ÚKLƆ́ KÚ ĀCOTƐ̄HƆ̄ 4

É le Upíta mla Ujɔ́ni bī nyɔ̄ iyɔ̄bū ójila ohɛ́pɔ̄

1Eko nɛ̄ Upíta mɛ́mla Ujɔ́ni yɔ̄ gē kɛlā lɛ ācɛ ā, ācogwɛ́ɛya #4.1 Aɔ́kpá ōhī kú otlɛ̄yí kú ācogwɛ́ɛya. mla ācogbāajɛ kú Agblīihɔ-nɛ̄hi ā mɛ́mla ācɛ Usádusīi ā, le pɛ́ wā ɛgiyí uwā 2É le cɔ̄nū ohígbū ka ācocɛ̄hɔ̄ ɛpa ā yɔ̄ gē nwū ācɛ ā ɛlā gē ka tɛ́ɛcɛ ka Ujísɔ̄si ɔ́ɔ le héyī ŋmá ɔlékwū ɔ́ɔmā mafú ka ācɛ nēe pɛ́ kwú kpɛ́mm géē héyī. 3Anɔ́ɔ ācɛ ā le uwá kpó kwú, le uwá kpó tū ijaló gbó oŋmɔ́ɔ̄cī nū á, ohígbū ka eko ɔ́ɔmā wɛ ɔ̄nɔ̄ɔ̄nɛ̄. 4Amáŋ alɛwa kú ācɛ nēe jāhɔ̄ lɛ ɛlā nēé ka ā cɛ̄, áluka kú ācɛ ā lɛbɛ̄ɛka úlā igwɛ́ɛpa ce ofīgwó ā (5,000).

5Oŋmɔ́cī nū ā, aígabɔ̄ kú uwā ā mɛ́mla anyākwɔ́cɛ ā mɛ́mla aítíca kú íne ā gaá le jīla bá Ujerúsālɛm. 6É le jīla tɔ̄há mɛ́mla Ánāsi, otrɛ̄yí kú ācogwɛ́ɛya ā mɛ́mla Ukayáfāsi mɛ́mla Ujɔ́ni mɛ́mla Alesáŋda mɛ́mla odúúdú ipɔ́ɔnū kú otrɛ̄yí kú ācogwɛ́ɛya ā. 7É le ɔ́da je kéē lɛ ayíkpó ɛplɛ́ɛpa kpó wā í háyi iyɔ̄bū uwā. Anɔ́ɔ é da uwá ɔ̄kā kahíníī, “Ɔwɛ nyá nɛ̄ aá yá nɛ̄ ocīkpó ā gbɔɔ́ ō yāwu ā? Ɔfú nyá nɛ̄ aá lɛ ā, ámāŋ ka iyē kú ɔ̄nyɛ nɛ̄ aá bī le yúklɔ́ ɔ́ɔmā ā?” 8Anɔ́ɔ Upíta nōo le mu mla Alelékwū Ihɔ ā da uwá kahíníī, “Aá aígabɔ̄ mɛ́mla anyākwɔ́cɛ, 9ɔ́dāŋ kéē yɔ̄ ī kɛpɔ̄ tū alɔ ícɛ ohígbū ɔdā olɔhi nɛ̄ alɔ yá lɛ ocīkpó nyā ā, aá klla dɔɔ̄kā ɔwɛ nɛ̄ alɔ le hɛ́ ɔ̄ tá ā, 10ó lɛ ā odúúdú aá cíkā ō jé, odúúdú ācɛ kú Ísrɛ̄lu cíkā ō le jé, kéē hɛ́ ɔ̄cɛ nōo háyi iyɔ̄bū aá ā tá, o ŋmá lɛ ɔfú kú iyē kú Ujísɔ̄si Ohɔ́nyɛtá kú Unásārēti nɛ̄ aá nyɔ́kpá, nɛ̄ Ɔwɔicō kē jé héyī ŋmá ɔlékwū ā. 11#Aíjē 118.22Ujísɔ̄si wɛ ɔ̄cɛ nēé kɛlā ohígbū nū ipú ɛlɔ̄ɔwɔicō ka,

‘Ɛcɔ̄ nɛ̄ aá nōo gē gwíinu ā leyī gwū ɔ̄ tá ā,

kwú pīya ɛcɔ̄ nōo cɛgbá fíyɛ́ dúú ɛɛ́.’ 12O ŋmá ɛgiyí nū ofōōfūnū ā nēé nya ɔ̄cɛ tá glá á, ipú odúúdú ɛcɛ nyā ó lɛ ɔ̄cɛ ɔhá dúú nɛ̄ Ɔwɔicō fu nōo nya alɔ tá glá ŋ́.”

13Eko nēé lɛ ɔtū nɛ̄ Upíta mɛ́mla Ujɔ́ni lɛ ā má ā, é klla le jé kéē jɔ́kpá ŋ́ klla kē wɛ aógwuda ā, é le kpó hídáagó. É le jé ɔkwɛ̄yi kú uwā tɛtɛ yɔ̄ pī Ujísɔ̄si. 14Amáŋ eko nēé le ɔ̄cɛ nēé nyatá ā má háyi pī uwā ā, é lɛ ɔdā dúú nēé ī ka ŋ́. 15Anɔ́ɔ eko nēé le da uwá kéē ga ɛcɛ ŋmá ójila ohɛ́pɔ̄ ā, é gbɔɔ́ ō ga ojuju mla iyī uwā yɔ̄ ī kahíníī, 16“Ɔdí nɛ̄ alɔ géē yá mla ācɛ nēe bá nyā ā? Ó ta cāā lɛ odúúdú ācɛ nēe lā Ujerúsālɛm ā kéē lɛ ɔdā ō hídáagó ojēyī nɛ̄hi yá ɛɛ́, alɔ í kē híhó kú nū glá ŋ́. 17Amáŋ cɛ́ɛ́ kóō híī le nyīla ɔtāhɛ̄ kú ācɛ ā gɛ ŋ́ mā, ālɔ̄ lɛ uwá ahɔ̄ pi kéē kɛlā lɛ ɔ̄cɛ dúúmā lɛyíkwu iyē kú Ujísɔ̄si gɛ ŋ́.” 18Anɔ́ɔ é lɛ uwá hīgwú le ɛlā ka lɛ uwá lɔfú lɔfú kéē klla kɛlā ámāŋ o nwū ɔdā dúúmā fúlufúlu lɛyíkwu iyē kú Ujísɔ̄si ā gɛ ŋ́. 19Amáŋ Upíta mɛ́mla Ujɔ́ni tá uwā ohi kahíníī, “Ó cíkā iyɔ̄bū kú Ɔwɔicō ká ɔ̄cɛ kóō lɛyítáajɛ lɛ aá ikɔkɔ ōlɛyítáajɛ lɛ Ɔwɔicō, aá géē hɛ́pɔ̄ nyā á. 20Ohígbū ka alɔ abɔ̄ alɔ í lɔfú habɔ̄ ō yɔ̄ ī kɛlā kú ɔdā nɛ̄ alɔ abɔ̄yī alɔ má ā klla pó ā tá glá ŋ́.” 21Anɔ́ɔ eko nɛ̄ aígabɔ̄ klla lɛ uwá tūūfi kpɔ́ ā, é habɔ̄ uwā tá kéē nyɔ̄, ɛ́gɛ́nɛ̄ é má ɔwɛ dúúmā nēé gē lɛ abɔ̄ bá ɔ̄ yá uwā italā ŋ́ mā. Ohígbū ka ācɛ ā bá yɔ̄ ī cɛ̄tra Ɔwɔicō kú ɔdā nōo yá ā. 22Ohígbū ka ɔ̄cɛ nēé hɛ́tá ɔwɛ úklɔ́ ō hídáagó nyā wɛ ɔnyākwɔ́cɛ nɛ̄ iháyí kú nū fíyɛ́ ofɛpa.

Ācotɛ̄hɔ̄ ā gbɔ̄ɔkɔ kú ɔtōōlɛ

23Ɔkwɔɔkwu nēé le Upíta mɛ́mla Ujɔ́ni hɛ́tá ā, é kwúcē le tá ɛgiyí aɔ́mpa uwā. Anɔ́ɔ é le ɔdā dóódu nɛ̄ aótrɛ̄yí kú ācogwɛ́ɛya mɛ́mla anyākwɔ́cɛ ā da uwá ā kpó ka lɛ uwá. 24#Oyɛb 20.11; Uneh 9.6; Aíjē 146.6Eko nēe le pó ā, é je ɔkɔ gicō tɔ̄há le ɔkɔ gbā lɛ Ɔwɔicō kahíníī, “Ɔkpani, awɔ nōo yá ɔkpáncō, ɛcɛ, ísu mɛ́mla ɔdā dóódu nōo yɔ̄ ipú uwā ā, 25#Aíjē 2.1,2a bī Alelékwū Ihɔ kɛlā bū okónu kú ádā alɔ ɔnyākwɔ́cɛ Udéfīdi, ɔ̄cocɛ̄hɔ̄ kú uwɔ ā kahíníī,

‘Ɔdíyá nɛ̄ aéwɔhá ī kpɔ́tū fúúlú ā,

ɔdíyá nɛ̄ ācɛ gē tū ujɔ̄ nōó tīile ŋ́ mā a?

26Aɔ́cɛ́ kú ɛcɛ ā le iyī uwā tútū,

aígabɔ̄ ā kē le jīla tɔ̄há

lɛyíkwu Óndú ā mɛ́mla Ohɔ́nyɛtá kú nū ā.’

27 # Ulúk 23.7-11; Umát 27.1,2; Umák 15.1; Ulúk 23.1; Ujɔ́n 18.28,29 Ohígbū ka, ɔkwɛ̄yi nɛ, Uhérɔ̄du mɛ́mla Upɔ́ntíyɔ̄si Upáyílēti le jīla igelī nyā tɔ̄há mɛ́mla aílɔ́wá mɛ́mla ācɛ kú Ísrɛ̄lu lɛyíkwu Ujísɔ̄si, ɔ̄cocɛ̄hɔ̄ kú uwɔ nōo tīihɔ ā, nāa je pīya Ohɔ́nyɛtá ā. 28É le jīla tɔ̄há kéē lɛ ɛjɛ̄ɛ̄jī ɔdā nāa tɛtɛ le miya táajɛ kóō géē yá ā yá, a lɔfú miya ɔ́ ɔwɛ ɛ́gɛ́nyā glá ohígbū ɔfú mɛ́mla ɔdā nāa cɛ̄ ā. 29Abālɔbányā, Óndú, má ɛ́gɛ́nɛ̄ é gē tū alɔ ufi lɛ ā, lɛ ɔfú tū alɔ iyē, alɔ ɔ̄cocɛ̄hɔ̄ kú uwɔ, ká ālɔ̄ cɛ̄ olɛhɔ̄ kú uwɔ pāālā mla ɔtōōlɛ. 30Lɛ ɔfú kú uwɔ mafú oŋmá lɛ ō hɛ́ ācɛ odoōcē tá, je ɔfú lɛ alɔ kú ālɔ̄ yúklɔ́ ō hídáagó oŋmá lɛ iyē kú Ujísɔ̄si, ɔ̄cocɛ̄hɔ̄ Otīhɔ kú uwɔ.” 31Anɔ́ɔ eko nēe lɛ ɔkɔ gbā kwɛyí ā, ɛga nēé jīla tɔ̄há ā le jíliyē, anɔ́ɔ ɛjɛ̄ɛ̄jī uwā le tū mu mla Alelékwū Ihɔ, anɔ́ɔ é lɔtu lɛ gbɔɔ́ ō kɛlā Ɔwɔicō pāālā á.

Ācocɛ̄ɛ̄lā ā gē kɔ̄ agbénú kú uwā

32 # Ācot 2.44,45 Anɔ́ɔ ɔ́wá kú ācocɛ̄lɔ̄ɔwɔicō ā bī ɔtū ékpónú mɛ́mla odo ékpónú, odóódu kú uwā í ka ka ɔdā nɛ̄ anúɔ ɔ́ɔ lɛ ā wɛ ákú anúɔ ōfōōfū anúɔ ŋ́, amáŋ é gē kɔ̄ ɛjɛ̄ɛ̄jī ɔdā nēé lɛ ā mla ɔ́mpa uwā. 33Ācotɛ̄hɔ̄ ā bī ɔfú nɛ̄hi cījáalí ka Óndú Ujísɔ̄si le héyī ŋmá ɔlékwū, Ɔwɔicō klla le ɔhā nɛ̄hi hɛ́ce uwá. 34Ɔdā dúú í kpla uwā ɛhá ŋ́, ohígbū ka ɛjɛ̄ɛ̄jī uwā nōo lɛ ajɛ ámāŋ ka inu ā, kwú uwā ú kpó lá, anɔ́ɔ é le ije kú nū kpó tɔ̄há, 35cɛ́ɛ́ é le kpó wā iyɔ̄bū kú ācotɛ̄hɔ̄ ā, cɛ́ɛ́ é lɛ ɔ́ kɔ̄ lɛ ɔnyɔ̄ɔnyɛ ɛ́gɛ́nɛ̄ ɛgbá kú nū lɛ ā. 36Ɛ́gɔ́ɔmā nɛ̄ ó lɛ lɛ Ujósɛ̄fu, Ulɛ́fāyi nēé ma Usáyíprɔ̄si ɔ̄cɛ nɛ̄ ācotɛ̄hɔ̄ ā hī ka Ubánābasi ā (ɛ̄nɛ̄ ɛyí nū lé ka ɔyí kú olɔfú tīyē), 37kwú ajɛ éyi nɛ̄ ó lɛ ā ú lá, anɔ́ɔ ó lɛ ije kú nū bī wā gaá tá iyɔ̄bū ācotɛ̄hɔ̄ á.

Currently Selected:

ÚKLƆ́ KÚ ĀCOTƐ̄HƆ̄ 4: IFBCL

Highlight

Copy