịnọ, ḿ ka jẹ́-ẹ jẹ́ yẹkẹẹ, imajẹ ọlala ri ọhọbịrị ọhọhọ datị ka. Ma, m tị jẹ́ lẹẹlẹẹ lẹ, chajị ehile yẹkẹẹ, “A la imajẹ ẹ-ẹga nya ang nya ọngịnyị ọọnang ka.” 8Ma, ụka ọlẹ ká ehile ọọwa warị kaka da irya nya ọhọbịrị ọhọhọ ọlẹpwụ nyam uya lẹ, ọ juwa kpam kaka họ ụkụrwọ nya imajẹ la datị-datị ẹ-ẹga nya angịnyị aanam lẹlẹ. Chajị, ẹga ọlẹ ká ijata ojiji nya ehile á ji ka, irya nya ọhọbịrị ọhọhọ kaa nune chịng ẹ-ẹga ọọwa. 9Chajị, ụka ọhẹ juwa kaam ayịdang kụ lahị, chajị ụka ọọwa lẹ, ehile á ji kpụ ọ-ka jẹ́-ẹ ya eje nya igu ogbugbu wum bwula ọhọbịrị ọhọhọ nyam lẹka. Ma, ụka ká ehile tị pwụ eji lẹ, ọhọbịrị ọlẹpwụ nyam a chị ahi-une, juwa họ ụkụrwọ lẹ, am ayịdang a gbugbu ị-ịlahị nya Ohe Oluhye bwula ọhọbịrị ọhọhọ ọọwa lẹlẹ. 10Ịnyị lẹ, ehile nya Ohe Oluhye ọlẹ kọ myị ọnụ nya ọhịhị nyamwụ ha ọng myị́ ọng ọlẹ kọ ka myị-ị ju ihi nyamwụ, a mwọọgịlẹ ri ang ọ-ya eje nya igu ogbugbu wum am dachichi lẹlẹ. 11Chajị, ehile ọọwa a chị ọhọbịrị ọhọhọ ọlẹpwụ nyam ahị-une lẹ, ọhọbịrị ọọwa a pịrịm hụlẹ-hụlẹ, gbee kọ wụrụ igu kaka nwụm bwula ọlẹ kam kpoye nya ehile ọọwa lẹlẹ. 12Lẹ, ehile nya Ohe Oluhye ayịdang ịlẹ kị da ju ụpwụ lẹ, ị la ịgọgọ! Chajị, ugbe nya ehile ọnyị myị ọnyị ọlẹ ká Ohe Oluhye da wuu, la ịgọgọ bala ọ-la kpẹẹkpẹẹ bala ọ-kaa họ ụkụrwọ hiigu hahị ahị angịnyị ehe ịnyịnyị! 13Ee lẹ, ọọwa tị ri yẹkẹẹ, ehile ọọwa ọlẹ kọ ri ang ọnyịịla a tị́ mwọọgịlẹ wụrụ igu kaka nwụm wẹ lẹ, lee? Ịgọgọ ẹnẹnẹhẹ! Chajị, ọhọbịrị ọhọhọ ọlẹpwụ nyam a wụrụ igu ogbugbu chịm ọgụ bwula ọ-kpa ehile ọnyịịla ọọwa họ ụkụrwọ wẹ dachichi lẹ! Ọ tị lịnyị, chajị kị ka jẹ́-ẹ jẹ́ jaabwọ ká ọhọbịrị ọlẹpwụ nyam ọọwa ri ang ọtịpyọ ịnyịlẹhị. Ọọwa lẹ, bwula ijata ojiji nya ehile ọọwa lẹ, ọ họ ká ang onyobyi ọhọhọ lụmẹ nya ọhọbịrị jẹ́ kụ ehe wẹ gede-gede ugbẹnyị lẹlẹ.

Uya Ọlẹpwụ Ọkịlẹtụ nya Ọngịnyị Ehe

14Ahị jẹ́ yẹkẹẹ, ehile nya Ohe Oluhye lẹ, ang nya olegu kem, ọ ri lẹ. Ma, am lẹ, m tị ri ọngọ kaa ji oye nya imyi nya ịnyịrọ nyam, chajị ọnyọhị nya ọhọbịrị ọhọhọ kpangga, m ri lẹ. 15Chajị, am ayịdang á dọmwụ jẹ́ egbeju nya ang ọlẹ kam juwa họ datị ka. Chajị, a-ang ọnyịịla ọlẹ kam kaa chị eje nyọka họhọ, a ri ang ọlẹ kam kaa họ ka. Ma, ọkọkọ nya ọọwa lẹ, ang onyobyi ọhọhọ ọlẹ kọ kaa wụm ẹjẹ, m mwọọgịlẹ juwa họ lẹlẹ. 16Jaabwọ ká ang inyibyi ịịwa ịlẹ kam juwa họ ri ang ị-wụm ẹjẹ ịnyị lẹlẹ, ọọwa mẹjẹ yẹkẹẹ, ang ọnyịịla ọlẹ ká ehile tịtọ kam ka họ lẹ, m myị jwoo lẹ. 17Ọọwa mẹjẹ yẹkẹẹ, ám ayịdang kpangga a tị tị wẹẹ họ ang inyibyi ịịwa la irya nya ịlọm kaka. Ma, ọhọbịrị ọlẹ kọ kwẹẹ ẹ-ẹpwụ nyam a wẹẹ kpam haa lẹlẹ. 18Chajị, m jẹ́ yẹkẹẹ, ẹ-ẹpwụ nya ugbinyịrọ nyam ayịdang ọlẹ lẹ, ịngịngịhyẹ ọnyịịla á jam ụ-ụwa kpong-kpong ka. Chajị, irya ọ-kpa họ ang ọnyịịla lẹ, ọ jam ẹ-ẹpwụ ọkịlẹtụ nyam lẹ! Ma, ọngịrị ọ-ka kpa họ ang ọnyịịla ọọwa á tị jam ham ka. 19Chajị, abwẹla ọnyịịla ọlẹ kọ kaa hám kam ka họ lẹ, ọ́ọ̀wa m kaa họ kpong-kpong ka. Ma, ọkọkọ nya ọọwa lẹ, ang onyobyi ọlẹ kam tịtọ kam ka họ kpong-kpong ka, ọwa, m mwọọgịlẹ kaa họ lẹlẹ. 20Jaabwọ ká ang ọọwa ọlẹ kam juwa họ ịnyị ri ang ọ-hám há kaka wẹ lẹlẹ, ọọwa ri yẹkẹẹ, ám la ịlọm kpangga a tịtị wẹẹ họ ang ọọwa bwula irya nyam kaka. Ma, ọhọbịrị ọlẹ kọ kụ ẹpwụ nyam a wẹẹ gbilem kaka họ ang inyibyi ịịwa lẹlẹ. 21Ang ọlẹ kam yẹ ẹ-ẹga nya ugbinyịrọ nyam ri yẹkẹẹ, ọhọbịrị ọlẹpwụ nyam a dachichi kụrụm, jam dam ehile myị́ lẹlẹ. Ịnyị a du, ụka myị́ ụka kam juwa tịtọ nyọka họ ang ọnyịịla lẹ, ká ang onyobyi ọhọhọ mwọọgịlẹ kaa hu gẹgịlẹ ị-ịlahị nyam dachichi lẹlẹ. 22Chajị, ịnọ, ihi nya ehile nya Ohe Oluhye ojuju kpẹẹkpẹẹ ri ang ọ-kpụm ịpyọ ẹ-ẹpwụ nya olegu nyam nya ịlẹhị-ịlẹhị. 23Ma, m tị yẹ ehile nya ọhọbịrị ọhọhọ ọlẹpwụ nya ugbinyịrọ nyam, kọ juwa dẹwụ ta ehile nya olegu ọlẹpwụ nyam ọlaanyị. Ọọwa lẹ, ehile nya ọhọbịrị ọhọhọ ọlẹpwụ nya ugbinyịrọ nyam ọọwa a kụrụm, jam kpa ugbinyịrọ nyam họ ang onyobyi jaabwọ kọ họ́ọ lala ọnyọhị nyamwụ lẹlẹ. 24Oo! Ọlịnyịribyi, m ri lẹlẹ! Oowo, a tị́ ka chịm da bwu ẹpwụtụbwọ nya ugbinyịrọ nyam ọlẹ kọ lẹẹ wụrụ igu ogbugbu wam bwula ọhọbịrị ọhọhọ kpá lẹẹ mẹ? 25Obe ojiji a juwa ha Ohe Oluhye, Ọngọ ka chịm da bwula iJisọsị ịKịrayịsị Ọngọlahị. Ẹ-ẹpwụ nya olegu nyam lẹ, m jam kpa irya nyam wuu myị ẹrụ ha ehile nya Ohe Oluhye lala ọnchẹ nyamwụ lẹ! Ma, ẹ-ẹpwụ nya ugbinyịrọ nyam tị lẹ, ọnyọhị nya ọhọbịrị ọhọhọ, m ri dachichi bwula ang onyobyi ọhọhọ lẹlẹ.

Currently Selected:

ALA IROM 7: IBNO

Highlight

Copy