Markus 6

Mji Ku Nggəlar Yesu Ahar Nazareth

(Mat 13:53-58; Luk 4:16-30)

1Antə Yesu ku təra kazhar vəi nda, ka ngka akwa diyirni, antə mjirthlipərni ku nutə ni. 2Sakatə Vir Ghərəmtaghəra ku si antə tsa ləkwa mbwar vəngkər səli ka baɗitə thlipa aka mji, antə mji hang na nggatə ni, ku ndatədzi, ka pəla, “Mdə ngəni wuta ama shanga su ngəni ri? Tsa wuta ama jili ɗəɗukur ngəni, natə har tsa akwa hara surndatayeri ngəni kəgari nə ri? 3Aɗi ngəni an kapənta ni pwa? Ngəni aɗi ɓzər Maryamu pwa? Tsuwa aɗi tsa an ɓzərma' Yakub, ka Yusuf, ka Yahuda, ka Siman wa ya? Tsuwa aɗi shanga maɗama'ni na maɗankwi azi adzə mburu wa ya?” Antə da ləkwa səlkərni.

4Antə Yesu pəla ala ɗa, “Vəi aɗi tə naɓi kula daraja ata wa, tar akwa diyirni, ka akwa nca maɗama'ni, ka kutakəyirni.” #Yah 4:44

5Antə Yesu aɗi mzhi hara surndata anda wa, təng mji laga yiɗauwa na nggawa nggawa daci antə tsa vəngkər tsiyari ala ɗa, ka mbantə ɗa. 6Tsa ku ndatədzi ata kəra tur hamta jirər ɗa. Antə Yesu ku dlarhə kauyayeri ni akwa thlipa ala ɗa.

Yesu Ku Thlentə Mjirthlipərni

(Mat 10:5-15; Luk 9:1-6)

7Antə tsa kəgatə mjirthlipərni na kumnya suɗə ni adzə ni, ka baɗitə thlentə ɗa suɗsuɗa, ka hamta ala ɗa duna ata kəra mambəlayeri na ɗimi ɗimi. 8Tsa tsawa ala ɗa abbər, “Giri aɗiya kəl su kamnyar lənggur giri wa, wala susəma, wala thləvu, wala kwaba akwa dlipur giri wa, təng zwal daci antə ka giri kəsi. #Luk 10:4-11 9Ka giri hatə ɓaɓiyir giri, amma giri aɗiya kətə ləptu damwa wa. 10Kəlara sakatə giri ku ləkwa kəi laga, ka giri ndzi tsu akwa kəi nda, har tar ma sakatə giri ata zhar di nda. 11Tsuwa akwa kəlara vəi tə mda aɗi dlu giri akwa wa, wala psi thləm aka ndərər giri wa, ma sakatə giri ata zhar vəi nda, ka giri ɓumta bərbər na ata səla giri, ka ndzi seɗa ala ɗa.”

12Antə da ku təra kara ngkər ndərər Hyel aka mji abbər ka mji tubi. 13Antə da ku kədləɓəla shatanayeri hang akwa dza mji, ka kəkərtə mji na nggawa nggawa hang ka mal zaitun ka mbantə ɗa. #Yak 5:14

Mtər Yahwana Mdər Hara Baptizma

(Mat 14:1-12; Luk 9:7-9)

14Kuthli Hirudus ku nggata ata kəra shanga suayeri ngəni, kamnyar tə thləma Yesu ku tuwa ka duna akwa kəlara bwa. Har mji laga akwa pəla abbər, “Sakani Yahwana na mdər hara baptizma ni an thlata akwa mtəmta, an su na hara tə tsa ka dunar hara surndatayeri ngəni ni.” #Mat 16:14; Mar 8:28; Luk 9:19

15Amma mji laga pəla, “Tsa an Iliya.” Mji laga tsuwa pəla, “Awa, naɓi laga diya zum, apa pal akwa nca naɓiyayeri na waci.”

16Amma sakatə Hirudus ku nggata apani, antə tsa pəla, “Ai ngəni Yahwana natə I nthləmta kərari ni an jaktə thlatə ka mpika!” 17Kamnyar Hirudus surni an thlenta abbər ka mdə ngkəi Yahwana, ka mbwahə ni, ka hambwa ni akwa pərsəna. Hirudus hara apani kamnyar Hirudiya na mwalar ɓzərma'ni Filibus, kamnyar Hirudus ku kəl mwala ni. #Luk 3:19-20 18Kamnyar Yahwana ku kəɗar pəla aka Hirudus abbər, “Aɗi kalkal ka gə kəl mwalar ɓzərma' ngə wa!”

19Kamnyar su ngəni antə Hirudiya ku kəsi Yahwana akwa ɗəffari, akwa pakə lakur tsi ni. Amma tsa aɗi mzhi wa, 20kamnyar tə Hirudus akwa thlivər Yahwana. Tsa ku sənda abbər Yahwana ka jirkur, tsuwa tsa mdə na kula biku, antə Hirudus ku wulwul kərari ta su awutə ni. Wala tə kəlara sakatə Hirudus ku nggatə Yahwana akwa gari, tsa ana damitədzi ni, tsu tsa ana nggatə msərakur gariyirni.

21Amma laku ku sə wutədzi aka Hirudiya, sakatə Hirudus kəgatə mji akwa kucalər vir tə mdə yaɓəla ni ni. Tsa kəgatə ajiyayeri arni, kəga mji na ol'ola ata kəra sojayeri arni, kəga mji na ol'olər Galili. 22Kamnyar sakatə ngkwar Hirudiya səmbwa ka ɓathla akəma Hirudus ka mətəpiyayeri arni ni, shanga ɗa ku nggatə msərakurari. Antə kuthli ni pəla aka ngkwa ni abbər, “Yu kəlara su tə ga akwa barari, I ata hamta ala ga.” 23Tsuwa har kuthli ni ku kahyel aka ngkwa ni abbər, “Kəlara su tə ga ku yu akəli, I ata hamta ala ga, wala an retar kuthlikur arna.”

24Antə ngkwa ni ləɓəla ka pəla aka mama'ni, “Man su tə kəi kiɗə ri?” Antə mama'ni pəla alari, “Kəra Yahwana na Mdər hara Baptizma.”

25Təkəma antə ngkwa ni jaktə ngka adzə kuthli ka huva ka pəla alari, “I akwa bara ka gə ni kəra Yahwana na mdər hara baptizma kulini ata paranti!”

26Gari ngəni ku ɓzamtə ɗəffa kuthli ka duna! Amma kamnyar kahyel tə tsa hara, ka tsuwa mətəpiyayeri arni, tsa aɗi bara ka tsa ɓəli alkawal tə tsa hara alari wa. 27Təkəma antə kuthli ni thlentə pal akwa nca sojayeri arni na ana sək kərari, ka tsa ra nthləi kəra Yahwana. Antə soja ni ku mwari, ka nthləi kəra Yahwana akwa pərsəna ni, 28ka səntə kəra Yahwana ni ata paranti, ka hamta aka ngkwa ni. Antə ngkwa ni ku dluwa ka mwanta aka mama'ni. 29Sakatə mjirthlipər Yahwana nggatə su ngəni, antə da si ka kətə mshiyirni, ka ra harəmtari.

Yesu Ku Ndlantə Mji Dəpu Ntəfu Ka Susəma

(Mat 14:13-21; Luk 9:10-17; Yah 6:1-14)

30Antə aposəlayeri ku ngka adzə Yesu, ka pəla alari ata kəra shanga su tə da ku hara, ka su tə da ku thlipa. 31Mji hang akwa dingngga si ka təra adzə Yesu, har tə mjirthlipərni aɗi wutə saka wala raka ka da səm susəm wa. Antə Yesu pəla ala ɗa, “Asər giri ka mburu mwari akwa vəi laga na kula mda, ka giri ɗar ghərɓəlaghəra.” 32Antə da ləkwa shar, da shiɗa, ka təra mwari akwa vəi na kula mda.

33Amma mji hang ku wutə ɗa akwa təra ni, ka nggaɓəla ɗa. Antə mji ku thlata akwa kauyayeri arɗa ka hwi mwari ka səl, har ka mzhitə vəi nda akəmata da. 34Sakatə Yesu ku səɓəla akwa shar ni, ka wutə dlamar mji na tsaptədzi ni, antə tsa kətadzə ɗa, kamnyar da ndzi apa təmayeri na kula mdər ɓəla. Antə tsa baɗitə thlipa ala ɗa suayeri hang. #Mat 9:36 35Sakatə pci abaka təri, antə mjirthlipərni si adzə ni ka pəla alari, “Vəi ngəni ku hara ciju ta kuta di. Nggədza tsuwa pci abaka təri. 36Antə kuji gə salamtə mji ni, kamnyar ka da mzhi mwari akwa kuta di kəga diyayeri na raka raka, kamnyar ka da mastə su tə ka da səma.”

37Amma Yesu shinau ala ɗa ka pəla, “Na giri ala ɗa su tə ka da səm bu.” Antə da pəla alari, “Ka yeru ra mastə susəma ar kwabar ntər mdər kəthlər vir aru suɗa, ka yeru na ala ɗa ka da səm ya?” 38Antə Yesu pəla, “Kər buradi yiɗau an akəla giri ri? Mwar giri ka giri wulha.” Sakatə da ku mwari ka wulha, antə da si ka pəla, “Kər buradi ntəfu ka kəlfa suɗa.”

39Antə Yesu pəla aka mjirthlipərni, ka da tsawa aka shanga mji ka da ndzəndzi ata kusar miraku zara zara. 40Antə mji ku ndzəndzi zara zara, laga aru aru, laga ntəfkumari ntəfkumari. 41Sakatə tsa kətə kər buradi na ntəfu ka kəlfa na suɗə ni, ka haptə ncari amta, ka usar Hyel, antə tsa ɓəgəlwa buradi ni, ka hamta aka mjirthlipərni ka da ndəkəmta aka mji. Apani tsuwa antə tsa ndəkəmta kəlfa ni aka shanga mji. 42Antə shanga ɗa ku səma ka ndli. 43Antə mjirthlipərni tsaptə shanga buradi ka kəlfa na ɓushirəmtadzi ata di, har ka nghyantə thlambəl kumnya suɗə kəgari. 44Tsuwa hangkurər mji na kwasə buradi ni an mji shili dəpu ntəfu.

Yesu Ku Mwa Ata Kəra Yimi

(Mat 14:22-23; Yah 6:15-21)

45Da akwa kuriyari təkəma, antə Yesu tsawa aka mjirthlipərni ka da ləkwa shar, ka da mwa akəmari ka mwari ahar Bethsaida, ka tsa salamtə dlamar mji ni. 46Aghəla tə tsa salamtə mji ni, antə tsa ndlətə gar kamnyar hara adduwa. 47Sakatə pci ku təri, shar ni tsu ata ɗəffa manda ni, tsuwa Yesu tsu ata kəra gar ni shini. 48Sakatə Yesu wuta abbər mjirthlipərni akwa ɗar bwani akwa nggur shar ni kamnyar shambar na akwa damitə ɗa apa saka makər na aviri, təng da wutə ni akwa mwa ata kəra yimi ni akwa si təbwar ɗa. Apa tsa akwa bara təramta adzə ɗa. 49Amma sakatə da wutə ni akwa mwa ata kəra yimi ni, da dzama abbər sakani shatan, antə da hara kuraku, 50kamnyar shanga ɗa ku wutə ni ka thlivəra ka duna. Təng təkəma tsa gari ala ɗa ka pəla, “Peri gir hangkala giri! Iya! Giri aɗiya thlivər wa!” 51Antə tsa ləkwa shar ni adzə ɗa, antə shambar ni thləthlata. Antə da ndatədzi ka duna, 52kamnyar da aɗi nggaɓəla karapur ndlantə mji dəpu ntəfu nda wa, təng tə kəra ɗa ɓəɓal ni.

Yesu Ku Mbantə Mji Na Nggawa Akwa Jannisaret

(Mat 14:34-36)

53Sakatə da ləɓəla aɓəla bwanda manda ni, ka səɓəla akwa shar ni akwa tsəɗi Jannisaret, antə da mbwi shar ni ata mnya manda ni. 54Səɓəlar ɗa akwa shar ni, təng təkəma mji nggaɓəla abbər azha Yesu. 55Antə da hwi mwari akwa shanga kauyayeri na kalaktə ɗa, akwa sənta alari mjir ɗa na nggawa nggawa ata sərpəyayeri, akwa kəlara vəi tə da nggata abbər Yesu ata. 56Tsuwa kəlara vəi tə Yesu ku mwari ata, wala akwa kauyayeri, wala akwa bərniyayeri, wala na ata hildiyayeri, da ana pwi mji na nggawa ni akwa vəi kasəku, ka kiɗə Yesu abbər ka da tsəkwar wala mnya ləptərni. Tsuwa shanga mji na ku tsəkwar ni ku mbantədzi.

Currently Selected:

Markus 6: KNB

Highlight

Copy