UJƆ́NI 11

Ujísɔ̄si le Ulásārɔ̄si héyī ŋmá ɔlékwū

1 # Ulúk 10.38,39 Ɔ̄cɛ éyi lé ka Ulásārɔ̄si, ó lā ɔlɛ́ éyi nēé hī ka Ubɛ́tāni. Ɔ́ɔmā wɛ ɔlɛ́ kú Umerí mɛ́mla ɔyínɛ́ nū nɔ̄nyā Umáta dúú á. Ɛ̄cī éyi Ulásārɔ̄si gbɔɔ́ ō doōcē. 2#Ujɔ́n 12.3 Umerí nyā wɛ ɔ̄cɛ nōo lɛ anɔ̄ nya Óndú ā iyē, klla nya ikpó kú Óndú ā mla īnyīlɛ̄yí kú nū á. Anú nɛ̄ ɔyínɛ́ nū nɔ̄nyīlɔ, Ulásārɔ̄si, yɔ̄ gē doōcē á. 3Ayínɛ́ nū nɔ̄nyā le ɛ̄hɔ̄ tū fu Ujísɔ̄si kahíníī, “Óndú, má ɔ̄, oklóbīya uwɔ yɔ̄ ī doōcē.” 4Eko nɛ̄ Ujísɔ̄si le pó ā, ó kahíníī, “Ōcē nyā í gáā ŋmó Ulásārɔ̄si ŋ́, ɛ̄nyā le yá cɛ́ɛ́ kú ācɛ kéē cɛ̄tra Ɔwɔicō. Ó klla í wɛ ɔwɛ nɛ̄ ācɛ géē bī le cɛ̄tra Ɔyínɔ̄nyīlɔ kú Ɔwɔicō.”

5Umáta mɛ́mla ɔyínɛ́ nū nɔ̄nyā mɛ́mla Ulásārɔ̄si he Ujísɔ̄si ɔtū nɛ̄hi. 6Eko nɛ̄ ó le pó ka ɔ́ɔ gē doōcē ā, ó yɔ̄ ɛga nɛ̄ ó klá ā kpó, jāā ɛ̄cī ɛpa. 7Anɔ́ɔ, ó da ayíkpó kú nū kahíníī, “Ālɔ̄ kwúcē ga Ujudíya kpɔ́.” 8Anɔ́ɔ ayíkpó kú nū da ɔ́ kahíníī, “Itíca, ācɛ Ujíyu tíne kéē tá ɛcɔ̄ klá uwɔ eko kpiíí nōo yɛ ā, a klla tíne ká ā nyɔ̄ abɔ́ɔ igbɔhá kpɔ́ ɔ̄ɔ̄?” 9Anɔ́ɔ Ujísɔ̄si tóohi kahíníī, “Áwa igwɛ́ɛpa ī yɔ̄ ipú ɛ̄cī éyi ŋ́ nɛɛ? Ɔ́dāŋ́ ka ɔ̄cɛ gē yāwu ɔlɛ́ɛnɔ, ó gáā gwōnū ŋ́, ohígbū ka ó gē mɛ́ɛbɛ kú ɛcɛ nyā. 10Ɔ́dāŋ́ ka ɔ̄cɛ gē yāwu ipú obū otú, ó géē gwōnū, ohígbū ka ɔlá-fíyajɛ í yɔ̄ mla anú ŋ́.” 11Ó le ɛ̄nyā ka, anɔ́ɔ ó klla da uwá eko kpií kpɔ́ kahíníī, “Oklóbīya alɔ Ulásārɔ̄si yɔ̄ ī gbɔlā, amáŋ n géē nyɔ̄ gáā lɛ ɔ́ héyī.” 12Anɔ́ɔ ayíkpó kú nū da ɔ́ kahíníī, “Óndú, ɔ́dāŋ ka ó yɔ̄ ī gbɔlā, ó géē héyī kpɔ́ ɛ́ɛ́.” 13Ɛyí ɛlā kú Ujísɔ̄si ā wɛ ka Ulásārɔ̄si gekwú, amáŋ ayíkpó kú nū gbɛlá ka ɔ́ɔ kɛlā lɛyíkwu omlɛ́nyɔ́ ipú iyɔ̄la ōgbo. 14Anɔ́ɔ Ujísɔ̄si le da uwá pélúú kahíníī, “Ulásārɔ̄si gekwú ɛɛ́. 15Ɔtū he um nɛ̄hi, ohígbū ka ń yɔ̄ abɔ́ɔ ŋ́, o yá cɛ́ɛ́ ká aá cɛ̄ɛ̄lā kú um. Ālɔ̄ nyɔ̄ ɛgiyí nū.” 16Anɔ́ɔ Utɔ́mɔ̄si, nēé hī ka Áplɛ́ ā da ayíkpó ɔ́mpa nū kahíníī, “Ālɔ̄ nyɔ̄ dúú ká ālɔ̄ kwú mla anú.”

17Eko nɛ̄ Ujísɔ̄si gā ā, ó le jé ka é kwú ɔ̄ nyi ipú únóji ɛ̄cī ɛnɛ ɛɛ́. 18Ubɛ́tāni yɔ̄ kwu Ujerúsālɛm ajaajɛ. Ó lɛbɛ̄ɛka ukilómīta ɛtá ā. 19Ācɛ Ujíyu alɛwa wā gaá tū Umáta mɛ́mla Umerí ɔtūlé ohígbū ɔyínɛ́ uwā nɔ̄nyīlɔ nōo kwú ā. 20Abɔ̄ Umáta le pó ka Ujísɔ̄si yɔ̄ ī wā, ó le tɛ́ɛcɛ gaá jīla anú ɔwɛ. Amáŋ Umerí yɔ̄ ɔlɛ́. 21Anɔ́ɔ Umáta da Ujísɔ̄si kahíníī, “Óndú, ɔ́dāŋ ka a yɔ̄ amānyā nɛɛ, ɔyínɛ́ um nɔ̄nyīlɔ ā í yɛ í kwú ŋ́. 22Amáŋ abālɔbányā n jé ka ɔdā dúúmā nāa dɔɔ̄kā ŋmá ɛgiyí Ɔwɔicō, ó gē je ɔ́ gā uwɔ.” 23Ujísɔ̄si da ɔ́ kahíníī, “Ɔyínɛ́ uwɔ géē héyī.” 24Umáta da ɔ́ kahíníī, “N jé kóō géē héyī ŋmá ɔlékwū ɛ̄cī ámōōmɛ ā.” 25Ujísɔ̄si da ɔ́ kahíníī, “Ami gē je ācɛ héyī ŋmá ɔlékwū á. Ācɛ nēe cɛ̄ɛ̄lā kú um, géē yēeyī, nááná nēé gekwú ā. 26Ɔ̄cɛ dúúmā nōo yēeyī klla lɛ ɔtūce um, í gáā kwú ŋ́ piyóó. A cɛ̄ ɛ̄nyā a?” 27Umáta da ɔ́ kahíníī, “Īī, Óndú. N cɛ̄ ka a wɛ Ohɔ́nyɛtá á, Ɔyínɔ̄nyīlɔ kú Ɔwɔicō nōo gáā wɛ̄ɛcɛ ā.”

Ujísɔ̄si jikwū

28Eko nɛ̄ Umáta le ɛlā nyā ka kwɛyí ā, ó nyɛ̄ɛ̄ gaá lɛ Umerí ɔyínɛ́ nū nɔ̄nyā hīgwú gɛɛcɛ. Anɔ́ɔ ó ka tū ɔ̄ ahɔ̄ kahíníī, “Itíca ā yɔ̄ amānyā. Ó ī hī uwɔ igwú.” 29Eko nɛ̄ Umerí le pó ā, ó nyāŋjɛ, anɔ́ɔ ó páápá le tá ɛgiyí nū á. 30Ujísɔ̄si í wā ipɔ́lɛ́ ā dúúdú ɛ́ɛ́ nóo, amáŋ ó yɔ̄ ɛga nɛ̄ Umáta jīla anú ɔwɛ ā. 31Eko nɛ̄ ācɛ Ujíyu nēe bá inu mla anú gē tū ɔ̄ ɔtūlé ā má ɔ̄ bá ó nyāŋjɛ kpá le tɛ́ɛcɛ ā, é yɛce ɔ́, ohígbū kéē gbɛlá kóō gē nyɔ̄ únóji gaá jikwū abɔ́ɔ nɛɛ. 32Anɔ́ɔ eko nɛ̄ Umerí wā ɛga nɛ̄ Ujísɔ̄si yɔ̄ ā, ó lɛ ɔ́ má ā, ó má kwōkwū ajɛ iyɔbu kú nū. Anɔ́ɔ ó da ɔ́ kahíníī, “Óndú, ɔ́dāŋ ka a yɔ̄ amānyā nɛɛ, ɔyínɛ́ um nɔ̄nyīlɔ ā í yɛ í kwú ŋ́.” 33Anɔ́ɔ eko nɛ̄ Ujísɔ̄si má ɔ̄ gē jikwū, mɛ́mla ācɛ Ujíyu nēe wā mla anú ā bá gē jikwū dúú ā, ó yɔ̄ gē hīlifu ipú ɔtū kú nū. Ó le kwú ɔ̄ iyē nɛ̄hi. 34Anɔ́ɔ ó kahíníī, “Iní nɛ̄ aá lɛ ɔ́ gwutá ā?” Anɔ́ɔ é da ɔ́ kahíníī, “Óndú, wā gaá má ɔ̄.” 35Ujísɔ̄si le ikwū je. 36Anɔ́ɔ ācɛ Ujíyu kahíníī, “Má ɛ́gɛ́nɛ̄ ó yíihɔtū tū ɔ̄ dúú ā.” 37Amáŋ ācɛ ōhī kú ipú uwā kahíníī, “Ɔ̄cɛ nōo nwūla eyī kú ópeyī ā, í lɔfú yá ká ɔ̄cɛ kóō kwú ŋ́ glá ŋ́ nɛɛ?”

Ujísɔ̄si le Ulásārɔ̄si héyī ŋmá ɔlékwū

38Ɔtūnwula nwūla yá Ujísɔ̄si nɛ̄hi igbɔhá, anɔ́ɔ ó le tá únóji ā. Únóji ā wɛ ɔ̄gɔ̄ nōo yɔ̄ áklō kú ɛfu, nēé lɛ ɛcɔ̄ gwū ɔ̄ á. 39Ujísɔ̄si kahíníī, “Aá kwú ɛcɔ̄ nyā ú míya ŋmá amānyā.” Umáta, ɔyínɛ́ nɔ̄nyā kú ɔ̄cɛ nōo kwú ā, da ɔ́ kahíníī, “Óndú, abālɔbányā ó gē hójújá mla ípī mɛ́ɛnɛ, ohígbū ka ɛ̄cī ɛnɛ nɛ̄ ó kwú yɔ̄ mɛ́ɛ̄ á.” 40Ujísɔ̄si da ɔ́ kahíníī, “Ń tɛtɛ da uwɔ ka, ‘Ɔ́dāŋ́ ka a cɛ̄, a géē má ɔfú kú Ɔwɔicō ŋ́ nɛɛ?’” 41Anɔ́ɔ é kwú ɛcɔ̄ ā ú ŋmá abɔ́ɔ. Ujísɔ̄si jeyī gicō, anɔ́ɔ ó kahíníī, “Ádā, n tá uwɔ ahínyá ohígbū ka a gē jāhɔ̄ gā um. 42N kē jé ka a gē jāhɔ̄ gā um eko dóódu, amáŋ n kɛlā nyā ohígbū ācɛ nēe háyi amānyā ā, kéē cɛ̄ ka awɔ tū um ɛhɔ̄ á.” 43Eko nōó lɛ ɛ̄nyā ka kwɛyí ā, ó dɛ̄gba gbōmgbōm kahíníī, “Ulásārɔ̄si, gā ɛcɛ!” 44Ɔ̄cɛ nōo kwú ā gā ɛcɛ. É bī ɔpá le ɔ́ ikpó mɛ́mla abɔ̄ gbō, é kē lɛ ɛyí kú nū gbo igbogbo. Anɔ́ɔ Ujísɔ̄si da uwá kahíníī, “Aá lɛ ɔ́ wī kóō nyɔ̄.”

Ujɔ̄ nēé tū tū Ujísɔ̄si kéē ŋmó ɔ̄ ā

(Umát 26.1-5; Umák 14.1,2; Ulúk 22.1,2)

45Ācɛ alɛwa kú ācɛ Ujíyu nēe wā mla Umerí, nēe kē má ɔdā nɛ̄ ó yá ā, lɔtūce ɔ́. 46Amáŋ aóhī kú ipú uwā nyɛ̄ɛ̄ le tá ɛgiyí ācɛ Ufárisīi, gaá le ɔdā nɛ̄ Ujísɔ̄si yá ā ka lɛ uwá. 47Ohígbū ɔ́ɔmā otrɛ̄yí kú ācogwɛ́ɛya mla Ācɛ Ufárisīi lɛ ójila ohɛ́pɔ̄ hīgwú. Anɔ́ɔ é kahíníī, “Ɔdí nɛ̄ alɔ géē yá mɛ́ɛ̄ ā? Ohígbū ka ɔ̄cɛ ā gē yá ɔdōcābɔ̄ alɛwa. 48Ɔ́dāŋ́ ka ālɔ̄ habɔ̄ ɔ̄ tá lɛ ā, ācɛ dóódu géē lɔtūcɛ̄ ɛlā nū, ó lɛ ā, ācɛ Uróm géē wā gaá lɛ Agblīihɔ-nɛ̄hi mla ɔpu kú alɔ ca tāajɛ.” 49Amáŋ ɔ̄cɛ éyi kú ipú uwā, Ukayáfāsi, nōo wɛ otrɛ̄yí kú ācogwɛ́ɛya iháyí ɔ́ɔmā ā da uwá kahíníī, “Aá jé ɔdā dúúmā ŋ́. 50Aá jé kóō cɛgbá ká ɔ̄cɛ éyi kóō gekwú ohígbū ācɛ ā, ikoko nɛ̄ odúúdú ɔpu ā gé ca tāajɛ.” 51Ó wɛ ɔfú kú abɔ̄yī nū nōó bī le kɛlā nyā ŋ́, amáŋ ɛ́gɛ́nɛ̄ ó wɛ otrɛ̄yí kú ācogwɛ́ɛya iháyí ɔ́ɔmā ā, ó le ɛbɛ má ka Ujísɔ̄si ɔ́ɔ géē kwú ohígbū ācɛ Ujíyu ā. 52Ó wɛ ohígbū ācɛ Ujíyu ā ōfūnū nɛ̄ Ujísɔ̄si í kwú ā ŋ́, amáŋ ohígbū kóō lɛ ayí kú Ɔwɔicō, nēe le pahīla bá ɛga dóódu ā pīya tɔ̄há. 53Anɔ́ɔ oŋmɛ́cī ɔ́mā a aótrɛ̄yí ācɛ Ujíyu gbɔɔ́ ō tū ujɔ̄ kéē géē lɛ Ujísɔ̄si ŋmó.

54Ohígbū ɔ́ɔmā Ujísɔ̄si í yɛ ipú ācɛ Ujíyu cāā glá gɛ ŋ́, amáŋ ó nyɛ̄ɛ̄ ŋmá abɔ́ɔ le tá ipɔ́lɛ́ nōo yɔ̄ kwu ígbíli nēé hī ka Ɛ́frem ā, abɔ́ɔ nōó yɔ̄ mla ayíkpó kú nū á.

55Eko Ucɛ kú Onyatá le kwajaajɛ ɛɛ́. Ācɛ alɛwa ŋmá ɔlɛ́ uwā wā Ujerúsālɛm gbɔbū lɛ ɛ̄cī Ucɛ kú Onyatá ā, kéē lɛ iyī uwā gwu gbɔbū lɛ ucɛ ā. 56É bá yɔ̄ ī dɔɔ̄kā Ujísɔ̄si, uwá ka ɔtāhɛ̄ iyī uwā eko nēé bá Agblīihɔ-nɛ̄hi ā kahíníī, “Ɔdí nɛ̄ aá gbɛlá? Kóō gáā wā ɛgiyí ucɛ ā ŋ́ nɛɛ?” 57Ohígbū ka otrɛ̄yí kú ācogwɛ́ɛya ā mɛ́mla ācɛ Ufárisīi ā le ɔ́da je ka ɔ́dāŋ ka ɔ̄cɛ dúúmā jé ɛga nɛ̄ Ujísɔ̄si yɔ̄, kóō le ka tɛ́ɛcɛ, kéē lɛ ɔ́ kwú abɔ̄fú.

Currently Selected:

UJƆ́NI 11: IFBCL

Highlight

Copy