ÚKLƆ́ KÚ ĀCOTƐ̄HƆ̄ 6

Oōfu kú ācɛ ahāapa

É le ācɛ ahāapa fu kéē cɛ̄hɔ̄

1Eko le gla yɛ ā, abɔ̄ áluka kú ayíkpó ā gbɔɔ́ ō nyīla ā, ācɛ Ujíyu nēe ī ka ucē kú Ugríisi ā gbɔɔ́ ō ka iŋini lɛyíkwu ācɛ nēe ī ka Uhíbru ā, ohígbū kéē lɛ ɛlā kwu anyōkwū kú uwā ipú ɔdōlé kú ɛ̄cī dóódu nēé ī kɔ̄ ā ŋ́. 2Ācotɛ̄hɔ̄ igwɛ́ɛpa ā lɛ odúúdú ayíkpó ā kpó hīgwú tɔ̄há, anɔ́ɔ é da uwá kahíníī, “Ó cíkā nɛ̄ alɔ ī habɔ̄ ɛlā Ɔwɔicō tá ká ālɔ̄ kɔ̄ ɔdōlé ŋ́. 3Abɔ̄ ó i lɛ ā ā, ayínɛ́ alɔ, aá lɛ ācɛ ɔkwɛ̄yi ahāapa fu ŋmá ipú aá, ɛ̄nɛ̄ e le mu mla Alelékwū Ihɔ mɛ́mla ohílīpú, nɛ̄ alɔ géē je úklɔ́ nyā tū uwā abɔ̄. 4Alɔ ā, kē í je iyī alɔ táajɛ ká ālɔ̄ gbɔ̄ɔkɔ mɛ́mla o tɔ́ɔna kú Ɔ̄kōolɔhi ā.” 5Ɛlā nɛ̄ ayíkpó ā ka ā le he odúúdú ɛwa ā ɔtū. Anɔ́ɔ é lɛ Usitífin, ɔ̄cɛ nōo cɛ̄lɔ̄ɔwɔicō lɔfú lɔfú klla le mu mla Alelékwū Ihɔ ā fu mɛ́mla Ufílīpu mɛ́mla Uporokórɔ̄si mɛ́mla Unikánɔ mɛ́mla Utáyímɔn mɛ́mla Upámēnāsi mɛ́mla Uníkɔ̄lɔsi kú Ántiyɔ̄ku, ɔ̄cɛ nōo je pīya tá ɔwɛ o gbā ɔwɔicō ɛ̄gbā kú ācɛ Ujíyu dúú ā. 6É kwú ācɛ nēe bá ā ú háyi iyɔ̄bū ācotɛ̄hɔ̄ ā, anɔ́ɔ é le abɔ̄ ce uwá ɛyí le ɔkɔ gbā lɛ Ɔwɔicō á.

7Anɔ́ɔ ɛlā kú Ɔwɔicō le nyīla, áluka kú ayíkpó ā le nyīla nɛ̄hi ipú Ujerúsālɛm. Ācogwɛ́ɛya alɛwa cɛ̄ɛ̄lā olɔhi ā.

É le Ustífin kwú

8Usitífin nɛ̄ Ɔwɔicō hɔ́hā ce ɔ́ nɛ̄ɛ̄nɛ̄hi klla le ɔfú nɛ̄hi je lɛ ɔ́ ā, yá ɔdā idáagó mɛ́mla ɔdōcābɔ̄ nɛ̄hi alɛwa ɔtāhɛ̄ ācɛ ā. 9Amáŋ ācɛ ōhī kú Usayírīni mɛ́mla ákú Aálesáŋdrīya mɛ́mla aɛ́nɛ̄ e ŋmá Usilísīya mɛ́mla Ésīya nēe wɛ ācɛ kú Agblīihɔ-nɛ̄ŋcɛ́ kú ācɛ nēé hɛ́tá #6.9 Ācɛ nēe bá nyā wɛ ācɛ Ujíyu nēe wɛ ɔfiyɛ gbɔbū nēé bī ije le iyī uwā fūla. ŋmá ɔfiyɛ ā, cāŋjɛ gbɔɔ́ ō táafú mla Usitífin. 10Amáŋ Alelékwū le ɛdɔ íjééyī nɛ̄hi je lɛ Usitífin ka eko nɛ̄ ó le ɛlā ka, é má ɔdā dúú ka mla anú ŋ́. 11Anɔ́ɔ é le yɛ igbīhi gaá lɛ ācɛ pllā, nēe kahíníī, “Alɔ pó eko nōó gē bīya iyē kú Umósīsi mɛ́mla Ɔwɔicō ā.” 12Anɔ́ɔ é le ɔtū kú ācɛ Ujúu mɛ́mla anyākwɔ́cɛ mɛ́mla aítíca kú íne je gicō. É wúla klá Usitífin lɛ ɔ́ kwú ga iyɔ̄bū kú ójīla ohɛ́pɔ̄ ā. 13Anɔ́ɔ é lɛ ācɛ ōhī kpó wā kéē cē ijáalí ɛ̄kɛ̄mgbɛ̄, é kahíníī, “Ɔ̄cɛ ā í habɔ̄ ɛlā ō ka lɛyíkwu ɛga otīihɔ nyā mɛ́mla íne ā tá jéjéē ɛ́ɛ́ ŋ́. 14Ohígbū ka alɔ pó abɔ̄ ó yɔ̄ ī ka ka Ujísɔ̄si kú Unásārēti nyā géē bīya amānyā, ó kē í pīya uculo nɛ̄ Umósīsi je lɛ alɔ ā abɔ̄.” 15Abɔ̄ ācɛ dóódu nēe bá ipú ójila ohɛ́pɔ̄ ā bá ī héyī kwu ɔ́ ā, é má ka eyī kú nū le pīya bɛ̄ɛka eyī kú Alelékwū ōtɛ̄hɔ̄ ā.

Currently Selected:

ÚKLƆ́ KÚ ĀCOTƐ̄HƆ̄ 6: IFBCL

Highlight

Copy