ILUKU 22
22
Ị Me Obyi nya Igu Ju IJisọsị
(ịMatiyu 26:1-5; ịMakị 14:1-2; ịJọn 11:45-53)
1Ụka ọọwa, ụka nya Ang Oriri nya Ịkaa Ọmịrịị mịrị-ka, ọlẹ kị wụrụ Ang Oriri Ọchịpwụrụ ịnyịnyị juwa ju chwẹẹ lụmẹ lẹ. 2Ọọwa lẹ, alegbeju nya angịkiliya nya Ohe Oluhye bala ịtịcha ị-mẹ ehile nya iMosisi jẹ a juwa tịtọ nya ụgbẹyị ọlẹ kị ka bwu kpa nwụ iJisọsị lẹlẹ. Ma, ị tị juhi nya iru nya angịnyị ịlẹ kị juwa ụ-ụwa.
IJudasị Ye Okpoko Chajị nyọka Pịrị IJisọsị Ha
(ịMatiyu 26:14-16; ịMakị 14:10-11)
3Ịnyị, Ohe Onyobyi a jụ ka ẹpwụ nya iJudasị ọlẹ kị wụrụ Isikarọtụ, ọlẹ kọ ri ọngọhẹ ẹ-ẹpwụ nya angịjụgbẹyị nya iJisọsị angị iwo kụrụ imiiye lẹlẹ. 4IJudasị rụ kpehe bwu ẹpwụ nya angịjụgbẹyị ịkịla kele kaka me obyi jaabwọ kọ ka bwu pịrị iJisọsị ha alegbeju nya angịkiliya nya Ohe Oluhye bala alegbeju nya angị kpẹhị rịrị ube ịgọgọ ọtụka nya Ohe Oluhye nya ala iJuu. 5Ụka ká angịwẹ wo ẹla oyaya nya iJudasị ọọwa lẹ, ọ kpaa ịpyọ lụmẹ kaka kpoye. Ịnyị lẹ, ị myị ọnụ kị ka nwụ iJudasị uri kwiwa nya ọọwa lẹlẹ. 6Ụka ká iJudasị tịtị myị ọnụ haa lẹ, ọ juwa kụ kee gbe ụka ọlẹ ká ẹga ka chị dọọ chajị kọ ka jẹ́-ẹ pịrị iJisọsị haa ẹ-ẹkpẹ-ẹkpẹhi iru nya angịnyị lẹlẹ.
IPita Bala ỊJọn Nwụla Ẹga nya Ang Oriri Ọchịpwụrụ Nọ
(ịMatiyu 26:17-25; ịMakị 14:12-21; ịJọn 13:21-30)
7Ịnyị, ẹnụtụrụ nya Ang Oriri nya Ịkaa Ọmịrịị mịrị-ka, ọlẹ kị kaa kpa nwụ ọnyị nya ọkpịlọ ọkịla iya ha Ohe Oluhye nya Ang Oriri Ọchịpwụrụ, a pwụ eji lẹlẹ. 8Ọọwa lẹ, iJisọsị a byi iPita bala ịJọn yẹkẹẹ, “Anụ kele kaka kpụ́ ang oriri ọchịpwụrụ nyahị hahị kahị ka ri mẹ.”
9Ịnyị, iPita bala ịJọn a tọọ wo yẹkẹẹ, “Ọngọlahị, ale, a tị́ tịtọ kahị ka kaka kpụ́ ang oriri ọọwa ene?”
10IJisọsị wẹ byaa yẹkẹẹ, “Anụ wo mẹ! Anụ kele ka epweji ọwẹ mẹ. Ụka kanụ pwụ ụwa, anụ ka tọ ọlẹng ọhẹ kọ juwa nya ogo ụ-ụgbẹyị la ọta nya enyi. Anụ́-ụ bọọ rụ kele ka ọdọdẹpwa ọlẹ kọ wẹẹ ka jụ ka mẹ. 11Ụka kanụ pwụ ụwa, anụ́-ụ kele kaka byi ayịdẹpwa ọlụwa yẹkẹẹ, ‘Am ọngọmẹjẹ ayịdang nyị yẹkẹẹ, ẹpwụ nya ube nya angga oyina kpangga, am bala angịjụgbẹyị nyam nyaa tị́ ka hụ ri Ang Oriri Ọchịpwụrụ ọlẹ?’ 12Ụka ọọwa, ayịdẹpwa ọọwa ka kpanụ kele ka ube-oluhye nyamwụ, kaka mẹ ẹpwụ nya ube ọtụka-ọtụka ọhẹ, ọlẹ ká ekeji ị-da hụhụ juwa ụ-ụwa wuu ene-ene lẹ, jẹẹnụ. Ụ-ụwa, anụ ka nwụla ang wuu nọ gbehi lẹlẹ.”
13Ịnyị, iPita bala ịJọn a hu ang kele ka epweji ọọwa lẹ, ị yẹ ang myị́ ang wuu ụ-ụwa jaabwọ ká iJisọsị ya jaa ene-ene lẹlẹ. Ọọwa lẹ, ị nwụla ang myị́ ang wuu nọ ụ-ụwa gbe ụka nya Ang Oriri Ọchịpwụrụ ọọwa ịnyịlẹhị lẹlẹ.
Ang Oriri Ịgọgọ
(ịMatiyu 26:26-30; ịMakị 14:22-26; 1 Ala ịKọrịntị 11:23-25)
14Ịnyị, ụka ká ụka nya Ang Oriri Ọchịpwụrụ ọọwa pwụ lẹ, iJisọsị bala alẹrụ nyamwụ a kele kaka hụhụ i-itebwuru ookpokpo, juwa ri Ang Oriri Ọchịpwụrụ ọọwa lẹlẹ. 15Ọọwa lẹ, iJisọsị a byaa yẹkẹẹ, “Imyi nyọka ri ang oriri ohyẹẹkpẹ-ẹkpẹ ọlẹ tanụ ene kam ka yẹ akama nwụm lụka ọtata lẹ. 16Nya ịlẹhị ịnyị, m byinu yẹkẹẹ, ḿ ka ri ang oriri ọlẹ gụ ọlẹ kaka gbee ká etu nya ang oriri ọlẹ ka họ jịra wuu, ene kam ka ri ohyẹẹkpẹ-ẹkpẹ nyamwụ ụ-ụwa ị-ịpyị Adịrahụ nya Ohe Oluhye.”
17IJisọsị hu ukoku nya ere kpa ụ-ụbwọ. Ọ ji Ohe Oluhye obe u-uhye nyamwụ. Ọọwa lẹ, ọ hwọọ ha angịjụgbẹyị nyamwụ lẹ, ọ byaa yẹkẹẹ, “Anụ ye kanụ chọọ gịla awụlẹ nwa mẹ. 18Chajị, m jam byinu yẹkẹẹ, bwu ọlẹẹlẹẹ kele kịlahị, ḿ ka nwa ere nya alakọnụ ọwẹ gụ ọlẹ kaka, gbee pwụ ụka ọlẹ ká ịpyị Adịrahụ nya Ohe Oluhye ka warị.”
19IJisọsị hu ịkaa kpa ụ-ụbwọ. Ọ ji Ohe Oluhye obe u-uhye nyamwụ. Ọ gwọọ ene, hwọọ ha angịjụgbẹyị nyamwụ. Ọọwa lẹ, ọ byaa yẹkẹẹ, “Anụ ye ri mẹ. Ịkaa ọlẹ a ku ọmwakpa nya ugbinyịrọ nyam [ọlẹ kam hu kịla iya wọnụ nyanụ ju lẹlẹ. Anụ́-ụ juwa ri ang oriri ọlẹ ịnyịnyịịnyị, nya ọ-kpa kpịtịya nyam mẹ.” 20Ụka kị ri ịkaa ọọwa kpá lẹ, iJisọsị a hu ukoku nya ere ọọwa haa ịnyịnyị lẹ, ọ byaa yẹkẹẹ, “Anụ ye nwa mẹ. Ere olukoku ọlẹ a ku ọmwakpa nya ịwọ nyam ọlẹ kam ya yẹ hụrụ wọnụ nyanụ anụ angịnyị ehe wuu ju ụ-uhye nya iro ọnwanwa onyeewe nya Ohe Oluhye lẹlẹ.”]
21IJisọsị myịmyị byaa yẹkẹẹ, “Anụ yẹ mẹ! Ọngọlẹ kọ wẹẹ ka pịrịm ha, jam ri ang oriri tam i-itebwuru ọlẹ lẹẹlẹẹ! 22Ọ ri nya ịlẹhị, Ọnyị nya ọngịnyị ehe ọlẹ ayịdang juwa ka gbu jaabwọ kọ ri obyi omeme nya Ohe Oluhye ene-ene lẹ! Ma, ọngọlẹ kọ wẹẹ ka pịrị Ọnyị nya ọngịnyị ehe ọọwa ha-à wẹẹ, ọngọọwa ri enyi gu obyi lẹ!”
23Ọọwa lẹ, angịjụgbẹyị nyamwụ a juwa tọ awụlẹ wo yẹkẹẹ, “Ahyu! Oowo ẹ-ẹpwụ nyahị a tị́ ka ri ọngọ pịrọọ ha kpá wẹ mẹ?”
Oowo A Tị́ Ri Ọngọ Ọtụka Ọgụgụ Wuu?
24Ụka ọọwa, angịjụgbẹyị nya iJisọsị juwa da ịwẹẹ, juwa ju awụlẹ ju larụ-larụ u-uhye nya ọngọlẹ kọọwa, a ka ri ọngọ ọtụka gụ angịkịla nyaa wuu. 25Ịnyị, iJisọsị a byaa yẹkẹẹ, “Anụ wo mẹ! Alịdịrịhụ nya ala iJentayịlị ịlẹ kị jẹ́ Ohe Oluhye ka lẹ, ị kaa kpa alekpeleji nyaa la ụbwọ ọnyọọngịrị lụmẹ. Ọọwa lẹ, ị mwọọgịlẹ kaa tịtọ ká alekpeleji nyaa ịịwa ka dachichi wụrwaa ‘Alọnahị ịtụka’ lẹlẹ. 26Ma, ẹ-ẹga nyanụ anụ lẹ, ọ́ tị chịla kọ ka la ịnyị ka! Ọkọkọ nya ọọwa lẹ, ọngọlẹ kọọwa ayịdang á tịtọ kọ ka ri ọngọ ọtụka ọ-gụụnụ anụ angịkịla wuu lẹ aalẹ, ọngọọwa a kpa ịlọmwụ keji lala, ọwa nyaa ri onjwo nyanụ anụ angị ihihi wuu mẹ. Ọngọlẹ kọ tị tịtọ kọọwa ayịdang a ka ri olegbeju nyanụ anụ angị ihihi wuu lẹ aalẹ, ọngọọwa a nwụlanọ kọ ka myịnụ anụ angị ihihi ẹrụ lala ọwa nyaa ri ọnchẹ nyanụ ịnyịnyị mẹ.” 27IJisọsị a myịmyị yẹkẹẹ, “Kpakpakpa lẹẹ, ọngọlẹ kọ hụhụ u-uhye nya itebwuru, juwa ri ang oriri bala ọngọlẹ kọ juwa myị ẹrụ ha ọngọọwa lẹ, o-lẹpwụ nyaa ịwa angị imiiye a tị́ ri ọngọ ọtụka gụ ọngọkịla? Ayịdẹpwa ọlẹ kọ hụhụ u-uhye nya itebwuru, juwa ri ang oriri bala ọnchẹ ọlẹ kọ juwa myị ẹrụ họọ lẹ, o-owo a tị́ ri ọngọ ọtụka gụ ọngọkịla? Ịnọ, ayịbaba ọ-hụ i-itebwuru juwa ri ang oriri a kaa ri ọngọ ọtụka gụ lẹ! Ma, am kam ri ayịbaba nyanụ, m tị jam myị ẹrụ hanụ lala ọnchẹ nyanụ.”
28IJisọsị myịmyị byaa yẹkẹẹ, “Anụ wo mẹ! Anụ ayịdang a ri angịlẹ kanụ myị hụ tam lẹẹ ẹ-ẹpwụ nya ọ-tụ pyịpyị bala ọmayẹ nyam wuu pyịyọọ daalẹ lẹ. 29Chajị nya ọọwa lẹ, jaabwọ ká Ohe Oluhye Adịda chụm am nyọka ri adịrahụ ụ-ụwa ị-ịpyị adịrahụ nyamwụ wẹẹ, ịnyịnyị-ịnyịnyị, am ayịdang a tịtị ka chụnụ, kanụ ka ri ịdịrịhụ tam ị-ịpyị adịrahụ nyam lẹlẹ. 30Chajị kanụ ka jẹ́-ẹ ju epwedii tam i-itebwuru ookpokpo, juwa ri ang oriri bala o-juwa nwa ang ọnwanwa tam ụ-ụwa ị-ịpyị adịrahụ nyam bala ọ-ka hụhụ ụ-ụwa ẹ-ẹchị adịrahụ nyam tam, juwa la alimwawụ iwo kụrụ imiiye nya ala Isirẹlụ eje ụka ọọwa ịnyịnyị lẹlẹ.”
IJisọsị Yẹ Ọmwụ Rụ́ IPita Ọ-ka Pwọọ Pwa Rwarụ
(ịMatiyu 26:31-35; ịMakị 14:27-31; ịJọn 13:36-38)
31Ọọwa lẹ, iJisọsị a byi iPita yẹkẹẹ, “ỊSayịmọn! ỊSayịmọn! Wo Mẹ! Ohe onyobyi ye ọda bwu ẹga nya Ohe Oluhye chajị kọ ka kpa ọmayẹ dung abwọ pwụrẹ-pwụrẹ, juwa hịrịng, jaabwọ kị kaa kpa ụda hịrị ewoo nya ịrayịsị hụrụ! 32Ma, m tị raabwọ ha Ohe Oluhye, chajị ká ọmyịmyị ọlala nyang á ka gbu enyi kaka lẹ! Ụka ká tịrẹkpẹ nya chịm ọgụ kpá lẹ aalẹ, aa ju anyadang ịkịla ọhụ ịnyịnyị mẹ.”
33IPita wẹ byoo yẹkẹẹ, “Ọngọlahị ee, m nwụlanọ kam ka ji oye nyang pyịyọọ lẹ! Ó-ri ube nya agba riri lee igu, m ka juwa tang pyịyọọ lẹ.” 34IJisọsị wẹ byoo yẹkẹẹ, “IPita, wo mẹ! M jam bying yẹkẹẹ, ene ká ọwọọwọ á ka da ịgbụ ụka ookpokpo kpá la odu ọlalẹ, ahụ iPita ọwẹ ka pwam rwarụ yẹkẹẹ, ọwa nyị́ jẹ́m kpong-kpong ka ugbabwọ ịta.”
Okpoko lee Ịkpambwọ Bala Oge Ọkpakpa
35Ụka ọọwa, iJisọsị tọ angịjụgbẹyị nyamwụ wo yẹkẹẹ, “Ụka ọlẹ kam duunu ẹrụ kpehe lẹẹ ugbeene, kam myị hanụ, anụ kpa okpoko lee ịkpambwọ bala egbatẹ gbe ịlọnụ ẹkpẹ kpong-kpong ka lẹ, ịngịngịhyẹ kunu amwụ ụ-ụwa kpong-kpong?” Ị wẹ byoo yẹkẹẹ, “Ehe! Ịngịngịhyẹ á kuhi amwụ ụ-ụwa ka, Ọngọlahị.”
36IJisọsị wẹ byaa yẹkẹẹ, “Ma, lẹẹlẹẹ lẹ, m jam byinu yẹkẹẹ, ọng myị́ ọng ọlẹ kọ la okpoko lee ịkpambwọ juwa lẹ aalẹ, ọngọọwa a hwọọ kpa ụ-ụbwọ ba ịlọmwụ pyii mẹ. Ọngọlẹ kọ tị la oge lẹka lẹ aalẹ, ọ hu awụrụ nyamwụ ra kọ kaka ra oge ọlẹ kọ ka kpa ụ-ụbwọ ịnyịnyị mẹ. 37Chajị, m jam byinu yẹkẹẹ, ẹla ọlẹ ká Ụpwụ Ịgọgọ ya lẹẹ ẹ-ẹgẹlẹ, chajị nyam lẹ, ọ́ ka dayi la ọ-họ jịra kaka. Ị da ụ-ụwa yẹkẹẹ, ‘Ị ka wa ọngọọwa jula ịnọmba nya alọhọbịrị,’ chajị ang myị́ ang ọlẹ kị da chajị nyam wuu lẹ, ị́ ka dayi la ọ-họ jịra chị ọnụ kaka.”
38Ọọwa lẹ, angịjụgbẹyị nyamwụ a wẹ byoo yẹkẹẹ, “Ọngọlahị ee, yẹ mẹ! Ahị kpa ige imiiye ịhyẹ jam ẹgẹlẹ lẹẹlẹẹ!” Ọọwa lẹ, iJisọsị a wẹ byaa yẹkẹẹ, “Anụ ba la ẹla nya ige ịwẹ oyaya mẹ! Ọ nwa lẹ!”
IJisọsị Raabwọ Ha Ohe Oluhye
(ịMatiyu 26:36-46; ịMakị 14:32-42)
39Ịnyị, iJisọsị a rụ kpehe bwu ẹgẹwẹ, juwa jẹ kele ka uhye nya Ọgbọdọ nya Olivu jaabwọ kọ kaa họ ene-ene lẹ, angịjụgbẹyị nyamwụ a bọọ kele lẹlẹ. 40Ịnyị, ụka kị pwụ ụwa lẹ, ọ byi angịjụgbẹyị nyamwụ yẹkẹẹ, “Anụ raabwọ ha Ohe Oluhye chajị kanụ ka chabwọ ju ka ẹpwụ nya ọmayẹ nya ang onyobyi ọhọhọ kaka mẹ!”
41Ịnyị, ụka ká iJisọsị rụ hi angịjụgbẹyị nyamwụ ụ-ụwa lala apatẹ ohu ịrụ lẹ, ọ ya arụụ nyamwụ kụ e-eji, juwa raabwọ ha Ohe Oluhye ẹ-ẹga ọọwa lẹlẹ. 42Ọ raabwọ ọọwa byi Ohe Oluhye yẹkẹẹ, “Oo, Ohe Oluhye Adada ee! Ó-ri kọ ri irya nyang tụbwọ aalẹ, Aa chuchuu, ká myị ká ukoku nya ang ọjụjụ ọtụka ọlẹ a chịpwụrụ him chẹẹ mẹ! I-irya nyam am ayịdang A tị ka họ koo! Ma, ọlẹ kọ ri irya nyang Ahụ Adịda ịnyị!” 43Ịnyị, olegu-ẹrụ ọhẹ a bwu epwoohe hireji kele ka ẹga nyamwụ, juwa jwọọ ọhụ ụ-ụwa lẹlẹ. 44Ịnyị, ụka ká iJisọsị juwa raabwọ ha Ohe Oluhye ụ-ụwa ẹ-ẹpwụ nya olujwo ọtọtọ nya ịlẹhị-ịlẹhị gụ olene-ene gbee lẹ, inwu ọlịnyịrọ nyamwụ a yẹ la iku nya ịwọ, juwa nya cheji bwu ịnyịrọ nyamwụ ụ-ụwa lẹlẹ.
45Ụka ká iJisọsị wuleji bwu uhye nya abwọ ọrịrị ọọwa, ọ kele ka ẹga nya angịjụgbẹyị nyamwụ. Ọ yaa kị juwa kpa une nọ, chajị nya ọ-chị́ pyẹpyẹ nya ang olujwo ọlẹpwụ nyaa. 46IJisọsị byaa yẹkẹẹ, “Ịịyẹ a tị́ du kanụ jam nune ịnyị? Anụ chị ahi-une kanụ wuleji, kanụ raabwọ ha Ohe Oluhye ọgwọgụ, chajị kanụ ka chabwọ ju ka ẹpwụ nya ọmayẹ nya ang onyobyi ọhọhọ kaka mẹ!”
Owuwu nya IJisọsị
(ịMatiyu 26:47-56; ịMakị 14:43-50; ịJọn 18:3-11)
47Ịnyị, ụka ọlẹ ká iJisọsị juwa kpa ẹla ọọwa ọ-ọnụ ya wẹ lẹ, iJudasị Isikarọtụ ọlẹ kọ ri ọngọhẹ lẹpwarịrị nya angịjụgbẹyị nyamwụ angị iwo kụrụ imiiye, a kpa iru nya angịkịla kụ ịlahị kele ka ẹga nya iJisọsị lẹlẹ. Ọọwa lẹ, iJudasị a kpụrụrụ kele ka ẹga nya iJisọsị, juwa tịtọ kọ ka ju iJisọsị ọnụ lẹlẹ. 48Ma, iJisọsị byoo yẹkẹẹ, “IJudasị ee, lẹ, ọ ri ọnụ ojuju pyii, a ka kpa pịrịm am Ọnyị nya ọngịnyị ehe ọlẹ ha ene lẹẹ, ẹnwa?”
49Ịnyị, ụka ká angịjụgbẹyị nya iJisọsị ihihi yẹ ang ọlẹ kị juwa họ ẹ-ẹga nyamwụ lẹ, ị byoo yẹkẹẹ, “Ọngọlahị ee, ahị kpa ẹma nya ẹwụ nyahị dẹwụ yẹng dada mẹ?” 50Ọọwa lẹ, ọngọhẹ nyaa a gbile oge nyamwụ pịlala lẹ, ọ pwọ ụrụ upwuriri nya ọnchẹ ọhẹ nya olegbeju ọgbahị nya angịkiliya nya Ohe Oluhye hwaarịị deeji lẹlẹ.
51Ma, iJisọsị byaa yẹkẹẹ, “Anụ ba hyaa! Ọngọngọhẹ a haa abwaabwọhẹ gụ ọwẹ kokoo!” Ọọwa lẹ, iJisọsị a kele kaka hu ụrụ nya ọngọlẹ kị hụla deeji wẹ kwọọ gbịlẹ-gbịlẹ, jaabwọ kọ la ene-ene lẹlẹ.
52Ọọwa lẹ, iJisọsị a byi alegbeju nya angịkiliya nya Ohe Oluhye bala alegbeju ịkpẹhị rịrị ube ịgọgọ ọtụka nya Ohe Oluhye nya ala iJuu ịlẹ kị ri alogu ẹdịyẹ nya iJudasị yẹkẹẹ, “Ọlẹ kaanụ ayịdang wẹẹ kpa ẹma nya ẹwụ bala ekwiji warị wẹ ẹga nyam ịnyị lẹ, m ri oloyi nyanụ? 53Ụka kam juwa kaa mẹ ang jẹ ẹnẹnẹẹnụ u-ube ịgọgọ ọtụka nya Ohe Oluhye lẹ, ánụ jụm jụ wuwu myị́ ka! Ma, anụ jam wum myị́ alẹ chajị ụka ọlẹ ká Ohe Oluhye ya hanụ anụ bala Ohe Onyobyi olegbeju nya ukpowu a lẹẹ lẹlẹ.”
IPita Pwa IJisọsị Rwarụ
(ịMatiyu 26:57-58,69-75; ịMakị 14:53-54,66-72; ịJọn 18:12-18,25-27)
54Ịnyị, ị wu iJisọsị kpa rụ kele ka ọdọdẹpwa nya olegbeju ọgbahị nya angịkiliya nya Ohe Oluhye lẹlẹ. Ụka ọọwa, iPita juwa baa jẹ ẹ-ẹkpẹ-ẹkpẹ hwẹẹ. 55Ọọwa lẹ, iPita a kele kaka hụhụ ụ-ụwa ta angịhyẹ ịlẹ kị tụ ila ju ẹ-ẹpwarịrị nya ọdọdẹpwa ọọwa, juwa wo ila taa lẹlẹ. 56Ụka ọọwa, ọnyị onjwo ọnyang ochiche ọhẹ chẹhị kaka yẹ iPita kọ hụhụ ụ-ụwa o-okoyila lẹ, ọ mwụụrụ yọọ chịng lẹ, ọ ya dodehe yẹkẹẹ, “Ọngọlẹ ri ọngọhẹ ẹ-ẹpwụ nya angịjụgbẹyị nya iJisọsị ịnyịnyị!”
57Ma, iPita pwa rwarụ ụ-ụwa yẹkẹẹ, “Ẹnwa ọnyang, aḿ jẹ́ ọlẹng ọwẹ ká rụ́ kpong-kpong ka.” 58Ụka kọ nọ chẹẹ, ọngọhẹ ọkịla myịmyị byi iPita yẹkẹẹ, “Ahụ ayịdang ri ọngọhẹ ẹ-ẹpwụ nya angịjụgbẹyị nya iJisọsị ịnyịnyị!” Ma, iPita myịmyị pwa rwarụ ụ-ụwa yẹkẹẹ, “Eheehe! Aḿ ri ọngọhẹ ẹ-ẹpwụ nyaa ka, ẹnwa ọlẹng!”
59Ụka kọ nọ chẹẹ lala ụka nya awa ookpokpo myịmyị, ọngọ ọkịla ya ẹla dodehe rụ́ iPita yẹkẹẹ, “Nya ẹla nya ịlẹhị ịnyị, ọlẹng ọwẹ ri ọngọhẹ lẹpwụ nya angịjụgbẹyị nya iJisọsị, chajị ọwa ayịdang ri ola ịGalili.”
60Ma, iPita myịmyị pwa rwarụ ụ-ụwa yẹkẹẹ, “Eheehe! Aḿ jẹ́ etu nya ẹlẹwẹ ká wẹẹ ya kpong-kpong ka, ẹnwa ọlẹng!” Ịnyị, ahyaahị lụka ọlẹ ká iPita juwa kpa ẹla ọọwa ọ-ọnụ ya wẹ lẹ, ọwọọwọ a da ịgbụ lẹlẹ. 61Ọọwa lẹ, Ọngọlahị a chẹhị nyamwụ kaka yẹ iPita lẹ, iPita a kpịtịya nya ẹla ọlẹ ká Ọngọlahị ya tọọ lẹlẹ. Chajị, ọ byoo yẹkẹẹ, “Ahụ iPita ọwẹ ka pwam rwarụ yẹkẹẹ, ọwa nyị́ jẹ́m ka, ugbabwọ ịta ene ká ọwọọwọ ka da ịgbụ la odu ọlalẹ.” 62Ịnyị, ọ tọ iPita olujwo lụmẹ lẹ, ọ gba kpehe kele kaka jida onyuujujwo nya ịlẹhị-ịlẹhị ụ-ụwa lẹlẹ.
Ị Kpa IJisọsị Họ
(ịMatiyu 26:67-68; ịMakị 14:65)
63Ụka ọọwa, ịsọja ịlẹ kị juwa gbe iJisọsị, juwa kpọọ họ bala o-juwa nyi ọọ enyiri nya ịlẹhị-ịlẹhị. 64Ị ya apwụ chị iJisọsị a-ahị. Ụka ká angịhyẹ nyaa juwa wa iJisọsị ang kpuu lẹ, angịkịla a juwa byoo yẹkẹẹ, “Bwuru ẹnyị nya ọngọlẹ kọ wang ang wẹ ịnịịnọ, ya jehi mẹ.” 65I juwa chị oyoyi jwọọ nya ịlẹhị-ịlẹhị, juwa ya ala inyibyi bọọ ụ-ụwa jaabwọ kọ háa kaka ba ịnyịnyị lẹlẹ.
IJisọsị Ị-ịlahị nya Alọjịra-jịra Ọtụka nya Ala IJuu
(ịMatiyu 26:59-66; ịMakị 14:55-64; ịJọn 18:19-24)
66Ịnyị, ụka ká ahị pyẹ lẹ, alịgabwọ nya ala iJuu wuu a kele kaka jịra ẹ-ẹgẹhẹ bala alegbeju nya angịkiliya nya Ohe Oluhye wuu bala Ịtịcha ị-mẹ ehile nya iMosisi jẹ lẹ, ị kpa iJisọsị kele kaka godayị rịrị ị-ịlahị nya ịkọtụ ọgbahị ọgụgụ nyaa lẹlẹ. 67I byi iJisọsị yẹkẹẹ, “Ya jehi wẹẹ! Ahụ ayịdang kpangga a ri ịKịrayịsị ọọwa ịnyịlẹhị lẹ?” IJisọsị wẹ byaa yẹkẹẹ, “Ó-ri kam yaya jenu lẹẹlẹẹ wẹẹ, ánụ juwa ka myị ka! 68Ọ́ tị ri kam tọnụ ịtọ ẹlẹhẹ tọtọ wẹẹ, anụ juwa ka myị-ị wẹm ka, ịnyịnyị! 69Ma, bwu ọlẹẹlẹẹ, Ọnyị nya ọngịnyị ehe ọlẹ ayịdang juwa ka rụ kele kaka hụhụ ụ-ụwa u-upwuriri nya ọngịrị ọtụka nya Ohe Oluhye lẹ!”
70Angịwẹ myịmyị tọ iJisọsị wo yẹkẹẹ, “Ee lẹ, ọ-Ọnyị nya Ohe Oluhye a tị tị ri lẹka, lee?” IJisọsị wẹ byaa yẹkẹẹ, “Anụ ayịdang tị́ kpa ọnụ nyanụ wụrụm ịnyị wẹ lẹ.”
71Ọọwa lẹ, angịwẹ a juwa byi awụlẹ yẹkẹẹ, “Anụ ya ká ibeenu ọkịla ọhẹ ji, ahị ka tịtọ myịmyị gụ ọlẹ wẹẹ!”
Currently Selected:
ILUKU 22: IBNO
Highlight
Share
Copy
Want to have your highlights saved across all your devices? Sign up or sign in
Igede Bible © The Bible Society of Nigeria, 2019.
