Baɗitari 14

Ibram Ku Mbuli Lot

1Vir laga Amrafel na kuthlir Shinar, ka Ariyok na kuthlir Ellasar, ka Kedorlayomer na kuthlir Elam, ka Tidal na kuthlir Goyim, 2ku ləɓəla ka ra dlər Bera na kuthlir Sodom, ka Birsha na kuthlir Gomora, ka Shinab na kuthlir Adma, ka Shemebar na kuthlir Zeboyim, ka tsuwa kuthlir Bela na an Zowar. 3Antə shanga kuthlyayeri ngəni ntəfu ni ku paktə sojayeri arɗa ata kəma duku akwa Mular Siddim, natə tsa an Manda Una ni. 4Akwa məvayeri kumnya suɗa na təramta kuthlyayeri ngəni akwa hara mafakur aka Kedorlayomer, amma akwa məva na kumnya makərkur da ku hara alari kər ɓəɓalkur. 5Antə akwa məva na kumnya nfwarkur, Kedorlayomer ka kuthlyayeri na ata kəma duku ka tsa ku ləɓəla ka sojayeri arɗa ka dlərəmta mjir Refa akwa Ashtaroth Karnayim, ka mjir Zuzi na akwa Ham, ka mjir Emi na akwa bəbalər Kiriyathlayim, 6ka tsuwa mjir Hori na akwa Gar Seyir, har ka mwanta adzə Elparan na ata mnya mtaku. 7Antə da shinar kəma ɗa ka si ahar Enmishpat, natə tsa an Kadesh, ka səm shanga tsəɗi mjir Amalek, ka mjir Amor na akwa Hazazon Tamar. 8Antə kuthlyayeri ar Sodom, ka Gomora, ka Adma, ka Zeboyim, ka Bela natə tsa an Zowar, ku paktə sojayeri arɗa, ka mwari akwa mpa akwa Mular ar Siddim, 9kamnyar dlər Kedorlayomer na kuthlir Elam, ka Tidal na kuthlir Goyim, ka Amrafel na kuthlir Shinar, ka Ariyok na kuthlir Ellasar, watau kuthlyayeri nfwar akwa dlər kuthlyayeri ntəfu. 10Tsuwa Mular Siddim ni nghyinghyari ka kur su laga apa kwalta. Antə sakatə kuthlyayeri ar Sodom ka na ar Gomora ka sojayeri arɗa shinardzi akwa hwi, təng mji laga akwa nca ɗa ndla akwa kuayeri ni. Bwadukwa kuthlyayeri ni ka sojayeri arɗa tsuwa ku hwi ka mwari akwa garayeri. 11Antə Kuthlyayeri ngəni nfwar ni ku famnya shang kari mjir Sodom ka Gomora, har kəga susəmər ɗa ka təra. 12Tsuwa da ku kətə Lot na ɓzər ɓzərma' Ibram, na ka ndzi akwa Sodom, ka famnya shanga kariyirni ka təra.

13Antə mdə laga na ku msərəmta, ku si ka pəla aka Ibram na mdər Ibrani, na ka ndzi adzə kuɓər nfur ok ar Mamre na mdər Amor. Mamre an ɓzərma' Eshkol ka Aner, natə da an pazhir Ibram. 14Sakatə Ibram ku nggata abbər mdə ku ngkəi ɓzər ɓzərma'ni akwa mpa ni, antə tsa ləɓəla ka mjirni aru makər ka kumnya ncisu, mjirni natə mdə yaɓəla akwa kutakəyirni, mji tə mdə ku thlipta ala ɗa lakur mpa, antə da ku nu ghəla kuthlyayeri na nfwar ni har ka mzhitə tsəɗi Dan. 15Vir nda aviri antə tsa ndəkəmta mjirni na ata mpa ni akwa zarayeri. Antə Ibram ka sojayeri kamnyar ni ni ku dlər dawayeri arɗa, ka kədlə ɗa akwa nu ghəla ɗa har ka mwantə ɗa ahar Hoba na akwa yalar Damaska.

16Antə Ibram ka mjirni ni dlutsə shanga su tə mdə həltə ni ka ngka kəgari. Tsa ngka ka Lot na ɓzər ɓzərma'ni ni ka shanga kariyirni, ka ngka ka mwanki ka shanga mambila mji tə dawayeri fatə ni.

Melkizedek Ku Vədzə Barka Aka Ibram

17Sakatə Ibram ku ngka aghəla tə tsa ku dlərəmta Kedorlayomer ka kuthlyayeri na ku paktə kər ka tsa, antə kuthlir Sodom ləɓəla kamnyar thla kəma Ibram akwa Mular Shave, natə mda ana kəga Mular ar Kuthli ni. 18Antə Melkizedek na kuthlir Salem ku səɓəla ka buradi ka yimər anap. Melkizedek an prist ar Hyel na ka Səli ta Shang. 19Antə tsa vədzə barka aka Ibram akwa pəla,

“Ka Hyel na ka Səli ta Shang

vədzə barka aka Ibram,

Hyel na namtə vəi na amtazi ka duniya.

20Ka huwa ndzi aka Hyel na ka Səli ta Shang,

na hamta dawayeri ar nga akwa tsiya ga.”

Antə Ibram hamta alari zaka ar shanga su tə tsa fatə ni.

21Aghəla nda antə kuthlir Sodom pəla aka Ibram, “Ar ngə na ali mjirna ni daci, kara fatə shanga kari ni ka da ndzi ar nga.”

22Amma Ibram pəla aka kuthlir Sodom abbər, “I ku kurtə ka kahyel aka MTHLAKU na Hyel na ka Səli ta Shang, na namtə vəi na amtazi ka duniya, 23abbər I aɗi ata kəl su na ku ndzi ar ngə wa, wala an puwar nggira wala səwur ɓaɓi, ta ga asə pəla abbər, ‘I ku namtə Ibram mdər gəna.’ 24I aɗi ata kəl suma wa, tar su tə mjirna ku kurtə səməmnya, ka tsuwa su tə mji na pwar ra ni ata wutari, watau Aner, ka Eshkol, ka Mamre. Kalkal ka mdə na ɗa watsəɓər ɗa.”

Currently Selected:

Baɗitari 14: KNB

Highlight

Copy