ULÚKU 15

Álá nōo bī ā

(Umát 18.12-14)

1 # Ulúk 5.29,30 Ɛ̄cī éyi lé ka ɛ̄cī éyi eko nɛ̄ aódɔlɛ́ alɛwa mɛ́mla ācobīyíne ā wā kéē pó ɛlā kú Ujísɔ̄si ā, 2Ācɛ Ufárisīi mɛ́mla aútíca kú íne gbɔɔ́ ō ka iŋini kahíníī, “Ɔ̄cɛ ā géē mīyɛ ācobīyíne bɔ́tū, klla kōō ī lé ɔdōlé mɛ́mla uwá dúú!”

3Anɔ́ɔ Ujísɔ̄si le ita nyā kwu lɛ uwá á. 4Ó kahíníī, “Ɔ̄cɛ í jé ŋ́ nɛ̄ ɔ̄cɛ éyi ká aá lɛ aálá ofɛhɔ̄, anɔ́ɔ éyi kú uwā le lé gebí á. Ɔdí nɛ̄ ɔ̄cɛ ɔ́ɔmā í yá ā? Ó í habɔ̄ aálá ofɛnɛ cigwáahāanɛ ohile ā bá ipácí, cɛ́ɛ́ ó géē nyɔ̄ gaá gbɔɔ́ ō dɔɔ̄kā ékpó nōo bí ā jāā gbéeko nōó lɛ ɔ́ pīyɛ̄. 5Eko nōó lɛ ɔ́ pīyɛ ā, ó kwú ɔ̄ ú klá ɔkɔ, 6cɛ́ɛ́ ó kwú ú bī wā í tá ipú aɔ́mpānū ā. Cɛ́ɛ́ ó le tá ɔlɛ́ gaá lɛ aóklóbīya nū mɛ́mla aóladógbe kú nū hīgwú tɔ̄há. Cɛ́ɛ́ ó da uwá kahíníī, “Ɔtū he um nɛ̄hi, n le álá kú um nōo bī ā pīyɛ̄. Aá gwéeyē mla um! 7Ɔwɛ ékpó ɔ́ɔmā, n̄ da aá ka é géē gwéeyē nɛ̄hi ɔkpáncō ohígbū ɔ̄cobīyíne ékpó nōo le pīyabɔ̄ fíyɛ́ ācɛ olɔhi ofɛnɛ cigwáahāanɛ nēé cɛgbá ō pīyabɔ̄ gɛ ŋ́ mā ā.

Éeyē nēé gwó ohígbū īkpīije nōo héyī bī nēe le pīyɛ̄ ā

8Amáŋ ɔ̄cɛ í jé ŋ́ ɔnyā éyi nōo lɛ īkpīije nɛ̄hɛ́ igwó, anɔ́ɔ ékpónú gebí ɔdí nōó í yá ā? Ó í hɛ́ ɔlá kwu agege, lɛ inu ɔlɛ́ nū gwu wɛ̄ɛcɛ. Ó í dɔɔ̄kā nū lɔɔlɔhi ɛga dóódu jāā gbéeko nōó lɛ ɔ́ pīyɛ̄. 9Eko nōó le ɔ́ pīyɛ̄ ā, ó le áncɛ́nyā nū mɛ́mla aóladógbe kú nū kpó hīgwú tɔ̄hā, cɛ́ɛ́ ó da uwá kahíníī, “Ɔtū he um ícɛ nɛ̄hi ohígbū ka īkpīije kú um nōo bī ā, n le ɔ́ pīyɛ̄ ɛɛ́. Aá gwéeyē mla um!” 10Ɔwe ékpónú ɔ́ɔmā, n da aá, ka aálelékwū-ōtɛ̄hɔ̄ kú Ɔwɔicō gē gwéeyē ohígbū ɔ̄cobīyíne ékpó nōo le pīyabɔ̄.”

Ɔyínɔ̄nyīlɔ nōo bī ā

11Ujísɔ̄si klla kɛlā gɔbū kahíníī, “Ó le ɔnyīlɔ éyi yɔ̄ nōo lɛ ayínɔ̄nyīlɔ ɛpa. 12Ɛnɛ̄ŋcɛ́ ā da ɔ́ kahíníī, ‘Ádā um, lɛ ukpɛ̄ kú um kú agbénú kú uwɔ je ga um abālɔbányā ā.’ Anɔ́ɔ ɔnyīlɔ ā le agbénú kú nū kɔ̄ lɛ ayí nū nɔ̄nyīlɔ ɛplɛ́ɛpa ā. 13Ó gbo ɛ̄cī alɛwa ŋ́, ɔyí nɛŋcɛ́ ā kwú ukpɛ̄ kú agbénú kú nū ú kpó lá, anɔ́ɔ ó kwú ije ā ú nyɛ̄ɛ̄ ŋmá ɔlɛ́ á. Ó le tá ɔlɛ́ ɛga oligbó nɛ̄hi, ɛga nōó kwú ije ā í ŋmó bónū oŋmá lɛ o lā oyēeyī oŋmó ije bónū icííci. 14Ó le ɛjɛ̄ɛ̄jī ɔdā nōó lɛ ā ŋmó bónū. Anɔ́ɔ ɔkpɛtā nɛ̄hi gbɔɔ́ ō ŋmó ajɛ ɔ́ɔmā á. Ó kē lɛ ɔdā dúúmā nōó í lé gɛ ŋ́. 15Anɔ́ɔ ó nyɔ̄ í kwú iyī nū í tá olufa lɛ ɔ̄cɛ ajɛ kú abɔ́ɔ éyi á. Ɔ̄cɛ ā kwú ɔ̄ ú tū ga ɛhɔ̄ ɔlɛ́ nū kóō gē je ɔdōlé lɛ aókóome. 16Eyī yɔ̄ kóō lɛ ɔdōlé kú aókóome ā lé nū ipú, amáŋ ó kōō má ɔ̄cɛ dóódu je ɔdā dúúmā lɛ ɔ́ lé ŋ́. 17Eko nɛ̄ eyī gbo ɔ́ gɔɔ ā, ó kahíníī, “Odúúdú ācocɛ̄hɔ̄ olufa kú ɔlɛ́ ádā um gē lé ɔdōlé gē nū ipú klla gē tá. Anɔ́ɔ n yɔ̄ amānyā nɛ̄ ɔkpɛtā gáā je ŋmó yɔ̄ɔ̄! 18N géē nyāŋjɛ kú n̄ ga ɛgiyí ádā um, kú um gaá da ɔ́ kahíníī, “Adá um, n le íne kú Ɔwɔicō mɛ́mla ákú uwɔ bīya ɛɛ́. 19Ń cíkā nēé gē hī um ka ɔyínɔ̄nyīlɔ kú awɔ gɛ ŋ́. Kwú um bɛ̄ɛka éyi kú ācɛ nēe gē yúklɔ́ ga awɔ ā. 20Anɔ́ɔ ó nyāŋjɛ gbɔɔ́ ō kwúcē gā ɔlɛ́ ádā nū. Ó yɔ̄ ɛga oligbó ŋmá ɔlɛ́ ɛ́ɛ́ nɛ̄ ádā nū má ɔ̄ á. Ó le tū ɔ̄ eyīnyinyi, anɔ́ɔ ó le inya kwu nyɔ̄ gaá lɛ ɔ́ kwú bá ɔtū lɔɔlɔhi á. 21Ɔyí ā da ɔ́ kahíníī, ‘N le íne kú Ɔwɔicō mɛ́mla ákú uwɔ bīya. Ń cíkā kéē hī um ka ɔyí uwɔ gɛ ŋ́.’ 22Amáŋ ádā nū da ācocɛ̄hɔ̄ kú nū kahíníī, “Aá pápá lɛ awulú nōo lɔhi fíyɛ́ kpɛ́mm ā kpó wā í wu ɔ́ iyē. Aá kwú eliká ú wu ɔ́ abɔ̄, aá kwú áblákpá ú wu ɔ́ ikpó. 23Cɛ́ɛ́ aá nyɔ̄ í kwú ɛna ojɔ̄kwū ú kú aá lɛ ɔ́ ŋmó. Cɛ́ɛ́ kú alɔ gwéeyē kú alɔ lé ucɛ! 24Ohígbū ka ɔyí um nyā gekwú, ó kē kwú héyī abālɔbányā ɛɛ́. Ó gebí, é kē lɛ ɔ́ pīyɛ̄ ɛɛ́! Anɔ́ɔ é gbɔɔ́ ō gwéeyē gbɔɔ́ ō lé ucɛ á.

25“Ɔyí ádā nɔ̄nyīlɔ ɔnyākwɔ́cɛ ā yɔ̄ ɛhɔ̄ kpɔ́. Abɔ̄ ó yɔ̄ ī wā ɔlɛ́ ā, eko nōó le bá lɛ ɔlɛ́ ā, ó pó bā ācɛ bá ī gwíijē klla bá í jīije. 26Anɔ́ɔ ó lɛ éyi kú ācocɛ̄hɔ̄ kú ádā nū ā hīgwú le ɔ̄kā da ɔ́ kahíníī, ‘Ɔdí yɔ̄ í yá ā mɛ́ɛ̄.’ 27Ɔ̄cotɛ̄hɔ̄ ā da ɔ́ kahíníī, ‘Ɔyínɛ́ uwɔ nɔ̄nyīlɔ ā kwúcē wā ɔlɛ́ ɛɛ́. Ádā uwɔ kē lɛ ɛna ojɔ̄kwū ā ŋmó ɛɛ́, ohígbū ka ɔyí nū nɔ̄nyīlɔ kwúcē wā ɔlɛ́ ɛbɔ́.’ 28Ɔyínɛ́ nū ɔnyākwɔ́cɛ́ ā le cɔ̄nū nɛ̄hi ka anúɔ í gáā bēhé wā ɔlɛ́ ŋ́. Anɔ́ɔ ádā nū le bɛ̄cɛ gaá le ɔkɔ gbā lɛ ɔ́ kóō le bēhé wā ɔlɛ́ á. 29Amáŋ ó tá ádā nū ohi kahíníī, ‘Mɔ́ɔ̄, n húmáyī yúklɔ́ gā uwɔ bɛ̄ɛka ɔfiyɛ ā iháyí alɛwa. Ń kē yíkpɛ̄yí olɔfú tū uwɔ jéjéē ɛ́ɛ́ ŋ́. Á kē je ɔyí ɛwū ékpó gā um kú ami mɛ́mla aóklóbīya um ka alɔ báajɛ gwéeyē lé ucɛ jéjéē ɛ́ɛ́ ŋ́. 30Amáŋ ɔyí uwɔ nyā nōo kwú ɛjɛ̄ɛ̄jī ije kú uwɔ í ŋmó tū aákwuna ā, eko nōó kwúcē ga ɔlɛ́ ā, ā lɛ ɛna ojɔ̄kwū ŋmó lɛ ɔ́. 31Ádā nū tá ɔ̄ ohi kahíníī, “Ɔyí um, a yɔ̄ mla um eko dóódu, ɔdā dóódu nōo wɛ ákú um ā kē wɛ ákú uwɔ. 32Amáŋ ó cíkā kú ālɔ̄ gwéeyē, kú ɔtū kóō wɛ ɛnɛ̄hɛ́ lɛ alɔ ohígbū ka ɔyínɛ́ uwɔ nyā gekwú, abālɔbányā ó kē kwú héyī. Ó gebí, é kē lɛ ɔ́ pīyɛ̄.”

Currently Selected:

ULÚKU 15: IFBCL

Highlight

Copy