ỌMWỤ ỌDADA 40

IJosẹfụ U-ube nya Agba

1Ụka kọ nọ chẹẹ, ọnchẹ ọhẹ ọlẹ kọ ri olegbeju ọkpẹhị rịrị ere ọnwanwa nya adịrahụ nya ala Ijipiti wuu, họ ẹlẹhẹ wụ iFero Adịrahụ ẹjẹ lụmẹ. Ọnchẹ ọkịla ọlẹ kọ ri olegbeju ọgbahị nya angị họ ịkaa nya iFero Adịrahụ họ ẹla ọlịnyị-ọlịnyị wụ iFero ẹjẹ lụmẹ ịnyịnyị. 2Ịnyị lẹ, agbama nya iFero Adịrahụ a wuru lụmẹ-lụmẹ jahị da anchẹ alegbeju angị imimiiye ịwẹ lụmẹ-lụmẹ lẹlẹ. 3Ọọwa, adịrahụ a wu anchẹ angị imimiiye ịwẹ kpa kele kaka ju agba u-ube nya agba ọlọdọdẹpwa nya olegbeju ọgbahị nya angịdẹwụ ịlẹ kị juwa kpẹhị rịrị ọdọdẹpwa nya adịrahụ lẹlẹ. U-ube nya agba ọọwa-ọọwa, iJosẹfụ a ji ịnyịnyị lẹ. 4Ụka ọọwa, olegbeju ọgbahị nya angịdẹwụ ọọwa byi iJosẹfụ, nyị myị ẹrụ ha anchẹ nya adịrahụ angị imimiiye ịịwa u-ube nya agba. Ịwa wuu juwa lawụlẹ lụka ọtata.

Ụlaa nya Anchẹ nya iFero

5Odu ọhẹ lẹ, ọnchẹ nya iFero ọlẹ kọ ri olegbeju ọkpẹhị rịrị ere ọnwanwa nyamwụ bala ọnchẹ ọkịla ọlẹ kọ ri olegbeju ọgbahị nya ịkaa ọhọhọ, a la ụlaa u-ube nya agba ọlẹ ká iJosẹfụ ji lẹlẹ. Ọngọngọọng lẹpwụ nyaa ịwa angị imimiiye la ụlaa nyamwụ datị hi ọngọkịla nyaa. Etu nya ụlaa ọnyọọnyị datị hi ọkịla ịnyịnyị. 6Ụka ká ahị pyẹ lụtụrụ ká iJosẹfụ kele kaka yaa kị bwọ ayiiji lẹ, ọ jẹ ká ẹlẹhẹ juwa ẹ-ẹga nyaa lẹlẹ. 7IJosẹfụ taa ịtọ u-ube nya agba ọọwa yẹkẹẹ, “Ịịyẹ a tị́ du kanụ juwa bwọ ayiiji lụmẹ ịnyị alẹ?” 8Anchẹ ịwẹ byi iJosẹfụ yẹkẹẹ, “Ọngọngọọng lẹpwụ nyahị la ụlaa ọhẹ lodu ịnịyẹ, ma, áhị tị ye ọngọlẹ kọ ka bwuru etu nyaa ya jehi kaka, ịnyị a du lẹ.” Ọọwa lẹ, iJosẹfụ a wẹ byaa yẹkẹẹ, “Etu nya ụlaa ọjẹ́jẹ ji ẹpwụtụbwọ nya Ohe Oluhye! Lẹ, anụ wa alaa nyanụ ịịwa jem kam wowo wẹẹ.”

IJosẹfụ Bwuru Etu nya Ụlaa Ọnyịịla

9Olegbeju ọgbahị ọkpẹhị rịrị ere nya adịrahụ wa ụlaa nyamwụ jene. Ọ wa ụlaa ọọwa yẹkẹẹ, “Ụka kam juwa nune, m la ụlaa kam yẹ alakọnụ. 10Alakọnụ ọọwa be abwọ ịta. Ọ gu apwụ ahyaahị, ọ nwụ́ egbe lẹ, egbe ịịwa a ga i-ijata lẹlẹ. 11Ụka ọọwa, m godayị ụ-ụwa la ukoku onwere nya adịrahụ ụ-ụbwọ. Ọọwa, m juwa pyị enyi nya egbe nya alakọnụ ịịwa kwẹẹ, ju ka ẹpwụ nya ukoku ọọwa lẹ, m hu ukoku ọwẹ ha adịrahụ ụ-ụwa ẹ-ẹpwụ nya ụlaa lẹlẹ.”

12Ụka ká iJosẹfụ wo ụlaa nyamwụ ọọwa kpá lẹ, ọ byi ọlẹng ọwẹ yẹkẹẹ, “Etu nya ụlaa nyang ọwẹ a lẹẹ lẹlẹ: Abwọ ịta nya alakọnụ ịịwa ịlẹ ká yẹ, ku ọmwakpa nya ụtụrụ ịta ịnyịnyị. 13Etu nyamwụ ri ụtụrụ ọhata nya alẹ, adịrahụ ka gbang kpehe hi ube nya agba ọlẹ. Ọọwa, ọ ka hung tịrẹkpẹ kele ka iwe-ahụrụ onyogo nyang lẹlẹ. A ka myịmyị-ị̀ ri olegbeju ọkpẹhị rịrị ere nyamwụ juwa da ere họọ nwa jaabwọ ká-a họ ene-ene.” 14Ọọwa, iJosẹfụ a byoo yẹkẹẹ, “Chuchuu adam, ụka kị kpang tịrẹkpẹ ka iwe-ahụrụ nyang kpá ká ang wuu á juwa kịlahị hang lẹ, aa kpịtịya nyam ẹ-ẹga nya iFero Adịrahụ, chajị kị ka gbam kpehe hi agba ọlẹ mẹ! 15A yẹm wẹ lẹ, ịnọ am ọnyị nya ala iHiburu ịnyị. Ị wum wu yoyi kpa warị kaka ra ám ọ-ọpyị nya ala Ijipiti ọlẹ. Ọlẹ kam tị lẹẹ ám Ijipiti lẹ, ẹ-ẹlẹlẹhẹ onyobyi, m họ, a du kị wum kaka jwẹẹ ám u-ube nya agba ọlẹ ka ịnyịnyị.”

IJosẹfụ Bwuru Etu nya Ụlaa Onyobyi

16Ụka ọọwa, olegbeju ọgbahị nya ịkaa ọhọhọ ha adịrahụ wo jaabwọ ká etu nya ụlaa nya olegbeju ọkpẹhị rịrị ere ọwẹ hiigu lụmẹ lẹ, ọ tịtị wa ụlaa nyamwụ je iJosẹfụ ịnyịnyị lẹlẹ. Ọ wa ụlaa ọọwa yẹkẹẹ, “Ụka kam juwa nune, m la ụlaa kam yẹ ịlọm ká olo nya edo ị-kpa ju ịkaa ịta rịrị awụlẹ u-uhye. 17Ọọwa, ụma nya ịkaa datị-datị lala ịlẹ ká iFero Adịrahụ kaa ri a juwa ẹ-ẹpwụ nya udo ọhata oluhye-ọgba ọọwa lẹlẹ. Ọọwa, ịchịnụ a warị kaka gu ịkaa ịịwa ri u-uhye egbeju nyam lẹlẹ.” 18Ụka kọ wa ụlaa nyamwụ ọọwa kpá lẹ, iJosẹfụ a wẹ byoo yẹkẹẹ, “Etu nya ụlaa nyang a lẹẹ lẹ: Edo ịta ịlẹ ká yẹ, ku ọmwakpa nya ẹnụtụrụ ịta. 19Ẹnụtụrụ ọhata nya alẹ, adịrahụ ka gbang kpehe hi ube nya agba ọlẹ. Ọ ka chịng egbeju, hung kaka pịlẹ u-uhye nya okoji. Ịchịnụ iluhye-ọgba ka gu iyo nyang ri.”

Alaa Ịịwa Họ Jịra

20Ẹnụtụrụ ọhata nya alaa ịịwa ri ẹnụ ọ-kpa kpịtịya nya ọmama nya iFero Adịrahụ. Ọọwa, ọ họ ang oriri ọtụka-ọtụka ha anchẹ nyamwụ wuu bala alụkụrwọ ilekpeleji nyamwụ wuu lẹ, ọ du ẹrụ kele kaka gba anchẹ angị ịtụka nyamwụ angị imiiye ịwẹ kpehe bwu ube nya agba ọọwa ịnyịlẹhị lẹlẹ. 21Ịnyị lẹ, adịrahụ a tịrị ọngọlẹ kọ ri olegbeju ọkpẹhị rịrị ere ọnwanwa nyamwụ ẹkpẹ kele ka iwe-ahụrụ nyamwụ onyogo lẹ, ọ juwa da ere ha adịrahụ nwa, jaabwọ ká iJosẹfụ byoo ya, nyị ka la lẹlẹ. 22Ọngọlẹ kọ ri olegbeju ọgbahị nya ịkaa ọhọhọ ha adịrahụ lẹ, adịrahụ ya, “Anụ hwoo kpa kele kaka pịlẹ u-uhye nya okoji mẹ!” Ọọwa, ị họ ịnyị jaabwọ ká iJosẹfụ ya lẹlẹ. 23Ma, olegbeju ọkpẹhị rịrị ere nya adịrahụ ọwẹ á kpịtịya nya iJosẹfụ jaabwọ ká iJosẹfụ bịlọọ ya, nyị họ kpong-kpong ka.

Currently Selected:

ỌMWỤ ỌDADA 40: IBNO

Highlight

Copy