Baɗitari 25

Kəkayeri Ar Ibrahim Na Atar Ketura

(1 Lab Wac 1:32-33)

1Ibrahim ku kəl mwala damwa ka thləmari Ketura. 2Antə Ketura ku yaɓəla alari Zimran, ka Yokshan, ka Medan, ka Midiyan, ka Ishbak, ka Shuwa. 3Antə Yokshan ku yaɓəla Sheba ka Dedan. Antə kəkayeri ar Dedan an mjir Asshur, ka mjir Letushi, ka mjir Le Ummi, 4Maɗashilər Midiyan an Efa, ka Efer, ka Hanok, ka Abida, ka Eldaa. Shanga ɗa an kəkayeri ar Ketura.

5Tsuwa Ibrahim ku hamta shanga surni aka Ishaku. 6Amma aka maɗashilər mambila mwanki tə tsa pwi ni, Ibrahim hamta ala ɗa cautayeri. Tsuwa akwa sakatə tsa tsu ka mpika antə tsa salamtə ɗa kamnyar ka da ndəkəmtadzi ka ɓzərni Ishaku. Antə da ku təra ka mwari ciju akwa tsəɗi na təbwar raghəi.

Ibrahim Ku Mti Antə Mdə Ku Harəmta Ni

7Ngəni an hangkura məva Ibrahim akwa duniya akwa ndzəndziyir mpikari, məvari an aru pal ka murfəkumari ka ntəfu. 8Antə Ibrahim ku mti akwa sakatə tsa ku hali na kalkalari, mdə halhala na ka məvari hang, ka ra wutə kəkayeri arni na mtə kəmata tsa. 9Antə Ishaku ka Ishmayel na maɗa'ni ku harəmta ni akwa kur Makpela, akwa bəbal ar Efron na ɓzər Zohar na mdər Hitti, kudzəhə ka Mamre təbwar raghəi, 10vəi tə Ibrahim ku masɓəla akəla mjir Hitti. Anda antə mdə ku harəmta Ibrahim kudzəhə ka mwalankiɗa Saratu. 11Aghəla mtər Ibrahim, antə Hyel vədzə barka aka ɓzərni Ishaku. Antə Ishaku ku ra ndzəndzi ahar Beyer Lahai Roi.

Kəkayeri Ar Ishmayel

(1 Lab Wac 1:28-31)

12Nayeri ni an kəkayeri ar Ishmayel ɓzər natə Hagar na ngkwar Masar, na ngkwarmbwar Saratu, ku yaɓəla aka Ibrahim. 13Nggədza thləma maɗashilər Ishmayel, ata ola ata ola, baɗitə ka yarakəma. Nebayoth an yarakəma, kambəla Kedar, ka Adbeyel, ka Mibsam, 14ka Mishma, ka Duma, ka Massa, 15ka Hadad, ka Tema, ka Yetur, ka Nafish, ka Kedema 16Nayeri ni tsuwa an thləma maɗashilər Ishmayel, mdə rəbutə thləma ɗa ata di ata di ka thləma vəi fəliyir ɗa. Da ka kuthlyayeri kumnya suɗa akwa nyarmbwar ɗa. 17Tsuwa hangkur məva Ishmayel an aru pal ka makkumari ka murfa. Aghəla nda antə tsa ku mti, ka ra wutə mjirni na ku mtə kəmata tsa. 18Antə kəkayeri ar Ishmayel ku ndzəndzi akwa daɓwa Havila ka Shur, akwa tsəɗi na awul Masar, ata lakur Assiriya. Antə da ku ndzəndzi shiɗa, akwa dawakur ka shanga mjir ɗa.

Yaɓəladzər Isuwa Ka Yakub

19Nayeri ni an kəkayeri ar Ishaku na ɓzər Ibrahim. Ibrahim ku yaɓəla Ishaku. Ibrahim an yaɓəla Ishaku. 20Sakatə Ishaku hara məvari nfwarkumari ka yarni, antə tsa ku kəl mwalankiɗa Rubeka, na ngkwar Bethluwel na mdər Aram na ahar Paddan Aram. Rubeka an ngkwarma' Laban na mdər Aram. 21Antə Ishaku ku hara adduwa aka MTHLAKU ata kəra mwalankiɗa Rubeka, kamnyar tsa aɗi mzhi kətə hur wa. Antə MTHLAKU ku nggatə adduwar Ishaku antə Rubeka ku kətə hur. 22Antə maɗankyar ni ku ɓuji ka nvwa ɗa akwa kutari. Antə tsa pəla, “Kamnyar mi tə su apani ata wutə ra ri?” Antə tsa mwari adzə MTHLAKU kamnyar bara nggaɓəla su ata kər.

23Antə MTHLAKU pəla alari,

“Mji suɗa an akwa kuta ga,

antə mji ngəni suɗa akwa gə ni ata ndəkəmtadzi.

Mdə na pal ata ndzi ɓəɓal ta nvwa ni,

na olari an ata hara mafakur aka na ntsahari.”

24Sakatə sakar yarni ku hara, antə tsa yaɓəla maɗaɓuli. 25Ɓzər na səɓəla ntangkəma ni mamza, tsuwa shanga dzari ka shishi apa ləptər shishi, antə da vəta alari thləm Isuwa. 26Aghəla nda antə ɓzərma'ni səɓəla, ka matədukwa Isuwa akwa tsiyari. Apani antə thləmari ku ndzi Yakub. Ishaku ka məvari ngkwakumari sakatə mdə yaɓəla ɗa.

Isuwa Ku Ɗələmta Yarakəmakurərni

27Sakatə maɗankyar ni ku kəla, antə Isuwa ku ndzi muzəmaku na masəku, ka ndzi mdər mtaku. Ar Yakub ndərərni aɗi ol wa, antə tsa hir ndzi avi. 28Ishaku ku hir Isuwa, kamnyar kum mtaku tə Isuwa ana tsi ka səntə alari, amma ar Rubeka tsa hir Yakub.

29Vir laga sakatə Yakub akwa ɓwa pote, antə Isuwa səvi akwa mtaku ka mi akwa kətə ni ka duna. 30Antə Isuwa pəla aka Yakub, “Kətsa ali poteyir ngə na mamza ni bu, kamnyar mi akwa kətə ra ka duna. An su na hara tə mda ana kəga Isuwa abbər Edom, watau ‘mamza’ ni.”

31Antə Yakub pəla alari, “Tar ma ga ata ɗələmta ali yarakəmakurər ngə ni katagu.”

32Antə Isuwa pəla, “I ata mnya mtə diya, ka man tə olkur yarakəmakur ata dlar ra akwa ri?”

33Amma Yakub pəla, “To, ai tar ma ga ku kahyel ali katagu.”

Antə Isuwa ku kahyel alari abbər, “I ku ɗələmta ala gə olkur ar ndzi yarakəma ni.” 34Antə Yakub ku hamta buradi ka pote na ka tsər ni aka Isuwa. Antə Isuwa ku kwasa ka sangkər yimi, ka thlatə ka təra. Apani antə Isuwa ku rutəmta ka gyal ka yarakəmakur arni.

Currently Selected:

Baɗitari 25: KNB

Highlight

Copy