Markus 4

Karapu Laga Ata Kəra Mdər Ɓucə Hwulfa

(Mat 13:1-9; Luk 8:4-8)

1Antə Yesu jaktə baɗitə thlipa ata mnya Mandar Galili. Antə mji dlama dlama ku tsaptədzi adzə ni, har tə tsa ləkwa shar ka ndzəndzi akwa ata kəra manda ni. Antə shanga mji ni thləthlata ata wuyakər mnya manda ni. #Luk 5:1-3 2Antə tsa thlipa ala ɗa su hang akwa karapu. Akwa thlipərni ni tsa pəla,

3 “Psi gir thləma giri! Mdər tsuhwa laga aɗi na ku ləɓəla kamnyar ɓucə hwulfərni. 4Sakatə tsa akwa ɓucə hwulfə ni antə laga ku təri akwa kuta laku, antə ɗikayeri ku si ka ntəntwakəmnya ɗa. 5Hwulfayeri laga tsuwa ku təri akwa vəi na ka pirakthlya, vəi tə həi aɗi ata hang wa, antə tsa ku ptsi taktar kamnyar tə həi aɗi ata kərari hang wa. 6Amma sakatə pci ku səɓəla, antə da tətəɓumtadzi ka ulantədzi kamnyar tə da aɗi ka nggilang wa. 7Tsuwa hwulfayeri laga ku təri akwa nca mtəhərayeri, antə mtəhərayeri ni ku kələngkərdzi ala ɗa ka ngkatə ɗa kəla, antə da aɗi ya munya wa. 8Amma hwulfayeri laga ku təri akwa həi na ɓɗaku, antə da ku ptsi, ka kəla, ka pu munya, laga makkumari, laga ngkwakumari, laga tsuwa aru.” 9Antə Yesu pəla, “Mdə na ka thləmər nggatə su, ka tsa nggata.”

Sur Thlipa Na Akwa Karapu Ni

(Mat 13:10-17; Luk 8:9-10)

10Sakatə Yesu shini, antə mjirthlipərni na kumnya suɗə ni ka mji na akwa nu ni ku yu ni ata kəra karapwayeri ni 11Antə tsa pəla ala ɗa,

“Ar giri mdə ku hir ka giri sənda ashira kuthlikurər Hyel ni. Amma aka mji na aɗi akwa nca giri wa, shanga su sai akwa karapu. 12An su na hara ta,

“ ‘Da ata ləkəma ka wulari,

amma shang da aɗi ata wulɓəlari wa.

Da ata ləkəma ka nggatari,

amma shang da aɗi ata nggaɓəlari wa.

Ma da ku nggaɓəla,

da ata tubi, antə mda ata yafitə ɗa.’ ”

Yesu Ku Ngkərɓəla Karapur Mdər Ɓucə Hwulfə Ni

(Mat 13:18-23; Luk 8:11-15)

13Antə Yesu pəla ala ɗa, “Azha giri aɗi səndə karapu ngəni wa! Apa madi tə giri ata nggaɓəla karapu damwa ri? 14Mdər tsuhu ni akwa ɓucə ndərər Hyel. 15Antə hwulfayeri na təri akwa kuta laku ni ndzi apa mji laga na ku nggatə ndərər Hyel ni. Amma təkəma aghəla tə da nggatə ndər ni, təng Shatan si ka kəɓəla ndər ni akwa ɗəffa ɗa. 16Tsuwa hwulfə na təri akwa vəyayeri na ka pirakthlya ni an mji na ku nggatə ndər ni, ka dlu təkəma ka kucali. 17Amma təng tə da aɗi ka nggilang wa, da aɗi fəi wa. Apani sakatə bwaniyayeri na mwavər mwavər ku thlata ata kəra ndər ni, antə da ngka ka bwahili. 18Hwulfə na təri akwa mtəhərayeri ni an mji na ku nggatə ndərər Hyel ni, 19amma damitədzayeri, ka bara gəna, ka mwaɓər sur duniya, ku ləkwa ɗəffa ɗa ka ngkatə ɗa ta da akəla, antə da ku ndzi kula ampani. 20Amma hwulfə na təri akwa həi na ɓɗaku ni an mji na ku nggatə ndər ni ka dluwa, ka hara kəthlər kəgari, ka wutə riɓari, laga makkumari, laga ngkwakumari, ka laga aru.”

Karapu Ata Kəra Pitəla

(Luk 8:16-18)

21Antə Yesu pəla ala ɗa, “Nənga giri ana səmbwa ka pitəla ka giri hangkir akira balang wala akira dəkəl ri? I ana wuta abbər giri ana vəi ni ata vəi vətə ni. #Mat 5:15; Luk 11:33 22Kamnyar kəlara su na ɗuwarɗuwarari kulini, ata sə kəlardzi. Tsuwa kəlara su na ku ndzi akwa ashir, suari ata sə səɓəla ata bəbal. #Mat 10:26; Luk 12:2 23Kəlara mdə na ka thləmər nggatə su, ka tsa nggata.”

24Antə tsa pəla ala ɗa, “Ka giri hara hangkal ka su tə giri ana nggata. Ka jili tasa natə giri ana ngkərtə su aka nvwa giri akwa, antə mda ata sə ngkərwa ala giri kəgari, har ma ka mdə jakəngkər ala giri. #Mat 7:2; Luk 6:38 25Kamnyar mdə na ka su, antə mda ata jakəngkər alari damwa. Amma kəlara mdə na aɗi ka su wa, wala su tə tsa kəgari ma, mda ata dluɓəlari.” #Mat 13:12; 25:29; Luk 19:26

Karapu Ata Kəra Hwulfa Na Ku Ptsi

26Antə Yesu jaktə pəla, “Kuthlikurər Hyel ndzi tsu apa mdə na ku thləkamta hwulfə laga akwa fakərni. 27Da aɗi da aɗi, har tə hwulfə ni ptsa, ka kəla, mdə ni aɗi səndə laku tə su ni hara akwa wa. 28Amma həi ni ka kərari an akwa hara kəthlərərni. Ntangkəma thlali an səɓəla, aghəla nda tsa ata haɓəla kər, kambəla tsa pu munya. 29Sakatə munya mthli ni ku ng'həi, antə mdə ni ata kətə təkatəka ka tsa baɗitə nthlari, kamnyar tə sakar nthlə mthli ku hara.”

Karapu Ata Kəra Munya Mastad

(Mat 13:31-32; Luk 13:18-19)

30Antə Yesu pəla, “Ka mi antə mda ata mzhi gira kuthlikurər Hyel ri? Karapu madi antə mda ata mzhi kəthlər kəgari kamnyar ngkərɓəlari ri? 31Tsa ndzi tsu apa hwulfər munya mastad, hwulfə na raka ta shang tə mda ana thləkamta akwa di. 32Amma wala apani ma mdə ku thləkamta ni, tsa ana kəla, ka ndzi olta shanga suayeri na ptsa akwa fakə ni. Tsa ana hara tsiyayerari ol'ola har tə ɗikayeri ata mzhi pwa ata, ka thlir shanggurari.”

33Ka karapwayeri hang apani, antə Yesu ngkər labarər Hyel aka mji, kalkal ka su tə da ata mzhi nggaɓəlari. 34Su aɗi tə tsa ngkər ala ɗa amma kula akwa karapu wa. Amma sakatə da shiɗa kəga mjirthlipərni, tsa ana ngkərɓəla ala ɗa shanga su ata bəbal.

Yesu Ku Mpa Aka Shambar Yimi

(Mat 8:23-27; Luk 8:22-25)

35Tsu vir nda tahaku, antə Yesu pəla aka mjirthlipərni, “Ndzi ka mburu mwari aɓəla bwanda.” 36Antə da ku təra kazhar mji ni, ka kətə ni adzə ɗa akwa shar tə tsa akwa hwatu ni. Tsuwa sharayeri damwa aɗi adzə ɗa. 37Amma təkəma təng shambar yimi laga na mwavər baɗitə fya, akwa pu yimi akwa shar ni, har tsa abaka nghyantari. 38Amma ar Yesu tsa aghəli nda akwa kuta shar ni, ka kərari ata sur vətə kər akwa heni. Antə mjirthlipərni mwari ka thlentə ni, ka pəla alari, “Maləm, mburu ata kurəmtadzi diya, ga aɗi damitədzi wa ya?”

39Antə Yesu thlata ata heni ni, ka mpa aka shambar ni ka pəla aka mpar yimi ni, abbər, “Thləthlatə tsəkəm! Zhar fi ni!” Antə shambar yimi ni ku zhar fya, tə shanga su ku pəpəi. 40Antə Yesu pəla aka mjirthlipərni, “Kamnyar mi tə giri akwa thlivər nə ri? Har ba kulini giri aɗi ka hamta jiri wa ya?”

41Amma da ku thlivər ka duna, tə waskəi ku pəla aka nvwani, “Wa ngəni, tə wala shambar ka manda akwa kələngkər alari ni ri?”

Currently Selected:

Markus 4: KNB

Highlight

Copy