Mathliyu 15

Sur Thlipa Ar Kəkayeri

(Mar 7:1-13)

1Antə mjir Farisi laga ka maləmayeri ar thlipə tsawur Musa ku thlata ahar Urushalima ka si adzə Yesu ka pəla, 2“Kamnyar mi tə mjirthlipər nga ana ɓəli surharar kəkayeri ar mburu ri? Kamnyar da aɗi ana kəcimta tsiya ɗa kambəla da səm susəm wa!”

3Antə Yesu shinau ala ɗa ka pəla, “Wala giri ma, kamnyar mi tə giri ana ɓəli tsawur Hyel, təng kamnyar abbər ka giri ɓəlatə surharar kəkayeri ar giri nə ri? 4Kamnyar Hyel pəla, ‘Ka gə nar olkur aka baba' nga, ka mama' nga,’ tsuwa ‘Kəlara mdə na ku nggəl baba'ni wala mama'ni, mda ata tsi ni.’ 5Amma giri ana pəla, ‘Ma mdə na pəla aka baba'ni wala mama'ni abbər, “Shanga su tə kalkal ka giri wuta akəli ni I ku kurtə hamta aka Hyel,” to aɗi ata ndzi dwali alari ka tsa hara su na ata nar olkur aka baba'ni wa.’ 6Apani, giri ku hilantə ndərər Hyel, kamnyar ka giri nu surharar kəkayeri ar giri. 7Giri an mji na shimnya! Kalkal tə Ishaya hara naɓikur ata kəra giri, sakatə tsa pəla,

8 “ ‘Mji ngəni ana ni səli ata mnya ɗa ndzang,

amma ɗəffa ɗa ciju ka iya.

9 Da ana vəngkər səli ali gapani,

ka thlipə tsawur mji abbər

da akwa thlipə ndərər Hyel.’ ”

Suayeri Na Ana Hilantə Mda

(Mar 7:14-23)

10Antə Yesu kəgatə dlamar mji ka pəla ala ɗa, “Psi gir thləma giri ka giri nggaɓəla su! 11Aɗi su na ana ləkwa mnya mda, andər namtə mdə adiya wa, amma su na ana səɓəla akwa mnya mda an andər namtə mdə adiya.”

12Antə mjirthlipərni si ka pəla alari, “Ga ku asənda abbər ɗəffa mjir Farisi ku ɓzi ata kəra ndər ngəni tə da nggatə ni?”

13Amma Yesu shinau ka pəla, “Kəlara nfu natə aɗi Təddarna na amtazi an nci ni wa, mda ata ntsumta ni. 14Zhar gir ɗa. Da an mdlyangayeri na ana ndəkər mji na mdlyang. Antə ma mdlyang akwa ndəkər mdlyang nvwa ni, japwa ɗa ata pudzi akwa ku.” #Luk 6:39

15Amma Bitrəs pəla alari, “Ngkərɓəla ala yeru karapu ngəni.”

16Antə Yesu pəla ala ɗa, “Azha har ba kulini giri aɗi nggaɓəla ng? 17Giri aɗi sənda abbər kəlara su na ana ləkwa mnya mda, tsa ana ləghəi akwa kuta mda, kambəla tsa sə ləɓəla akwa dza mdə wa ya? 18Amma kəlara su na ana səɓəla akwa mnya mda, tsa ana səɓəla akwa ɗəffu. Antə su ngəni ana namtə mdə adiya. #Mat 12:34 19Kamnyar akwa ɗəffa mda antə dzamayeri na ɗimi ɗimi ana səɓəla, apa tsi mda, ka ləka, ka karwakur, ka həla, ka thlandər, ka ngkər mda. 20Suayeri ngəni andər namtə mdə adiya, amma səm su ka tsi kula kəca, aɗi ana diɓərantə mdə wa.” #Mat 12:34

Hamta Jiri Ar Mwala Kanana

(Mar 7:24-30)

21Antə Yesu ku təra kazhar vəi nda, ka mwari akwa bwar Taya ka Sidon. 22Anda antə da wutə mwala Kanana laga na si akwa haptə kuraku ka pəla, “Kəta adzə ra, Mthlaku, gə na Ɓzər Dauda! Shatan laga an ləkwa dza ngkwarna, akwa ɗar bwani alari.”

23Amma Yesu aɗi shinangkər alari, wala ka ndər duku wa. Antə mjirthlipərni ku si ka kiɗə ni, akwa pəla, “Kədləmta ni! Tsa akwa damitə mburu ka kuraku!”

24Antə Yesu shinau ka pəla, “Mdə thlentə ra dzak kamnyar təmar Israila na ku sha, na an mjir Israila.”

25Amma mwala ni si ka zuzuri akəmari, akwa pəla, “Mthlaku, dlar ra bu.”

26Antə Yesu pəla alari, “Aɗi kalkal ka mdə kətə susəmər maɗankyar ka mdə psəmta aka kilayeri wa.”

27Antə mwala ni pəla, “Ngəni jiri kam, Mthlaku. Amma wala kilayeri mthlakər ɗa ana mzhi zhar ka da ɗəmtə susəma na ɓushirəmtadzi alari ata di.”

28Antə Yesu ku pəla alari, “Mwala, gə ka hamta jiri na ola! Ndzi ka wujirər ngə ni kura apatə ga ku bara.” Tsu ata sakanda antə ngkwarni ni mbantədzi.

Yesu Ku Mbantə Mji Hang Damwa

29Thlatər Yesu anda antə tsa təra ata mnya Mandar Galili, ka ra lətə gar laga ka ndzəndzi. 30Antə mji dlama dlama ku si adzə ni. Da səntə mjir ɗa na nggurdəkəi, ka na abdala, ka na mdlyang, ka mji na ka mnya ɗa dləɓdləɓari, kəga mji damwa hang na nggawa nggawa, ka pwi ɗa akəmari. Antə tsa ku mbantə ɗa. 31Antə mji na tsaptədzi dlama dlama ni ku ndatədzi, sakatə da wuta abbər mji na mnya ɗa dləɓdləɓari akwa mnya, mji na abdala ku thlatə kalkal, mji na nggurdəkəi akwa mwa, tsuwa mji na mdlyang akwa wutə su. Antə da ku nar səli aka Hyelər Israila.

Yesu Ku Ndlantə Mji Dəpu Nfwar

(Mar 8:1-10)

32Antə Yesu kəgatə mjirthlipərni ka pəla, “Mji ngəni akwa hara kətadzə ra, kamnyar ashina vira ɗa makər adzə ra azi, tsuwa da aɗi ka susəma tə ka da səm wa. Tsuwa kəri ka salamtə ɗa ka mi wa, ta da asə thləvamtadzi ata laku.”

33Antə mjirthlipərni pəla alari, “Ka, akwa mtaku ni, ama antə mburu ata mzhi wutə susəma na ata mzhi ndlantə mji ngəni dlama dlama nə ri?”

34Antə Yesu pəla ala ɗa, “Kər buradi yiɗau an akəla giri ri?” Antə da pəla, “Murfa, ka kəlfayeri na raka raka yiɗauwa.”

35Antə tsa pəla aka mji na dlama dlama ni ka da ndzəndzi ata di. 36Antə tsa kətə kər buradi na murfa ka kəlfayeri ni, ka usar Hyel, ka ɓəgəlwa, ka hamta aka mjirthlipərni. Antə mjirthlipərni ku ndəkəmta aka dlamar mji ni. 37Antə shanga ɗa ku səma ka ndli, antə mjirthlipərni ku tsaptə na ɓushirəmtadzi, har ka nghyantə thlambəl murfa. 38Tsuwa hangkur mji na səm susəm ni an mji shili dəpu nfwar, amma mda aɗi jikau mwanki ka maɗankyar wa.

39Sakatə Yesu ku salamtə mji na dlama dlama ni antə tsa ləkwa shar, ka mwari akwa tsəɗi Magadan.

Currently Selected:

Mathliyu 15: KNB

Highlight

Copy