UMÁTIYU 6

Ɛhi oōje lɛ ācɛ nōo lɛ ŋ́

1 # Umát 23.5 “Aá leyī kwɛcɛ kú aá híīī yá ɔdā olɔhi kú aá iyɔ̄bū ācɛ o yá ká ācɛ kéē má ɔ̄ ŋ́. Ɔ́dāŋ́ ka aá ī yá lɛ āa, aá gáā mīyɛ ulé dúúmā ŋmá abɔ̄ Ádā aá, nōo yɔ̄ ɔkpáncō ā ŋ́.”

2“Eko nɛ̄ a gē yá ɛhi, ā híīī lɛ ɔ́ tɔ́ɔna ɛ́gɛ́nɛ̄ ācɛ oleyī ɛpa gē yá ipú aɛ́gogbɔ̄ɔkɔ mla ɔtāhɛ̄ ɔwɛ cɛ́ɛ́ ká ācɛ kéē cɛ̄tra uwá ā ŋ́. Ɔkwɛ̄yi, n̄ da aá ka, uwá mīyɛ ulé kú uwā ɛɛ́. 3Amáŋ eko nɛ̄ aá gē yá ɛhi kú aá, ā híīī yá ká abɔ̄lúfīyē kú aá kóō jé ɔdā nɛ̄ abɔ̄lɔ́ná kú aá gē yá ā ŋ́. 4Ká ɛhi kú aá kóō tayínū, cɛ́ɛ́ Ádā aá, nōo gē má ɔdā ōtayínū ā, géē cíla aá ulé.”

Ɔkɔ ō gbā ɛkwūbá

5 # Ulúk 18.10-14 Eko nɛ̄ aá gáā gbɔ̄ɔkɔ, aá híīī yá bɛ̄ɛka ācɛ oleyī ɛpa āa ŋ́. Ohígbū keé gē tíne kéē háyi ipú aɛ́gogbɔ̄ɔkɔ mɛ́mla áklō kú uláyi kéē gbɔ̄ɔkɔ ká ācɛ kéē má uwā. Ɔkwɔ̄ɔ̄kwɛ̄yi, n̄ da aá ka uwá mīyɛ ulé kú uwā ɛɛ́. 6Amáŋ aá ā, eko nɛ̄ aá gē gbɔ̄ɔkɔ, aá le tá inu eyīpú. Eko nɛ̄ aá lɛ ɔwɛ gwū, aá gbɔ̄ɔkɔ lɛ Ádā aá, nōo yɔ̄ ɛga otayínū ɔ́ɔmā ā. Ádā aá nōo ī má ɔdā otayínū ā, kē í cíla aá ulé.

7“Eko nɛ̄ a gē gbɔ̄ɔkɔ, ā híīī kɛlā cɔhá icō ɛ́gɛ́nɛ̄ ācɛ nēe ō pɛ̄cí ā gē yá ā ŋ́. Ohígbū ka uwá gbɛlá keé géē pó ɔkɔ kú uwā ohígbū ɛlā alɛwa nēé ī ka ā. 8Aá gbla uwá ŋ́, ohígbū ka Ádā ā jé ɛgbá kú aá gbɔbū ɛ́ɛ́ ka aá da ɔ́ ɔ̄kā nū.

Ɔkɔ ō gbā kú Óndú alɔ

(Ulúk 11.2-4)

9Ohígbū ɔ́ɔmā ā, ɔwɛ ɛ́gɛ́nyā nɛ̄ aá géē gbɔ̄ɔkɔ á.

‘Ádā alɔ, nōo yɔ̄ ɔkpáncō,

Alɔ gbɔ̄ɔkɔ ká ā yá ká ācɛ kéē lɛ ojīlīmā ce iyē otīihɔ kú uwɔ.

10Wā gaá cɔcɛ́ ɛcɛ amānyā.

Ká ɔdā nɛ̄ a tíne ā kóō yá ipú ɛcɛ nyā,

ɛ́gɛ́nɛ̄ ó ī yá ɔkpáncō ā.

11Je ɔdōlé nɛ̄ alɔ cɛgbá ɛ̄cī nyā ā lɛ alɔ.

12Kwú ucē obɔ̄bí nɛ̄ alɔ yá ā í yá alɔ ɛhi,

ɛ́gɛ́nɛ̄ alɔ ī je yá ācɛ nēe yá alɔ ɔdōōbɔ̄bí ā ɛhi ā.

13Ā híīī bī alɔ ga ipú ojámá nɛ̄hi ŋ́,

Amáŋ lɛ alɔ nyatá ŋmá ɔdōōbɔ̄bí.

14 # Umák 11.25,26 Ohígbū ka ɔ́dāŋ ka aá kwú ɔdōōbɔ̄bí nɛ̄ ācɛ yá aá ā í yá uwā ɛhi, Ádā aá nōo yɔ̄ ɔkpáncō ā, géē je ákú aá yá aá ɛhi dúú. 15Amáŋ ɔ́dāŋ ka aá tá ō je ɔdōōbɔ̄bí nɛ̄ ācɛ yá aá ā yá uwá ɛhi, Ádā aá nōo yɔ̄ ɔkpáncō ā, í gáā je ɔdōōbɔ̄bí nɛ̄ aá yá ā yá aá ɛhi ŋ́ dúú.

Ujísɔ̄si nwū ācɛ ɛlā lɛyíkwu Okónu ō gwū

16“Eko nɛ̄ aá ī gwōkónu, aá híīī lɛ eyī hɔ́ɔnɔ bɛ̄ɛka ācɛ oleyīɛpa ā ŋ́. Ohígbū keé gē le eyī kú uwā kwúfúlá ká ācɛ kéē jé ka uwá yɔ̄ ī gwōkónu. Ɔkwɔ̄ɔ̄kwɛ̄yi, n̄ da aá ka, uwá mīyɛ ulé kú uwā ɛɛ́. 17Amáŋ aá ā, eko nɛ̄ aá gē gwōkónu, aá kóō lɛ anɔ̄ nya ɛyí kú aá, klla lɛ eyī kú aá na. 18Aá mafú lɛ ācɛ ka aá gē gwōkónu ŋ́, amáŋ Ádā aá nōo yɔ̄ ɛga otayínū ā. Cɛ́ɛ́ Ádā aá, nōo gē má ɔdā ōtayínū ā, géē cíla aá ulé.

Ujísɔ̄si nwū ācɛ ɛga nēé géē kpó agbénú kú uwā tū

(Ulúk 12.33-34)

19 # Ujém 5.2,3 “Aá híīī kpó agbénú tū lɛ īyī aá ipú ɛcɛ nyā ŋ́. Ohígbū ka ipú ɛcɛ nyā, ɛha mɛ́mla ɛ́kla gē bīya agbénú. Ācɛ owūwī kē ī ca ɔwɛ gaá kpó uwī. 20Amáŋ aá lɛ agbénú tū lɛ īyī aá ɔkpáncō. Ohígbū ka abɔ́ɔ ā, ɛha ámāŋ ɛ́kla í gē bīya ɔdā dúú ŋ́. Ācɛ owūwī ī kē gē ca ɔwɛ gaá kpó uwī ŋ́. 21Ohígbū ka ɛga nɛ̄ agbénú kú uwɔ yɔ̄ ā, abɔ́ɔ nɛ̄ ɔtū kú uwɔ gē tá á.

Ujísɔ̄si nwɛ̄lā lɛyíkwu ɔdā nōo gē cɛ̄ lɛ ɔ̄cɛ mɛ́ɛbɛ

(Ulúk 11.34-36)

22“Īkpēyī kú ɔ̄cɛ gē yá nɛ̄ iyē kú nū gē mɛ́ɛbɛ á, ó lɛbɛ̄ɛka agege nōo ī cɛ̄ lɛ ɔ̄cɛ mɛ́ɛbɛ ā. Ohígbū ɔ́ɔmā ɔ́dāŋ ka ikpēyī kú uwɔ lɛ gēdēē, ó lɛ āa ɔlá gē fíyáajɛ klá odúúdú iyē kú uwɔ nɛ̄ɛ̄nɛ̄hi. 23Amáŋ ɔ́dāŋ ka ōcē lɛ eyī kú uwɔ pu, odúúdú iyē kú uwɔ géē yɔ̄ ipú obū. Ohígbū ɔ́ɔmā ā ɔ́dāŋ ka ɔlá nōo yɔ̄ ī fíyáajɛ ipú uwɔ ā le pīya obū, ó lɛ ā obū ā géē bɔ̄bí nɛ̄ɛ̄nɛ̄hi.

Ɔwɔicō mɛ́mla Agbénú ō lɛ.

(Ulúk 16.13; 12.22-31)

24“Ɔ̄cɛ dúúmā í lɔfú cɛ̄ ɔkpani ɛpa ɛhɔ̄ mla ɔtū ékpónú igbo ékpónú glá ŋ́. Ohígbū koó géē wɔ́tū éyi, ɔhá ā kē í he ɔ́ ɔtū. Ámāŋ ó géē lɛ ɔtū tū éyi cɛ́ɛ́ ó kē leyī gwō ɔhá bónū. Aá gáā cɛ̄ Ɔwɔicō ɛhɔ̄, ká aá klla yɔ̄ ī lɛ ije ō dɔ̄ɔkā bla anú igbo ékpónú ɔ́ɔmā glá ŋ́.

25“Ohígbū ɔ́ɔmā n da aá ka, aá híīī junwalu lɛ īyī aá nɛ̄hi lɛyíkwu oyēeyī kú aá, ohígbū ɔdā nɛ̄ aá géē lé mɛ́mla ɔdā nɛ̄ aá géē gwá ā ŋ́. Aá híīī junwalu lɛ īyī aá, ohígbū īlī nɛ̄ aá géē le wiyē ŋ́. Ó wɛ oyēeyī fíyɛ́ ɔdōlé ā ŋ́ nɛɛ? Iyē í kē fíyɛ́ īlī ā ŋ́ nɛɛ? 26Aá má aígbáanɔ nēe ī wu icō. É gē nyi ŋ́, é gē cē ŋ́, é kē ī kpó tū ɔbá ŋ́. Nááná Ádā aá, nōo yɔ̄ ɔkpáncō ā, gē je ɔdōlé lɛ uwá. Ó wɛ aá tīle fíyɛ́ uwá ŋ́ nɛɛ? 27Ɔ̄nyɛ kú ipú aá, nɛ̄ ɔ́dāŋ koó le kwú ɔ̄ iyē géē lɛ ɛ̄cī éyi tū oyēeyī kú nū glá āa? 28Ɔdíyá nɛ̄ aá kē ī lɛlá wu ɔdā nɛ̄ aá í lɛ wiyē āa? Aá má ɛ́gɛ́nɛ̄ ácí ō yá ododó ī jɛ lɛ́ āa. É gē yúklɔ́ ŋ́ ɛ́ɛ́ nēé gē tá odōwiyē abɔ̄yī uwā ŋ́. 29#1 Aɔ́cɛ́ 10.4-7; 2 Úklɔ́ 9.3-6Amáŋ n da aá ka Usólōmɔn, ɔcɛ́ nōo lɛ agbénú nɛ̄hi ā, í lɛ ɔdōwiyē nōo lɔhi bɛ̄ɛka aódodó nēe bá nyā ŋ́. 30Ɔwɔicō wɛ ɔ̄cɛ nōo ī lɛ ɔdōwiyē wu ácí nēe bá ícɛ, nɛ̄ óócí nēé bá gɛ ŋ́, nēé le uwá kpó tɔ̄lá ipú útuló ā iyē á. Ó lɛ āa, Ɔwɔicō í gáā lɛ ɔdōwiyē wu aá iyē fíyɛ́ ŋ́ nɛɛ? Ɔtū nɛ̄ aá kpóce Ɔwɔicō ā nyɛ́ íbí! 31“Ohígbū ɔ́ɔmā, aá híīī lɔtū plico yɔ̄ ī ka kahíníī, ‘Iní nɛ̄ ɔdōlé kú um géē ŋmá ā? Ámāŋ iní nɛ̄ ɔdā nɛ̄ n géē gwá ā í ŋmá ā? Ámāŋ iní nɛ̄ ɔdā nɛ̄ alɔ géē le wiiyē ā í ŋmá ā’ ŋ́. 32Aɔ́dā nēe gē kwú ācɛ nēe kpɔ́tūce Ɔwɔicō ŋ́ iyē ojigógó ā bá abɔ́ɔ á. Ádā kú aá nōo yɔ̄ ɔkpáncō ā tɛtɛ jé ka aɔ́dā nēe bá abɔ́ɔ ā ce aá ɛgbá. 33Ikoko ɔ́ɔmā, ɔtū kú aá kóō kwu ō jɛga lɛ Ɔwɔicō kóō le ɔcɛ́ lé oyēeyī kú aá, cɛ́ɛ́ kú aá bá ī yá ɔdā nōó tíne kú aá yá ā fíyɛ́ ɔdā ɔhá dúúmā. Ɔ́dāŋ́ ka aá le yá lɛ ā, Ɔwɔicō géē kpó aɔ́dā nēe bá nyā lɛ aá.

34“Ohígbū ɛ́gɔ́ɔmā, aá híīī junwalu lɛ īyī aá ɔtū lɛyíkwu ɛ́gɛ́nɛ̄ óócí géē lɛ ā ŋ́, ohígbū ka óócí lɛ unwalu alɛwa ákú abɔ̄yīnū. Unwalu kú ɛ̄cī dóódu jɛ̄ ɛ̄cī ɔ́ɔmā. Ó cɛgbá nɛ̄ ɔ̄cɛ í je unwalu kú ɛ̄cī ɔhá kwu ɔ̄ ŋ́.”

Currently Selected:

UMÁTIYU 6: IFBCL

Highlight

Copy