ALA IROM 5

Okpunyi Ọlala Ẹ-ẹga nya Ohe Oluhye Bwula Ọmyịmyị

1Chajị nya ọọwa lẹ, jaabwọ ká Ohe Oluhye ya eje owuwu nya ọhọbịrị ọhọhọ nyahị rụhị bwula ọmyịmyị ọlala lẹlẹ, ahị la okpunyi ẹ-ẹga nya Ohe Oluhye lẹẹlẹẹ bwula Ọngọlahị iJisọsị ịKịrayịsị lẹ. 2Ẹ-ẹga nya ịKịrayịsị ọọwa ayịdang kpangga ọlẹ kahị myị la, ahị bwula ọngịrị ọ-kpa jụ ka ẹpwụ nya iwe-ahụrụ nya ogodayị kpakpa ị-ịlahị nya Ohe Oluhye myị́, bwula ahyẹẹrwẹrwa nyamwụ lẹẹ ịnyịnyị lẹ. Ịnyị a du kahị lẹẹ chị ọkẹkẹnị nya ịlẹhị-ịlẹhị ẹ-ẹpwụ nya ẹhị ọrịrịị-rịrị gbe ụka ọlẹ kahị ka ba ogbo ọlẹbyẹbyị nya Ohe Oluhye bá la tọọ ị-ịlahị lẹlẹ. 3Ọ́ ba u-uhye nya ọwẹ kem ka! Ma, ahị kaa chị ọkẹkẹnị ẹ-ẹpwụ nya akama ịlẹ kị kaa wẹ chịhị ọgụ ọọ-la ọmyịmyị ọlala nyahị ịnyịnyị! Chajị, ahị jẹ́ yẹkẹẹ, akama ọyẹyẹ ịlịnyị a ri ang ọlẹ kọ kaa kpa ugbodu ojuju myị́ wẹ ẹpwụ nyahị lẹ. 4Ọọwa lẹ, ugbodu ojuju nyahị ọọwa, a kaa chị adam ọlẹng oriri ẹ-ẹpwụ nya abwẹla ọnyịịla nyahị ehe lẹlẹ. Ọọwa lẹ, abwẹla ọnyịịla ọọwa a kaa kpẹhị ọrịrịị-rịrị ọnyịịla wahị ịnyịnyị lẹlẹ. 5Ẹhị ọrịrịị-rịrị nyahị ọọwa, á tị kaa dahị lụgbaa kpong-kpong ka. Chajị, Ohe Oluhye ayịdang ya ọháha ọlala nyamwụ myị ẹpwụ ọkịlẹtụ nyahị bwula Olegu Ịgọgọ nyamwụ ọlẹ kọ hu hahị lẹ.

6Lụka ọlẹ kahị la ọngịrị ọhẹ-lọhẹ la ka da ịlọhị ụbwọ da myị́ kpong-kpong lẹka, ịKịrayịsị warị kaka gbu wọnụ nyahị ahị alọhọbịrị wuu ju lụka ọlẹ ká Ohe Oluhye ayịdang hunọ ene-ene. 7Ọ ka ri ang olujwo ọtụka nyọka byi ọngọkịla yẹkẹẹ, nyị kele kaka gbu wọnụ nya ọngọlẹ kọ juwa họ ehile wuu jịra kpẹẹkpẹẹ lẹ, mẹ. Ó-ri ká angịnyị ehe á ka myị-ị gbu igu wọnụ nya awụlẹ ju lẹ, ịnọ, ọngọ ri ọngọ ọnyịịla kem, ị ka myị-ị gbu igu wọnụ nyamwụ ju lẹlẹ. 8Ma, Ohe Oluhye ayịdang tị chị ọháha ọlala ọtụka nyamwụ ọlẹ kọ la ẹ-ẹga nyahị wuu ehe lẹ. Chajị ụka ọlẹ kahị juwa jiji ẹ-ẹpwụ nya ịhọbịrị ọhọhọ nyahị wẹẹ lẹ, Ohe Oluhye du ịKịrayịsị ẹrụ warị kaka gbu wọnụ nyahị ju. 9Lẹẹlẹẹ, jaabwọ ká Ohe Oluhye ya eje owuwu u-uhye nya ọhọbịrị ọhọhọ rụhị ahị angị myịmyị ị-ịlahị nyamwụ bwula ịwọ nya ịKịrayịsị ọlẹ kọ ya yẹ hụrụ chajị nyahị wẹ lẹlẹ, ọ tịtị la gbadaa ịnyịnyị yẹkẹẹ, ahị ka be hi agbama nya Ohe Oluhye ọlẹ kọ juwa ka wuru jahị da alọhọbịrị pyii ị-ịlahị ịnyịnyị lẹ. 10Ọ ri nya ịlẹhị, ịnọ, aluji nya Ohe Oluhye, ahị ri ene-ene bwula ọhọbịrị ọhọhọ nyahị lẹ. Ma, jaabwọ ká igu ọlẹ ká ịKịrayịsị gbu wọnụ nyahị ju, họ kaahị bala Ohe Oluhye ji ẹpwụ nya okpunyi lẹẹlẹẹ lẹlẹ, ọ tịtị la gbadaa yẹkẹẹ, ugbodu okpukpuru nyahị ka chịda ịnyịnyị bwula ọhịhị nya ịKịrayịsị ọọwa ayịdang pyii ịnyịnyị lẹ. 11Ọ́ ba ọọwa kem ka! Ma, ahị jam chị ọkẹkẹnị nya ịlẹhị-ịlẹhị ẹ-ẹpwụ nya Ohe Oluhye bwula Ọngọlahị iJisọsị ịKịrayịsị ọlẹ kọ họ kahị ye okpunyi ọlala bala Ohe Oluhye ọlẹ myị́ lẹẹlẹẹ lẹ.

Adam Bala ỊKịrayịsị

12Ọhọbịrị jụ warị wẹ ẹpwụ nya odehe ọlẹ bwula ọlẹng ookpokpo. Ọọwa lẹ, ọhọbịrị nyamwụ ọọwa a kpa igu ogbugbu jụ warị ịnyịnyị lẹlẹ. Ịnyị a du, ká igu ogbugbu ọọwa chị kịla angịnyị ehe wuu lẹẹ lẹlẹ. Chajị angịnyị ehe wuu ri alọhọbịrị. 13Lẹ, ọhọbịrị jam ẹ-ẹpwụ nya odehe ọlẹ ene nya ehile nya iMosisi. Ma, ẹga ká ehile á tị ji ka, ị́ jẹ́-ẹ wa ọhọbịrị ju ha ọngịnyị ehe ẹ-ẹga ọọwa myị́ ka. 14Ma, bwu ụka nya Adam ayịdang gbee, ju ka ụka nya iMosisi lẹ, ọngịrị nya igu ogbugbu kụrụ ọng myị́ ọng nya angịnyị ehe wuu chẹẹchẹẹ, dọmwụ tụ angịlẹ wuu kị họ ụma nya ọhọbịrị ọlala ịnya Adam ayịdang kpangga họhọ ka, ịnyịnyị.

Ụka ọọwa lẹ, Adam ọwẹ ayịdang ri ụrụrụ nya ọlẹng ọkịla ọhẹ ọlẹ ká Ohe Oluhye juwa nwụlanọ kọ ka du warị wẹ odehe ọlẹ ị-ịlahị. 15Ma, Adam bala ọngọọwa, á la ookpokpo ka. Chajị, Adam kpa igu ogbugbu warị. Ma, ọhịhị, ọngọọwa a tị kpa warị bwula ọgahị ọnahị nya Ohe Oluhye lẹ. Lẹ, jaabwọ ká igu ogbugbu chị kịla angịnyị ehe wuu bwula ọhọbịrị ọhọhọ nya Adam lẹ, ọ tịtị la gbadaa yẹkẹẹ, ọhaha nya ọhịhị ọlala bwula ahyẹẹrwẹrwa nya Ohe Oluhye, tịtị ka juwa ha iru nya angịnyị ehe mwụ aba ba bwula ọnahị nya ịKịrayịsị ọọwa ịnyịnyị pyii lẹ. 16Apyobwuna nya ọhaha ọnahị nya Ohe Oluhye ọlẹpwụ nya ịKịrayịsị ọọwa lụmẹ gụ uri owuwu ọlẹ ká ọhọbịrị ọhọhọ nya Adam kpa warị wẹ odehe ọlẹ. Chajị, uri owuwu u-uhye nya ọhọbịrị ookpokpo ọlam-ọlam ọlẹ ká Adam họ ugbeene ri eje owuwu ị-ịlahị nya Ohe Oluhye. Ma, lẹẹlẹẹ tị lẹ, bwula ọgahị ọnahị nya Ohe Oluhye ọọwa, Ọwa ayịdang nwụlanọ kọ ka ya eje nyamwụ rụ angịnyị ehe wuu u-uhye nya iru nya ọhọbịrị ịlẹ kị họ lẹ. 17Jaabwọ ká ọhọbịrị nya Adam ọngọ ookpokpo ọọwa, a họ du ká igu ogbugbu jam gbeji u-uhye nya ọhịhị nya alodehe wuu wẹẹ, ọ tịtị la gbadaa yẹkẹẹ, angịlẹ wuu kị ye ọgahị ọnahị ọ-mwụ aba ba nya Ohe Oluhye bala abwẹla ọnyịịla nyamwụ ọlẹ kọ ya haa ododu, a tịtị ka gbeji ẹ-ẹpwụ nya ọhịhị ọlẹ kị la bwula ịKịrayịsị ọọwa ịnyịnyị lẹlẹ.

18Lẹ, jaabwọ ká ugbe nya ọhọbịrị ookpokpo ọlẹ ká Adam họ ugbeene, a kpa eje owuwu nya ayịreji ọtata wẹ angịnyị ehe wuu wẹẹ, ịnyịnyị, ugbe nya abwẹla ọnyịịla ọhọhọ nya ịKịrayịsị ookpokpo, a tịtị ka kpa eje ọ-rụ ọngịnyị rụ nya Ohe Oluhye wẹ iru nya angịnyị ehe ju ka ẹpwụ nya ọhịhị ọmyịmyị-ka nya Ohe Oluhye ịnyịnyị lẹlẹ. 19Chajị, jaabwọ ká ihi ojuju-ka nya Adam ọlẹng ookpokpo ọọwa a họ, ká iru nya angịnyị ehe wuu ri alọhọbịrị wẹẹ, ịnyịnyị-ịnyịnyị, ihi ojuju nya ịKịrayịsị ọngọ ookpokpo ọọwa, a tịtị ka họ ká Ohe Oluhye ka wa iru nya angịnyị lụmẹ-lụmẹ nya alabwẹla ọnyịịla ị-ịlahị nya ịlọmwụ bwula ịKịrayịsị lẹlẹ.

20Ụka ọlẹ ká ehile nya Ohe Oluhye ji kpá ene, angịnyị ehe a jẹ́ jaabwọ kị bwu kpoye nya ehile nya Ohe Oluhye ọọwa ju iru kaka ba myị́ wẹẹ lẹ. Ma, ẹga ọlẹ ká ọhọbịrị ọhọhọ á ju iru lụmẹ, ẹ-ẹga ọọwa, Ohe Oluhye a kaa chị ọngịrị ọ-kpa kụrụ ọhọbịrị ọọwa ehe ha angịnyị ehe gụgụ lẹlẹ. 21Chajị, jaabwọ ká ọhọbịrị kaa gbe angịnyị ehe bwula igu ogbugbu wẹẹ, ịnyịnyị-ịnyịnyị, ọngịrị ọ-kpa họ abwẹla ọnyịịla nya Ohe Oluhye ọlẹ kahị la bwula iJisọsị ịKịrayịsị Ọngọlahị, a tịtị ka juwa gbe ọhịhị nyahị ịnyịnyị gbee, ju ka ẹpwụ nya ọhịhị ọmyịmyị-ka nya Ohe Oluhye lẹlẹ.

Currently Selected:

ALA IROM 5: IBNO

Highlight

Copy