ALA IROM 3

1Ee lẹ, ịịyẹ kpangga, ala iJuu a tị́ kpa gụ ala iJentayịlị ị-ịlahị nya Ohe Oluhye kpong-kpong? Lee, ịịyẹ a tị́ ri apyobwuna nya ụwụwụ ọdada ọlam-ọlam oluhye nya ugbinyịrọ ọlẹ ịnyịnyị? 2Ọ ri nya ịlẹhị, ọ la gbagbịla yẹkẹẹ, ala iJuu kpangga, Ohe Oluhye a tụụbwọ hi ẹla ọlẹpwụ nyamwụ ju ụ-ụbwọ ọhọhẹ-ọhọhẹ, kị ka ye kpa kaka ya je alepwoja ịkịla wuu lẹ. 3Ee lẹ, anụ ya, ó ri ká angịhyẹ lẹpwụ nya ala iJuu ịịwa á myị la Ohe Oluhye kpẹẹkpẹẹ kaka odu lẹ, ká ọhọhọ nyaa ọọwa, ka la ọngịrị tụ ọ-chị la o-hu ọkịlẹtụ ha nya Ohe Oluhye ayịdang biri myị́ lẹ? 4Ohe Oluhye a pwa ang onyobyi ọlịnyị! Chajị, Ohe Oluhye ayịdang kpangga, a ri Adịda nya ẹla nya ịlẹhị lẹ, ọ ri nya ịlẹhị yẹkẹẹ, ọng myị́ ọng nya angịnyị ehe wuu lẹ, ọlọnọọkịla, ọ ri lẹ. Chajị, ị da kpehe ụ-Ụpwụ Ịgọgọ ẹ-ẹgẹlẹ yẹkẹẹ,

“Chajị ká ẹla oyaya o-bwu ọnụ nyang Ahụ Ohe Oluhye

ka jẹ́-ẹ chị ẹla ịlẹhị nya ịlọng ehe mẹ.

Chajị ká ka jẹ́-ẹ ri angịlẹ kị juwa lang Ahụ Ohe Oluhye

eje oku hịlẹ-hịlẹ ịnyịnyị mẹ.”

5Ee lẹ, ó-ri ká abwẹla onyobyi ọhọhọ nyahị ahị angịnyị ehe, á juwa họ ká abwẹla ọnyịịla ọhọhọ nya Ohe Oluhye á juwa chị ehe gede-gede lẹ, tị bẹ? Anyị, ahị tị́ ka ya u-uhye nya ọọwa mẹ? Ó ri ká Ohe Oluhye á wụ ẹjẹ tahị, ahị tị́ ka yẹkẹẹ, “Ohe Oluhye họ tịpyọ, chajị nyọlẹ kọ yẹhị akama u-uhye nya ọ-jẹ́ họ-ka nyahị ọọwa lẹ, lee?” M ya ẹlẹwẹ lala ọngịnyị ehe! 6Ohe Oluhye a pwa ang onyobyi ọlịnyị! Chajị, ó-ri ká Ohe Oluhye ayịdang á ri ọlabwẹla ọnyịịla ene ka, anyanyị, ọ tị́ ka jẹ́-ẹ họ kọ ka ri Adịrahụ ọtụka ọ-la alodehe ọlẹ wuu eje kpẹẹkpẹẹ myị́?

7Ee lẹ, ó-ri ká ọnọọkịla ọlẹpwụ nyam am, á ri ang ọlẹ kọ wẹẹ ka du ká angịnyị ehe ka jẹ́-ẹ yẹ ẹla ịlẹhị nya Ohe Oluhye myị́ gede-gede, du kị ka juwa gwogbo ha ẹnyị nyamwụ lẹ, ịịyẹ a tị́, tị tị du ká Ohe Oluhye tị ka mwọọgịlẹ ya eje nyamwụ wum lala ọngọhọbịrị mẹ? 8Ọkọkọ nya ọọwa lẹ, ịnọ, ọ tị́ chịla kịị ka ya dodehe yẹkẹẹ, ahị nyị juwa họ ang onyobyi kịlahị-ịlahị, chajị ká ang ọnyịịla nyị ka jẹ́-ẹ bwu ẹpwụ nyamwụ kpehe, tịtị mẹ? M wo yẹkẹẹ, angịhyẹ nyanụ nyị juwa ya ịnyị ahị angị ya ẹrụ ọnyịịla ọlẹ nyaa ya lẹ. Ọọwa lẹ, angịkịla a wẹẹ myị jwaa ịnyịlẹhị lẹlẹ. Ma, eje owuwu nya angị ịlịnyị tị la gbadaa u-uhye nya ẹlẹwẹ kị ya ododu lẹ!

Ọngọngọhẹ-ẹ́ Ri Ọlabwẹla Ọnyịịla Odehe Ọlẹ Ka

9Ee lẹ, anyị, ahị tị́, tị tị ka ya mẹ? Ahị ala iJuu ji iwe-ahụrụ ọlẹ kọ la kpakpa gụ ịnya ala iJentayịlị ị-ịlahị nya Ohe Oluhye kpong-kpong? Ehe! Ọ́ lịnyị kpong-kpong ka! Chajị, m ya dodehe ụgwọhẹ yẹkẹẹ, eje nya ọhọbịrị ọhọhọ wuhi ahị angịnyị ehe wuu lẹ. Óo-riri kahị ri ala iJuu ri lee ala iJentayịlị, ahị wuu juwa ẹ-ẹpwụ ọnụ nya ọhọbịrị ọhọhọ lẹ! 10Chajị, ọ la jaabwọ kị da kpehe ẹ-ẹpwụ nya Ụpwụ Ịgọgọ lẹẹ ẹgẹlẹ ịnyịlẹhị. Ị ya ụ-ụwa yẹkẹẹ,

“Ọngọngọhẹ nya alodehe ọlẹ wuu,

dọmwụ tụ ọngọ ookpokpo ọlam-ọlam ọlẹ á jam odehe ọlẹ kọ ri ọlabwẹla ọnyịịla kpong-kpong ka.

11Ọngọngọhẹ á jam odehe ọlẹ kọ ri ọngọ wo ẹla nya Ohe Oluhye myịmyị,

juwa kpa họ ụkụrwọ kaka.

Lee, o-ri ọngọ juwa tịtọ nya Ohe Oluhye hịlẹ-hịlẹ kpong-kpong kaka ịnyịnyị.

12Angịnyị ehe wuu tụụbwọ hi ụgbẹyị ọnyịịla nya Ohe Oluhye deeji lẹ.

Angịnyị ehe wuu lawụlẹ ka ẹga kị ba lẹ,

ị́ kpa ọhịhị nyaa họ ang o-ju apyobwuna ha Ohe Oluhye kaka.

Ọngọngọhẹ nya alodehe ọlẹ wuu dọmwụ,

tụ ọngọ ookpokpo ọlam-ọlam ọlẹ,

á ri ọngọ họ ang ọnyịịla kpong-kpong kaka.

13Iwa nya ụkpụrọkọ nya angịnyị ehe myị la eguru nya ang,

jaabwọ ká iworu kaa myị la ang ịháha-ka.

Ị kaa kpa ẹlẹlẹ ọlẹpwụ ọnụ nyaa ya ala ịpịrị angịnyị ju kem.

Ẹla ọlẹ kọ kaa bwu ugbọnụ nyaa kpehe kaa la ujujwo lala ẹhwa nya ilo ọnyẹẹgẹga.

14Ẹla myị́ ẹla ọlẹ kọ kaa bwu ọnụ nya angịnyị ehe wuu kpehe kaa ri ẹla onyuujujwo kem,

lee, ọlọ ọgaga ju awụlẹ.

15Angịnyị ehe juwa kpa ẹpẹtẹ ọjẹdịyẹ nyaa kele kaka họ awụlẹ ang ọjụjụ,

lee, ọ-nwụ awụlẹ nwụ daarụ ịnyịnyịịnyị.

16Ang o-ju ẹjẹẹ ọlẹ kị kaa kpa jẹ́ ọgụ-ẹpẹtẹ nya ẹga ọlẹ ká angịnyị ehe chịpwụrụ bwu ụbwọọmwụ,

a ri ayịreji ọtata bala ang ọjụjụ ọlụwa lẹlẹ.

17Chajị, angịnyị ehe wuu lẹ,

ọngọngọhẹ nyaa á jẹ́ ụgbẹyị nya okpunyi nya Ohe Oluhye kpong-kpong kaka.

18Lee, ọngọngọhẹ lẹpwụ nya angịnyị ehe,

ọ kaa mwụ ẹhị nyamwụ biri ẹ-ẹpwụ nya uhi nya Ohe Oluhye ojuju kaka ịnyịnyị.”

19Ahị jẹ́ yẹkẹẹ, ẹla ọlẹpwụ nya ehile nya Ohe Oluhye wuu juwa ha angịlẹ kị ji ekpeleji nya ehile ọọwa. Chajị, ká ọngịnyị ehe ọhẹ-lọhẹ á ka jẹ́-ẹ hi iwe ha ịlọmwụ u-uhye nya ang onyobyi ọhọhọ kaka. Chajị ká alodehe ọlẹ wuu lẹpwụ-lẹpwụ ka jẹ́ yẹkẹẹ, ịwa wuu nyị juwa ẹ-ẹpwụ ọnụ nya eje owuwu nya Ohe Oluhye ịnyịlẹhị. 20Chajị, ọngọngọhẹ nya alodehe wuu á juwa kọ ka jẹ́-ẹ họ ang myị́ ang ọlẹ ká ehile ya kpẹẹkpẹẹ wuu myị́ kpụ, eje ka jẹ́-ẹ rwọọ myị́ ị-ịlahị nya Ohe Oluhye kaka. Chajị, ụkụrwọ nya ehile wuu ụbwọọmwụ ri, ọ-ka me ang ọlẹ kọ ri ọhọbịrị ọhọhọ ụchụ jẹ angịnyị ehe kem.

Abwẹla Ọnyịịla nya Ohe Oluhye Bwula Ọmyịmyị Ọlala

21Ma, lẹẹlẹẹ lẹ, Ohe Oluhye ayịdang chị ụgbẹyị nya abwẹla ọnyịịla nya ịlọmwụ ehe mẹjẹ alodehe datị hi ụgbẹyị nya ehile ọhọhọ nyamwụ ọọwa lẹ. Ma, ang ọlẹ ká abwẹla ọnyịịla nya Ohe Oluhye ọọwa tịtọ ká angịnyị ehe ka họ lẹ, ọmẹjẹ nya ehile nya Ohe Oluhye ayịdang bala ọmẹjẹ nya alọmwụ inyogo nya Ohe Oluhye wuu, tị myị ju ụgbẹyị nya abwẹla ọnyịịla ọọwa ịnyịnyị! 22Abwẹla ọnyịịla nya Ohe Oluhye ọọwa juwa ha ọng myị́ ọng ọlẹ wuu kọ myị lọọ bwula iJisọsị ịKịrayịsị lẹ. Chajị, ịngịngịhyẹ ọdatị á juwa ẹ-ẹga nya ọngịnyị ehe ọhẹ-lọhẹ ị-ịlahị nya Ohe Oluhye kaka. 23Chajị, alodehe wuu họ ang onyobyi lẹ, ọngọngọhẹ nyaa á la ọhịhị pwoku ogbo nya Ohe Oluhye myị́ kaka. 24Ma, lẹẹlẹẹ lẹ, Ohe Oluhye jam ya eje nyamwụ rụ, angịnyị ehe bwula ọnahị nyamwụ ọlẹ kọ ya gaa ahị, bwula ọchịda nya ugbodu okpukpuru nyaa ọlẹ ká ịKịrayịsị ra ihi nyamwụ wọnụ nyaa ju lẹ. 25Chajị, Ohe Oluhye ayịdang hu ịKịrayịsị ọọwa kịla iya wọnụ nya angịnyị ehe wuu ju bwula ịwọ nya ịKịrayịsị ọọwa ọlẹ kọ ya hụrụ haa, chajị ká angị myịmyị ka la ọchịda bwula ọọwa. Ohe Oluhye hu ịKịrayịsị ha ịnyị, chajị ká ọọwa ka ri ang ọ-chị abwẹla ọnyịịla nya Ohe Oluhye ehe gede-gede yẹkẹẹ, ujiji ohuhu onyudiyo nya Ohe Oluhye ẹ-ẹga nya ịhọbịrị nya angị inyogo ịlẹ kịị nyị họ gbalẹ-gbalẹ ene-ene nyị ri ogodayị gbe ụka ká ịwọ nya ịKịrayịsị ka hụ́ ịhọbịrị ịịwa. 26Ohe Oluhye họ ọọwa ịnyị nyọka chị abwẹla ọnyịịla nyamwụ ehe lẹẹlẹẹ, mẹjẹ angịnyị ehe. Chajị ká angịnyị ka jẹ́ ịnyịlẹhị yẹkẹẹ, Ohe Oluhye nyị ri Ọngịnyị ọkpẹẹkpẹẹ lẹ, Ọwa ayịdang kpangga nyaa chịla ọ-ka ya eje rụ angịlẹ wuu kịị nyị myị la iJisọsị ịnyịlẹhị lẹlẹ.

27Bwula ọọwa lẹ, u-uhye nya ịyẹ, ahị angịnyị ehe a tị́ ka jẹ́-ẹ chị ogu wẹ kpong-kpong myị́ mẹ? Ụgbẹyị nya ọọwa á ji ka! Chajị, u-uhye nya ehile ọkpakpa myị́ nyahị, ahị tị́ ka kpa chị ogu lee, ịnya ụkụrwọ ọnyịịla ọhọhọ myị́ tị́? Ọhẹ-lọhẹ á ji ka. Chajị, iwe-ahụrụ nyahị, ahị angịnyị ehe ị-ịlahị nya Ohe Oluhye á bwula ụgbẹyị nya ehile nya Ohe Oluhye ọhọhọ ka. Ma, ụgbẹyị nya ẹrụ ọnyịịla chajị nya ọmyịmyị ọlala ọlẹ ịnyị! 28Chajị nya ọọwa lẹ, ẹla otuku ri yẹkẹẹ, ọmyịmyị ọlala nyahị ahị angịnyị ehe, Ohe Oluhye a kaa kpa ya eje nyamwụ rụhị ị-ịlahị nya ịlọmwụ lẹ. Aajị nya ụkụrwọ nya ehile ọhọhọ jịra nyahị kpong-kpong ka. 29Lee, Ohe Oluhye ayịdang tị́ ri Ohe Oluhye nya ala iJuu ụbwaa kem lẹ? Ọwa ayịdang á ri Ohe Oluhye nya ala iJentayịlị kpịlọ ka? Aa du ka. Ọ ri Ohe Oluhye nya ala iJentayịlị ịnyịnyị. 30Chajị, Ohe Oluhye ayịdang ri Ohe Oluhye ookpokpo. Ọmyịmyị ọlala nya ala iJuu ịlẹ kị ri angị kaa da ụwụwụ, Ohe Oluhye a ka kpa ya eje rwaa ị-ịlahị nya ịlọmwụ lẹ. Ala iJentayịlị ịlẹ kị tị ri angị da ụwụwụ da ka lẹ, ọmyịmyị ọlala nyaa ọọwa-ọọwa, Ohe Oluhye a tị ka kpa ya eje rwaa ị-ịlahị nya ịlọmwụ ịnyịnyị lẹ. 31Ọọwa ri yẹkẹẹ, ahị la ọmyịmyị ọlala lẹlẹ, ahị tụụbwọ hi ụgbẹyị nya ehile nya Ohe Oluhye ta ayịreji mẹ? Ohe Oluhye a pwa ang onyobyi ọlịnyị! Ọkọkọ nya ọọwa lẹ, ahị ka yụbwọ chị ẹla ịlẹhị nya ehile ọọwa kpa ụ-ụwa gogo.

Currently Selected:

ALA IROM 3: IBNO

Highlight

Copy