ULÚKU 4

Ojámá nɛ̄ ebilíi yá Ujísɔ̄si ā

1Ujísɔ̄si pīyɛyí ŋmá ísu kú Ujɔ́dan ɛga nēé yá ɔ̄ Ubatísim ā. Alelékwū Ihɔ le mu ɔ́ iyē nɛ̄hi. Anɔ́ɔ Alelékwū Ihɔ ā le ɔ́ bī ga ipú ígbíli á. 2Ebilíi yá ɔ̄ ojámá ɛ̄cī ofɛpa abɔ́ɔ. Ipú aɛ́cī nōó yɔ̄ abɔ́ɔ ā, ó lé ɔdā dúúmā ŋ́, ɛmiyɛ kē gbɔɔ́ ō ŋmó ɔ̄ eko nɛ̄ aɛ́cī ɔ́ɔmā le gla ā. 3Ebilíi da ɔ́ kahíníī, “Ɔ́dāŋ ka awɔ wɛ ɔyínɔ̄nyīlɔ kú Ɔwɔicō á, da ɛcɔ̄ nyā kóō le pīya igbō.” 4#Obla 8.3Amáŋ Ujísɔ̄si da ɔ́ kahíníī, “É lɛ ɔ́ tá tū ɔkpíihɔ ā kahíníī, ‘Ó wɛ igbō ōfūnū nɛ̄ ɔ̄cɛ í lé kóō yēeyī ā ŋ́.” 5Anɔ́ɔ ebilíi ā lɛ ɔ́ bī gicō, lɛ odúúdú ajɔ̄ɔ̄cɛ́ kú ɛcɛ nyā mafú lɛ ɔ́ ipú eyī ō cēbeé á. 6Ebilíi da ɔ́ kahíníī, “N géē kpó odúúdú ɔfú mɛ́mla ɛgahi nyā gā awɔ. É le odúúdú uwā kpó ga um, n kē lɔfú je lɛ ɔ̄cɛ dúú nōo he um ɔtū. 7Ɔ́dāŋ ka a cɛ̄ lɛ ɛ̄gbā gbā um, n géē kpó odúúdú aɔ́dā nēe bá nyā ga awɔ” 8#Obla 6.13Ujísɔ̄si tá ohí kahíníī, “É lɛ ɔ́ tá tū ɔkpíihɔ ā kahíníī, “Gbā Óndú ā, nōo wɛ Ɔwɔicō kú uwɔ ɛ̄gbā, anú ōfōōfūnū nɛ̄ a kē í cɛ̄ ɔ̄ ɛhɔ̄ á!” 9Anɔ́ɔ ebilíi le ɔ́ bī ga Ujerúsālɛm gaá kwú ɔ̄ ú ce ágēnégēne kú Agblīihɔ-nɛ̄hi ā, anɔ́ɔ ó da ɔ́ kahíníī, “Ɔ́dāŋ ka awɔ wɛ ɔyínɔ̄nyīlɔ kú Ɔwɔicō á, lɛ ómbli tá ŋmá amānyā gajɛ. 10#Aíjē 91.11,12Ohígbū kéē lɛ ɔ́ tá tū ɔkpíihɔ ā kahíníī,

‘Ɔwɔicō í da aálelékwū-ōtɛ̄hɔ̄ kú nū kéē leyīkwu uwɔ.’

11É klla tá kahíníī,

‘É géē bī uwɔ ipú abɔ̄ kú uwā,

cɛ́ɛ́ kú ɔdā dúú kóō híīī yá uwɔ ŋ́, ɛ́ nɛ̄ a kōō le ikpó gbo ɛcɔ̄, í fu ikpó ɛyí ŋ́.’”

12 # Obla 6.16 Amáŋ Ujísɔ̄si tóohi kahíníī, “É lɛ ɔ́ tá tū ɔkpíihɔ ā kahíníī, ‘Ā híīī yá Óndú ā, nōo wɛ Ɔwɔicō kú uwɔ ā ojámá ŋ́.’” 13Eko nɛ̄ ebilíi lɛ Ujísɔ̄si jámá ɔwɛ dóódu ā, anɔ́ɔ ó nyɛ̄ɛ̄ hɛ̄ ɔ̄ tá gbéeko ɔhá á.

Ujísɔ̄si gbo úklɔ́ kú nū ipú Ugálīli.

14Ujísɔ̄si pīyɛyí wā Ugálīli, ó kē le ɔfú kú Alelékwū kú Ɔwɔicō ā. Ofu kú nū le nyīla le tá ɛga dóódu kú ajɛ abɔ́ɔ. 15Ó nwū ācɛ ɛlā ipú aɛ́gogbɔ̄ɔkɔ kú uwā, ācɛ kē bá ī cɛ̄tra anú.

Ācɛ kú Unásārēti tá Ujísɔ̄si

16Ujísɔ̄si le yɛ tá Unásārēti, ɛga nēé bī ɔ̄ jɛ̄ ā, anɔ́ɔ ó le yɛ tá ɛgogbɔ̄ɔkɔ ɛ̄cī usábati, ɛ́gɛ́nɛ̄ ucē kú nū lɛ ā. Ó cāŋjɛ kóō jé ɔkpíihɔ tɛ́ɛcɛ. 17Anɔ́ɔ é kwú ɔkpá kú Ayisáya ú lɛ ɔ́ á. Ó lɛ ɔkpá ā nāndaa anɔ́ɔ ó lɛ ɛga nēé tá kahíníī,

18 # Ayis 61.1,2 “Alelékwū kú Óndú ā yɔ̄ iyē kú um,

ohígbū ka Óndú ā lɛ um fu ká n̄ bī ɔ̄kōolɔhi gé lɛ ācogbɛhá.

Ó lɛ um tɛ̄hɔ̄ ká n̄ da ācɛ nēe bá agbá ā kéē lɛ uwa hɛ̄tá ɛɛ́.

Ká n̄ da ācopeyī kéē lɔfú mɛ́ɛbɛ mɛ́ɛ́nɛ.

Ká n̄ lɛ ācɛ nēé gē yá uwā ōwē ā hɛ́tá.

19Cɛ́ɛ́ ká n̄ ka tɛ́ɛcɛ ka eko nɛ̄ Óndú ā dɔɔ̄kā

ō nya ācɛ ɔlɛ́ nū tá ā gā ɛɛ́.

20Ujísɔ̄si lɛ ɔkpá ā hā, kwú ɔ̄ ú kwúcē lɛ ɔ̄cɛ nōo ī yúklɔ́ abɔ́ɔ ā, anɔ́ɔ ó má cīce á. Odúúdú ācɛ nēe bá ipú ɛgogbɔ̄ɔkɔ ā le eyī kpó gbā kwu ɔ́. 21Anɔ́ɔ ó da uwá kahíníī, “Ɛlā nēé ka ipú ɔkpíihɔ nyā le yá jīla ipéyī aá ícɛ nyā, ɛ́gɛ́nɛ̄ á pó abɔ̄ nɛ̄ n jé ɔ̄ tɛ́ɛcɛ nyā ɛɛ́.” 22Odúúdú uwā nēe bá abɔ́ɔ ka olɔhi kú nū, ɛlā olɔhi nōó jé ɔ̄ ka ā le hɛ́ uwā idáagó. Anɔ́ɔ é bá ī da iyī uwā ɔ̄kā kahíníī, “Ó wɛ anú wɛ ɔyí Ujósɛ̄fu ā ŋ́ nɛɛ?” 23Ujísɔ̄si da uwá kahíníī, “N jé ka aá géē kwu ita nyā ga um, ‘Obócí lɛ iyī uwɔ hɛ́tá ɛ́’. Aá klla í da um kahíníī, ‘Lɛ ɔdā nɛ̄ alɔ pó ka a yá Ukápānɔm ā yá ajɛ ɔlɛ́ uwɔ amānyā dúú.’ 24#Ujɔ́n 4.44Amáŋ, n̄ lɛ ɛlā ɔkwɛ̄yi nyā da aá, keé gē mīyɛ ɔcomɛ́ɛbɛ dóódu ajɛ ɔlɛ́ nū ŋ́. 25#1 Aɔ́cɛ́ 17.1Amáŋ ká ɛlā ɔkwɛyi ā, n̄ da aá, ka anyōkwū alɛwa bá Isrɛ̄lu eko kú Ɛláyíja, nɛ̄ ɔwɔ í yá ŋ́ iháyí ɛtá ce ɔyā ɛhīlī ā, nɛ̄ ɔkpɛtā nɛ̄hi ŋmó ajɛ kú Ísrɛ̄lu ā. 26#1 Aɔ́cɛ́ 17.8-16Ɔwɔicō í da Ɛláyíja kóō nyɔ̄ í gbɔga ɔlɛ́ ɔnyōkwū ɔhá dúúmā gwū ɔnyōkwū kú Usárefāti, ipú ajɛ kú Usídɔn ā tá ŋ́. 27#2 Aɔ́cɛ́ 5.1-14Aólagwú alɛwa bá ajɛ kú Ísrɛ̄lu eko kú Ɛláyíssa, ɔ̄comɛ́ɛbɛ ā. Nááná Ɛláyíssa í hɛ́ odúúmā kú uwā tá ŋ́, ń táafú ŋ́ Unéman ōfōōfūnū. 28Eko nɛ̄ ācɛ nēe bá ɛgogbɔ̄ɔkɔ ā lɛ ɛnyā pó ā, é le cɔ̄nū nɛ̄hi. 29Anɔ́ɔ é cāŋjɛ lɛ Ujísɔ̄si kwu tɛ́ɛcɛ ŋmá ipú igelī kú ɔlɛ́ uwā á. É lɛ ɔ́ bī ga á ogenegene kú ɛyí ɛfu nēé gwó igelī kú ɔlɛ́ uwā ce ā, cɛ́ɛ́ kéē le ɔ́ pīyɔcíkōtō gaajɛ. 30Amáŋ ó le bū ipú ɛwa nyɛ̄ɛ̄ le tá ɛga ɔhá.

Ujísɔ̄si le alelékwū obɔ̄bí nū tɛ́ɛcɛ ŋmá iyē kú ɔ̄cɛ éyi

31Anɔ́ɔ Ujísɔ̄si le tá Ukápānɔm, igelī nɛ̄ŋ́cɛ́ éyi kú Ugálīli gaá le ɛlɔ̄ɔwɔicō nwū ācɛ ā ɛ̄cī usábāti. 32#Umát 7.28,29Odúúdú uwā le kpó hídáagó ɔwɛ nōó bī íkwu le nwū ɛlɔ̄ɔwɔicō ā. 33Ɔnyīlɔ éyi yɔ̄ ipú ɛgogbɔ̄ɔkɔ ā nōo lɛ alelékwū obɔ̄bí. Ó dɛ̄gba tɛ́ɛcɛ gbōmgbōm kahíníī, 34“Ujísɔ̄si, ɔ̄cɛ Unásārēti, habɔ̄ alɔ tá cíí, ɔdí nɛ̄ a tíne ō yá alɔ ā gɛ? A wā amānyā gaá kpó alɔ yíífi nɛɛ? N jé ɔ̄cɛ nɛ̄ a wɛ ā. Awɔ wɛ Ɔ̄cɛ ōtīihɔ kú Ɔwɔicō á. 35Ujísɔ̄si lɛ ɛgba dɛ̄ tū alelékwū ā kahíníī, “Yɔ̄ cíí, ká ā le bɛ̄cɛ ŋmá ipú iyē kú ɔnyīlɔ ā!” Alelékwū obɔ̄bí ā lɛ ɔnyīlɔ ā tá fīyajɛ iyɔ̄bū uwā, anɔ́ɔ ó le bɛ̄cɛ ŋmá ipú nū á, amáŋ ó klla yá ɔ̄ ɔdā dúúmā gɛ ŋ́. 36Ācɛ ā le kpó hídáagó, anɔ́ɔ é gbɔɔ́ ō da iyí uwā kahíníī, “Ɛlā okónu kú nū lɔfú klla lɛ íkwu nɛ̄hi. Ɔ́nyīlɔ nyā bī ikwu mɛ́mla ɔfú í le dɛ̄gba tū aálelékwū obɔ̄bí, é kē ī bɛ̄cɛ!” 37Anɔ́ɔ ɔ̄kā kú ɔdā nōó yá nyā le tá ɛga dóódu kú ajɛ ā ā.

Ujísɔ̄si le ācɛ alɛwa hɛ́tá

38Ujísɔ̄si nyɛ̄ɛ̄ ŋmá ɛgogbɔ̄ɔkɔ ā anɔ́ɔ ó le tá ɔlɛ́ Usáyímɔ̄n á. Áganá yɔ̄ ī yá ɛ́nɛ́ ɔnyā Usáyímɔ̄n, anɔ́ɔ é le ɔkɔ gbā lɛ ɔ́ kóō lɛ ɔ́ hɛ́tá. 39Ó gaá háyi pī agōdō kú nū, anɔ́ɔ ó lɛ ɛgba dɛ̄ tū áganá ā, anɔ́ɔ áganá ā habɔ̄ ɔ̄ tá á. Ó cāŋjɛ ikpíikpo ɔ́ɔmā anɔ́ɔ ó gbɔɔ́ ō kpó ɔdōlé lɛ uwá lé á.

40Eko nɛ̄ ɛnɔ gbɔɔ́ ō gaajɛ ā, ācɛ nēe lɛ ācɛ nēe lɛ ɛdɔ ōcē ɛyɛ́ɛyɛ́yí ā, le uwá kpó wā ɛgiyí Ujísɔ̄si. Anɔ́ɔ ó lɛ abɔ̄ ce ɛjɛ̄ɛ̄jī uwā, lɛ uwá kpó hɛ́tá á. 41Aálelékwū obɔ̄bí bɛ̄cɛ ŋmá iyē kú ācɛ alɛwa dúú. É bá gē dɛ̄gba kahíníī, “Awɔ wɛ Ɔyínɔ̄nyīlɔ kú Ɔwɔicō á!” Ujísɔ̄si lɛ ɔ́da je kéē híīī kɛlā ŋ́, ohígbū kéē le jé ka anú wɛ Ohɔ́nyɛtá ā á.

Ujísɔ̄si tɔ́ɔna kú ɛlɔ̄ɔwɔicō ipú ɛgogbɔ̄ɔkɔ.

42Ɔcɔ̄ɔ̄cī blibli ó nyɛ̄ɛ̄ ŋmá igelī ā anɔ́ɔ ó le yɛ tá ipú ígbíli á. Ācɛ alɛwa gbɔɔ́ ō tíne nū, eko nēé lɛ ɔ́ má ā, é le ɔkɔ gbā lɛ ɔ́ kóō híīī nyɛ̄ɛ̄ ŋmá ɛgiyí uwā ŋ́. 43Amáŋ ó da uwá kahíníī, “N géē nyɔ̄ gaá tɔ́ɔna kú ɔ̄kōolɔhi ohígbū ajɔ̄ɔ̄cɛ́ kú Ɔwɔicō ipú aígelī ɔhá dúú, ohígbū ɔ́ɔmā nɛ̄ Ɔwɔicō tū um ɛhɔ̄ wā á.” 44Anɔ́ɔ ó le yɛ gaá tɔ́ɔna kú ɔ̄kōolɔhi ā ipú aɛ́gogbɔ̄ɔkɔ nēe bá ɛga ɛyɛ́ɛyɛ́yí kú ajɛ ā á.

Currently Selected:

ULÚKU 4: IFBCL

Highlight

Copy