ILUKU 6:27-49

IJisọsị myịmyị byaa yẹkẹẹ, “Ma, lẹẹlẹẹ, m juwa byinu anụ angịlẹ kanụ wẹẹ wo ẹla nyam yẹkẹẹ, aluji nyanụ a háanụ nya ịlẹhị-ịlẹhị mẹ. Kanụ họ ang ọnyịịla ha angịlẹ wuu kanụ waa ẹjẹ ịnyịnyị mẹ. Anụ wahị kụrụ angịlẹ kị juwa gọlọ junu. Anụ juwa raabwọ ha Ohe Oluhye chajị nya angịlẹ wuu kị juwa ya ẹla onyobyi baanụ lido-lido. Ó-ri ká oluji nyang á wang-abwọ ụbaa ọhẹ, ọkọkọ nyọka họọ kwiwa lẹ, a ji ụbaa nyang ọkịla dọọ kọ myịmyị wang abwọ ụ-ụwa ịnyịnyị mẹ. Ó-ri ká oluji nyang á juwa tịtọ nyọka nung awụrụ oluhye ogbileji nyang aalẹ, ọkọkọ nyọka jwoo ju tọọ lẹ, tụtụ pwọ awụrụ olekpeleji nyang ọkịla myịmyị ba oluhye ọọwa họọ mẹ. Ọng myị́ ọng ọlẹ kọ bịlẹng ahụ ọngọ la ang aalẹ, a ya ang ọọwa ga ha ọngọọwa mẹ. Ọng myị́ ọng ọlẹ kọ warị kaka hu ang nyang ahụ, ọngọ la ang lẹ aalẹ, a myịmyị byi ọngọọwa kọ kpa tịrẹkpẹ wang kaka. Ụma nya ang ọnyịịla ọlẹ kọ wẹẹ mang ma, ká angịnyị angịkịla ka họ hang wẹẹ, ahụ ayịdang a jene-jene họ ang ọọwa ha angịkịla mẹ!” IJisọsị myịmyị byaa yẹkẹẹ, “Ó-ri kaanụ ayịdang á juwa la ọháha u-uhye nya angịlẹ kị kaa la ọháha ẹ-ẹga nyanụ kem lẹ, ịịyẹ a tị́ ka ri o-ya dodehe ọnyịịla nyanụ mẹ? Chajị, ịnyịnyị, angịlẹ kị ri alọhọbịrị a kaa la ọháha u-uhye nya angịlẹ kị kaa la ọháha ẹ-ẹga nyaa ịịwa kem lẹ! Ọ́ tị ri kanụ juwa họ ang ọnyịịla ha angịlẹ kị juwa họ ang ọnyịịla hanụ kem ịnyịnyị lẹ, ịịyẹ a tị́ ka ri o-ya dodehe ọnyịịla nyanụ mẹ? Chajị ịnyịnyị, angịlẹ kị ri alọhọbịrị a kaa họ ang ọnyịịla ha angị họ ọnyịịla haa kwiwa lẹ. Ó-ri kanụ juwa hu ang nyanụ kpịla angịlẹ kanụ jẹ́ yẹkẹẹ, nyị ka ye ang nwụnụ uri nyamwụ lẹ, ịịyẹ a tị́ ka ri o-ya dodehe ọnyịịla nyanụ mẹ? Chajị angịlẹ kị ri alọhọbịrị kaa ya ang kpịla alọhọbịrị aanaa ịlẹ kị ka jụ uri ọọwa nwụ tịrẹkpẹ haa myị́ ịnyịnyị. Ma, anụ lẹ, anụ́-ụ juwa la ọháha nya ịlẹhị-ịlẹhị ẹ-ẹga nya aluji nyanụ mẹ. Anụ juwa họ ang ọnyịịla ha aluji nyanụ wuu mẹ. Anụ ya ang kpịla aluji nyanụ la ọdahịhile ọ-ka yeye tịrẹkpẹ bwu ụbwọ nyaa myịmyị kaka. Ó-ri kanụ juwa họ ịngịịwẹ wuu lẹ aalẹ, uri nyanụ ka lụmẹ ụ-ụwa e-epwoohe lẹ. Aalẹ, angịnyị wuu ka jẹẹnụ nya anyị ịlam-ịlam nya Ohe Oluhye Agụgụ ịnyịnyị lẹ. Chajị, ẹ-ẹga nya Ohe Oluhye lẹ, Ọ kaa họ ọnahị ẹ-ẹga nya angị la olegu nya obe o-ji Ohe Oluhye ji-ka bala ẹ-ẹga nya angịlẹ ká ang nya ụbwọ nya ịlaa kem ụbwaa a kaa háa ịnyịnyị. Anụ́-ụ la olegu nya ahyẹẹrwẹrwa ụka wuu, jaabwọ ká Adanụ Olepwoohe ayịdang ri ọngịnyị nya ahyẹẹrwẹrwa mẹ.” IJisọsị myịmyị byaa yẹkẹẹ, “A hu ịlọng agaba ọ-la angị ịkịla eje ku ọmwakpa nya Ohe Oluhye ka. Ó-ri ịnyị ka aalẹ, Ohe Oluhye ayịdang ka lang ahụ eje ịnyịnyị! A ya eje wu ọngọngọhẹ jene nya Ohe Oluhye ka. Ó-ri ịnyị ka aalẹ, Ohe Oluhye ayịdang ka ya eje wung ịnyịnyị. Aa la ọhịnyọhi ẹ-ẹga nya alọhọbịrị bang wuu mẹ. Aalẹ, Ohe Oluhye ka hịnyọhi ịhọbịrị nyang hang ịnyịnyị lẹ. Aa ri ọngọ juwa pyẹ ụbwọ maa, hu ha angịnyị ehe aanang ịnyịnyịịnyị mẹ. Aalẹ, ang ọnyịịla ọlẹ kị ya jụ ẹ-ẹpwụ nya obwuhu, kọ myọọ pwẹ pwẹẹ, kị hwọọ jigi-jigi, tọọ wụ kpọng-kpọng, kị myịmyị chụ myọọ gbee kọ juwa chị́ hụrụ, ọọwa, angịnyị a ka hu mẹngkẹẹ kpa kaka nịrọng a-ata kwiwa nyọlẹ ká hu ha lẹlẹ. Chajị ang ọlẹ kaahụ ayịdang wẹẹ kpa me ang ha angịkịla wẹẹ, ụma nya ang ọọwa, Ohe Oluhye a ka kpa me ang tịrẹkpẹ hang ịnyịnyị lẹlẹ.” IJisọsị kpa etu ọlẹ ya ẹla taa yẹkẹẹ, “Anụ ya ká olidu ọhẹ ka jẹ́-ẹ kpa olidu ọkịla ụgbẹyị myị́? Ó-ri kị họ ịnyị, ịwa angị imimiiye á ka chabwọ kpụ ẹpwụ nya ụjẹ ọpyị wurum ka? Anụ wo mẹ! Ọnyị onjwo olube ụpwụ ọhẹ-lọhẹ á kaa gụ ịtịcha nyamwụ ka. Ma, onjwo nya ube ụpwụ ọnyị myị ọnyị ọlẹ kị mẹ ang jẹ yẹẹyẹẹ kpá lẹ aalẹ, ọ ka jẹ́ ang kaka wu ịtịcha nyamwụ ọyị myị́ pyii lẹ.” “Ịịyẹ a tị́ du kaahụ ayịdang juwa ye ẹla ya rụ́ abyị ọlala nya ọngịnyị ehe ọọnang ọlẹ kọ byẹhị pyịnyẹng wẹ lala uhweyi olukilẹhị nyamwụ kpong-kpong? Ụka ọlẹ ká abyị ọlala ọlẹ kọ chụng ahụ e-egbeju tị lụmẹ wẹ lala ugbile nya okoji ọtụka-ọtụka ọlẹ kaahụ ayịdang kpa u-uhye nya ukilẹhị nya ịlọng ịnyị? Lẹ ya jem wẹẹ. Ó-ri kaahụ ayịdang á rị ugbile nya okoji ọtụka olukilẹhị nya ịlọng ọọwa daarụ kpá, a jẹ́ juwa yọyị yẹẹyẹẹ ene ka, anyanyị, a tị́ ka jẹ́-ẹ juwa byi ọngịnyị ehe ọọnang ọkịla ọọwa yẹkẹẹ, ‘Ẹnwa, kẹwẹ kam gba uhweyi olukilẹhị nyang ọwẹ daarụ hing mẹ?’ Ahụ ọlahị imiiye, maga ká jene gba ugbile nya okoji ọtụka nya abyị ọlala hi ukilẹhị nya ịlọng, chajị ká jẹ́ yọyị cheri-cheri, ene ká ka jẹ́-ẹ gba uhweyi nya abyị ọlala olukilẹhị nya ọngịnyị ehe ọọnang ọọwa daarụ hyọọ myị́ mẹ.” IJisọsị myịmyị byaa yẹkẹẹ, “Okoji ọnyịịla á ka jẹ́-ẹ nwụ́ ugbe ọtịpyọ kaka. Okoji ọtịpyọ á tị jẹ́-ẹ nwụ́ ugbe ọnyịịla kpong-kpong kaka ịnyịnyị. Chajị, bwula ugbe nya okoji ọnyị myị ọnyị, ị kaa kpa jẹ́ ụma nya okoji ọlẹ kọ ri lẹ. Chajị ujwo-owuru ọhẹ-lọhẹ á ka jẹ́-ẹ nwụ́ ugbe nya okiledu kaka lee okoji nya ụpaa, ọ-ka jẹ́-ẹ nwụ́ ugbe nya alakọnụ ọnẹnẹ kpá myị́ ẹnẹnẹhẹ kaka ịnyịnyị. Ịnyịnyị, ọ tịtị la ẹ-ẹga nya ọhịhị nya angịnyị ehe lẹ. Ọngọlẹ kọ kpụ ụdụ nya abwẹla ọnyịịla ẹ-ẹpwụ nya ọkịlẹtụ nyamwụ lẹ aalẹ, ang ọnyịịla kem, ọlabwẹla ọnyịịla ọọwa a kaa họ pyịyọọ lẹlẹ. Ma, ọngọlẹ ká abwẹla onyobyi ọhọhọ á myị ẹpwụ nya ọkịlẹtụ nyamwụ kpọrịkọọ lẹ aalẹ, ang onyobyi kem, ọngọ onyobyi ọọwa a kaa họ pyịyọọ ịnyịnyị lẹlẹ. Chajị ang myị́ ang ọlẹ kọ myị ẹpwụ ọkịlẹtụ nya ọngịnyị ehe pwẹẹpwẹẹ, a kaa chị́ hụrụ bwu ọnụ nyamwụ kpehe lẹ.” IJisọsị myịmyị byaa yẹkẹẹ, “Ịịyẹ a tị́ du kanụ juwa wụrụm, ‘Ọngọlahị! Ọngọlahị!’ Kanụ tị juwa kpa ẹla ọmẹjẹ nyam họ ụkụrwọ kpong-kpong ka? Anụ wo mẹ! Ọng myị́ ọng ọlẹ kọ warị wẹ ẹga nyam kaka wo ẹla ọmẹjẹ nyam, kọ juwa kpa ẹla ọọwa họ ụkụrwọ ịnyịnyị aalẹ, m ka chụ ọngọọwa ka pwoku etu nya oja ọlẹ. Ọngọọwa ka lala ọlẹng ọhẹ kọ juwa tịtọ nyọka me ube nyamwụ, kọ kele kaka be aya nya ube ọọwa u-uhye nya ẹjwọ kpori-kpori ene kọọ da omwuji nya ẹpwang nyamwụ u-uhye nya ẹjwọ ọọwa yẹẹyẹẹ. Ukpenyi ọtụka-ọtụka do kaka mịla ẹpwang ọọwa nmoo. Ihu myị pẹlẹ-pẹlẹ kaka yẹrịrị ẹpwang ọọwa. Ma, ẹpwang ọọwa á tị hụ́ kpiki kpong-kpong ka. Chajị, ị nwọ́ọ hiigu-hiigu u-uhye nya ẹjwọ. Ma, ọng myị́ ọng ọlẹ kọ juwa wo ẹla ọmẹjẹ nyam, kọ tị myị juwa kpa ẹla ọọwa họ ụkụrwọ ka aalẹ, ọngọọwa ka lala ọlẹng ọkịla ọlẹ kọ juwa tịtọ nyọka me ube, kọ kele kaka dọmwụ nya ẹpwang nyamwụ u-uhye nya ugburuja, kọ chị ụjẹ nya omwuji nyamwụ kpori-kpori ene kpong-kpong ka. Ịnyị, ụka ká ihu myị kaka yẹrịrị ẹpwang ọọwa lẹ, ọ tụrụ wurum lẹlẹ. Ọtụrụ-tụrụ nya ube ọọwa họ anụ ọtụka-ọtụka gbedem.”