UMÁKI 15

Upáyílēti da Ujísɔ̄si ɔ̄kā

(Umát 27.1,2,11-14; Ulúk 23.1-5; Ujɔ́n 18.28-38)

1Ɔ̄cɔ̄ɔcī blibli ā, aótrɛ̄yí kú ācogwɛ́ɛya mla anyākwɔ́cɛ mla aítíca kú íne mɛ́mla odúúdú Ukánsulu ā lɛ ojuju kú uwa yá. É kwú agbá ú kwu Ujísɔ̄si abɔ̄, anɔ́ɔ é lɛ ɔ́ bī nyɔ̄ í tū Upáyílēti abɔ̄ á. 2Upáyílēti da ɔ́ ɔ̄kā kahíníī, “Awɔ wɛ ɔcɛ́ kú ācɛ Ujíyu áā?” Ujísɔ̄si tá ɔ̄ ohi ka, “Awɔ ka lɛ a á n.” 3Aótrɛ̄yí kú ācogwɛ́ɛya ā bá gē kpó ɔdā alɛwa ce ɔ́. 4Anɔ́ɔ Upáyílēti klla lɛ ɔ̄kā da ɔ́ kpɔ́ kahíníī, “Ɔdíyá nɛ̄ á gáā cīla ɔ̄kā dóódu ŋ́ mā? Jāhɔ̄ tá odúúdú ɔdā nēé kpó ce uwɔ ā! 5Ujísɔ̄si tá kóō kɛlā kpɔ́ɔ́kpɔ́, anɔ́ɔ Upáyílēti le hídáagó á.

Upáyílēti lɛ Ujísɔ̄si ŋmɛ́pɔ̄bí kéē lɛ ɔ́ ŋmó

(Umát 27.15-26; Ulúk 23.13-25; Ujɔ́n 18.39—19.16)

6Ɛpláko kú ucɛ kú Onyatá ā, ó gē wɛ ucē kú Upáyílēti kóō hɛ́ olagbá éyi tá lɛ ācɛ Ujíyu. 7Ó lɛ eko éyi nɛ̄ ācɛ cīlɛ̄fú le unu egidi nu lɛ ɔ̄cɛ éyi ŋmó. É lɛ uwá kpó tāagbā. Ɔ̄cɛ éyi kú uwā wɛ (Ubárābasi). 8Eko nɛ̄ ɛwa le jīla gbɔɔ́ ō da Upáyílēti kóō lɛ ɔdā olɔhi nōó ge yá lɛ uwá ojígógó ā yá ā. 9Ó lɛ ɔ̄kā da uwá kahíníī, “Aá dɔɔ̄kā kú um lɛ ɔcɛ́ kú ācɛ Ujíyu ā hɛ́tá lɛ aá nɛɛ?” 10Ó le jé lɔɔlɔhi ka ohígbū ímálanyi Ujísɔ̄si nɛ̄ otrɛ̄yí kú ācogwɛ́ɛya gē má ā yá, ɛ́ɛ́ nēé kwú ɔ̄ gé le anúɔ á. 11Amáŋ otrɛ̄yí kú ācogwɛ́ɛya ā lɛ nwū tū ɛwa ā ipú kéē cɛ̄ Upáyílēti kóō lɛ Ubárābasi hɛ́tá lɛ uwá ikɔkɔ Ujísɔ̄si. 12Upáyílēti lɛ ɛlā ka lɛ ɛwa ā kpɔ́ kahíníī, “Ɔdí nɛ̄ aá dɔɔ̄kā kú um yá mla ɔ̄cɛ ɛ̄nɛ̄ aá hī ka ɔcɛ́ kú ācɛ Ujíyu āā?” 13É lɛ ɔkɔ cɛyí dɛ̄gba kahíníī, “Lɛ ɔ́ nyɔ́kpá!” 14Upáyílēti da uwá ɔ̄kā kā, “Ɔdōbɔ̄bí nyá nɛ̄ ó yā?” É klla lɛ ɔkɔ cɛyí dɛ̄gba gbōmgbōm fíyɛ́ kahíníī, “Lɛ ɔ́ nyɔ́kpá!” 15Anɔ́ɔ abɔ̄ Upáyílēti gē yɔ́tūkpoókpoó kóō yá ɔdā nɛ̄ ɔtū géē he uwá ā, anɔ́ɔ ó lɛ Ubárābasi hɛ́tá lɛ uwá á. Ó cɛ̄ lɛ ācɛ lɛ Ujísɔ̄si gɔ́, anɔ́ɔ ó kwú ɔ̄ ú tū uwā abɔ̄ kéē lɛ ɔ́ nyɔ́kpá.

Aícɔ́ɔja yá Ujísɔ̄si ɛbɛ́

(Umát 27.27-31; Ujɔ́n 19.2,3)

16Aícɔ́ɔja ā kwú Ujísɔ̄si ú bī ga ipú odúdɔlɛ̄ kú ogbla kú ɔlɛ́ Igbómína ā, anɔ́ɔ é lɛ aícɔ́ɔja ohile nēe bá abɔ́ɔ ā hīgwú á. 17É kwú awulú kú otómbíyē ú tá klá Ujísɔ̄si iyē, anɔ́ɔ é bī ujē lɛ ɔfla kú ɔcɛ́ yá, anɔ́ɔ é kwú ɔ̄ ú wu ɔ́ ɛyí. 18Anɔ́ɔ é gbɔɔ́ ō tá ɔ̄ icɔ́gbá ɔcɛ́ ka, “Ágábáidu ɔcɛ́ kú ācɛ Ujíyu!” 19É lɛ ogbló fīyɛ̄ ɔ̄ ɛyí, é tá ahɛ klá anú, é lɛ okwúukwu kwajɛ túkpɛɛ́ iyɔ̄bū nū. 20Eko nēé lɛ ɛbɛ yá ɔ̄ kwɛyí ā, é lɛ awulú kú otombíyē ā kpó ŋmá ɔ́ iyē, anɔ́ɔ é kwú úwé kú nū í kpó wu ɔ́ iyē á. Anɔ́ɔ é lɛ ɔ́ bītá ga ɛga nēé gáā je ɔ́ nyɔ́kpá ā.

É lɛ Ujísɔ̄si nyɔ́kpá

(Umát 27.32-44; Ulúk 23.26-43; Ujɔ́n 19.17-27)

21 # Uróm 16.13 Eko nēé yɔ̄ ī nyɔ̄ ā, é lɛ ɔ̄cɛ éyi nēé hi ka Usáyímɔni má, ó ŋmá eyīpɔ́lɛ́ yɔ̄ ī wā ipú igelī nɛ̄hi ā, anɔ́ɔ aícɔ́ɔja ā lɛ ɔ́ pi abɔ̄fú kóō bī ɔcóōnyɔ́kpá kú Ujísɔ̄si. (Usáyímɔni ŋmá Usirín, anú kē wɛ ádā kú Alesáŋda mla Urúfɔ̄si á). 22É lé Ujísɔ̄si bī ga ɛga éyi nēé hī ka Ugɔ́ɔ́gɔ̄ta ā, nɛ̄ ɛyí kú iyē ā lé kahíníī, “ɛga kú ákōklō ɔ̄cɛ.” 23É tíne kéē je ejé nēé lɛ ɛcí nēé hi ka Umɛ́ɛ ā tū ɔ̄ lɛ ɔ́ kóō gwá abɔ́ɔ, amáŋ Ujísɔ̄si tá ō gwá ejé ā. 24#Aíjē 22.18 Anɔ́ɔ é kwú ɔ̄ ú nyɔ́kpá á. É le úwé kú nū kɔ̄ lɛ iyī uwā. É le ūlī tá cɛ́ɛ́ kéē jé ɔ̄cɛ nōo géē je āyā kú úwé kú nū ā. 25Ó wɛ ɛplá oje ahāanɛ kú ɔ̄cɔ̄ɔ̄cī nēé je Ujísɔ̄si nyɔ́kpá á. 26É lɛ ije nēé cē bá ɔ̄ kahíníī, “Ɔcɛ́ kú ācɛ Ujíyu” ā tá playi icō ikpɛ̄yí ɔcóōnyɔ́kpá kú nū ā. 27#Ayis 53.12É lɛ ācohéjulúgwu ɛpa nyɔ́kpá mla Ujísɔ̄si, éyi yɔ̄ abɔ̄lɔ́ná anɔ́ɔ ɔhá ā kē yɔ̄ abɔ̄lúfīyē kú nū. 28Ó ŋmá ɛ̄nyā ā, ɛga kú ipú ɛlā Ɔwɔicō nēé kahíníī, “Ɔdā nēé yá ācɛ obɔ̄bí nēé yá ɔ̄ dúú ā,” le cɛ̄ ɔkwɛ̄yi. 29#Aíjē 22.7; 109.25; Umák 14.58; Ujɔ́n 2.19Ācɛ nēe bá ī yɛ ɔwɛ ā jílɛyí jigijigi tū ɔ̄. É klla cá ɔ̄ ɛcá, yá ɔ̄ ɛbɛ́ gē kahíníī, “Aháa! awɔ nōo géē lɔfú ca Agblīihɔ-nɛ̄hi ā tāajɛ, klla í lɔfú gwó ɛ̄nɛ̄ ɔlɛɛcɛ í bī abɔ̄ gwó glá ŋ́ ɛ̄cī ɛtá glá. 30Abālɔbányā le hīlatá ŋmá ɛyí ɔcóōnyɔ́kpá cɛ́ɛ́ ká ā lɛ iyī wɔ nyatá mɛ́ɛ́nɛ.” 31Ɛ́gɔ́ɔmā nɛ̄ aótrɛ̄yí kú ācogwɛ́ɛya ā mla aítíca kú íne ā yá Ujísɔ̄si ɛbɛ́ dúú á. É bá yɔ̄ ī ka lɛ aɔ́mpa uwā ka “Ó nya ācɛ ɔhá tá, amáŋ ó nya iyīnū tá glá ŋ́! 32Ohɔ́nyɛtá, ɔcɛ́ kú Ísrɛ̄lu ā kóō le hīlatá ŋmá ɛyí ɔcóōnyɔ́kpá abālɔbányā kú ālɔ̄ má ɔ̄ mɛ́ɛ́nɛ, cɛ́ɛ́ alɔ géē cɛ̄ɛ̄lā kú nū!” Ācɛ ɛpa nēé nyɔ́kpá mla anú ā kōō cá ɔ̄ ɛcá dúú.

Ujísɔ̄si gekwú

(Umát 27.45-56; Ulúk 23.44-49; Ujɔ́n 19.28)

33Eko nɛ̄ oje igwɛ́ɛpa kú ɔlɛ́ɛnɔ le yá ā, obū le du ajɛ ɛga dóódu jāā gbó ɛplá oje ɛtá kú ɔlɛ́ɛnɔ. 34#Aíjē 22.1 Ɛplá oje ɛtá kú ɔlɛ́ɛnɔ Ujísɔ̄si dɛ̄gba gbōmgbōm kahíníī, “Ɛlɔ̄yi, Ɛlɔ̄yi, lamá sabaktáni?” Nɛ̄ ɛyí nū wɛ, “Ɔwɔicō kú um, Ɔwɔicō kú um, ɔdíyá nāa je mlanyi um ā?” 35Ācɛ ōhī nēe háyi abɔ́ɔ ā lɛ ɛlā nōó ka ā pó, é kahíníī, “Aá má ɔ̄ ɛ́ɛ̄, ó yɔ̄ ī hī Ɛláyíja igwú.” 36#Aíjē 69.21Anɔ́ɔ ɔ̄cɛ éyi le kwu gaá lɛ ejé ōmákáká cē tū isoso kwú ɔ̄ ú kwu ɔcí lɛ ɔ́ kóō gwá, anɔ́ɔ ó da uwá kéē háyi kú aá má ɔ̄, ɔ́dāŋ ka Ɛláyíja ɔ́ɔ géē wā gaá je ɔ́ wā ajɛ nɛ. 37Ujísɔ̄si le ɛgba dɛ̄ nɛ̄ɛ̄nɛhi, anɔ́ɔ ó mā owu á. 38#Oyɛb 26.31-33Īlī ō hɛ́ inu ɛpa kú Agblīihɔ-nɛ̄hi ā le hɛ́ɛpa ŋmá icō wāajɛ. 39Anɔ́ɔ eko nɛ̄ otrɛ̄yí kú aícɔ́ɔja ofɛhɔ̄ nōo háyi iyɔ̄bū nū ā, nōo má ɔ̄ abɔ̄ ó dɛ̄gba klla mā owu ā kahíníī, “Ɔkwɔ̄ɔ̄kwɛ̄yi, ɔ̄cɛ ā wɛ ɔyí kú Ɔwɔicō!”

40 # Ulúk 8.2,3 Ācɛnyā ōhī bá yɔ̄ ī cokē nū ŋmá ɛga oligbó. Aóhī kú uwā wɛ Umerí Umagadalíni, Umerí ɛ́nɛ́ kú Ujémīsi nɛ̄ŋ́cɛ́ mla Ujósɛ̄fu, mla Usalómi. 41É yɛce ɔ́ eko nōó yɔ̄ Ugálīli ā. É gē cɛ̄ ɔ̄ ɛhɔ̄ dúú. Ācɛnyā alɛwa ɔhá nēe wā Ujerúsālɛm mla anú ā, bá abɔ́ɔ dúú.

É kwú Ujísɔ̄si ú nyi

(Umát 27.57-61; Ulúk 23.50-56; Ujɔ́n 19.38-42)

42Ɛplá nɛ̄ ɔ̄nɛ̄ le gbo ā, ɛ́gɛ́nɛ̄ ó wɛ ɛ̄cī Otútū ā, nōó klla wɛ ɛ̄cī nōo gbɔbū lɛ ɛ̄cī Usábāti ā, 43Ujósɛ̄fu ɔ̄cɛ Arimatéya gā. Ó wɛ ɛ́nɛ́nɛ̄ ɔ̄cɛ ipú ācohɛ́pɔ̄, ɔ̄cɛ nɛ̄ anú abɔ̄yīnū gē leyīce oōwā kú ajɔ̄ɔ̄cɛ́ kú Ɔwɔicō. Ó leyī hɔ́lá le yɛ tá ɛgiyí Upáyílēti gaá da ɔ́ kóō kwú okwū kú Ujísɔ̄si ú lɛ anúɔ. 44Ó le yá Upáyílēti eyījii, abɔ̄ ó pó ka Ujísɔ̄si ɔ́ɔ gekwú ɛɛ́ mā. Ó le otrɛ̄yí kú aícɔ́ɔja ofɛhɔ̄ ā hīgwú, anɔ́ɔ ó da ɔ́ ɔ̄kā ɔ́dāŋ́ ka ɔ́ɔ gekwú ɔkwɛ̄yi ɛɛ́. 45Anɔ́ɔ abɔ̄ ó le pó ŋmá ɛgiyí otrɛ̄yí kú aícɔ́ɔja ofɛhɔ̄ ā, ka ɔ́ gekwú ɛɛ́ mā, anɔ́ɔ Upáyílēti cɛ̄ ka Ujósɛ̄fu kóō kwú okwū ā ú mɛ́ɛnɛ. 46Ujósɛ̄fu le ɔpá nɛ̄hɛ́ lā, kwú okwū ā ú wā ajɛ, anɔ́ɔ ó kwú ɔpá nɛ̄hɛ́ ā ú hā tū ɔ̄ á. Anɔ́ɔ ó kwú ɔ̄ ú nyɔ̄ í gwutá ipú únóji nēé yíla tá ipú ápátɛ́cɔ̄ ā. Anɔ́ɔ ó le ɛcɔ̄ míya gaá gwū okónu únóji ā á. 47Umerí Umagadalíni mla Umerí ɛ́nɛ́ kú Ujémīsi má ɛga nēé je ɔ́ gwutá ā.

Currently Selected:

UMÁKI 15: IFBCL

Highlight

Copy