UMÁTIYU 9

Ujísɔ̄si lɛ ɔ̄cɛ oŋmíyē éyi hɛ́tá

(Umák 2.1-12; Ulúk 5.17-26)

1Ujísɔ̄si le yɛ tá ipú ɔ́kɔ ga ogbeé ɔhá. Anɔ́ɔ ó gā ajɛ igelī nōo lā á. 2Ācɛ éyi le ɔ̄coŋmíyē éyi tá agōdō gé lɛ ɔ́. Eko nɛ̄ Ujísɔ̄si le ɛ́gɛ́nɛ̄ é kpɔ́tūce lɛ ā má ā, ó da ɔ̄coŋmíyē ā kahíníī, “Lɛ ɔtūlé, é kwú íne nɛ̄ a bīya ā í yá uwɔ ɛhi ɛɛ́.” 3Anɔ́ɔ aítíca kú íne ōhī da ɔ́mpa ūwā kahíníī, “Ɔ̄cɛ ā le ɛbí ka ɛɛ́.” 4Abɔ̄ nɛ̄ Ujísɔ̄si le ɛlá nēé gbo ā jé ā, ó kahíníī, “Ɔdíyá nɛ̄ aá ī gbɛlá obɔ̄bí ipɔ́tū kú aá āa? 5Ɛ̄nyá tɔ́ɔtɛ ō ka āa, ‘É kwú íne nɛ̄ a bīya í yá uwɔ ɛhi ɛɛ́’, kɛ́ɛ koō ka ka, ‘Cāŋjɛ ká ā yāwu.’ 6N géē mafú lɛ aá ka Ɔyínɔ̄nyīlɔ kú Ɔ̄cɛ lɛ íkwu ipú ɛcɛ nyā ō je íne nɛ̄ ācɛ bīya ā uwā yá ūwā ɛhi.” Anɔ́ɔ ó da ɔ̄coŋmíyē ā kahíníī, “Cāŋjɛ, ka ā kwú agōdō kú uwɔ ú ká ā ga ɔlɛ́ uwɔ!” 7Anɔ́ɔ ɔ̄cɛ ā cāŋjɛ le tá ɔlɛ́ nū á. 8Eko nɛ̄ ɛwa ā le ɔ́ má ā ufi yá uwā nɛ̄hi, anɔ́ɔ é cɛ̄tra Ɔwɔicō nōo je íkwu ɛ́gɛ́nyā lɛ ācɛ ā.

Ujísɔ̄si fu Umátiyu

(Umák 2.13-17; Ulúk 5.27-32)

9Abɔ̄ Ujísɔ̄si ŋmá abɔ́ɔ ā, ó má ɔ̄cɛ éyi yɔ̄ ɛga odɔ̄lɛ́ nɛ̄ iyē nū lé ka Umátīyu. Ó da ɔ́ kahíníī, “Yɛce um.” Anɔ́ɔ ó cāŋ́jɛ le yɛce ɔ́ á.

10 # Ulúk 15.1,2 Anɔ́ɔ abɔ̄ ó yɔ̄ gē lé ɔdōlé ipú inu ɔlɛ́ Umátīyu ā, ācodɔlɛ́ mɛ́mla ācobīyíne alɛwa yāajɛ mɛ́mla Ujísɔ̄si mɛ́mla ayíkpó kú nū. 11Ācɛ ɔ́wá kú Ufárisīs ōhī le ɔdā nōo yá ā má, anɔ́ɔ é da ayíkpó kú nū ɔ̄kā kahíníī, “Ɔdíyá nɛ̄ itíca kú aá gē lé ɔdōlé mɛ́mla ācɛ odɔlɛ́ mɛ́mla ācobīyíne āa?” 12Eko nɛ̄ Ujísɔ̄si le ɛlā nēé ka ā pó ā, ó tá uwā ohi kahíníī, “Ācɛ nēe lɔfú iyē ā í cɛgbá obócí ŋ́, amáŋ ācɛ o doōcē ā cɛgbá obócí á. 13#Umát 12.7; Uhos 6.6Aá nyɔ̄ ká aá gaá dɔɔ̄kā ɛyí kú ɛlā nɛ̄ ɔkpá kú ɛlɔ̄ɔwɔicō ka ka, ‘Eyīnyinyi nɛ̄ n tíne á, ó wɛ ɛbɛ́ ō le gwɛ́ɛya ŋ́.’ Ń wā gaá hī ācɛ olɔhi igwú ŋ́, amáŋ ācobīyíne kéē pīyabɔ̄.”

É da Ujísɔ̄si ɔ̄kā lɛyíkwu okónu ō gwū

(Umák 2.18-22; Ulúk 5.33-39)

14Anɔ́ɔ ayíkpó kú Ujɔ́ni wā ɛgiyí Ujísɔ̄si gaá dɔɔ̄kā kahíníī, “Ɔdíya nɛ̄ alɔ mɛ́mla ācɛ Ufárisīi gē gwōkónu ojigógó, amáŋ ayíkpó kú uwɔ̄ í gē gwōkónu ŋ́ mā āa?” 15Anɔ́ɔ Ujísɔ̄si da uwá kahíníī, “Aóklóbīya kú ɔ̄colɔnyā ɛ̄yīpɛ̄ lɔfú yɔ́tūnōbí eko nɛ̄ ɔ̄colɔnyā ā yɔ̄ mɛ́mla uwá glá āa? Amáŋ eko gē wā, nēé géē je ɔ̄colɔnyā ā ŋmá abɔ̄ uwā. Eko ɔ́ɔmā é géē gwōkónu. 16Ɔ̄cɛ dúúmā í gē gɔ́ īlī ɛ̄yīpɛ̄ ce ɛyí ɛnɛ̄ncɛ̄ ŋ́. Ohígbū ka ɛ̄yīpɛ̄ ā géē híla ŋmá ɛnɛ̄ncɛ̄ ā cɛ́ɛ́ ó klla le híla fíyɛ́. 17Ɔ̄cɛ dúúmā í gáā lɛ ejé ɛ̄yīpɛ̄ tū ipú ɔjá ɔkpɛ́bɛ́ nɛ̄ncɛ̄ ŋ́. Ɔ́dāŋ koó le yá lɛ ā, ɔjá ɔkpɛ́bɛ́ ā géē yíla cɛ́ɛ́ ejé ā kwú pɛ́ bónū, cɛ́ɛ́ ɔjá ɔkpɛ́bɛ́ ā kē í bīya. Amáŋ é gē lɛ ejé ɛ̄yīpɛ̄ tū ipú ɔjá ɔkpɛ́bɛ́ ɛ̄yīpɛ̄, cɛ́ɛ́ uwá ɛplɛ́ɛpa í gáā bīya ŋ́.”

Ɔyínɔ̄nyā kú Ujáyīrɔs, mla ɔnyā nōo lɛ abɔ̄ kwu úwé kú Ujísɔ̄si ā

(Umák 5.21-43; Ulúk 8.40-56)

18Eko nōó yɔ̄ gē kɛlā lɛ uwá āa, otrɛ̄yí kú ajɛ abɔ́ɔ éyi gaá gbɔ̄ɔkɔ lɛ ɔ́ kahíníī, “Ɔyínɔ̄nyā kú um gekwú ɛɛ́. Wā ká ā gaá lɛ abɔ̄ kú uwɔ ce ɔ́, ó kē ī je hēyī.” 19Ujísɔ̄si mɛ́mla ayíkpó kú nū cāŋ́jɛ̄, anɔ́ɔ é yɛce ɔnyīlɔ aā. 20Ɔnyā éyi nōo yɔ̄ gē hóóyī iháyí igwɛ́ɛpa, yɛ igbīhi nū gaá lɛ abɔ̄ kwu ogwu kú úwé kú nū. 21Ó le ka ipú odo kú nū kahíníī, “Ɔ́dāŋ́ ka n lɛ abɔ̄ kwu úwé kú nū ōfūnū, n géē je hɛ́tá ŋmá ōcē kú um.” 22Ujísɔ̄si leyipīya lɛ ɔ̄ má, anɔ́ɔ ó kahíníī, “Adá um, lɔtūlé, ɔtōkpóce kú uwɔ lɛ uwɔ hɛ́tá ɛɛ́.” Anɔ́ɔ ɔnyā ā le hɛ́tá ŋmá ōcē kú nū ɔkwɔɔkwu ɔ́ɔmā á. 23Eko nɛ̄ Ujísɔ̄si gā ɔlɛ́ otrɛ̄yí ɔ́ɔmā ā, ó má ācɛ otá ɔkpancílé mɛ́mla ācɛ nēe bá gē yúuya nɛ̄hi. 24Ó da uwá kahíníī, “Aá gɛcɛ, ohígbū ka ɔyínɔ̄nyā ā í kwú ŋ́, amáŋ ó yɔ̄ gē gbiyɔ̄lā.” Amáŋ é le ɛhɛ yɛ tū ɔ̄. 25Anɔ́ɔ eko nōó lɛ uwá kpó nū gɛcɛ ā, ó le tá ipú inu anɔ́ɔ ó lɛ abɔ̄ je ɔyínɔ̄nyā gicō, anɔ́ɔ ɔyínɔ̄nyā ā cāŋ́jɛ á. 26Ɔ̄kā kú úklɔ́ ō hídáagó nyā le yɛ ɛga dóódu kú ajɛ abɔ́ɔ jīla.

Ujísɔ̄si le aópeyī ɛpa hɛ́tá kéē mɛ́ɛbɛ

27Abɔ̄ Ujísɔ̄si ŋmá abɔ́ɔ āa, ācɛ opeyī ɛpa yɛce ɔ́, gē dɛ̄gba hī ɔ̄ kahíníī, “Ményinyi alɔ, ɔyínɔ̄nyīlɔ kú Udéfīdi.” 28Eko nōó le bēhé tá inu ā, ācɛ opeyī ɛpa ā gā ɛgiyí nū. Anɔ́ɔ Ujísɔ̄si da uwá ɔ̄kā kahíníī, “Aá cɛ̄ ka n lɔfú yá ɔdā nɛ̄ aá ba ā glá āa?” Anɔ́ɔ é da ɔ́ kahíníī, “Īī, Óndú.” 29Anɔ́ɔ Ujísɔ̄si lɛ abɔ̄ kwu īkpeyī kú uwā, anɔ́ɔ ó kahíníī, “Ó le yá lɛ aá ɛ́gɛ́nɛ̄ aá kpɔ́tūce Ɔwɔicō lɛ āa.” 30Anɔ́ɔ ó lɛ uwā eyī nwūla kéē mɛ́ɛbɛ́ á. Ujísɔ̄si pi uwá ahɔ̄ lɔfúlɔfú kahíníī, “Aá híīī yá ká ɔ̄cɛ dúúmā kóō jé ŋ́.” 31Amáŋ é nyɛ̄ɛ̄ gaá lɛ ofu kú nū ca klɛ́ɛcɛ ɛga dóódu kú ajɛ abɔ́ɔ.

Ujísɔ̄si lɛ ɔ̄cɛ odokónu éyi hɛ́tá

32Abɔ̄ é bá gē nyɔ̄ ā, é le ɔ̄cɛ o lɛ alelékwū obɔ̄bí nōó gē kɛlā gla ŋ́ bī gé lɛ Ujísɔ̄si. 33Eko nōó lɛ alelékwū obɔ̄bí ā nū tɛ́ɛcɛ ā, ɔ̄cɛ nōo dokónu ā gbɔɔ́ ō kɛlā. Anɔ́ɔ ɛwa ā le kpó hídáagó, klla kahíníī, “Ɛ́gɛ́nyā í yá ajɛ Ísrɛ̄lu jéjéē ɛ́ɛ́ ŋ́.” 34#Umát 10.25; 12.24; Umák 3.22; Ulúk 11.15Anɔ́ɔ ācɛ Ufárisīi kahíníī, “O ŋmá ɔfú kú otrɛ̄yí kú alelékwū obɔ̄bí nōó gē nū alelékwū obɔ̄bí tɛ́ɛcɛ á.”

35 # Umát 4.23; Umák 1.39; Ulúk 4.44 Ujísɔ̄si yɔ̄ gē yɛ aígelī nɛ̄hi mɛ́mla aípɔ́lɛ́ dóódu, yɔ̄ gē nwɛ̄lā ipú aɛ́gogbɔ̄ɔkɔ kú uwā. Ó kla gē tɔ́ɔna kú ɔ̄kōolɔhi kú ajɔ̄ɔ̄cɛ́ ā. Ó kē yɔ̄ gē hɛ́ ācɛ nēe gē du ɛdɔ ōcē dóódu mla ɔ́fú dóódu tá.

Ohɔ́nyɛtá ményinyi ācɛ

36 # Áluk 27.17; 1 Aɔ́cɛ́ 22.17; 2 Úklɔ́ 18.16; Isík 34.5; Umák 6.34 Eko nōó má ɛwa āa, é le tū ɔ̄ eyīnyinyi ohígbū keé bá ī móōwē, í klla má otábɔ̄ dúúmā ŋ́. É lɛbɛ̄ɛka aálá nēé lɛ ɔ̄cɛ ogbō uwā ŋ́ mā ā. 37#Ulúk 10.2Anɔ́ɔ ó da ayíkpó kú nū kahíníī, “Ɔdɛ̄hɔ̄ ā nwuné nɛ̄hi, amáŋ ācoyúklɔ́ ā í lɛ ɛwa ŋ́. 38Ohígbū ɔ́ɔmā ā aá gbɔ̄ɔkɔ lɛ Óndú kú ɔdɛ̄hɔ̄ ā, cɛ́ɛ́ kóō lɛ ācoyúklɔ́ alɛwa tū ga ipú ɛhɔ̄ ā kéē cē ɔdɛ̄hɔ̄ kú nū.”

Currently Selected:

UMÁTIYU 9: IFBCL

Highlight

Copy