ỌMWỤ ỌDADA 27

IJekọbụ Nu Ịsọ Ahị Ọwawa

1Ụka ọọwa, Ayịsiki chị okwirichi lụmẹ gbee kọ jẹ yọyị kpong-kpong kaka. Ẹnụtụrụ ọhẹ, ọ be ẹkọ wụrụ Ịsọ ọnyị ọgbahị nyamwụ. Ọọwa, ọ byoo yẹkẹẹ, “Ịsọ ọnyị nyam ee!” Ịsọ wẹ byoo yẹkẹẹ, “Adada, m lẹẹ.” 2Ayịsiki byoo yẹkẹẹ, “Ịsọ, a tị́ yẹ kam chị ogogo dẹẹ kụnyẹ-kụnyẹ lẹ. Ụka nya igu ogbugbu nyam tụbwọọ ka pwụ lẹ. 3Lẹ, kele ká hu ọhyangba nya ịcha nyang bala uda nyang ká kele ka urwe kaka nwụ iyo kpa wam mẹ. 4Ká kpụ́ ọhọ ọnyịịla ọlịpyọ la iyo chọkọ-chọkọ lala ọlẹ kọ kaa hám lụmẹ, kam ri kpá lẹ, kam ka wahị kụrụng ahụ ọnyị ọgbahị nyam ene kam ka gbu mẹ.”

5Ụka ká Ayịsiki juwa ya ẹla chajị nya ahị ọ-ka wawa kụrụ Ịsọ lẹ, iRibeka chị ụrụ kaka wo ẹla ọọwa ịnyịnyị. Ịnyị lẹ, Ịsọ a rụ kele ka urwe kọ ka nwụ iyo kpa warị jaabwọ ká Ayịsiki adamwụ byoo lẹlẹ. Ahyaahị ká Ịsọ rụ lẹ, 6iRibeka a be ẹkọ wụrụ iJekọbụ lẹlẹ. Ọ byoo yẹkẹẹ, “Á jẹ ka aalẹ, adang juwa ka wahị kụrụ Ịsọ ọnyịnang hing lẹ! Chajị, am chị ụrụ kaka wo ká adang be ẹkọ wụrụ Ịsọ lalẹẹ byoo yẹkẹẹ, 7Ịsọ, ahụ nyị kele ka urwe kaka nwụ iyo warị. Kaahụ nyị ya kpụ́ ọhọ ọlịpyọ warị kọọwa nyị ri kọọwa nyị wahị kụrụng ị-ịlahị nya Amkpaa Ohe Oluhye ene kọọwa nyị ka gbu mẹ. 8Lẹ, iJekọbụ, ang nya ịlẹhị nyam, wo ẹla ọlẹ kam wẹẹ ka ya jeng ká họ ịnyị mẹ, ẹnwa. 9Chị agaga kele ka ẹga nya ịmwụ ịlaanyị ká wu agba nyaa imiiye ịlẹ kị ju eyo hiigu-hiigu kpa warị, ká nwaa ham ahyaahị, chajị kam ka ya kpụ́ ụma nya ọhọ ọlịpyọ ọlẹ kọ kaa há adang lụmẹ mẹ. 10Ụka ká ọhọ ọọwa á myị lẹ, ká ka hwoo kpa kịla adang kọ ka ri mẹ, chajị kọ ri kpá lẹ, kọ wahị kụrụng ene kọ ka gbu mẹ.” 11IJekọbụ byi ịnamwụ yẹkẹẹ, “Ịnẹnẹ ee, a ya ká ẹlẹwẹ ka chịkpẹẹ wẹẹ? Yẹ wẹẹ, Ịsọ bwu egbii lụmẹ-lụmẹ, ma m̀ tị la ịnyịrọ ọhịlẹ-hịlẹ. 12Ó-ri ká Adada-á yụbwọ gum kọ jẹ kam ri Ịsọ kaka lẹ aalẹ, ọkọkọ nya ọ-wahị kụrụm lẹ, ọ ka gọlọ jum lẹlẹ!” 13IRibeka byi iJekọbụ yẹkẹẹ, “A chuko ka, ẹnwa. Ó-ri ká adang á gọlọ lẹ, ọlọ ọọwa a wum mẹ. Kele kaka nwụ ịmwụ imiiye ịịwa kpa wam odu mẹ!” 14Ụka ọọwa lẹ, iJekọbụ a kele kaka wu agba nya ịmwụ imiiye ịịwa nwụ kpa kele kịla ịnamwụ lẹlẹ. Ahyaahị lẹ, iRibeka a ya kpụ́ ụma nya ọhọ ọlịpyọ ọ-lala ọlẹ kọ kaa há Ayịsiki lụmẹ-lụmẹ lẹlẹ. 15Ụka ká iRibeka kpụ́ ang oriri ọọwa kpá, ọ wụrụ iJekọbụ kele. Ọ go ịwụrụ ịnyịịla-ịnyịịla nya Ịsọ ọnyị ọgbahị nyamwụ kụrụ iJekọbụ ọlẹ kọ ri onjwo. Ịwụrụ nya Ịsọ ịịwa gu ụwa u-ube nya iRibeka ene-ene. 16IRibeka go egba nya ịmwụ ịịwa kụrụ iJekọbụ ẹ-ẹgbịrabwọ imimiiye nyamwụ bala ụkpụrwọkọ ẹ-ẹga ọlẹ ká ịnyịrọ nyamwụ dụwa hịlẹ-hịlẹ.

17Ịnyị lẹ, iRibeka a hu ọhọ ọlẹ kọ kpụ bala ịkaa ọlẹ kọ họ ha iJekọbụ nyị kpa kịla adamwụ mẹ lẹlẹ. 18Ụka ká iJekọbụ kpa ang oriri ọọwa pwụ ube nya adamwụ, ọ be ẹkọ wụrwọọ yẹkẹẹ, “Adada ee.” Adamwụ myị yẹkẹẹ, “M̀ lẹẹ, ahụ owo tị́ ene?” 19IJekọbụ wọọ yẹkẹẹ, “Am Ịsọ, ọnyị ọgbahị nyang a wẹẹ ya ẹla lẹ. Am họ jaabwọ ká byim ya, am nyị họ kpá lẹ. Wuleji hụhụ ká ri iyo ọlẹ kam nwụ kpa wang ene ká ka wahị kụrụm mẹ Adada.” 20Ayịsiki byoo yẹkẹẹ, “Anyị a tị́ họ ká dodo ye iyo nwụ ahyaahị ịnyị?” IJekọbụ wọọ yẹkẹẹ, “Amkpaa Ohe Oluhye nyang a dam ụbwọ du kam ye iyo nwụ ahyaahị lẹ.” 21Ayịsiki byoo yẹkẹẹ, “Ọ hiigu, tụ warị wẹẹ, ọnyị nyam. M tịtọ kam ka yụbwọ gung kam ka jẹ ọ́-ri ká ri iJekọbụ, lee ọ́-ri ká ri Ịsọ ịnyịlẹhị.” 22Ọọwa lẹ, iJekọbụ a tụ kele ka ẹga nya adamwụ lẹlẹ. Ụka ká Ayịsiki yụbwọ nyamwụ gwoo kpá, ọ yẹkẹẹ, “Ịnọ, omyi nyang mem omyi nya iJekọbụ, ma abwọ nyang tị mem abwọ nya Ịsọ.” 23Ang odudu ká Ayịsiki á jẹ iJekọbụ ogu datị ka, ri chajị nya egbii nya egba nya ịmwụ ịlẹ ká iJekọbụ go kụrụ ịlọmwụ ịnyịrọ du kọ mẹ Ịsọ. Ịnyị lẹ, Ayịsiki a juwa tịtọ kọ ka wahị kụrwọọ iJekọbụ lẹlẹ. 24Ma, ene ká Ayịsiki ka ri ang oriri ọọwa lẹ, ọ myịmyị tọ iJekọbụ ịtọ yẹkẹẹ, “Ya ẹla nya ịlẹhị jem mẹ. A ya kaahụ Ịsọ a wẹ ịnyịlẹhị?” IJekọbụ myịmyị wẹ byoo yẹkẹẹ, “Ee, am Ịsọ a lẹẹ ịnyịlẹhị lẹ.” 25Ọọwa, Ayịsiki a yẹkẹẹ, “Ọ hiigu, kpa iyo ọlẹ kaahụ ọnyị nyam nwụ wam kam ri, kam ka wahị kụrụng tịtị mẹ.” Ọọwa lẹ, iJekọbụ a kpa ang oriri ọọwa bala ere kịlọọ lẹlẹ. Ụka ká Ayịsiki ri ang oriri ọọwa bala ere kpá, 26ọ byi iJekọbụ yẹkẹẹ, “Ọnyị nyam ọnyịịla tụ warị ka jum ọnụ wẹẹ.” 27Ịnyị lẹ, iJekọbụ a kele kaka ba adamwụ ajẹ, juwa jwoo ọnụ lẹlẹ. Ụka ọọwa, Ayịsiki adamwụ jẹ oru nya awụrụ nya Ịsọ datị. Ọọwa lẹ, ọ yẹkẹẹ, “O! Anụ kẹwẹ kaka yẹ jaabwọ ká ọnyị nyam ọlẹ lẹẹ choru kwọkwọ lala oru nya ẹpwamẹ ọnyịịla-ọnyịịla ọlẹ ká Amkpaa Oluhye wahị kụrụ lụmẹ-lụmẹ wẹẹ!” 28Ụka ọọwa, Ayịsiki juwa dọmwụ nya ahị ọwawa kụrụ iJekọbụ yẹkẹẹ, “Ọnyị ọnyịịla nyam, a ka pyẹẹẹ. Ẹrụ nyang ka pyẹ kpanggba ẹka myị ẹka wuu, Ohe Oluhye ka họ ká ọpyị nyang ka ju eyo hiigu-hiigu. Ọ ka kpụ amwụ kụrụ ang nya ẹrụ nyang ụka wuu ịnyịnyị. chajị ká ang myị ang ọlẹ ká wu ẹ-ẹrụ nyang wuu lẹ, ka há lụmẹ-lụmẹ tụ egbe nya alakọnụ ịlẹrụ nyang ịlẹ kị kaa kpa họ ere ọnwanwa wuu ka há ịnyịnyị. 29Ahụ ayịdang lẹ, ahụ-ahụ, alepwoja ịkịla wuu, a ka myị ẹrụ ha lẹlẹ. Ahụ-ahụ, angịnyị nya alụma ịkịla wuu a ka chị arụụ eji ha ịnyịnyị lẹ lẹ. Ahụ-ahụ ụbwọng, anyịnang wuu a ka chị arụụ eji ha lẹẹ lẹ. Ọngọlẹ kọ gọlọ jung lee juwa ya ẹla onyobyi nyang, Ohe Oluhye ka họ ká ụtụrụ ka byị ọngọọwa. Ọng myị ọng ọlẹ kọ tị wahị kụrụng lee juwa ya ẹla ọnyịịla nyang, Ohe Oluhye tịtị ka họ ká ụtụrụ ka há ha ọngọọwa ịnyịnyị.”

Ịsọ Jụwa Ba Ida

30Ahyaahị ká Ayịsiki wahị kụrụ iJekọbụ kpá, kọ gba kpehe bwu ube nya adamwụ lẹ, Ịsọ a nya bwu urwe lẹlẹ. 31Ịsọ kele kaka kpụ́ ụma nya ọhọ ọlẹ kọ kaa há adamwụ lụmẹ ịnyịnyị la iyo ọlẹ kọ nwụ bwu urwe. Ụka kọ họ kpá, ọ kpa kele kịla adamwụ. Ọ byoo yẹkẹẹ, “Adada, wuleji ká ri iyo ọlẹ kam nwụ wang, ká ka wahị kụrụm mẹ.”

32Ayịsiki adamwụ wẹ byoo yẹkẹẹ, “Ọọhọ! Ahụ owo a tị́ wẹ ene?” Ịsọ yẹkẹẹ, “Am Ịsọ ọnyị ọgbahị nyang ịnyị.” 33Ụka ọọwa, Ayịsiki juwa che dadaada nya ịlẹhị-ịlẹhị juwa yẹkẹẹ, “Ịsọ ọnyị nyam! Oowo a tị́ tịtị jene nyang kaka nwụ iyo kpụ́ kpa warị wam ri ene ká nya bwu urwe wẹ mẹ! Am wahị kụrụ ọngọọwa ene lẹ! Ḿ tị ka jẹ-ẹ tịrọọ ẹkpẹ kaka.”

34Ahyaahị ká Ayịsiki ya je Ịsọ ịnyị kpá lẹ, Ịsọ a da kpuu lida, juwa jida onyuujujwo gboo nya ịlẹhị-ịlẹhị lẹlẹ. Ọ byi adamwụ yẹkẹẹ, “Adada, am bẹ? Ọ ri á ka wahị kụrụm ịnyịnyị chẹẹ myị kaka?” 35Ayịsiki wẹ byoo yẹkẹẹ, “IJekọbụ ọnyịnang jene kaka kpa ịjẹẹhị nung ahị ọwawa nyang ene lẹ, ọnyị nyam.”

36Ịsọ yẹkẹẹ, “Hòóō! Ẹbyị a họm lẹẹ-ẹ́! IJekọbụ ọwẹ, lee! Ọọwa ri ọlẹ kị wụrụ ẹnyị nyamwụ iJekọbụ lẹẹ lẹ, ọ lẹẹ họm ri ịnyịnyịịnyị jaabwọ ká etu nyamwụ ri ọngọ pịrị ọngịnyị ju, ịnyịlẹhị lẹka? Ụka oheeye a wẹ ká iJekọbụ họm uguru nya ẹla lẹlẹ. Ugbeene, ọ num ọgbahị oriri nyam la ịjẹẹhị. Alẹ ọlẹ, ọ tụtụm myịmyị num ahị ọwawa nya ọnyị ọgbahị lẹ.” Ịsọ myịmyị byi adamwụ yẹkẹẹ, “Adada ee, a ya ká ụpịlẹ nya ahị ọwawa ọhẹ-lọhẹ á hi juwa kpa, a ka wa kụrụm kpong-kpong kaka ịnyịlẹhị?”

37Ayịsiki byi Ịsọ yẹkẹẹ, “Ọnyị nyam, wo mẹ. Am wahị kụrụ iJekọbụ yẹkẹẹ, ahụ a ka ji ekpeleji nyamwụ lẹlẹ. Ọwa, aanamwụ wuu a ka myị ẹrụ ha lẹlẹ. Ọwa, m wahị kụrụ ang ịlẹrụ nyamwụ wuu tụ alakọnụ ọ-kpa họ ere lẹlẹ. Lẹ, a tị́ yẹ wẹ lẹ, ịngịngịhyẹ á hi, m ka wahị kụrụng la kaka, adam.”

38Ịsọ myịmyị yẹkẹẹ, “O Adada, chuchuu, adam ká wahị ookpokpo kụrụm chẹẹ mẹ! Chuchuu wahị kụrụm ịnyịnyị mẹ, Adada!” Ọọwa lẹ, Ịsọ a juwa jida ọtụka-ọtụka ẹ-ẹpwụ nya olujwo ọtọọtọ lẹlẹ.

39Ọọwa lẹ, Ayịsiki a wẹ byoo yẹkẹẹ, “Ịsọ wo mẹ. Ọpyị nya ẹrụ nyang ahụ, á ka ri ọpyị o-ju eyo pịlẹ kpong-kpong ka. Ohe Oluhye á ka kpụ amwụ kụrụ ang nya ẹrụ nyang ahụ gbuu ka ịnyịnyị. 40Ahụ-ahụ lẹ, ẹma-ẹma nya ẹwụ kem, a ka kpa ma uya ene ká ka ye ang oriri ri odehe ọlẹ lẹlẹ. A ka ri ọngọmyẹrụ ha iJekọbụ ọnyịnang gbegbegbe pwụ ụka ọlẹ ká ka la egbeju-ọngịrị jahị dọọ, chị ebwo hyoo rụ kaka la ịlọng ị-ịlahị.”

41Bwu ụka ọwẹ kele kịlahị, iJekọbụ wụ Ịsọ ẹjẹ nya igu-igu chajị nyọlẹ ká iJekọbụ kpa ịjẹẹhị nu Ịsọ ahị ọwawa bwu ẹga nya adamwụ. Ịnyị lẹ, Ịsọ a cheje yẹkẹẹ, “Ụka ká adịdịwa nyị gbu, kịịwa nyị juwa bida nyamwụ lẹ, ọwa nyaa ka nwụ iJekọbụ lẹlẹ.” 42Ahyaahị nyọlẹ ká Ịsọ ya ịnyị, ọngọhẹ kele kaka ya je iRibeka jaabwọ ká Ịsọ ya. Ịnyị lẹ, iRibeka a be ẹkọ wụrụ iJekọbụ byoo yẹkẹẹ, “Wo mẹ! Ịsọ ọnyịnang jam kpa obyi omeme nyọka nwụng nwụ kpụ́ ịlọmwụ ẹjẹ lẹ! 43Chajị nya ọọwa lẹ, ọnyị nyam ọnyịịla, wo ẹla ọlọnụ nyam ká họ ịnyị mẹ. Hu ang ká rụ kele ka ẹga nya iLeban ọnyịnam ụ-ụwa ị-Haran, 44ká hụ ụ-ụwa gbee ká ọkịlẹtụ nya Ịsọ ọnyịnang a kpụba wẹẹ mẹ. 45Ụka kam jẹ yẹkẹẹ, ma ọkịlẹtụ nya Ịsọ kpụba wuu kpá, kọ deeri lẹ, m ka du ẹrụ tọng ká ka nya warị lẹlẹ. Ó-ri kọ ri ịnyị ka, anyanyị, m tị́ ka họ, kọ ri kaanụ angị imimiiye á gbu wuu ẹnụ alẹ-alẹ?”

IJekọbụ rụ Ka Ẹpwa nya Ịnamwụ

46Ụka ọọwa, iRibeka kele kaka byi Ayịsiki yẹkẹẹ, “Am lẹ, ẹla nya ịhụ nya Ịsọ ịlẹ kọ ye bwu ọpyị nya ala iHiiti chịm aga lẹ. Nyẹla nya ịlẹhị, ọ́-ri ká iJekọbụ a myịmyị ye ọla-Hịt myịmyị lẹ aalẹ, am ka dayi la ọ-họ ịlọm abwọhẹ ẹ-ẹpwa ọlẹ kokoo!”

Currently Selected:

ỌMWỤ ỌDADA 27: IBNO

Highlight

Copy