Baɗitari 12

Hyel Ku Kəga Ibram

1Antə MTHLAKU pəla aka Ibram, “Zhar tsəɗiyir nga kəga yangkura ga, kutakəyir baba' nga, ka gə mwari akwa tsəɗi tə I ata ncanta ala ga.”

2“I ata hara ka gə ndzi dur na ola,

tsuwa I ata vədza ala gə barka,

I ata hara ka thləma gə tuwa,

kamnyar ka gə ndzi ka barka aka mji.

3Kəlara mdə na ku vədzə ala gə barka,

I ata vədza alari barka.

Kəlara mdə na ku rutə nga,

I ata shuwumta ni.

Atar nga antə shanga mjir duniya

ata sə wutə barka.”

4Antə Ibram ku təra apatə MTHLAKU ku pəla alari, tsuwa Lot ku mwari ka tsa. Ibram ka məvari murfəkumari ka ntəfu sakatə tsa təra kazhar Haran. 5Antə Ibram ku kətə mwalankiɗa Saraya, ka Lot na ɓzər ɓzərma'ni ni, ka fatə shanga gənar ɗa tə da wuta, ka shanga mafayeri tə da kəgari akwa Haran, ka ləkwa laku kamnyar mwari akwa tsəɗi Kanana. Sakatə da ku mzhitə tsəɗi ni, 6antə Ibram təramta akwa tsəɗi ni ka mwari akwa vəi laga tə mda ana kəga Shekem, adzə nfur ok laga, vəi laga akwa Moreh. Akwa saka na ndaga mjir Kanana an akwa tsəɗi ni. 7Antə MTHLAKU ku ncantə kərni aka Ibram ka pəla alari, “Ngəni an tsəɗi natə I ata na aka kəkayeri ar nga.” Antə Ibram ku həntə bagaɗi anda aka MTHLAKU na ncantə kərni alari ni. 8Sakatə Ibram thlata anda antə tsa mwari akwa bwar garayeri abwar raghəi ar Bethlel, ka nci tentərni təbwar ramta ka Bethlel, təbwar raghəi ka Ai. Anda antə tsa həntə bagaɗi aka MTHLAKU ka vəngkər səli aka MTHLAKU. 9Antə Ibram jaktə ləkəma ka lənggu ni, akwa mwari tsu təbwar Nəgəv.

Ibram Ka Saraya Akwa Masar

10Akwa saka na ndaga məi ku təri akwa tsəɗi ni. Antə Ibram ku təra ləghəi ahar Masar ka ɗarndzi asəgu, kamnyar tə mi ni ku hara mwavər. 11Sakatə tsa hara kudzəhə ka kəla Masar antə tsa pəla aka mwalankiɗa Saraya abbər, “I ku sənda abbər gə mwala na dakwi, 12antə ma mjir Masar ku wutə nga, da ata sə pəla, ‘Ngəni mwalankiɗa!’ Antə da ata tsi ra, ka da zhar nga ka mpika. 13Antə kara pəla ala ɗa abbər gə ngkwarma' na, antə da ata wulwul ra ɓɗaku kamnyar nga, ka da zhar ra ka mpika.” 14Tsuwa təkəma ləkwar ɗa akwa Masar, təng mjir Masar ni wuta abbər mwala ni dakwi ka duna. 15Tsuwa sakatə kwakunayeri ar kuthli wutə mwala ni, antə da mwari akəma kuthli ka pəla alari abbər, “Ɓzərngkwa laga dakwi ku si akwa di ni!” Antə mdə kətə mwala ni ka mwantə ni akwa kəi kuthlikur ka tsa ndzi mwalar kuthli ni. 16Antə kamnyar mwala ni, kuthli ni ku hara ɓɗakkur ka duna aka Ibram. Tsa hamta alari cautayeri ar təmayeri, ka gyalayeri, ka kwarayeri salari kəga mwalari, ka mafayeri shili ka mwanki, ka dləkəmauwayeri.

17Amma MTHLAKU ku səntə shilkayeri na mwavər mwavər ata kəra kuthli ka mjir kutakəyirni kamnyar Saraya na mwalar Ibram. 18Antə kuthli kəga Ibram ka pəla alari abbər, “Man tə gə hara ali apani ri? Kamnyar mi tə ga aɗi pəla ali abbər tsa mwalankiri wa ri? 19Kamnyar mi tə gə pəla abbər tsa ngkwarma' nga, tə I ku kətə ni tə tsa ndzi mwalankiya nə ri? Kulini, nggədza mwalankiri, kətə ni ka giri təra!” 20Antə kuthli ku tsawa aka mjirni ata kərari. Antə mdə ku pwarɓəla ni, tsa, ka mwalankiɗa, ka shanga su tə tsa kəgari.

Currently Selected:

Baɗitari 12: KNB

Highlight

Copy