ỊJỌN 19

1Ịnyị, ịPayịleti a wu iJisọsị wa egbiji ụ-ụwa lẹlẹ. 2Ịsọja ịlẹ kị wu iJisọsị, họ okpo nya ejwo-ejwo kụrụ iJisọsị e-egbeju. Ị hu awụrụ ọnyọmịla ogbileji kụrwọọ. 3Ịnyị, ị kele juwa kpa iJisọsị họ ụ-ụwa yẹkẹẹ, “Ịjachi! Ahụ Adịrahụ nya ala iJuu, a ka hịhị gbe oyi myị́ oyi!” I kele juwa wọọ abwọ ụ-ụwa ịnyịnyị lẹlẹ.

4ỊPayịleti myịmyị kele ka ẹga nya aluche nya angịnyị kaka byi ala iJuu ịwẹ yẹkẹẹ, “Anụ yẹ mẹ! M ka kpa ọlẹng ọlẹ warị wẹ ẹga nyanụ, chajị kanụ ka jẹ́ yẹkẹẹ, am nyị́ ye ịngịngịhyẹ ka ya eje woo u-uhye nyamwụ kpong-kpong kaka.” 5Ịnyị, ị kpa iJisọsị kele lẹlẹ. Ọ kụrụ okpo nya ejwo-ejwo ọọwa bala awụrụ ọnyọmịla ogbileji ụ-ụwa wẹẹ. Ọọwa lẹ, ịPayịleti a byi aluche ịịwa yẹkẹẹ, “Anụ yẹ mẹ! Ọlẹng ọọwa a lẹẹ lẹlẹ!” 6Ịnyị, ụka ká alegbeju nya angịkiliya nya Ohe Oluhye bala alegbeju nya ala iJuu ịkịla yẹ iJisọsị lẹ, ị juwa yẹkẹẹ, “Ahị tịtọ ká ka gwọọ iloo ba okoji hahị! Ahị tịtọ ká ka gwọọ iloo ba okoji hahị!” ỊPayịleti wẹ byaa yẹkẹẹ, “Ọ tị́ wẹ lẹ, anụ kpọọ rụ kele kaka gu iloo ba okoji la ịlọnụ mẹ. Ḿ ye ịngịngịhyẹ ọlẹ kọ họ kpoye nya ehile kpụ, m ka ya eje nya igu woo kpong-kpong kaka.”

7Alegbeju nya ala iJuu ịịwa wẹ byi ịPayịleti yẹkẹẹ, “Ahị la ehile nyahị ọhẹ juwa. Bwula ehile nyahị ọọwa, ọ chịla ká ọlẹng ọlẹ ka gbu pyii lẹ. Chajị, ọ kpa agbụrụ agbụrụ nya ịlọmwụ yẹkẹẹ, ọwa ayịdang nyaa ri Ọnyẹwẹ nya Ohe Oluhye lẹlẹ.”

8Ụka ká ịPayịleti wo ẹnyị nya Ọnyẹwẹ nya Ohe Oluhye ịnyị lẹ, ọ juwa lọọ uhi-uhi gụ olene-ene lẹlẹ. 9Ọọwa lẹ, ịPayịleti a rụ tịrẹkpẹ kele ka ọdọdẹpwa nyamwụ kaka tọ iJisọsị ịtọ wo yẹkẹẹ, “Ale, a tị́ bwu warị kpong-kpong?” iJisọsị hwoo ujiji kpini kpini. Ọ́ wẹ ẹlẹlẹhẹ bwu ọnụ ka. 10ỊPayịleti byi iJisọsị yẹkẹẹ, “O ri á ka wẹm ẹlẹlẹhẹ kaka? Á jẹ́ yẹkẹẹ, am nyị ka la ọngịrị chịng da myị́ lee ọ-myị ọnụ yẹkẹẹ, nyị gung iloo ba okoji myị́ mẹ ka?”

11IJisọsị wẹ byi ịPayịleti yẹkẹẹ, “A la ọngịrị ọlịnyị u-uhye nyam myị́. Ma, chajị nyọlẹ ká Ohe Oluhye ayịdang ya ọngịrị ọọwa hang ịnyị ene a tị du lẹ. Ọngọlẹ kọ wum jung ụ-ụbwọ, a tị la abyị nya ọhọbịrị onyobyi ọhọhọ gụ lẹ.”

12Ụka ká ịPayịleti wo ẹla ọọwa lẹ, ọ juwa maga nya ụgbẹyị ọlẹ kọ ka bwu kpa chị iJisọsị da lẹlẹ. Ma, ala iJuu ịwẹ wuu juwa chaga gbogbogbo yẹkẹẹ, “Ó ri ká chị ọlẹng ọlẹ da alẹ lẹ aalẹ, á tị tị ka ri oligu nya iSisa adịrahụ ọgbahị kokoo! Chajị, ọng myị́ ọng ọlẹ kọ hu ịlọmwụ nya adịrahụ, jaabwọ ká ọlẹng ọwẹ họ aalẹ, oluji nya adịrahụ iSisa, ọngọọwa a ri lẹlẹ!”

13Ụka ká ịPayịleti wo ala ịịwa lẹ, ọ gba iJisọsị kpehe kele ka ụda lẹ, ịPayịleti a kaka hụhụ u-uhye nya ẹchị adịrahụ oleje nyamwụ ụ-ụwa ogidi nya ẹjwọ-ẹjwọ ọlẹ kị wụrụ ịGabata la oja nya ala iHiburu lẹlẹ. 14Ụka ọọwa ri ụka nya oje iwo kụrụ imiiye nya ẹnụ nya ahị ọpyẹpyẹ ọlẹ ká ahị ọpyẹpyẹ ọọnamwụ a juwa ka ri ẹnụ nya Ang Oriri Ọchịpwụrụ nya ala iJuu lẹ, ịPayịleti byi ala iJuu ịwẹ yẹkẹẹ, “Adịrahụ nyanụ wẹ lẹ!”

15Ala iJuu wuu wẹ la omyi o-gboo yẹkẹẹ, “Nwọọ daarụ mẹ! Nwọọ daarụ mẹ! Gwọọ iloo ba okoji hahị mẹ pyii!” ỊPayịleti wẹ byaa yẹkẹẹ, “Anụ tịtọ kam ka gu adịrahụ nyanụ iloo ba okoji hanụ lẹ?” Alegbeju nya angịkiliya nya Ohe Oluhye anyị wẹ byi ịPayịleti yẹkẹẹ, “Áhị́ la adịrahụ ọkịla ọhẹ dala Adịrahụ iSisa kaka!”

16Ịnyị, ịPayịleti a tụụbwọ hi iJisọsị ju alịsọja ịlẹ kị ka kpọọ kaka gu iloo ba okoji ụ-ụbwọ lẹ, ị juwa kpa iJisọsị rụ kele kị ka gwọọ iloo ba okoji ịnyịlẹhị lẹlẹ.

Ị Gu IJisọsị Iloo Ba Okoji

(ịMatiyu 27:32-44; ịMakị 15:21-32; iLuku 23:26-43)

17Ịnyị, ịsọja ịịwa a hu olo nya agurube nya iJisọsị chwọọ e-egbeju lẹ, ị juwa kpọọ rụ kele lẹlẹ. Ị jẹ gbee kị pwụ ẹga ọlẹ kị wụrụ iGolugota la oja nya ala iHiburu, ká etu nyamwụ ri ogo nya egbeju. 18I-iGolugota ọọwa kpangga, alịsọja ịịwa a gu iJisọsị iloo ba okoji lẹ. I gu angị imiiye ịkịla ịhyẹ iloo ba okoji ịkịka oyiye oyiye nya iJisọsị lẹ, iJisọsị a juwa ẹ-ẹpwarịrị nyaa lẹlẹ. 19ỊPayịleti da egbeju nya ẹla ọlẹ kị chị ba iJisọsị ị-ịlahị nyamwụ ba u-uhye nya agurube ọlẹ kị gu iJisọsị iloo ba. Ọ da ụpwụ ọọwa yẹkẹẹ, “IJisọsị ọla ịNasareti, Adịrahụ nya ala iJuu, a lẹẹ lẹ.” 20Ẹla ọọwa ọlẹ ká ịPayịleti da lẹ, iru nya ala iJuu lụmẹ-lụmẹ kele kaka wọọ, chajị ẹga ọlẹ kị gu iJisọsị iloo ba okoji ju epweji nya iJerusalẹm chwẹẹ lụmẹ. Ị da ẹla ọọwa la oja nya ala iHiburu bala oja nya ala iGirisi bala ịLatịn. 21Ịnyị, alegbeju nya angịkiliya nya Ohe Oluhye bala ala iJuu ịkịla wuu a kele kaka byi ịPayịleti yẹkẹẹ, “Ọlẹ ká da yẹkẹẹ, Adịrahụ nya ala iJuu lẹ, á ka ya ịnyị ka! Da yẹkẹẹ, ‘Ọlẹng ọlẹ yẹkẹẹ, Am a ri Adịrahụ nya ala iJuu lẹ.’ ” 22ỊPayịleti wẹ byaa yẹkẹẹ, “Jaabwọ kam da ju wẹ ene-ene lẹ, ịnyị, ọ ka la pyii lẹlẹ.”

23Ụka ọlẹ ká alịsọja ịịwa gu iJisọsị iloo ba okoji kpá wuu lẹ, ị chị ịwụrụ nyamwụ ebwo ine gịla awụlẹ lẹ, ọngọngọọng nyaa a la ookpokpo ookpokpo lẹlẹ. Ịnyị, ọ hi awụrụ ogbileji nya iJisọsị ọlẹ kị mwụmwụ, kị gọọ ga kpụ, ị ka jẹ́-ẹ gu ene lee ọ-jẹ́ yoo yi myị́ kaka lẹlẹ. 24Ọọwa lẹ, ịsọja ịịwa a byi awụlẹ yẹkẹẹ, “Ọ́ chịla kahị ka gu awụrụ ọlẹ ene gu ka. Lẹ, anụ kẹwẹ kahị diwo jwoo mẹ. Ọngọlẹ ká iwo á wu lẹ aalẹ, ká ọngọọwa a lọọ mẹ.” Ịwụrụ nya iJisọsị ịwẹ kị ga ịnyị lẹ, ọ ri ọ-họ jịra nya ẹla ọlẹ kị da kpehe ẹ-ẹpwụ nya Ụpwụ Ịgọgọ ene-ene yẹkẹẹ,

“I go ịwụrụ nyam gịla awụlẹ.

I juwa diwo ju awụrụ ogbileji nyam.”

Ọọwa lẹ, alịsọja ịịwa a diwo ọọwa ịnyịlẹhị lẹlẹ.

25Ụka ọọwa, ịnịna nya iJisọsị godayị rịrị ụ-ụwa ẹ-ẹga nya agurube nya iJisọsị bala ọnyịnịna ọnyang nya ịnịna nya iJisọsị bala iMeri ahụ nya iKilopasị bala iMeri ọla ịMagịdala anyị wuu ịnyịnyị. 26Ụka ká iJisọsị chẹhị kaka yẹ ịnamwụ bala ọngọjụgbẹyị nyamwụ ọlẹ kọ họ́ọ lụmẹ lẹ, iJisọsị a byi ịnamwụ yẹkẹẹ, “Ayam, ọlẹng ọwẹ a ri ọnyị nyang lẹlẹ!”

27Ịnyị, iJisọsị a byi ọngọjụgbẹyị nyamwụ ọọwa yẹkẹẹ, “Ịnang a wẹ ịnyịnyị lẹlẹ!” Bwu ụka ọọwa kpangga, ọngọjụgbẹyị nya iJisọsị ọọwa a kpa ịnịna nya iJisọsị rụ ka ẹpwa nya ịlọmwụ, juwa kpẹhị rịrọọ ụ-ụwa lẹlẹ.

Igu Ogbugbu nya IJisọsị

(ịMatiyu 27:45-56; ịMakị 15:33-41; iLuku 23:44-49)

28Ịnyị, jaabwọ ká iJisọsị jẹ́ yẹkẹẹ, ang myị́ ang ọlẹ wuu kịị nyị ya dodehe chajị nya ọọwa lẹ, nyị họ jịra u-uhye nya ọọwa chị ọnụ lẹ, iJisọsị a ya ẹla ọlẹ dodehe, chajị ká ẹla oyaya nya Ụpwụ Ịgọgọ wuu chajị nyamwụ ka họ jịra lẹlẹ. Ọ ya ẹla ọọwa yẹkẹẹ, “Imyi-enyi juwa nwụm.”

29Ụka ọọwa, ere ọ-chagbịlangịrị ọhẹ ju ẹja ọhẹ rịrị ụ-ụwa. Ịnyị, angịhyẹ a kele kaka hu akuruhya kpa kaka ju ka ẹpwụ nya ere ọọwa chwaa, chọọ ori ba uke nya okoji nya ihisọpụ lẹ, ị kpa kele kaka gu iJisọsị ọ-ọnụ kọ ka nwa lẹlẹ. 30Ụka ká iJisọsị ye ivinigaa ọọwa lẹ, ọ ya dodehe yẹkẹẹ, “Ọ myị́ lẹ.” Ọọwa lẹ, ụka kọ hiri egbeju nyamwụ kpẹẹ lẹ, ọ chị ẹjẹ lẹlẹ.

Ị Gu iJisọsị Ụwangga Ekilo

31Ụka ọọwa, ala iJuu kele kaka byi ịPayịleti yẹkẹẹ, nyị ya ọda ha ịwa, kịịwa nyị kele kaka mwụ angịlẹ kịị nyị gu iloo ba okoji ata mẹ. Chajị kịị nyị ka gbu lẹ, kịịwa nyị ka jẹ́-ẹ hiri egu nyaa eji kpa kaka ju eji ahyaahị mẹ. Chajị, ẹnụtụrụ ọọwa ri ẹnụ nya ịFụrayịdee ọlẹ kọ kaa ri ụka ọ-kpa nwụlanọ gbe Ẹnụtụrụ Ọhịnyọ Lụkụrwọ nya ala iJuu. Ọgụgụ wuu ri yẹkẹẹ, ẹnụ ụtụrụ nya ọmwịịnyọ ọọwa juwa ka ri Ẹnụtụrụ Ọhịnyọ Lụkụrwọ ọlịgọgọ gụ ịkịla wuu, chajị nya Ang Oriri Ọchịpwụrụ ọlẹ kọ pwoku ẹnụ ọọwa ịnyịnyị. 32Ịnyị, ịsọja ịwẹ a kele kaka mwụ ata nya ọngọhẹ bala ọngọ oheeye nya angịlẹ kị gu iloo ba ekeji ẹ-ẹga nya iJisọsị ịnyịnyị lẹlẹ. 33Ma, ụka kị pwụ ẹga nya iJisọsị lẹ, ị yẹ jaabwọ ká iJisọsị ayịdang gbu kpá ene-ene lẹlẹ. Ọọwa lẹ, ị mwụ ata nya iJisọsị eku kaka, lẹlẹ. 34Ma, ọlịsọja ọhẹ tị gu iJisọsị ụwangga ekilo nyamwụ hurum lẹ, ịwọ bala enyi a mwụ bwu ekilo nya iJisọsị kpehe lẹlẹ. 35Ọngọlẹ kọ kpẹhị nya ịlọmwụ yẹ ẹlẹwẹ kpangga, a lẹẹ da ẹla ọọwa kpehe lẹ. Ẹla nya ịlẹhị, ọ tị da kpehe lẹ. Ọwa ayịdang jẹ́ ịnyịnyị yẹkẹẹ, ẹla nya ịlẹhị nyaa wẹ, kọọwa nyị ya lẹ. Chajị kaahụ ọngọ wẹẹ wa ẹla ọlẹ wa ka myị la ẹla ọọwa la ọkịlẹtụ ookpokpo. 36Chajị ang ịlẹ wuu họ u-uhye nya iJisọsị chajị nyọka ri ọ-họ jịra nya ẹla ọlẹ ká Ụpwụ Ịgọgọ ya ene-ene yẹkẹẹ, “Ị́ ka be ukpunogu nyamwụ ọhẹ-lọhẹ ene kpong-kpong ka.” 37Ụpwụ Ịgọgọ myịmyị ya ẹ-ẹga ọkịla yẹkẹẹ, “Angịnyị ehe ka juwa chẹhị kaka yẹ ọlẹng ọọwa ọlẹ kị gu ụwangga ekilo.”

Ị Ju Ogu nya IJisọsị Eji

(ịMatiyu 27:57-61; ịMakị 15:42-47; iLuku 23:50-56)

38Ụka kọ nọ chẹẹ lẹ, iJosẹfụ ọhẹ ọlẹ kọ bwu epweji nya Arịmatiya, a pwụ eji kele lẹlẹ. IJosẹfụ ọọwa ri ọngọjụgbẹyị nya iJisọsị. Ma, ọ tị kaa kpa ịlọmwụ kwiikwii, chajị nya uhi nya ala iJuu. IJosẹfụ ọọwa kele ka ẹga nya ịPayịleti kaka bịlọọ ogu nya iJisọsị kọ ka hwoo kpa kaka ju eji. Ọọwa lẹ, ịPayịleti a myị ọnụ họọ lẹ, iJosẹfụ ọwẹ a kele kaka hu ogu nya iJisọsị kpa rụ ịnyịlẹhị lẹlẹ. 39Ọlẹng ọkịla ọhẹ juwa ọlẹ kị wụrụ iNikodimọsị. Ọwa ri ọngọlẹ kọ ka ẹga nya iJisọsị la odu lụka ká iJisọsị juwa la ọhịhị wẹẹ lẹ. Ọ ra ida ichoru kwọkwọ ịhyẹ ịlẹ kị kpa ekeji ịlẹ kị wụrụ “maa” bala “aloyisi” họ. Ị la ilo lala awụtọọ nya ajẹ nya ịrayịsị myị́. 40Ịnyị, iJosẹfụ bala iNikodimọsị, a hu ogu nya iJisọsị lẹ, ị ya ịpwụ inyiiwuru ịlẹ kị ra, rị ogu nya iJisọsị bala o-hu ida ịịwa wọọ, jaabwọ ká ala iJuu kaa họ ene kị kaa ju ogu nyaa eji lẹlẹ. 41Ẹga ọlẹ kị gu iJisọsị iloo ba okoji lẹ, ẹrụ oliku ọhẹ juwa ụ-ụwa. Iworu onyeewe-onyeewe ọhẹ tị juwa ẹ-ẹrụ ọọwa ịnyịnyị. Ị́ ju ọngọngọhẹ eji ẹ-ẹpwụ nya iworu ọọwa ẹnẹnẹhẹ lẹka. 42Ọọwa lẹ, iJosẹfụ anyị ịwẹ a hu ogu nya iJisọsị kpa kele kaka ju eji ụ-ụwa lẹlẹ. Chajị, ẹnụtụrụ ọọwa ri ẹnụ nya ịFụrayịdee ọlẹ kọ kaa ri ụka ọ-kpa nwụlanọ gbe Ẹnụtụrụ Ọhịnyọ Lụkụrwọ nya ala iJuu lẹ. Ụka ọọwa lẹ, odu ohihi juwa ju chwẹẹ lẹ.

Currently Selected:

ỊJỌN 19: IBNO

Highlight

Copy