UMÁTIYU Omafú kú ɔ̄kā kú ipú ɔkpá ā
Omafú kú ɔ̄kā kú ipú ɔkpá ā
Ɔ̄kōōlɔhi ɛ́gɛ́nɛ̄ Umátiyu tá ɔ̄ ā kɛlā lɛyíkwu ɔ̄kōolɔhi nōo ka ka Ujísɔ̄si ɔ́ɔ wɛ ohɔ́nyɛtá nɛ̄ Ɔwɔicō tɛtɛ cokónu lɛ ācɛ ɔlɛ́ nū á. Ɔwɔicō le okónu nōó ce lɛ ācɛ ɔlɛ́ nū ipú ɔkpá kú “ɛka nɛ̄ŋcɛ̄” ā ka ɔ́ɔ géē wā ā yájīla. Ɔ̄kōōlɔhi ā ka ka Ujísɔ̄si ɔ́ɔ wā gaá katɛ́ɛcɛ ka ajɔ̄ɔ̄cɛ́ éyi yɔ̄ nōó labɔ̄ lɛ igɛ́mɛ́nti kú ipú ɛcɛ nyā ŋ́, ajɔ̄ɔ̄cɛ́ nɛ̄ ācɛ nēe lā ipú nū ā í gē kwú ŋ́. Ɔ̄kōōlɔhi nyā í yɔ̄ lɛ ācɛ Ujíyu, nēe má Ujísɔ̄si nōó klla lā ipú uwā ōfōōfū ūwā ŋ́, amáŋ ohígbū ɛjɛ̄ɛ̄jī ācɛ kú ɛcɛ nyā.
Umátiyu le ɛlá kwu ɔ́ lɛ ɔ̄kā ā gwótū. Ó gbɔɔ́ ŋmá eko nɛ̄ Umerí ma Ujísɔ̄si ā, ubatísim kú nū mɛ́mla ojámá nēé yá ɔ̄ ipú ígbíli ā, mɛ́mla úklɔ́ kú ɛhɔ̄ nōó cɛ̄ lɛ ācɛ ā, mɛ́mla ɛlā nōó nwū ācɛ ā, mɛ́mla ācɛ nōó hɛ́tá ŋmá ōcē ipú Ugálīli ā. Igbīhi ɛ̄nyā ā, ɔ̄cɛ nōo tɔ́kpá nyā klla kɛlā lɛyíkwu iyāwu kú Ujísɔ̄si ŋmá Ugálīli ga Ujerúsālɛm mɛ́mla aɔ́dā alɛwa nōó ga ipú aláadi ámōōme nōó yá ipú ɛcɛ nyā ā, jāā kwu eko nɛ̄ aícɔ́ɔja kú Uróm je ɔ́ nyɔ́kpá mɛ́mla eko nɛ̄ Ɔwɔicō jé ɔ̄ héyī ŋmá ɔlékwū ā.
Ɔ̄kōōlɔhi nyā le Ujísɔ̄si kwɛcɛ kóō wɛ Itíca nɛ̄hi éyi nōo lɛ íkwu kóō cɔ̄wɔ íne kú Ɔwɔicō. Ó nwū ācɛ ɛlā lɛyíkwu ajɔ̄ɔ̄cɛ́ kú Ɔwɔicō. Ó tá péee ka Ɔkpíihɔ kú ɛka nɛ̄ncɛ̄ ā ce ācɔ̄lóhɔ́nyɛtá nēe bá nyā ɛgbá nɛ̄hi, ɔ́ɔmā yá ɛ́ɛ́ nɛ̄ Umátiyu í mlanyi kóō mafú lɛ ācɛ ā ɛgɛɛga kú Ɔkpíihɔ nēé tá ka Ɔwɔicō ɔ́ɔ tū Ujísɔ̄si ɛhɔ̄ kóō wā í lɛ ācɛ nyatá ŋ́ má. Umátiyu tɔ́kpá nyā o yá ɛ́ɛ́ kú ācɔ̄lóhɔ́nyɛtá kéē le jé kpɔ́cíí ka ɔtū nēé ce Ujísɔ̄si ka anú ɔ́ɔ wɛ ɔ̄cɛ nōo wā í nya uwá tá ā le ekli kwú Ɔ̄kōōlɔhi kú ɛka nɛ̄ncɛ̄. Ó klla tíne kóō tū uwā abɔ̄ kú ɔtū nēe le ce Ɔwɔicō ā kóō lɔfú fíyɛ́.
(a) Ɛlā nōó nwū ɛyí ɛfu nōó kɛlā lɛyíkwu uce, úklɔ́ mɛ́mla ɔdā nēé miya táajɛ lɛ ācɛ kú ajɔ̄ɔ̄cɛ́ kú Ɔwɔicō (ɛyí 5-7); (b) Ukɔ́ nōó tū ayíkpó igwɛ́ɛpa ā lɛyíkwu úklɔ́ kú uwā ā (ɛyí 10); (c) Aíta nōó kwu lɛyíkwu ajɔ̄ɔ̄cɛ́ kú Ɔwɔicō (ɛyí 13); (d) Ɛlā nōó nwū lɛyíkwu ācɛ nēe tíne kéē wɛ ayíkpó ā (ɛyi 18); (e) Ɛlā nōó nwū lɛyíkwu eko nyā mɛ́mla eko nɛ̄ Ɔwɔicō í wā í cɔcɛ́ ipú ɛcɛ nyā ā (ɛyí 24-25).
Okwɔgba kú aɔ́dā nēe bá ipú ɔkpá ā
Aádáádā kú Ujísɔ̄si Ohɔ́nyɛtá 1.1—2.23
Úklɔ́ kú Ujɔ́ni o yúbatísim 3.1-12
Ubatísim mɛ́mla ojámá nēé yá Ujísɔ̄si ā 3.13—4.11
Úklɔ́ nɛ̄ Ujísɔ̄si yá ipú ācɛ Ugálīli ā 4.12—18.35
Oŋmá Ugálīli ga Ujerúsālɛm 19.1—20.34
Aláadi amōōmɛ ɛga nōo kwu Ujerúsalɛm ajaajɛ mɛ́mla ipú Ujerúsalɛm 21.1—27.66
Óndú ā le héyī klla le iyīnū mafú lɛ ācɛ 28.1-20.
Currently Selected:
UMÁTIYU Omafú kú ɔ̄kā kú ipú ɔkpá ā: IFBCL
Highlight
Share
Copy
Want to have your highlights saved across all your devices? Sign up or sign in