Matthew 28
28
1Lāk ōbā‐ya sa sabbath, yiḵs gala‐ī akuḵ‐īdī gil‐bāyī nāla sa num punā gīla, gāḵī Mary Magdalene gla wī da ogwila Mary doqā ḵā digāzī.
2Wa dok, nutl‐īda zīkyāsī da awīnāqīs: kā ī da angel asa īkē Gīkumī gāḵā ḵā gēh‐īd lāḵā īkē, kās gāḵī lūḵ‐wīd ḵā tīsum, la qāskum‐īk.
3Ḵīs qīxdumī numāyhis gla wa klinī‐qila, lā tā qītl‐qēlēs malā hī qīx nā‐yī.
4Kā īḵs kitlilā as yiḵā khākhālālāk dāḵw ḵwanāla, kās lē hē qīx la tlī‐tlilī.
5Lī da angel nīk ḵā zīdāk, qālas kitlil yūtl; kāḵ gin kauklilā mī gāḵs ālē‐āḵ Jesus, yiḵā glapā‐sūk dē lāḵā kayū‐yaula.
6Kīyōsī la lāḵ‐ga; kā īḵs lamā ā glāḵ‐wīda, lāḵīs wātldumk dē; kīlāga, dōḵ‐wīduḵ‐ga uḵ‐āsda‐gāsī.
7Hālāga hānā‐qīlāḵ, kās nītla ūsāḵ disciples as sīḵs lamā ā glāḵ‐wīd lāḵā tlilī: doqātlāla, lā klī gāgālatl gīwī klūs lāḵ Galilee; hī mī sis lāk dāḵw klūs doqilas kla kī: doḵ, lamun nīk yūtl.
8Wa lāk dāḵw hānā‐qīla gēh‐īd lāḵā digāzī kitlilāk dāḵwā aulā ḵād ekīkulā; zilh‐wila kās zikyā‐tlilēḵ disciples as sā wātldum.
9¶ Wa dok! Jesus nākō glūk dāḵwī, nīkya, mūlāk dāḵw la: gāḵ dāḵw dāk‐sīzin duḵ gūgwa‐yaus, kās umyāḵ‐īdīk.
10Lī Jesus nīk dāḵwuk, qālā kitlil: hāgik dāḵw la, nīk ḵun nātl‐numwiyūta kā lāk dāḵwī sī lāḵ Galilee, hī mīs lā‐kl doqilas dāḵw klisī gāḵun.
11¶ Wa yiḵs lāk dāḵwā ī lā‐nāqila, dok! ḵā gāyūtlī lāḵā khākhā‐lālāk‐dī gāḵ lāḵā town, kās nītlī ḵā gī‐gakumā‐yī priests sa nāwhā qīh‐īda asa.
12Lāk dāḵw kāpīkō gla wa quls‐qul‐yāq, kās kwīḵulī, lāk dāḵw hatlākā sa kīnum dāla lāḵā soldiers,
13Nīkya, nīk dāḵw la, gāḵī disciples asī ḵā kānūtl, gilutl‐īdukīḵ gānūh lēk mī‐ḵā.
14Gil um‐kl wīsūḵ lā‐yū‐kl lāḵā hānā‐gāzī, lamīsunūh au‐um‐kl yākuntīt kla kī, lā‐kl kīyōs‐kl qīh‐īda as klū‐kl.
15Wa lāk dāḵw dādāla ḵā dāla hīk dāḵw mīs qīh‐īdī wātldum‐āk ga mīs la zikyā‐tlil kayāyū lāḵā Jews gāḵ‐āklil lāḵwā nālāḵ.
16¶ Au mī sī da numūgwa‐gīyū disciples lā lāḵ Galilee, lāḵā nagē yiḵ glīkuq dēs Jesus kāk dāḵwī.
17Gilk dāḵw mīs doḵwā‐klilāk, lāk dāḵw umyāḵ‐īduk: nāḵs‐īlēla tī da waōq.
18Wa gāḵī Jesus yāka‐gātl dāḵwuk, nīkya, nāwhā mī da tlā‐whāya la zawē gāḵun lāḵā īkē awīnāqīs gla wūḵ da awīnāqīs‐īḵ.
19¶ Hāgik dāḵw la, disciples sīlāḵ nāwhā līlqalā‐klāya, baptize‐uk lāḵ glīkuma sa Ump, gla wa Kwanūq, gla wī da Holy Spirit:
20Kākoklā‐mas uk kā āḵīlāk dāḵwī sī ḵun nāwhā wātldum‐ūtl: dok, hīmanātla um klin kapētla‐kl glūs, lāga‐ā um‐kl lāḵ qilbā as kla sa awīnāqīs‐īḵ. Amen.
Currently Selected:
Matthew 28: Kwak
Highlight
Share
Copy
Want to have your highlights saved across all your devices? Sign up or sign in
Historical texts first published by the British and Foreign Bible Society 1882-1897. These texts were digitised for the Canadian Bible Society.
