ỊMAKỊ 8

IJisọsị Kpa Angị Ụnọ Ine Chiriri La Ang Oriri

(ịMatiyu 15:32-39)

1Ụka kọ nọ chẹẹ, iru nya angịnyị ịhyẹ myịmyị kele kaka jịra ẹ-ẹga nya iJisọsị. Ụka kị ye ang oriri ọhẹ-lọhẹ ka ri ụ-ụwa kaka lẹ, iJisọsị a be ẹkọ wụrụ angịjụgbẹyị nyamwụ kaka byaa yẹkẹẹ, 2“Anụ wo mẹ! Aliru nya angịnyị ịwẹ lam ahyẹẹrwẹrwa lụmẹ kaka kpoye, chajị alẹ a ri ẹnụtụrụ ọhata kị wẹẹ bam jẹ ịnyịnyịịnyị lẹlẹ. Ma, ang oriri ọhẹ-lọhẹ á tị ji haa, ị ka ri ka. 3Ma, ọ́ tị ri kam kwaa rụ ka ẹpwa limyi-limyi, ọhẹka, angịhyẹ nyaa tị ka kpụ ịbwọ ụ-ụgbẹyị, chajị angịhyẹ lẹpwụ nyaa bwu ẹga ọlụrụ lụmẹ.”

4Ịnyị, angịjụgbẹyị nyamwụ a byoo yẹkẹẹ, “Ayịbahị, ale, ahị́ tị ka ye ịkaa ọlẹ kọ ka nwa iru nya angịnyị ịlẹ wuu ra bwu ụ-ugbileji ọlẹ?”

5Ụka ọọwa, iJisọsị taa wo yẹkẹẹ, “Abẹ nya ịkaa ịmanyị, anụ tị́ la juwa ene?” Ị wẹ byoo yẹkẹẹ, “Abẹ nya ịkaa irwiye a lẹẹ lẹ, Ayịbahị.”

6Ịnyị, iJisọsị a byi iru nya angịnyị ịịwa yẹkẹẹ, nyị hụhụ ị-ịpyị bẹẹbẹẹ mẹ. Ọọwa lẹ, ọ go abẹ nya ịkaa irwiye ịịwa lẹ, ọ ji Ohe Oluhye obe la abwọ ọrịrị lẹ, ọ gwaa ene, gaa ha angịjụgbẹyị nyamwụ lẹ, ị kpa kele kịla iru nya angịnyị ịịwa lẹlẹ. 7Angịwẹ la iyenyi ịmanyị-ịmanyị ịhyẹ juwa ụ-ụwa ịnyịnyị. Ụka ká iJisọsị wahị kụrụ iyenyi ịịwa kpá wuu lẹ, ọ gaa ha angịjụgbẹyị nyamwụ, nyị ye kpa kịla iru nya angịnyị ịịwa mẹ lẹlẹ. 8Ụka ká iru nya angịwẹ ri ịkaa bala iyenyi ịịwa wu ẹpwụ kpọng-kpọng lẹ, angịjụgbẹyị nya iJisọsị a kele kaka go apwụ nya ihihi nyaa myị edo irwiye lẹlẹ. 9Iru ojuju nya angịlẹ kị ri ang oriri ọọwa la angịnyị angị ụnọ ine chiriri. 10Ọọwa lẹ, iJisọsị a tụụbwọ hi angịwẹ wuu rụ ka ẹpwa nya ịlaa lẹlẹ. Ahyaahị lẹ, iJisọsị a gba ju ka ẹpwụ nya ụmwụ nya enyi bala angịjụgbẹyị nyamwụ lẹ, ị rụ kele koye nya ọpyị nya ịDalịmanụta lẹlẹ.

Ala ỊFarịsii Tịtọ nya Ang O-ju Ẹjẹẹ Bwu Ẹga nya IJisọsị

(ịMatiyu 16:1-4)

11Ụka ọọwa, ala ịFarịsii ịhyẹ kele ka ẹga nya iJisọsị, juwa da ịwẹẹ tọọ bala o-juwa tịtọ kị ka mọọ yẹ. Ọọwa lẹ, ị juwa tịtọ nya ang o-ju ẹjẹẹ nya ụkụrwọ ẹbyẹbyị o-bwu epwoohe bwu ẹga nyamwụ lẹlẹ. 12Ụka ká iJisọsị chaarụ ọtụka gboo nya ịlẹhị-ịlẹhị bwu ẹpwụ nya olegu nyamwụ lẹ, ọ taa wo yẹkẹẹ, “Ịịyẹ a tị́ du ká angịnyị iloyi ọlẹ jam tịtọ nya ang o-ju ẹjẹẹ nya ụkụrwọ ẹbyẹbyị ọlịnyị ene? Ma, nya ịlẹhị-ịlẹhị, m byinu yẹkẹẹ, ánụ tị ka ye kpong-kpong ka.”

13Ọọwa lẹ, iJisọsị a rụ bwu ụwa hi angịwẹ kaka ju ụmwụ nya enyi bala angịjụgbẹyị nyamwụ lẹ, ị juwa rụ kpoye nya ihu ọkịlọlọ ọwẹ, kele ka ọnụụka oloye ọlaanyị nyamwụ lẹlẹ.

Ijọnwa nya Ala ỊFarịsii

(ịMatiyu 16:5-12)

14Ụka ọọwa, angịjụgbẹyị nya iJisọsị á kpịtịya kpa ịkaa ọhẹ ẹ-ẹpwụ nya ụmwụ nya enyi nyaa dala ẹbẹ nya ịkaa ookpokpo kem kaka. 15Ụka ọọwa, iJisọsị juwa gbile angịjụgbẹyị nyamwụ ụbwọ ụ-ụrụ nya ịlẹhị-ịlẹhị yẹkẹẹ, “Anụ kpahị ju ịlọnụ ọgwọgụ, kanụ juwa cheji ba ịjọnwa ọ-kpa ịkaa mịrị nya ala ịFarịsii bala ịnya iHerọdụ mẹ.”

16Ụka ọọwa, angịjụgbẹyị nyamwụ juwa kpa ẹla ọọwa ma ya ta awụlẹ yẹkẹẹ, “Ọlẹ kahị deeri hi ịkaa ọkpakpa, a du ká Ayịbahị wẹẹ ya ẹlẹwẹ tahị lẹ.”

17Ụka ká iJisọsị ayịdang jẹ́ ẹla ọlẹ ká angịjụgbẹyị nyamwụ juwa kpa ya ta awụlẹ lẹ, ọ byaa yẹkẹẹ, “Ịịyẹ a tị́ du kanụ juwa kpa ẹla nya ịkaa ọkpakpa-ka ọwẹ ya ta awụlẹ ịnyị? Ọ ri ánụ tụtụm la olegu ọ-kpa ju ang-ẹjẹẹ datị lee ọ-la olegu nya ọ-jẹ́ myịmyị kpong-kpong lẹka, dọọ lẹẹlẹẹ? Ọkịlẹtụ ọdịyọ-dịyọ, anụ la lẹ? 18Ọ ri egbahị nyanụ bala arụ nyanụ ịwẹ kanụ ju wẹ lẹ, anụ́ jẹ́-ẹ kpa yọyị lee ọ-kpa wo ẹla kpong-kpong kaka? Lee, ánụ tị kpịtịya kaka? 19Anụ ya jem wẹẹ. Ụka ọlẹ kam gu abẹ nya ịkaa ịrụ ene ha angịnyị angị ụnọ ịrụ ri lẹ, anụ tị́ go apwụ ihihi nya ịkaa ịịwa myị edo ịlẹpwụ-lẹpwụ ịmanyị?”

Ị wẹ byoo yẹkẹẹ, “Edo iwo kụrụ imiiye ịnyị, Ayịbahị!”

20IJisọsị myịmyị byaa yẹkẹẹ, “Ụka ọlẹ kam tị gu abẹ nya ịkaa irwiye ene ha angịnyị angị ụnọ ine ri tị bẹ? Edo ịmanyị, anụ tị́ go apwụ ihihi nyaa myị ịnyịnyị?”

Ị wẹ byoo yẹkẹẹ, “Edo irwiye ịnyị, Ayịbahị!” 21IJisọsị myịmyị taa wo yẹkẹẹ, “Ee lẹ, ánụ tụtụm myịmyị la ọ-jẹ́ myịmyị ugbẹnyị lẹka?”

IJisọsị Họ Ọlẹng Okpidu Ọhẹ Uda Ị-ịBẹtịsayịda

22Ụka ká iJisọsị bala angịjụgbẹyị nyamwụ kele ka ịBẹtịsayịda lẹ, angịhyẹ a kpa ọlẹng okpidu ọhẹ kele ka ẹga nya iJisọsị, juwa bịlọọ, nyị chuchuu, kịị nyị yụbwọ gu olidu ọọwa kịị nyị họọ uda ha ịwa mẹ lẹlẹ. 23Ụka ọọwa, iJisọsị yụbwọ chị olidu ọọwa ụ-ụbwọ nyamwụ kpọọ kele ka ugumẹ ẹpwa nya epweji ọọwa. Ọ chị́ ide da olidu ọọwa ka egbahị nyamwụ lẹ, ọ yụbwọ gwoo egbahị lẹlẹ. Ụka kọ pyẹ ahị nyamwụ maa lẹ, iJisọsị a tọọ wo yẹkẹẹ, “Á jẹ́ yọyị lẹka?”

24Ụka ká ọlẹng ọọwa pyẹ ahị nyamwụ maa lẹ, ọ byi iJisọsị yẹkẹẹ, “M jẹ́ juwa yọyị kudu kudu. M yẹ angịnyị ehe wuru wuru lala ekeji ịlẹ kị juwa jẹdịyẹ.”

25Ịnyị, iJisọsị a myịmyị yụbwọ nyamwụ gu ọngọwẹ a-ahị lẹ, idu ọkpụkpụ nyamwụ a myị́ lẹlẹ. Ụka kọ myịmyị pyẹ ahị nyamwụ maa kọ juwa mwụụrụ yọyị chịng lẹ, ọ jẹ́ juwa yẹ ang myị́ ang wuu cheri-cheri lẹlẹ. 26IJisọsị gbiloo ụbwọ ụ-ụrụ nya ịlẹhị-ịlẹhị yẹkẹẹ, “Rụ kele ka ẹpwa nyanụ mẹ. A kele ka epweji ọwẹ, [lee, o-ya je ọngọngọhẹ ụ-ụwa koo!]”

IPita Ya Ọngọlẹ Ká IJisọsị Ri Dodehe

(ỊMatiyu 16:13-20; ILuku 9:18-21)

27Ụka ọọwa, iJisọsị bala angịjụgbẹyị nyamwụ rụ kele ka epweji ịhyẹ ịlẹ kị juwa ọ-ọpyị nya iSisarịya-Filipayị. Ụ-ụgbẹyị ọọwa, iJisọsị tọ angịjụgbẹyị nyamwụ ịtọ yẹkẹẹ, “Oowo, angịnyị ehe a tị́ ya, am nyị ri kpong-kpong?”

28Angịjụgbẹyị nyamwụ wẹ byoo yẹkẹẹ, “Ayịbahị, angịhyẹ juwa yẹkẹẹ, ahụ nyị ri ịJọn ọngọ hụ enyi Ohe. Angị ịkịla yẹkẹẹ, ahụ nyaa ri Ịlayịja lẹ. Angị ịkịla tị myịmyị yẹkẹẹ, ahụ nyị ri ọngọhẹ lẹpwụ nya alọmwụ inyogo nya Ohe Oluhye.”

29IJisọsị myịmyị taa wo yẹkẹẹ, “Lẹ, anụ ayịdang bẹ? Oowo, anụ tị́ ya, am nyị ri lẹẹ mẹ?”

IPita wẹ byoo yẹkẹẹ, “Ayịbahị, ahụ ayịdang kpakpakpa a ri ịKịrayịsị ọọwa ọlẹ ká Ohe Oluhye du warị lẹ.”

30Ụka ọọwa lẹ, iJisọsị a gbilaa ụbwọ ụ-ụrụ nya ịlẹhị-ịlẹhị yẹkẹẹ, “Anụ ya je ọngọngọhẹ ụma nya ọngọlẹ kam ri kpong-kpong koo!”

IJisọsị Yẹ Ọmwụ Rụ́ Akama Ọyẹyẹ Bala Igu Ogbugbu Nyamwụ

(ịMatiyu 16:21-28; iLuku 9:22-27)

31Ọọwa lẹ, iJisọsị a dọmwụ nya o-juwa mẹ ang jẹ angịjụgbẹyị nyamwụ byaa yẹkẹẹ, “Am Ọnyị nya ọngịnyị ehe ọlẹ ka yẹ akama ọtụka-ọtụka bwu ẹpwụtụbwọ nya ịgabwọ nya ala iJuu bala alegbeju nya angịkiliya nya Ohe Oluhye bala ịtịcha ị-mẹ ehile nya iMosisi jẹ wuu. Ịwa wuu ka pwam, ji ẹkpẹ dam. Ị ka nwụm. Ma, m tị ka wuleji bwula igu la ẹnụtụrụ ọhata, myịmyị juwa hịhị.” 32Ịịwẹ, iJisọsị a bwu ya ẹla chajị nya akama bala igu nyamwụ ọwẹ dodehe gede gede jaa lẹ, iPita a wu iJisọsị yalibyi la ụ-ụwa nya ịlẹhị-ịlẹhị lẹlẹ. 33Ma, ụka ká iJisọsị jahị nyamwụ kpata da ka ẹga nya angịjụgbẹyị nyamwụ wuu lẹ, ọ juwa yalibyi la iPita nya ịlẹhị-ịlẹhị la ịkata yẹkẹẹ, “IPita, ahụ Ohe Onyobyi ọwẹ, kam kẹkpẹ nyam pyii! Chajị, i-irya ọlẹ kọ bwu ẹpwụtụbwọ nya Ohe Oluhye ayịdang, a wẹ ká kpa ya ẹlẹwẹ kpong-kpong ka. Ma, irya nya angịnyị ehe ịlam-ịlam kem ịnyị.”

34Ọọwa lẹ, iJisọsị a be ẹkọ wụrụ iru nya angịnyị ịlẹ kị juwa tọọ bala angịjụgbẹyị nyamwụ lẹ, ọ byaa yẹkẹẹ, “Ọng myị́ ọng ọlẹ kọ juwa tịtọ kọ ka bam jẹ nya ịlẹhị-ịlẹhị lẹ aalẹ, ọngọọwa a pwa ịlọmwụ rwarụ, kọ juwa hu agurube nya akama ọyẹyẹ tam chụ ịlọmwụ e-egbeju kọọwa ayịdang a kẹwẹ kaka bam jẹ mẹ. 35Chajị ọng myị́ ọng ọlẹ kọ juwa tịtọ nyọka chị ọhịhị nya ịlọmwụ dodehe ọlẹ aalẹ, ọhịhị nyamwụ ọọwa ka gwọọ byi pyịyọọ. Ma, ọng myị́ ọng ọlẹ kọ tị ka tụụbwọ hi ọhịhị nyamwụ ga ha igu, chajị nya ẹnyị nyam bala ẹrụ ọnyịịla ọlẹ lẹ aalẹ, ọngọọwa ayịdang juwa ju ọhịhị nyamwụ ọọwa ịtọ gbe ịlọmwụ pyịyọọ lẹ. 36Chajị, ịịyẹ a tị́ ka ri apyobwuna ha ọngịnyị ehe tụtụm wẹẹ? Ko ri ká ọngọọwa ụbwọọmwụ kem á go ang myị́ ang ilodehe ọlẹ wuu la, ká ugbodu okpukpuru nyamwụ ọwa ayịdang á tị gwọọ byi? 37Anụ wo mẹ! Ịngịngịhyẹ á ji, ọlẹ ká ọngịnyị ehe ka jẹ́-ẹ hu kpa kele kaka nyẹ ugbodu okpukpuru nyamwụ myị́ kpong-kpong kaka. 38Chajị, ọng myị́ ọng ọlẹ kọ ka juwa ju oyi nya o-ya ịlọmwụ dodehe lala ọngọ ji oye nyam bala ẹrụ ọnyịịla nyam ọlẹ, ám odehe onyobyi ọlẹ, ká angịnyị ịlẹpwụ nyamwụ jam ji ẹkpẹ da Ohe Oluhye jaabwọ ká ọnyang ahụ ọ-chị la o-hu ọkịlẹtụ ha-ka, kaa họ ụya ba ọrụmwụ aalẹ, am ayịdang tịtị ka ju oyi nya o-ya ọngọọwa dodehe lala ọngịnyị nyam, ụka ọlẹ kaam Ọnyị nya ọngịnyị ehe ọlẹ ka mwọọgịlẹ warị la ogbo nya Adam bala alegu-ẹrụ ịgọgọ nyamwụ.”

Currently Selected:

ỊMAKỊ 8: IBNO

Highlight

Copy