ILUKU 19

IJisọsị Bala ỊSakiyọsị

1Ụka ọhẹ, iJisọsị juwa chịpwụrụ kam bwu epweji nya iJeriko. 2Ọlẹng ọhẹ juwa ụ-ụwa ọlẹ kị wụrụ ịSakiyọsị. Ọ ri olegbeju nya angị nyẹ angịnyị ẹpwa. Ọ kpụ ụdụ lụmẹ. 3ỊSakiyọsị ọwẹ juwa tịtọ kọ ka yẹ iJisọsị. Ma, jaabwọ kọ ri ọngọ kpikpiri lụmẹ lẹ, ọ́ jẹ́ yẹ iJisọsị ẹ-ẹhị myị́ ka, ọọ-la iru nya angịnyị. 4Ịnyị, ịSakiyọsị a yegiri la ụnyẹ ji ịlahị nya iru nya angịnyị ịịwa kaka kpụ uhye nya okoji isikamọ ọlẹ kọ lala okoji nya ombyi ọ-ọnụ ụgbẹyị ọlẹ ká iJisọsị juwa chịpwụrụ bwu lẹlẹ. 5Ụka ká iJisọsị jẹ pwụ ụwa, ọ chẹhị kaka yẹ ịSakiyọsị u-uhye nya okoji ọọwa. Ọ byoo yẹkẹẹ, “ỊSakiyọsị ee, hireji mẹ ẹnwa! Chajị ẹ-ẹpwa nyang, m ka hyehe obyi alẹ pyii lẹlẹ.”

6Ịnyị, ịSakiyọsị a hireji bwu uhye nya okoji ahyaahị lẹ, ọ da iJisọsị ọwụraba kele ka ẹpwa nyamwụ, juwa chị ọkẹkẹnị ọtụka-ọtụka lẹlẹ. 7Ma, ụka ká angịlẹ kị juwa ụ-ụwa yẹ ọhọhọ nya iJisọsị ọọwa, ị juwa mwọ ala ya yẹkẹẹ, “Anụ yẹ jaabwọ ká ọlẹng ọlẹ mwọọgịlẹ wẹẹ ka ẹpwa nya ọngọhọbịrị ọlaanyị, kaka ju ụga ụ-ụwa wẹẹ.”

8Ịnyị, ụka ká iJisọsị juwa ẹ-ẹpwa nya ịSakiyọsị lẹ, ịSakiyọsị a wuleji, byoo yẹkẹẹ, “Ọngọlahị ee, yẹ mẹ! M ka chị ang-abwọ nyam wuu ebwo imiiye kam ka hu ebwo ọhẹ nyamwụ ga ha ikpehika lẹ! Angịlẹ kam họ ri la ijẹẹhị ene-ene lẹ, m ka nwụ ọngọngọọng nyaa uri nya ang ịịwa mwụ aba ba ugbabwọ ine kwiwa lẹẹlẹẹ ịnyịnyị lẹ!”

9Ịnyị, iJisọsị a byoo yẹkẹẹ, “ỊSakiyọsị, wo mẹ! Ọchịda nya Ohe Oluhye warị wẹ ọdọdẹpwa nyang alẹ lẹ! Jaabwọ kaahụ ayịdang ri ọngọhẹ lẹpwụ nya anyị nya Ebiraham ịnyịnyị lẹ. 10Chajị am Ọnyị nya ọngịnyị ehe ọlẹ warị wẹ odehe ọlẹ kaka pịlahị nya angịlẹ kị hwahị hi ụgbẹyị nya Ohe Oluhye kam ka chaa da bwu ẹpwụ nya ịhọbịrị ịhọhọ nyaa wuu ịnyịnyị.”

Oja nya Ụpang Iwo

(ịMatiyu 25:14-30)

11Ịnyị, ụka ká angịnyị juwa wo ala nya iJisọsị ịnyịnyịịnyị lẹ, iJisọsị a kpa oja ọkpịta ọlẹ mẹ ang jáa ụ-ụwa lẹlẹ. Chajị, ị juwa jẹ ju iJerusalẹm chwẹẹ lẹ. Chajị angịịwa juwa me irya ịnyịnyị yẹkẹẹ, Ohe Oluhye nyị juwa ka chị ịpyị adịrahụ nyamwụ ehe ahyaahị lẹ. 12Ọ jaa oja ọọwa yẹkẹẹ, “Ụka ọhẹ, ọlẹng ọtụka ọhẹ juwa kọ hu ang ẹdịyẹ ka epwoja ọlụrụ ka ẹga nya adịrahụ ọgbahị ọhẹ ọlẹ kọ ka ya ọngịrị họọ kọ ka ri Adịrahụ nya ọpyị nya ụpwọma nyamwụ ene kọ ka nya bwu ụwa. 13Ma, ene ká ọlẹng ọọwa ka yegiri rụ kanyị lẹ, ọ be ẹkọ wụrụ anchẹ nyamwụ angị iwo chiriri. Ọ hu ụpang ookpokpo ha ọngọngọọng nyaa lẹ, ọ byaa yẹkẹẹ, ‘Anụ kpa okpoko ọwẹ da ọhị gbee pwụ ụka ọlẹ kam ka nyanyị mẹ.’ 14Ma, jaabwọ ká ọlẹng ọtụka ọọwa wụ alọpyị nyamwụ ẹjẹ lụmẹ kaka kpoye lẹ, ị pwa yẹkẹẹ, nyị́ ka ri adịrahụ nyịwa ka. Ọọwa lẹ, ị du angịhyẹ ẹrụ kele kaka byi adịrahụ ọgbahị ọọwa yẹkẹẹ, ‘Ahị alọpyị nyahị wuu pwa yẹkẹẹ, ọlẹng ọwẹ á ka ri adịrahụ nyahị kpong-kpong ka.’ ”

15“Ịnyị, ụka ká ọlẹng ọtụka ọọwa ye ọngịrị nya adịrahụ oriri ọọwa kpá wuu lẹ, ọ nya tịrẹkpẹ kele ka ọpyị nyamwụ lẹlẹ. Ọọwa lẹ, ọ be ẹkọ wụrụ anchẹ nyamwụ ịlẹ kọ ya okpoko ju ọhị lẹ, ọ byaa yẹkẹẹ, ‘Anụ kele kaka kpa apyobwuna nya ọhị ọdada nyanụ warị kam yẹ mẹ.’ 16Ọnchẹ nya ọgbanyẹ kele kaka byoo yẹkẹẹ, ‘Ọngọlahị, yẹ mẹ. M kpa ụpang ookpokpo ọlẹ ká ya ham da ọhị gbee lẹ, m ye apyobwuna la ụpang iwo chiriri lẹẹ lẹ!’ 17Ụka ọọwa, ayịbamwụ wẹ byoo yẹkẹẹ, ‘A họ hiigu lụmẹ ẹnwa. A ri ọnchẹ ọnyịịla lụmẹ. Jaabwọ ká chịla o-hu ọkịlẹtụ ha ẹ-ẹpwụ nya ọkpẹhị rịrị ang ochiche wẹ lẹlẹ, m tịtị ka ya ọngịrị hang ká ka ri olegbeju ọkpẹhị rịrị epweji iwo chiriri ham lẹ.’ 18Ọnchẹ oheeye kele kaka byi ayịbamwụ yẹkẹẹ, ‘Ọngọlahị, yẹ mẹ! Ụpang ookpokpo ọlẹ ká ya ham lẹ, m kpa da ọhị gbee lẹ, m ye apyobwuna la ụpang ịrụ lẹẹ lẹ!’ 19Ayịbamwụ wẹ byoo yẹkẹẹ, ‘O hiigu! Ịnyang ahụ ri epweji ịrụ ká ka ri olegbeju ọkpẹhị rịraa ham ịnyịnyị lẹ.’ 20Ọọwa lẹ, ọnchẹ ọkịla a kele kaka byi ayịbamwụ yẹkẹẹ, ‘Ọngọlahị ee, ụpang nyang ọlẹ ká ya ham ugbeene, kam kpa kaka bwọ ẹhị ẹ-ẹpwụ nya ọnyị-apwụ a lẹẹ lẹlẹ. 21Ang odudu kam họ ịnyị ri yẹkẹẹ, a lam uhi-uhi, chajị ahụ ayịdang ri ọngọ lujwo lụmẹ kaka kpoye. A ri ọngọlẹ ká kaa go ajẹ nya ang ju ang bwu ẹga ọlẹ ká tụguru ene kpong-kpong ka. A tị kaa hya egbe bwu ẹga ọlẹ ká ya tọ ene ka ịnyịnyị.’ 22Ayịbamwụ wẹ byoo yẹkẹẹ, ‘Ahụ ọnchẹ onyobyi ọwẹ lee! Ẹla ọlọnụ nyang pyii, m ka kpa ya eje wung lẹ! Ịnọ, ọ ri a jẹ́ yẹkẹẹ, am nyị ri ọngọ lujwo lụmẹ? Bala, am ọ-kaa go ajẹ nya ang ju ang bwu ẹga ọlẹ kaam nyị́ tụguru ene ka? Bala am ọ-kaa hya egbe bwu ẹga kaam nyị́ ya tọ ene kpong-kpong ka ịnyịnyị? 23Ee lẹ, ịịyẹ a tị́ du ká tị kpa okpoko ọlẹ kọ ri ịnyam lụbwọ-lẹta kaka ju ọhị chajị kam nya lẹ, kam ka ye okpoko ọọwa bala apyobwuna nyamwụ kaka, tị wẹ mẹ?’ 24Ọọwa lẹ, ayịbamwụ a byi angịlẹ kị godayị rịrị ụ-ụwa yẹkẹẹ, ‘Anụ kele kaka noo ụpang nyamwụ ọlaanyị, kanụ kpa kịla ọngọlẹ kọ la ụpang iwo lalẹ mẹ.’ 25Ọọwa lẹ, angịịwa a wẹ byoo yẹkẹẹ, ‘Ọngọlahị ee, m me ọngọ ọlaanyị tị́ la ụpang iwo chiriri kpataka wẹ ene lẹ!’ 26Ọọwa lẹ, ayịbaa a wẹ byaa yẹkẹẹ, ‘Nya ịlẹhị-ịlẹhị, m byinu yẹkẹẹ, ọngọlẹ kọ kpa ang ọlẹ kọ la maga gbee kọ chị anyị da ịlọmwụ aalẹ, ọngọọwa, ị ka ya ang ọtụka ba ọlẹ kọ la juwa ene u-uhye ha lẹ. Ma, ọng myị́ ọng ọlẹ kọ tị kpa ang ọlẹ kọ la maga kpụ ọ-chị anyị ọhẹ-lọhẹ da ịlọmwụ ka aalẹ, ang ochiche ọlẹ kọ la juwa ene lẹ, ị ka nọọ ọọwa hi abwabwọ pyii. 27Chajị, angịlẹ wuu kị ri aluji nyam, kị lẹẹ pwa yẹkẹẹ, am nyị́ ka nya kaka ri adịrahụ nyịwa kaka lẹ, anụ kele kaka kpaa warị kanụ nwaa wuu chahị jum ẹ-ẹgẹlẹ lẹẹlẹẹ mẹ.’ ”

IJisọsị Kụ Ụnyịrẹ Ka IJerusalẹm

(ịMatiyu 21:1-11; ịMakị 11:1-11; ịJọn 12:12-19)

28Ịnyị, ụka ká iJisọsị ya ala ịịwa wuu kpá lẹ, ọ yegiri ji ịlahị nya angịkịla lẹ, ị juwa kele ka iJerusalẹm lẹlẹ. 29Ụka kọ jẹ ju epweji nya ịBẹtịfegi bala ịBẹtanị chwẹẹ ẹ-ẹga nya ọgbọdọ nya Olivu lẹ, ọ du angịjụgbẹyị nyamwụ angị imiiye ịhyẹ ẹrụ lẹlẹ. 30Ọ byaa yẹkẹẹ, “Anụ kele ka epweji ochiche ọlịlahị nyahị ọwẹ mẹ. Ahyaahị kanụ pwụ ụwa, anụ ka yẹ ụgba nya ụnyịrẹ ọhẹ ọlẹ ká ọngọngọhẹ á kụ ẹnẹnẹhẹ lẹka, kọ bwọ eji ụ-ụwa. Anụ yoo, kanụ kpọọ wam mẹ. 31Ó-ri ká ọngọngọhẹ á tọnụ ịtọ yẹkẹẹ, ‘Ịịyẹ a tị́ du kanụ juwa yi ụgba nya ụnyịrẹ ọwẹ ori ịnyị?’ Aalẹ, anụ byi ọngọọwa yẹkẹẹ, ‘Ọngọlahị ayịdang a tịtọ nyamwụ lẹ.’ ”

32Ịnyị, angịjụgbẹyị nyamwụ ịịwa a kele ka ụwa lẹ, ị yẹ ụnyịrẹ ọọwa jaabwọ ká iJisọsị byaa lẹlẹ. 33Ụka kị juwa kpa ụgba nya ụnyịrẹ ọọwa yi ori lẹ, angị lala a byaa yẹkẹẹ, “Ịịyẹ a tị́ du kanụ juwa yi ụgba nya ụnyịrẹ ọwẹ ori ịnyị?” 34Ị wẹ byaa yẹkẹẹ, “Ọngọlahị a tịtọ nyamwụ a du lẹ.” 35Ịnyị, angịjụgbẹyị nya iJisọsị ịịwa a kpa ụgba nya ụnyịrẹ ọọwa kele ka ẹga nya iJisọsị lẹlẹ. Ọọwa lẹ, ị pwọ ịwụrụ nyaa ịhyẹ da ụnyịrẹ ọọwa u-uhye wuu lẹ, ị da iJisọsị ụbwọ hụhụ ụ-ụwa lẹlẹ. 36Ịnyị, ụka ká iJisọsị juwa yegiri u-uhye nya ụnyịrẹ ka iJerusalẹm lẹ, ị go ịwụrụ nyaa da ụ-ụgbẹyị ha ụnyịrẹ nyamwụ lẹlẹ.

37Ịnyị, ụka ká iJisọsị jẹ ju iJerusalẹm chwẹẹ, ẹ-ẹga ọ-pwọ hireji nya Ọgbọdọ Olivu lẹ, iru nya angịjụgbẹyị nyamwụ lụmẹ-lụmẹ a juwa dọmwụ nya o-ji Ohe Oluhye obe, juwa gwogbo họọ nya ịlẹhị-ịlẹhị la omyi o-gboo chajị nya ụkụrwọ ẹbyẹbyị la datị-datị ịlẹ ká iJisọsị kaa họ lẹlẹ. 38I juwa da owiwiyi gboo yẹkẹẹ, “Ahị ọwawa ọtụka a juwa hang Ahụ Adịrahụ ọlẹ ká wẹẹ warị la ẹnyị nya Ọngọlahị Ohe Oluhye! Ká okpunyi a juwa e-epwoohe! Ká ogbo ọtụka a juwa hang Ahụ Ohe Oluhye ẹ-ẹga oluhye!”

39Ụka ọọwa, ala ịFarịsii ịhyẹ ịlẹpwụ nya iru nya angịịwa byi iJisọsị yẹkẹẹ, “Ayịbahị ịtịcha, yalibyi la angịjụgbẹyị nyang ịwẹ kị ba la ọmọnyọ ọwẹ pyii!”

40IJisọsị wẹ byaa yẹkẹẹ, “Nya ịlẹhị-ịlẹhị, m byinu yẹkẹẹ, ó-riri ká angịwẹ á tụ ọnụ nyaa tụpịrị wẹwẹ aalẹ, Ohe Oluhye ka họ ká ajwọ ịlẹ wuu ka gwogbo, juwa da iwuru ham myị́.”

IJisọsị Je Ida O-oluhye nya IJerusalẹm

41Ịnyị, ụka ká iJisọsị jẹ ju epweji nya iJerusalẹm chwẹẹ, kọ juwa kpẹhị yẹ epweji ọọwa lẹ, ọ juwa jida chajị nya iJerusalẹm lẹlẹ. 42Ọ yẹkẹẹ, “Oo! Ahụ epweji nya iJerusalẹm! Ịnọ, ó-ri ká angịnyị nyang á ka jẹ́ ang ọlẹ kọ ka wu okpunyi nya Ohe Oluhye kụrụ haa myị́ wẹẹ lẹ, ịnọ, ọ́ ka há lẹka? Ma, ánụ tị jẹ́ kaka. Chajị, ọ kpịbaa hiinu lẹ. 43Chajị ẹnụtụrụ onyobyi juwa warị ị-ịlahị ụka ọlẹ ká alija alẹwụ nyanụ ka warị kaka bá urwe dọgịlẹ ju epweji nyanụ wuu chọnụ gbee, kanụ ka ye ẹgẹgẹhẹ bwu rụnyẹ kpehe kaka. 44Ọọwa lẹ, aluji nyanụ ịịwa a ka gba mịlaanụ lẹ, ị ka tụrụ epweji nyanụ ju eji, nwụnụ wuu chọnyị-chọnyị gbee kị ka tụrụ ebe ịlẹ kanụ kpa ajwọ nwụ́ wuu ju eji gbanggbang la ẹjwọ ọhẹ-lọhẹ hi nịrọ ọkịla u-uhye kaka lẹlẹ. Chajị, anụ ayịdang á jẹ́ ụka nya eje nya Ohe Oluhye nyanụ datị kaka.”

IJisọsị Jụ Ka Ube Ịgọgọ Ọtụka nya Ohe Oluhye

(ịMatiyu 21:12-17; ịMakị 11:15-19; ịJọn 2:13-22)

45Ịnyị, iJisọsị a jụ kele ka ube ịgọgọ ọtụka nya Ohe Oluhye nya ala iJuu lẹ, ọ ku angịlẹ kị juwa kpa ihi ra ta awụlẹ rụ kpehe hi ụwa lẹlẹ. 46Ọọwa lẹ, iJisọsị a byaa yẹkẹẹ, “Ohe Oluhye ya ẹla ụ-Ụpwụ Ịgọgọ yẹkẹẹ, ‘Ube nyam Am Ohe Oluhye ka ri ube nya abwọ ọrịrị.’ Ma, anụ tị mwọọgịlẹ jam hu ube ịgọgọ ọọwa nya ube nya ọjịra-jịra nyanụ anụ angị họ angịnyị ri lala aleyi lẹ!”

47Ịnyị, iJisọsị a juwa mẹ ang jẹ u-ube ịgọgọ ọtụka nya Ohe Oluhye nya ala iJuu ọọwa ẹnẹnẹẹnụ lẹlẹ. Ụka ọọwa, alegbeju ịgbahị nya angịkiliya ha Ohe Oluhye bala ala ịtịcha ị-mẹ ehile nya iMosisi jẹ wuu bala angị ịtụka-ịtụka nya ala iJuu wuu juwa tịtọ kị ka nwụ iJisọsị daarụ. 48Ma, ịwa ayịdang á tị ye ịngịngịhyẹ ka yụbwọ chị kpa họọ ịnyị myị́ kaka. Chajị iru nya angịnyị ịlẹ wuu kị juwa wo ẹla nya iJisọsị lẹ, ị kpa ọkịlẹtụ ookpokpo myị ju ẹla ọọwa wuu.

Currently Selected:

ILUKU 19: IBNO

Highlight

Copy