ỤKỤRWỌ nya ALẸRỤ 26

ỊPọlụ Tịrị Ọnụ Ẹla nyamwụ Ị-ịlahị nya Adịrahụ Agiripa

1Ịnyị, adịrahụ Agiripa a byi ịPọlụ yẹkẹẹ, “Ẹga hi da hang ká ka ya ẹla nyang lẹ, ẹnwa.” Ọọwa lẹ, ịPọlụ a nịra ụbwọ nyamwụ kpaa lẹ, ọ juwa tịrị ọnụ-ẹla nyamwụ yẹkẹẹ:

2“Agaba idu, adịrahụ Agiripa, m me irya yẹkẹẹ, ọ ri ang nya ụrụrụ ọháha ham, chajị nyọlẹ kam godayị rịrị, lẹẹ tịrị ọnụ-ẹla nyam ị-ịlahị nyang. 3Chajị, ọgụgụ wuu ri yẹkẹẹ, ahụ ayịdang lẹ, á ri ọngga ẹ-ẹga nya abwẹla ọhọhọ nya ala iJuu bala o-wo lawụlẹ-ka ọlẹpwarịrị nyaa kpong-kpong kaka. Lẹ, aa chuchuu ká ke ụrụ la ẹla nyam ẹ-ẹpwụ nya ugbodu ojuju mẹ.”

4“Ụma nya ọhịhị ọlẹ kam kaa hị lụka nya enjwo nyam ẹ-ẹpwarịrị nya alẹpwụma nyam ụ-ụwa i-iJerusalẹm lẹ, ala iJuu wuu jẹ́ ụma nya ọhịhị nyam ọọwa. 5Ala iJuu ịịwa ayịdang dọmwụ jẹ́m lụka ọtata lẹ. Ó ri kịịwa ayịdang á ka myị-ị ri ibeenu nya ẹla nya ịlẹhị aalẹ, ị ka myị jum yẹkẹẹ, am nyị kaa la ọhịhị nya ehile nya iMosisi ọkpakpa kpẹẹkpẹẹ lụmẹ. Chajị, m ji ẹpwụ nya ogu nya angị gbịgba ha Ohe Oluhye ọlịnyị ịlẹ kị wụrụ ala ịFarịsii. 6Ang odudu kị wum kaka godayị rịrị, lẹẹ lam eje alẹ ri, chajị nyọlẹ kam la ẹhị ọrịrịị-rịrị u-uhye nya ọnụ ọmyịmyị ọlẹ ká Ohe Oluhye myị ha adahị igogo anyị. 7Ọ-họ jịra nya ọnụ ọmyịmyị ọọwa kpangga, a tị ri ẹhị ọrịrịị-rịrị nya alimwawụ iwo kụrụ imiiye nya ala Isirẹlụ nyahị, ọlẹ kị juwa ya ẹhị rịrị gbe kọ ka họ jịra haa lẹ. Ịnyị a du kị juwa kaa gbịgba ha Ohe Oluhye lodu bala alẹnụ ịnyịnyịịnyị lẹ. Lẹ, o-oluhye nya ẹhị ọrịrịị-rịrị ọọwa pyii, a tị du ká ala iJuu ịlẹ mwọọgịlẹ lẹẹ chị ala bám lẹlẹ, Agaba idu Adịrahụ Agiripa! 8Ịịyẹ a tị́ dọmwụ du kpong-kpong, kaanụ ala iJuu nyahị juwa me irya yẹkẹẹ, Ohe Oluhye nyị́ ka jẹ́-ẹ wule angị gbugbu eji bwula igu myị́ ka ene?”

9“Ịnọ, ụka ọọwa lẹ, eje ọchịchị olirya nyam wuu ri yẹkẹẹ, ọ chịla kam ka họ iru nya ang lụmẹ-lụmẹ ẹ-ẹpwụ nyọka juwa tụ ẹnyị nya iJisọsị ọla ịNasareti pyịpyị. 10Ọọwa lẹ, m juwa tụ ẹnyị nyamwụ pyịpyị ịnyịlẹhị e-epweji nya iJerusalẹm lẹlẹ. Chajị, ọ́ ba o-ri yẹkẹẹ, m juwa kaa wu iru nya angị ịgọgọ nya Ohe Oluhye kpa kele kaka ju agba bwula ọngịrị ọlẹ kam ye bwu ẹpwụtụbwọ nya alegbeju ịgbahị nya angịkiliya nya Ohe Oluhye kem kaka. Ma, ụka ọlẹ ká angịnyị juwa nwụ angịnyị nya Ohe Oluhye ịịwa lẹ, m juwa kaa kpa ụbwọ u-uhye ha angịịwa chajị nya ọ-nwaa nwụ kpịlọ. 11Ụka ọọwa lẹ, m juwa kaa yẹ angịnyị nya Ohe Oluhye ịịwa akama tụ ebe ị-mẹ ẹla nya Ohe Oluhye jẹ ịnyị myị́ ịnyị wuu da, juwa kaa maga nyọka táa ọnụ nyọka ya ala ịpyịpyị ba Ohe Oluhye. M kaa kpa agbama ọtụka-ọtụka jahị daa, juwa táa pyịpyị lalala ju kele ka epweji nya alẹpwụma ịkịla ịnyịnyị.”

ỊPọlụ Ya Ẹla Rụ́ Irya Ọyẹda nyamwụ

12ịPọlụ myịmyị yẹkẹẹ, “Ịnyị, m hu ang ẹdịyẹ nya epweji nya ịDamasịkọsị lụka ọlẹ kam ye ọngịrị bala ẹrụ odudu o-bwu ẹga nya alegbeju ịgbahị nya angịkiliya nya Ohe Oluhye lẹlẹ. 13Ọọwa lẹ, am ịPọlụ ọlẹ, a chẹhị kaka yẹ ahịgboo nya ila ọtụka ọhẹ bwu epwoohe lụka nya ẹnụ ọrịrị ẹ-ẹpwayịrẹtẹ lẹlẹ, Agaba idu Adịrahụ Agiripa. Ahịgboo nya ila ọọwa juwa hụ́ myịrị myịrị gụ ahịgboo nya ẹnụ oluhye-ọgba ọọwa wẹẹ. Ịnyị lẹ, ahịgboo ọọwa a chị dagaga jum bala alogu ẹdịyẹ nyam wuu lẹlẹ. 14Ịnyị, ụka kaahị wuu hịda keji ẹ-ẹga ọọwa lẹ, m wo ká omyi ọhẹ juwa ya ẹla tam loja nya iHiburu yẹkẹẹ, ‘ỊSọlụ, ịSọlụ, ịịyẹ a tị́ du ká juwa tụm pyịpyị ịnyị? Ọ ka ri ang ọjụjụ hang lụmẹ nyọka juwa kpa ịlọng kaka gu ọgọdọ ọlẹ kọ ru ẹhị, kị kaa kpa gu ẹna chọọchọọ.’ 15Ịnyị lẹ, m yẹkẹẹ, ‘Ahụ owo a tị́ wẹẹ ene Ọngọlahị la?’ Ịnyị, Ọngọlahị a wẹ byim yẹkẹẹ, ‘Am kpakpakpa a ri iJisọsị, ọngọlẹ ká wẹẹ tụ pyịpyị ịnyịnyịịnyị lẹ. 16Ma, wuleji ká godayị kọkọ ẹ-ẹta nyang lẹẹlẹẹ mẹ. Chajị ang odudu kam chị ịlọm ehe mẹjẹng ri, chajị kam ka chụng ha ịlọm, ká ka ri ọngọ myị ẹrụ ham, ká ka juwa ri ibeenu nya ang ịlẹ wuu ká kpẹhị nya ịlọng yẹyẹ bala ang ịlẹ wuu kam juwa ka ya chị ehe hang ị-ịlahị. 17Ma, m juwa ka gbang kpehe bwu ẹpwụtụbwọ nya ala iJuu wuu bala ala iJentayịlị ịlẹ kam wẹẹ ka dung ẹrụ kaka ya ẹrụ ọnyịịla je ịnyịnyị lẹ. 18M juwa dung kele ká ka wụrụ egbahị nya angịlẹ kị kpụ idu bwula ọhọbịrị ọhọhọ nyaa, chajị ká angịịwa ka jẹ́-ẹ yẹ irya da bwu ẹpwụ nya ukpowu nya ang inyibyi ịịwa ịhọhọ, kị ka jụ ka ẹpwụ nya ahịgboo nya abwẹla ọnyịịla nya Ohe Oluhye. Ká ka myịmyị-ị̀ gbaa kpehe bwu ẹpwụtụbwọ nya ọngịrị nya Ohe Onyobyi kele ka ẹpwụtụbwọ ọnyọọngịrị nya Ohe Oluhye. Chajị ká angịịwa ka jẹ́-ẹ ye ọhịnyọhi ịhọbịrị nyaa, kị ka la iwe-ahụrụ ta angịnyị nya Ohe Oluhye ịlẹ wuu ká Ohe Oluhye hwáa cheri-cheri ha ịlọmwụ bwula ọmyịmyị ọlala u-uhye nyam am iJisọsị mẹ.’ ”

ỊPọlụ Ya Ẹla Rụ́ Ụkụrwọ Ọhọhọ Ha Ohe Oluhye nyamwụ

19“Chajị nya ọọwa lẹ, Oo, Adịrahụ Agiripa olihi ọtụka, ọyị ọyẹyẹ a-arụrụ ọlẹ kọ bwu epwoohe chịm ọgụ lẹ, ḿ la egbeju-ọngịrị tọ́ọ pyịpyị kpong-kpong ka. 20Ma, ọkọkọ nya ọọwa lẹ, m dọmwụ nya ẹrụ ọnyịịla oyaya pyẹ họhẹ-họhẹ e-epweji nya ịDamasịkọsị. Ịnyị lẹ, m kpa ẹrụ ọnyịịla ọọwa kele kaka ya pyẹ e-epweji nya iJerusalẹm bala ịkịka nya ọpyị nya iJudiya wuu bala ọ-kpa ẹla ọọwa kele kaka ya je ala iJentayịlị ịnyịnyị, chajị kị ka jẹ́-ẹ yẹ irya da, kị ka jahị nyaa kpata da ka ẹga nya Ohe Oluhye, kị ka juwa họ abwẹla ọlẹ kọ chịla-chịla nya ang o-ju ẹjẹẹ nya irya ọyẹda nyaa lẹlẹ. 21Ẹla nya Ohe Oluhye ọ-kpa ya pyẹ nyam ọọwa kpangga, a ri ang odudu ká ala iJuu warị kaka wum bwu ube ịgọgọ ọtụka nya Ohe Oluhye nyaa lẹ, ị juwa tịtọ kị ka nwụm daarụ ụ-ụwa lẹlẹ. 22Pịyọọ daalẹ ọlẹ tị lẹ, m jam ye ụbwọ ọdada bwu ẹga nya Ohe Oluhye ayịdang. Chajị nya ọọwa a tịtị du kam lẹẹ ri ibeenu dodehe ju angị ichiche bala angị ịtụka wuu lẹlẹ. Ma, ẹla oyaya dodehe nyam ọọwa, tị myị ju ụma nya ala ịlẹ wuu ká alọmwụ inyogo nya Ohe Oluhye bala iMosisi yẹkẹẹ, nyị ka họ jịra ị-ịlahị. 23Ẹla ọọwa ri yẹkẹẹ, ịKịrayịsị nyị ka warị kaka yẹ akama odehe ọlẹ. ịKịrayịsị ọọwa, nyaa ka ri ọngịnyị nya ọgbanyẹ ọ-ka wuleji bwula igu, juwa hịhị myịmyị lẹlẹ. Ọọwa lẹ, bwula owuleji bwula igu nyamwụ ọọwa, ịKịrayịsị nyaa ka ri ọngọ ka juwa kpa ahịgboo nya ọhịhị nya Ohe Oluhye kịla ala iJuu wuu bala ala iJentayịlị ịnyịnyị lẹlẹ.”

24Ịnyị, ụka ká ịPọlụ juwa kpa ọnụ-ẹla nyamwụ tịrị ịnyịnyịịnyị lẹ, ịFẹsịtọsị a ya ẹla dodehe lomyi o-gboo yẹkẹẹ, “ỊPọlụ, a hya ụla lẹ? Ang ọjẹ́jẹ lụmẹ nyang juwa hyang ụla lẹ!”

25Ma, ịPọlụ wẹ byoo yẹkẹẹ, “Ḿ hya ụla kpong-kpong ka, ịFẹsịtọsị ahụ adịrahụ olihi ọtụka. Ma, ọkọkọ nya ọọwa lẹ, ẹla ọlahị-chịng bala ẹla nya ịlẹhị a wẹ kam wẹẹ ya lẹ. 26Chajị, am ịPọlụ ọlẹ jẹ́ yẹkẹẹ, ahụ adịrahụ Agiripa jẹ́ ang chajị nya ang ịlẹ kam wẹẹ ya wuu ene-ene lẹ. Ịnyị a du kam wẹẹ ya ẹla tang tẹndẹ myị́ chajị nyaa lẹlẹ. Chajị, m jẹ́ myịmyị yẹkẹẹ, ịngịngịhyẹ lẹpwụ nya ang ịwẹ kam wẹẹ ya lẹ, ọhẹ-lọhẹ nyaa á juwa kaahụ adịrahụ á jẹ́ ang chajị nyamwụ kaka lẹ ka. Chajị, ang ịịwa wuu á họ uku kpong-kpong ka. 27Adịrahụ Agiripa, a myị ju ẹla nya alọmwụ inyogo nya Ohe Oluhye? M jẹ́ ká myị ju ẹla nyaa ịnyịlẹhị.”

28Ịnyị, Agiripa a byi ịPọlụ yẹkẹẹ, “ỊPọlụ, a me irya yẹkẹẹ, nyị hihi pyịnyẹng kaahụ nyị ka họ kaam nyị ka ri ọngịnyị nya Ohe Oluhye riri lẹ?”

29ịPọlụ wẹ byoo yẹkẹẹ, “Ó riri kọọ hihi pyịnyẹng lee o-ohihi lụmẹ, tụbwọ aalẹ, ọbịlẹ-bịlẹ nyam ẹ-ẹga nya Ohe Oluhye ri kaahụ ụbwọng kem a ka yẹ irya da ka. Ma, ká angị ịkịla ịlẹ wuu kị wẹẹ wo ẹla nyam ọlẹ tịtị ka yẹ irya da lala am-am, kẹnẹ-kẹnẹ kaka hi agba ojuju nyam ọlẹ.”

30Ịnyị lẹ, adịrahụ Agiripa bala ịFẹsịtọsị Adịrahụ nya ọpyị bala iBeenisi bala angịkịla ịlẹ wuu kị hụhụ ụ-ụwa a wuleji godayị kọkọ lẹlẹ. 31Ụka ká angịwẹ rụ bwu ẹga nya ịPọlụ kpá lẹ, ị juwa ya ta awụlẹ yẹkẹẹ, “Ọlẹng ọlẹ á da ẹlẹlẹhẹ nya igu ka lee ẹla nya agba ọ-ka jwoo ju kpong-kpong ka.” 32Ịnyị, Agiripa a byi ịFẹsịtọsị yẹkẹẹ, “Ọ́ dọmwụ ri ká ọlẹng ọlẹ á họ apile nya eje nyamwụ ka ẹga nya iSisa adịrahụ ọgbahị ọgụgụ nya ala iRom ene ka, ịnọ, ọhẹka, ị ka chọọ da ẹ-ẹgẹlẹ myị́.”

Currently Selected:

ỤKỤRWỌ nya ALẸRỤ 26: IBNO

Highlight

Copy