UJƆ́NI 5

Ɔ̄cɛ ocīkpó nōo yɔ̄ ókpoó kú Ubɛtisáta

1Igbīhi ɛ̄nyā, Ujísɔ̄si le tá Ujerúsālɛm ɔnū ucɛ kú ācɛ Ujíyu. 2Ipú Ujerúsālɛm ā, éŋkpɔ̄ ókpoó#pi okónu kú álá ókpoó, pi ókpoó kú aálá ɛga éyi éyi tá okómpinu ɔwɛ kú álá, nēé hī okónu Uhíbru ka “Ubɛtisáta.” #Ubɛtsáta: aɔ́kpá ōhī tá ka Ubɛtsayída Ó lɛ okómpīinu ɛhɔ̄. 3Ipú okómpīinu nēe bá ā ācɛ odoōcē bá, ācɛ opeyī, ācɛ ocīkpó, mɛ́mla ācɛ nɛ̄ iyē kú uwā le ŋmó. É bá gē gbēyī eko nɛ̄ éŋkpɔ̄ ā géē jíliyē ā. 4Ohígbū ka alelékwū-ōtɛ̄hɔ̄ kú Óndú ā gē wā ajɛ eko ōhī gaá jíla éŋkpɔ̄ ā iyē. Ɔ̄cɛ dúúmā nōo le tá ipú éŋkpɔ̄ ā aflɛ́yí eko nēé lɛ ɔ́ jíliyē, ó lɛ nyatá ŋmá ōcē dúúmā nōó lɛ ā. 5Amáŋ ɔ̄cɛ éyi yɔ̄ abɔ́ɔ, nōo doōcē iháyí ofu cigwáhātá. 6Eko nɛ̄ Ujísɔ̄si le ɔ́ má, nɛ̄ ó le jé ka ɔ́ɔ doōcē gbojī ɛɛ́ mā ā, ó da ɔ́ kahíníī “A tíne kéē lɛ uwɔ nyatá āā?” 7Ɔ̄cɛ odoōcē ā tóohi kahíníī, “Óndú, ń lɛ ɔ̄cɛ dúú nōo géē je um tá ipú ókpoó ā eko nēé lɛ ɔ́ jīliyē ŋ́. Eko nɛ̄ n gbɔɔ́ gē nyɔ̄, ɔ̄cɛ ɔhá le gbɔbū gā um le tá ipú éŋkpɔ̄ ā.” 8Ujísɔ̄si da ɔ́ kahíníī, “Cāŋjɛ, kwú ipoto kú uwɔ ú ká ā yāwu.” 9Anɔ́ɔɔ ɔkwɔɔkwu ɔ́mā ōcē kú nū mɛ. Anɔ́ɔ ó kwu ipoto kú nū ú gbɔɔ́ ō yāwu á.

Amáŋ ɛ̄cī ɔ́ɔmā wɛ ɛ̄cī usábāti #fr 5.9 usábāti, ɛ̄cī nɛ̄ ācɛ Ujíyu í gē yúklɔ́ ŋ́ mā. 10#Uneh 13.19; Ujer 17.21Eko nɛ̄ aótrɛ̄yí kú ācɛ Ujíyu le ɔ̄cɛ ā má bī ipoto kú nū ā, é da ɔ́ kahíníī, “Ícɛ wɛ ɛ̄cī usábāti, ó kē wɛ íne ō bīya ká ā bī ipoto kú uwɔ.” 11Amáŋ ó da uwá kahíníī, “Ɔ̄cɛ nōo nya um tá ā da um ka āmí ɔ̄ɔ́ kwú ipoto kú um ká n̄ yāwu.” 12É da ɔ́ ɔ̄kā kahíníī, “Ɔ̄nyɛ wɛ ɔ̄cɛ nōo da uwɔ kā a kwú ipoto kú uwɔ ú ká ā yāwu ā?” 13Amáŋ ɔ̄cɛ nēé nyatá ā í jé ɔ̄cɛ nōó wɛ ā ŋ́, ohígbū ka ɛwa nɛ̄hi bá abɔ́ɔ, Ujísɔ̄si kē le púla wɛɛlɛ nyɛ̄ɛ̄ ŋmá abɔ́ɔ. 14Igbīhi ɛ̄nyā Ujísɔ̄si lɛ ɔ́ má ipú Agblīihɔ-nɛ̄hi ā, anɔ́ɔ ó da ɔ́ kahíníī, “Má ɔ̄, a le lɔfú iyē ɛɛ́. Ā bīyíne gɛ nóo, ohígbū nɛ̄ ɔdōbɔ̄bí fíyɛ́ géē yá uwɔ.” 15Ɔ̄cɛ ɔ́ɔmā nyɛ̄ɛ̄ gaá da ācɛ Ujíyu ka Ujísɔ̄si ɔ́ɔ wɛ ɔ̄cɛ nɛ̄ ɔ́ɔ yá ká iyē kóō lɔfú lɛ anúɔ á. 16Ohígbū ɛ̄nyā ācɛ Ujíyu gbɔɔ́ ō yá ikpɛ́lā tá Ujísɔ̄si, ohígbū koó nya ɔ̄cɛ tá ɛ̄cī usábāti. 17Ujísɔ̄si da uwá kahíníī, “Ádā um gē yúklɔ́ ojigógó, ɛ́gɔ́ɔmā nɛ̄ n kē í yá á.” 18Ɛlā nɛ̄ ó ka nyā yá kú ācɛ Ujíyu kéē tíne fíyɛ́ kéē lɛ ɔ́ ŋmó. Ohígbū keé ka ó wɛ íne kú usábāti ōfūnū nɔ́ɔ bīya ā ŋ́, amáŋ ó kla hī Ɔwɔicō ka ádā nū. O ŋmá ɛ̄nyā ɔ́ɔ gē je iyī nū jōnjīlɛ̄ mla Ɔwɔicō.

Íkwu kú Ujísɔ̄si ŋmá ɛgiyí Ádā nū

19Ujísɔ̄si tóohi da uwá kahíníī, “Ɔkwɔ̄ɔ̄kwɛ̄yi, n̄ da aá ka, Ɔyínɔ̄nyīlɔ ā í yá ɔdā dúúmā abɔ̄yīnū glá ŋ́, ayíka ɛ̄nɛ̄ ó má Ádā nū gē yá ā nɛ̄. Ohígbū ka ɔdā dóódu nōó yá ā, Ɔyínɔ̄nyīlɔ ā géē yá ɔ̄ glá dúú. 20Ohígbū ka Ɔyínɔ̄nyīlɔ ā he Ádā nū ɔtū, anɔ́ɔ Ádā le ɔdā dóódu nɛ̄ ó yɔ̄ ī yá abɔ̄yīnū kpɛ́mm ā kpó mafú lɛ ɔ́. Ó klla géē ma úklɔ́ nōo fíyɛ́ ɛ̄nɛ̄ e bá ā fú lɛ ɔ́, kóō hɛ́ aá idáagó. 21Ɛ́gɛ́nɛ̄ Ádā ā yá kú ācɛ ogekwú kéē le héyī nɛ̄ ó klla í je oyēeyī lɛ uwá ā, ɛ́gɔ́ɔmā nɛ̄ Ɔyínɔ̄nyīlɔ ā géē je oyēeyī lɛ ācɛ nēe he ɔ́ ɔtū á. 22Ohígbū ka Ádā ā í kɛpɔ̄ tū ɔ̄cɛ dúúmā ŋ́, amáŋ ó kwú ɛpɔ̄ dóódu ú kpó tū Ɔyínɔ̄nyīlɔ ā abɔ̄, 23cɛ́ɛ́ ká ācɛ dóódu kéē lɛ ojīlīmā ce Ɔyínɔ̄nyīlɔ ā, ɛ́gɛ́nɛ̄ é lɛ ojīlīmā ce Ádā ā. Ɔ̄cɛ nōó lɛ ojīlīmā ce Ɔyínɔ̄nyīlɔ ā ŋ́, ayíka ó ī lɛ ojīlīmā ce Ádā nōo tū ɔ̄ ɛhɔ̄ ā ŋ́. 24Ujísɔ̄si kahíníī, “Ɔkwɔ̄ɔ̄kwɛ̄yi, ɔ̄cɛ nōo cɛ̄ɛ̄lā kú um, nōo kē lɔtūce ɔ̄cɛ nōo tū um ɛhɔ̄ ā, lɛ oyēeyī opiyóo. É gáā ŋmó ɔ̄ ɛpɔ̄bī ŋ́, amáŋ ó le gla ikwū le tá ipú oyēeyī ɛɛ́.”

25Ó klla ka kpɔ́ kahíníī, “Ɔkwɔ̄ɔ̄kwɛ̄yi, n̄ da aá ka, eko géē wā, eko ā kōō gā ɛɛ́, eko nɛ̄ ācɛ ogekwú géē pó ɔkɔ kú Ɔyínɔ̄nyīlɔ kú Ɔwɔicō ā, ācɛ nēe kē pó ā géē yēeyī. 26Ohígbū ka ɛ́gɛ́nɛ̄ Ádā ā lɛ oyēeyī abɔ̄yī nū ā, ɛ́gɔ́ɔmā nōo je oyēeyī lɛ Ɔyínɔ̄nyīlɔ kú nū á, kóō lɛ oyēeyī abɔ̄yī nū á. 27Anɔ́ɔ ó le ɔfú je lɛ ɔ́ kóō hɛ́pɔ̄, ohígbū kóō wɛ Ɔyínɔ̄nyīlɔ kú Ɔ̄cɛ. 28Ɛ̄nyā kóō híī hɛ́ aá idáagó ŋ́. Ohígbū ka eko géē wā, eko nɛ̄ ācɛ dóódu nēe bá únóji ā géē pó ɔkɔ kú nū. 29#Udan 12.2É kē géē pɛ́ wɛ̄ɛcɛ ŋmá únóji kú uwā. Ācɛ nēe yá ɔdā olɔhi ā géē héyī ŋmá ɔlékwū cɛ́ɛ́ kéē yēeyī. Ācɛ nēe kē yá ɔdōbɔ̄bí ā géē héyī ŋmá ɔlékwū kéē ŋmó uwā ɛpɔ̄bí.”

Ijáalí nɛ̄ Ujísɔ̄si cɛ̄ ā

30Ujísɔ̄si kahíníī, “Ń lɔfú yá ɔdā dúú ŋmá ɔfú kú abɔ̄yī um ŋ́. N gē hɛ́pɔ̄ ɛ́gɛ́nɛ̄ Ɔwɔicō da um lɛ ā. Ó lɛ ā ɛpɔ̄ kú um kē wɛ ɔkwɛ̄yi, ohígbū ka ń gē dɔɔ̄kā ɔdā nōo tá ɔtū kú um ŋ́, amáŋ ɔdā nōo tá ɔtū kú ɔ̄cɛ nōo tū um ɛhɔ̄ ā. 31Ɔ́dāŋ́ ka n cījáalí kú iyī um, ijáalí ɔ́ɔmā í wɛ ɔkwɛ̄yi ŋ́. 32Amáŋ ɔ̄cɛ éyi yɔ̄, nōo gē cījáalí kú um. N jé ka ɛjɛ̄ɛ̄jī ɔdā nōó ka ohígbū um ā wɛ ɔkwɛ̄yi. 33#Ujɔ́n 1.19-27; 3.27-30Aá tū ācɛ ɛhɔ̄ fu Ujɔ́ni, ó kē kɛlā ɔkwɛ̄yi lɛ uwá. 34Ń mīyɛ ijáalí okwɛ̄yi lɛyíkwu um ŋmá ɛgiyí ɔ̄cɛ ŋ́, amáŋ n ka ɔdā nēe bá ā kéē lɛ aá nyatá nɛ̄ n. 35Ujɔ́ni lɛbɛ̄ɛka agege nōo gē yi klla gē fíyaajɛ lɔɔlɔhi eko kpiíí ā. Ó tīile lɛ aá ɔtū kē he aá. 36Amáŋ n lɛ ijáalí kú abɔ̄yī um nōo fíyɛ́ ákú Ujɔ́ni, ohígbū ka úklɔ́ nɛ̄ Ádā um je gā um ká n̄ lɛ ɔ́ yá mɛ̄ ā, úklɔ́ ā nɛ̄ n kē yɔ̄ gē yá abālɔbányā á, úklɔ́ ā gē cē um ijáalí ka Ádā um ɔ́ɔ tū um ɛhɔ̄ á. 37#Umát 3.17; Umák 1.11; Ulúk 3.22Ádā um nōo kē tū um ɛhɔ̄ ā, anú abɔ̄yī nū cījáalí kú um á. Aá pó ɔkɔ kú nū jéjéē ɛ́ɛ́ ŋ́, ɛ́ɛ́ nɛ̄ aá ī má ōgbla kú nū ɛ́ɛ́ ŋ́. 38Anɔ́ɔ ɛlā kú nū í yɔ̄ mla aá ŋ́, ohígbū ka aá cɛ̄ ɛlā kú ɔ̄cɛ nɛ̄ anú ā abɔ̄yī nū tɛ̄hɔ̄ ā ŋ́. 39Aá gē kllɔcɛ́ ɔdā kú ipú ɛlɔ̄ɔwɔicō, ohígbū ka aá gbɛlá ka aá géē lɛ oyēeyī opiyóo ŋmá ipú uwā. Amáŋ ɛlɔ̄ɔwɔicō abɔ̄yī nū kē ī cījáalí gā um. 40Aá kē cɛ̄ wā ɛgiyí um ká n̄ je oyēeyī opiyóó nyā lɛ aá ŋ́. 41Ń tíne ká ācɛ kéē cɛ̄tra um ŋ́. 42Amáŋ n jé aá, n kē jé ka aá yíihɔtū tá Ɔwɔicō ŋ́. 43Ami ā wā kwɛyí Ádā um, amáŋ aá mīyɛ um ŋ́. Amáŋ ɔ́dāŋ ka ɔ̄cɛ ɔhá gā ŋmá iyē kú abɔ̄yī nū, aá géē mīyɛ anú. 44Ɛ́gɛ́nyā nɛ̄ aá gē cɛ̄ glá ā, aá nōo ī cɛ̄tra iyí aá ā, amáŋ aá gē tíne kú ɔ̄cɛ nōo wɛ Ɔwɔicō ōfōōfūnū ā kóō cɛ̄tra aá ŋ́. 45Aá híī gbɛlá ka n géē kpɛ́lā ce aá iyɔ̄bū Ádā ā ŋ́. Ɔ̄cɛ éyi yɔ̄ nōo géē kpɛ́lā ce aá, Umósīsi nɛ̄ aá lɛ ɔtūce ɔ́ ā. 46Ɔ́dāŋ́ ka aá cɛ̄ɛ̄lā kú Umósīsi nɛɛ, aá géē cɛ̄ɛ̄lā kú um dúú, ohígbū kóō tá ɔkpá lɛyíkwu um. 47Amáŋ ɔ́dāŋ ka aá cɛ̄ɛ̄lā kú ɔdā nōó tá ā ŋ́, ɛ́gɛ́nyā nɛ̄ aá géē cɛ̄ɛ̄lā kú um glá ā?”

Currently Selected:

UJƆ́NI 5: IFBCL

Highlight

Copy