ỤKỤRWỌ nya ALẸRỤ 2

Ọ-họ Jịra nya Ọwẹwẹ nya Olegu Ịgọgọ

1Ịnyị, ụka ọlẹ ká ụka nya ang oriri ọtụka nya ala iJuu ọhẹ ọlẹ kị wụrụ iPentikọsị pwụ eji wuu lẹ, angịnyị nya Ohe Oluhye ịịwa a jịra ẹ-ẹga ookpokpo lẹlẹ. 2Ịnyị, lụka ọ-mwaa lẹ, angịịwa a wo la iru nya ịngịhyẹ ọlẹ kọ juwa họ anụ kuu lala igbachịwụ ọtụka-ọtụka ọhẹ bwu epwoohe hireji kele ka ẹpwụ nya ube ẹ-ẹga ọlẹ kị hụhụ lẹlẹ. 3Ịnyị lẹ, ịngịhyẹ lala ẹlẹlẹ nya ila a hi ehe ụ-ụwa lẹ, ọ bene kpanggbaa kele kaka kụ ọng myị́ ọng nyaa e-egbeju lẹlẹ. 4Ọọwa lẹ, ịwa wuu a myị la ọngịrị nya Olegu Ịgọgọ lẹ, ị juwa ya ẹla la ija ịkịla la datị-datị jaabwọ ká Olegu Ịgọgọ ọọwa juwa ya ọngịrị haa lẹlẹ.

5Ụka ọọwa lẹ, iru nya ala iJuu ịhyẹ lụmẹ-lụmẹ ịlẹ kị myị la Ohe Oluhye nya ịlẹhị-ịlẹhị kụ ụwa e-epweji nya iJerusalẹm bwu epwoja la datị-datị nya odehe ọlẹ wuu. 6Ịnyị, ụka ká iru nya alepweji nya iJerusalẹm wo iru ọtụka ọlẹpwụ nya ọjịra-jịra nya angịnyị nya Ohe Oluhye ịịwa lẹ, ịwa wuu a kele kaka tụ jịra ẹ-ẹga ọọwa lẹlẹ. Ịnyị, ụka kị pwụ ụwa lẹ, ọ laa ịwa wuu ahịbwuu lụmẹ nya ịlẹhị-ịlẹhị, chajị nyọlẹ ká ọng myị́ ọng lẹpwụ nyaa wuu jẹ́ juwa wo etu nya ẹla ọlẹ ká angịnyị nya Ohe Oluhye ịịwa juwa ya dodehe la ija ịkịla ịịwa wuu lẹlẹ. 7Ịnyị, ụka ká ẹla ọọwa pyaa ọnụ lụmẹ kaka kpoye lẹ, ị juwa yẹkẹẹ, “Ahyu! Aangịlẹ wuu kị kaa ya oja nya ịGalili kem a lẹẹ alẹ kaka? 8Ee lẹ, anyanyị, ọ tị́ la tị tị, ká ọng myị́ ọng lẹpwarịrị nyahị mwọọgịlẹ jẹ́ jam wo etu nya ẹla ọlẹ ká angịwẹ wẹẹ ya la oja nyahị ahị ẹ-ẹga ọlẹ kị mahị wuu tịtị lẹẹ mẹ? 9Chajị, angịhyẹ nyahị bwu ụpwọma nya ala ịPaatiya bala ala ịMidi bala ala Ẹlam bala ala iMesopotemiya bala ala iJudiya bala ala ịKapadosiya bala ala ịPọntọsị bala ala Echiya. 10Angị ịkịla nyahị bwu ụpwọma nya ala iFurijiya bala ala ịPamfiliya bala ala Ijipiti bala aloye nya ịpyị nya ala iLibya ọlẹ kọ ju ịpyị nya ịSayịrin chwẹẹ bala angga ịhyẹ ịlẹ kị bwu ọpyị nya ala iRom, tụ angịlẹ kị ri ala iJuu ayịdang riri bala ala iJentayịlị ịlẹ kị kaa gbịgba ha Ohe Oluhye lala ala iJuu ịnyịnyị, 11bala angị bwu ọpyị nya ala iKiriti bala ala Arebyiya wuu lẹ, ọng myị́ ọng nyahị wuu tị jẹ́ juwa wo jaabwọ ká angịnyị nya Ohe Oluhye ịwẹ juwa kpa oja nyahị gwogbo ha Ohe Oluhye u-uhye nya iru nya ụkụrwọ ịtụka ịlẹ ká Ohe Oluhye họ odehe ọlẹ.” 12Ịnyị, ụka ká ahịbwuu ọtụka nya ẹla ọọwa chaa enikpi nya ịlẹhị-ịlẹhị lẹ, ị juwa byi awụlẹ yẹkẹẹ, “Ahyu! Ẹla ọlanyị a tị́ lẹẹ mẹ?”

13Ma, angịkịla nyaa juwa kpa angịnyị nya Ohe Oluhye ịịwa họ yẹkẹẹ, “Chaaa! M me akụrụ nya ere, angịwẹ a tị́ nwanwa wẹ, dudu ká ere ọọwa wẹẹ yaa ya lụmẹ ịnyị!”

Ẹla Ohe Oyaya Dodehe nya IPita

14Ịnyị, ụka ká iPita bala alẹrụ ọnyịịla angị iwo kụrụ ookpokpo ihihi wuleji godayị kọkọ ị-ịlahị nya aluche wuu lẹ, iPita a hu ọnụ nyamwụ ya ẹla gboo ta iru nya angịnyị ịịwa yẹkẹẹ, “Anụ ala iJudiya nyahị wuu bala anụ angị ịkịla ịlẹ kanụ kụ epweji nya iJerusalẹm, anụ ke ụrụ lam, kam ya jenu etu nya ang ọlẹ kọ họ lẹẹ alẹ mẹ. 15Chajị, angịlẹ kanụ me wẹ yẹkẹẹ, ere nyaa nwa lụmẹ, du kịị nyị wẹẹ ya lẹlẹ wẹẹ, ịnyị, ọ la kpong-kpong ka. Anyanyị, anụ tị́ dọmwụ me irya ká angịnyị ehe ka jẹ́-ẹ dodo, nwa, ere juwa ya la ụtụrụ-ụtụrụ lụka nya oje ihikichu amachanyị lẹ? 16Ma, ang ọlẹ ri ọ-họ jịra nya ẹla ọlẹ ká iJuwẹlụ ọlọmwụ onyogo nya Ohe Oluhye ya ẹla rụ́ ene-ene.

17‘Ọlẹ a ri ang ọlẹ kam juwa ka họ lụka ohyẹẹkpẹ lẹ,

ịnyị, Ohe Oluhye a ya lẹ.

M juwa ka hu ọngịrị nya Olegu Ịgọgọ nyam Am Ohe Oluhye chị kụrụ angịnyị ehe wuu.

Ịnyị lẹ, anyị alẹng nyanụ bala anyị anyang nyanụ a ka juwa yẹ ọmwụ dodehe bwula ọngịrị nya Olegu Ịgọgọ lụka ọọwa lẹlẹ.

Ikolobya nyanụ, anụ angịnyị ehe ka juwa yọyị a-arụrụ lụka ọọwa.

Angị ịpyẹhị nyanụ anụ angịnyị ehe tị ka juwa la ụlaa la datị-datị lụka ọọwa ịnyịnyị.

18Nya ịlẹhị ịnyị, ụka ọọwa Am Ohe Oluhye,

M juwa ka hu Olegu Ịgọgọ nyam chị kụrụ angịlẹ kị ri anyịhị alẹng bala anyịhị anyang lụka nya oyi ohyẹẹkpẹ ọọwa ịnyịnyị.

Ọọwa lẹ, ị ka juwa yẹ ọmwụ dodehe ịnyịnyị bwula ọngịrị nya Olegu Ịgọgọ lẹlẹ.

19Am Ohe Oluhye, M ka họ ụkụrwọ ẹbyẹbyị la datị-datị u-uhye-ọgba nya epwoohe.

M ka họ ang i-ju ẹjẹẹ ịlẹbyẹbyị datị-datị ẹ-ẹpwụ nya odehe ọlẹ loyi ọọwa ịnyịnyị.

M ka mẹ ịwọ bala ila bala ịmwụ-ila ochowu ọtụka ịlẹ kị ka la ẹbyẹbyị jẹ alodehe ụka ọọwa.

20Ụka ọọwa, m ka họ ká ẹnụ oluhye-ọgba ọwẹ ka yẹ ri ukpowu,

bala ọ-họ ká ọya oluhye-ọgba ọwẹ ka yẹ la ịwọ-ịwọ,

ene ká ẹnụtụrụ ọtụka oluhi-uhi nya Ọngọlahị ọọwa ka pwụ eji.

21Ụka ọọwa, ọng myị́ ọng ọlẹ kọ ka myị-ị kpa ọmyịmyị ọlala nyamwụ be ẹkọ wụrụ ẹnyị nya Ọngọlahị Ohe Oluhye lẹ,

aalẹ, ọngọọwa ka chịda lẹ.’ ”

22IPita myịmyị byaa yẹkẹẹ, “Anụ ala Isirẹlụ wuu anụ ke ụrụ la ẹla nyam mẹ. IJisọsị ọla ịNasareti ọngọ kpa ẹrụ ọnyịịla nya Ohe Oluhye kaka ya jenu, a ri ọngọlẹ ká Ohe Oluhye ji ẹkpẹ nyamwụ gede-gede bwula uda ọhọhọ nyamwụ bala ụkụrwọ ẹbyẹbyị ọhọhọ bala ang i-ju ẹjẹẹ ịlẹbyẹbyị ịkịla la datị-datị ịlẹ ká iJisọsị kpa ọngịrị nya Ohe Oluhye họ wuu ẹ-ẹpwarịrị nyanụ, jaabwọ kaanụ ayịdang jéjé wuu ene-ene lẹlẹ. IJisọsị ọọwa a ri ọngọlẹ kanụ wu bwula egbeju ọnyọọngịrị ọlala nyanụ kpa kaka ju alọhọbịrị ụ-ụbwọ du kị kpọọ kaka gu iloo u-uhye nya okoji, nwọọ hanụ lẹ. 23Ma, igu ogbugbu nya iJisọsị ọọwa tị pwoku obyi omeme ọlẹ kọ bwula irya nya Ohe Oluhye ọlẹ kọ kpa ẹla ọjẹ́jẹ lụmẹ ọ-nọ u-uhye nya ịlọmwụ me kpá gbalẹ-gbalẹ ene-ene lẹ. 24Ma, lẹẹlẹẹ lẹ, Ohe Oluhye tị wule ịKịrayịsị ọọwa eji bwula igu, gbọọ kpehe bwu ẹpwụ nya ang ọjụjụ nya igu ogbugbu ọọwa ịnyịnyị lẹ. Chajị, igu ogbugbu á la ọngịrị kụrụ ịKịrayịsị myị́ kpụ, ọ ka woo kpa ụ-ụwa pyịyọọ kpong-kpong ka. 25Chajị, ọ la jaabwọ ká iDevidi ya ẹla rụ́ ịKịrayịsị ẹ-ẹgẹlẹ yẹkẹẹ,

‘M kaa kpẹhị nya ịlọm yẹ Ọngọlahị i-ijata nyam ụka wuu.

Chajị, Ọngọlahị la kaa juwa tam u-upwuriri nyam ụka myị́ ụka wuu lẹ,

ḿ ka hụ́ kpiki lụka nya akama kpong-kpong kaka.

26Chajị nya ọọwa a du ká ọkẹkẹnị ọtụka myị ẹpwụ ọkịlẹtụ nyam lụmẹ lẹ.

Ịnyị a tị́ du kam kaa kpa ẹlẹlẹ nyam chị ọkẹkẹnị lụmẹ ịnyịnyị lẹ.

Ọgụgụ wuu ri yẹkẹẹ, m kaa la ẹhị ọrịrịị-rịrị ẹ-ẹpwụ

nya ọhịhị nya ugbinyịrọ nyam ọlẹ ụka wuu ịnyịnyị.

27Chajị, m jẹ́ yẹkẹẹ, Ahụ Ohe Oluhye Ọngọlahị,

á ka myị-ị tụụbwọ hi ugbodu okpukpuru nyam juwa ẹ-ẹpwụ nya ejegu lụka ọtata kpong-kpong ka.

Lee, Ahụ Ohe Oluhye ọ-ka myị-ị tụụbwọ hi ugbinyịrọ nya Ọnchẹ Ọlịgọgọ nya ịlọng,

ọ ka mama ju eji pyịyọọ kpong-kpong ka ịnyịnyị.

28Ọngọlahị, Ahụ ayịdang tị mẹ ụgbẹyị nya ọhịhị onyeewe nyang wuu jẹ́m ịnyịnyị lẹ.

A tị kaa kpa ijata ojiji nya ịlọng họ kam kaa juwa chị ọkẹkẹnị ọtụka-ọtụka ụka wuu ịnyịnyị lẹ.’ ”

29IPita myịmyị byaa yẹkẹẹ, “Anụ anyadam ee, m tịtọ kam ka da ẹla ọlẹ wụlẹ ya jenu yẹẹyẹẹ chajị nya iDevidi adahị ogogo. Ẹla ọọwa ri yẹkẹẹ, iDevidi adahị ogogo gbu lẹ, ị jwoo eji. Iworu nyamwụ dọmwụ jam tahị pyịyọọ daalẹ ọlẹ. 30Ma, jaabwọ ká iDevidi ri ọlọmwụ nya Ohe Oluhye bala ọwa ayịdang ọ-jẹ́ jaabwọ ká Ohe Oluhye myị ọnụ họọ bwula iro ọnwanwa yẹkẹẹ, ụtẹ nya iDevidi ọhẹ nyị ka wuleji ị-ịlahị kaka hụhụ ẹ-ẹchị adịrahụ ku ọmwakpa nya iDevidi pyii, wẹẹ. 31Ịnyị, Ohe Oluhye a wụrụ ang ọlẹ kọ ka họ ị-ịlahị mẹjẹ iDevidi chajị nya owuleji bwula igu nya ịKịrayịsị lẹlẹ. Ọọwa a du ká iDevidi ya ẹla dodehe ẹ-ẹgẹwẹ wẹ yẹkẹẹ, Ohe Oluhye nyị́ ka myị-ị tụụbwọ hi ugbodu okpukpuru nya ịKịrayịsị hụ ụ-ụwa e-ejegu tata ka lee ọ-ka myị-ị tụụbwọ hi ugbinyịrọ nya ịKịrayịsị nyị ka mama ju eji pyịyọọ kpong-kpong ka ịnyịnyị lẹ. 32Lẹ, iJisọsị ọọwa a ri ọngọlẹ ká Ohe Oluhye wuleji bwula igu lẹlẹ. Ahị alẹrụ ọnyịịla nyamwụ ịlẹ kpangga, a ri alibeenu nya owuleji bwula igu nyamwụ ọọwa lẹlẹ. 33Ịnyị, ụka ká ịKịrayịsị wuleji bwula igu kpá lẹ, Ohe Oluhye a kpọọ kele ka iwe-ahụrụ oluhye kaka hụhụ u-upwuriri nya ịlọmwụ lẹlẹ. Ịnyị, ụka ká iJisọsị ye ọhaha nya Olegu Ịgọgọ ọlẹ ká Ohe Oluhye myị ọnụ hahị ene-ene lẹ, ịKịrayịsị a du Olegu Ịgọgọ nyamwụ ọọwa kaka chị kụrụụhị lẹẹ, jaabwọ kanụ wẹẹ yẹ bala ọ-kpa ụrụ nya ịlọnụ wo alẹ lẹlẹ. 34Chajị, iDevidi adahị ogogo ayịdang á kpụ uhye kele ka epwoohe ene kọọ ya ẹla ọlẹ dodehe lẹẹ ẹ-ẹgẹlẹ ka. Ọ ya ẹla ọọwa yẹkẹẹ,

‘Ọngọlahị Ohe Oluhye byi Ọngọlam la yẹkẹẹ,

kẹwẹ kaka hụhụ lẹẹ u-upwuriri nyam ẹ-ẹgẹlẹ,

35gbee pwụ ụka ọlẹ kam ka họ ká ka kụrụ aluji nyang chẹẹchẹẹ,

juwa ya ẹta nyang rịraa e-egbeju mẹ.’ ”

36Ịnyị, iPita a myịmyị byaa yẹkẹẹ, “Anụ wo mẹ! Anụ ala Isirẹlụ wuu, anụ jẹ́ nya ịlẹhị-ịlẹhị lẹẹlẹẹ mẹ. IJisọsị ọngọlẹ kanụ wu kpa kaka gu iloo ba okoji lẹ, ọwa kpakpakpa, Ohe Oluhye a chụ, hwoo nya Ọngọlahị la bala ịKịrayịsị nyahị wuu lẹlẹ.”

37Ịnyị, ụka ká angịịwa wo ẹla oyaya nya iPita ọọwa kpá, kọ gwaa ẹ-ẹpwụ nya irya ọ-ya eje wu angịnyị ọlọkịlẹtụ nyaa lụmẹ lẹ, ị byi iPita bala alẹrụ ọnyịịla ịkịla ihihi yẹkẹẹ, “Anụ anyadahị, ee lẹ, anyanyị, ahị tị́ ka họ lẹẹ mẹ?”

38Ịnyị, iPita a myịmyị byaa yẹkẹẹ, “Anụ yẹ irya da bwu ẹpwụ nya ịhọbịrị ọhọhọ nyanụ wuu, ká ọng myị́ ọng lẹpwụ nyanụ a kele kaka hụ enyi Ohe la ẹnyị nya iJisọsị ịKịrayịsị nya ang o-ju ẹjẹẹ yẹkẹẹ, Ohe Oluhye hịnyọhi ịhọbịrị nyanụ wuu hanụ lẹ mẹ. Ọọwa lẹ, anụ tịtị ka ye ọhaha nya Olegu Ịgọgọ ọlẹ ịnyịnyị lẹlẹ. 39Chajị, ọnụ ọmyịmyị nya Olegu Ịgọgọ ọọwa juwa hanụ wuu bala anyị nyanụ wuu bala angịkịla ịlẹ kị juwa ji ẹ-ẹga ọlụrụ wuu bala ọng myị́ ọng ọkịla ọlẹ wuu ká Ọngọlahị Ohe Oluhye juwa ka be ẹkọ bebe wụrụ kaka ri angịnyị nya ịlọmwụ ị-ịlahị ịnyịnyị wẹẹ.”

40Ịnyị, iPita a myịmyị juwa kpa iru nya ala ịkịla la datị-datị, juwa kpa jwaa ọhụ nya ịlẹhị-ịlẹhị yẹkẹẹ, “Anụ cheri kanụ gba ịlọnụ kpehe bwu ẹpwụtụbwọ nya ọhọbịrị ọhọhọ ta aloyi onyobyi ọlẹ ká ọhọbịrị ọhọhọ, ke ọhịhị nyaa ịwa wuu kụra-kụra lẹ mẹ.” 41Ịnyị lẹ, angịlẹ kị myị la Ohe Oluhye bwula ẹla oyaya nya iPita ọọwa lẹ, ị hwaa enyi Ohe ẹnụ ọọwa lẹlẹ. Angị inyeewe ịlẹ kị yẹ irya da la ẹnụtụrụ ọọwa da angịnyị nya Ohe Oluhye ịkịla uhye la angịnyị angị ụnọ irwiye da angịnyị angị ohu iwo chiriri myị́. 42Ụka ọọwa, angịnyị nya Ohe Oluhye inyeewe ịịwa wuu hu irya nyaa wuu lẹpwụ-lẹpwụ, juwa myị la Ohe Oluhye e-ekpeleji nya alẹrụ ọnyịịla ịịwa. I juwa wo ang ọmẹjẹ nya alẹrụ ọnyịịla ịịwa bala o-juwa kele ka ọjịra-jịra nyaa ịnyịnyịịnyị bala o-juwa ri ang oriri e-epwedii ta alẹrụ ọnyịịla bala o-juwa raabwọ ha Ohe Oluhye taa ịnyịnyịịnyị.

Ọ-yẹ Ju Lawụlẹ nya Angịnyị nya Ohe Oluhye

43Ụka ọọwa, ọng myị́ ọng lẹpwarịrị nyaa wuu juwa gbịgba ha Ohe Oluhye ẹ-ẹpwụ nya uhi ojuju. Iru nya ụkụrwọ ẹbyẹbyị bala ang i-ju ẹjẹẹ ịlẹbyẹbyị la datị-datị juwa họ bwu ẹpwụtụbwọ nya alẹrụ ọnyịịla nya ịKịrayịsị ụ-ụwa ịnyịnyị. 44Ụka ọọwa lẹ, angịnyị nya Ohe Oluhye ịịwa wuu yẹ ju lawụlẹ ẹ-ẹpwụ nya ang myị́ ang wuu. Ọngọngọhẹ á la ịngịngịhyẹ nya ụbwọ nya ịlọmwụ datị kpong-kpong kaka. 45Ụka ọọwa lẹ, ọng myị́ ọng lẹpwarịrị nyaa a kele kaka go ang myị́ ang nyamwụ ịlẹ kọ la ra lẹ, ị go ikpoko ịịwa wuu kpa kaka ju lawụlẹ ẹ-ẹga ookpokpo lẹlẹ. Ọọwa lẹ, ị kaa kpa okpoko ọọwa họ ang myị́ ang ha ọng myị́ ọng lẹpwarịrị nyaa ịnyịnyịịnyị, jaabwọ kọ baba haa lẹlẹ. 46Ẹnụ myị́ ẹnụ wuu, ị kaa kele kaka la ọjịra-jịra lawụlẹ u-ube ịgọgọ ọtụka nya Ohe Oluhye nyaa ịwa ala iJuu. Ị kaa kele kaka ju epwedii nya ang oriri nyaa ẹ-ẹpwa nya awụlẹ, juwa ri ang oriri ọọwa la ọkẹkẹnị bala olegu ọdụmwọ nya ọkịlẹtụ. 47I juwa kaa gwogbo ha Ohe Oluhye ịnyịnyịịnyị bala ọ-kaa la ẹhị okpunyi ẹ-ẹga nya awụlẹ lụmẹ. Ịnyị lẹ, Ọngọlahị Ohe Oluhye a juwa hu ịnọmba nya angị inyeewe ịlẹ kị myị la Ohe Oluhye da angị inyogo uhye ẹnụ myị́ ẹnụ wuu jaabwọ kọ chịla kọ ka la kaka ba ịnyịnyịịnyị lẹlẹ.

Currently Selected:

ỤKỤRWỌ nya ALẸRỤ 2: IBNO

Highlight

Copy