Luke 4
4
1Lī Jesus kā īs kūtā īnāyā ḵā Holy Spirit āīdaākā gehīd laḵ Jordan, la lā yū sa Spirit lāḵā lūbīsa awīnāgwīs,
2La mūskum gūstau pun hwās gwānā sūs Satan: hī we ḵā tā humhīd lāḵīs wāwāyas: gil mīs qilastu masa la pūsk̤ah‐īda.
3Lī da Satan nīk lāk, kāsū sū um lāḵ Ḵwanūq sī da Ike Gīkumī, wīgā weḵā ḵwā tīsum īḵ kā qāquh‐sumhīdī sū.
4Lī Jesus nānāḵmīk nīkia, kiaduq ma ā sīḵs kīsa ī hīhiamī da qāquh‐sum hamezī mats bagwānum kās qilātla‐yau, hī dī da nāhwā wātldum gāyā nāqil lāḵ simpsa sa Ike Gīkumī.
5Lī Satan dāgūstūds lāḵā īkiāla nuge, kās dūqā masīs nāhwāḵ egim sa awīnāgwīs īḵ lāḵā num ātl‐īd pīdāwī.
6Lī Satan nīk yik, nāhwā um klūḵ da tlāhwāyīḵ zawe klin klūkl, gla wūḵ egim āḵs; kā ūḵs zaw ya īḵ gāḵun; kun zawe sūḵ lāḵun qayau kun zāwātsūḵ.
7Kāsū umyāḵ‐īd kla gāḵun, la mī sūḵ wīla um‐kl kūs‐kl.
8Lī Jesus nānāḵmī kās nīk yik, hāga ulḵ‐glind gāḵun, kā īḵs kiaduq mā ī, umyāḵā‐kl tsī ḵā Gīyā Gīkumāyūs, hīgaum‐kl ḵa ā wī sis nakau sū klī.
9Lā lās lāḵ Jerusalem, kās qāgaāklilūdīs lāḵ wītla tauya sa ekī umyāḵulazī, kās nīk yik, kāsū sū um lāḵ Ḵwanūq sa Ike Gīkumī, zukāḵā laga qilīxumḵ lāq:
10Kā īḵs kiadūq mā ī, zawe kla sīs pīyaglum nūq kā aāḵsīlūkl kās yeklau ūkl;
11Lā klī ayāsūh daḵwā sī klāklilāla klūkl, ā klas qāsālū da laḵ sūs gūgwayau kūs lāḵā tīsum.
12Lī Jesus nānāḵmī nīk yik, kiaduq ma ā sī, kīs klis gwānātl ḵā Gīkumāya Gīyūs.
13Gil mī sī Satan qātlā mas ḵīs tlālāīkulā īnāyī, la bos yāwās īda.
14¶ Lī Jesus āīdaākā lāḵ tlāhwāya sa Spirit lā laḵ Galilee: hī mīs la gegilīzā tsa zītlwā‐les lāḵā nāhwā awīstas.
15La kākūklā mas laḵ kāpīkawāzīh dāḵwās, la hyīlā su sa nāhwā.
16¶ La gāḵ laḵ Nazareth, lāḵīs qāḵālīzas dī: la mīs lāḵīs qīgīlas nāhwā, lā lāḵā kāpīkawāzī lāḵā Sunday, la mīs glāḵwā lītl kās kiākiaduq‐sīlī.
17La zawe lāk ī da kiaduqas Isaiah: gil mīs klupīd ḵā kiaduq, la nukā ḵā kiaduqī nīkia,
18Yiḵ Spirit a sa Gīkumāya gāḵ gāḵun, kā īḵs gwukuḵ‐klelā‐bindā ā gāḵun kun glīḵs‐āle sa ekī zikiālum lāḵā wīwūsīlākā; la yālākā gāḵun kun ūmātīdā masī ḵā zihyiles naukāyī, kun glīḵs‐āles lawilsā lāḵā wuh‐wālītlī, glū ītīdī dūqila lāḵā papāsī, kun qītl īdā masī ḵā yilkutlā ī,
19Kun glīḵs‐āles dādālah dum a sa Ike Gīkumī.
20La kiswūtl īd ḵā kiadūqī, la zaws lāḵā aāḵsīla, kās qāgālītlī: lī da kayākutsī da nāhwā lāḵā kāpīka‐wāzī dūqātlāk.
21La gil bund kās nīkī lāh dāḵwuk, la mūḵ da kiaduqīḵ aulā matsū ḵwā nālā lāḵūs wuglitl dāḵwā kūs.
22La nāhwā aulāḵāk glū ḵunyasa sa ekī wātldum gāyau lāḵ simp sas: lāh dāḵw nīkia, īzau ga um ḵwanūqs Joseph?
23La nīk lah daḵwuk, la ums nīk hyis kla gāḵun klas gada glīḵsāla‐yūq; patīnūḵ, qilīx la ga patāḵ: yiḵunūh nāhwe unūh khā‐tlūs qīgīlas lak Capernaum, hī la ga qīgīl lāḵūs kūsā kūs gūqilūtā.
24La nīkia, aulin nīkiūkl, kīyosa ī nāwālāq dādālā sū sīs kus māk gūqilūtā.
25La mīs glin nīkiūklāḵs aula mā ī kīnum ī da kīkakiaus wūtla laḵ nālūtlas Elijah, yiḵs lā ūtlī da īkī klauḵ‐sta‐wāq mā mūḵ unḵīla sa kukla skum gīla, yiḵs lā ūtlī nāhwā paulī da awīnāgwīs;
26Lā glā tā kīyos yālākum yū wās wūtl‐ts Elijah hī ga mūtl lāḵ Zarephath gūqiles Sidon lāḵā zidāk ī yiḵā kakiausī.
27Gla wa kīnum ūtla ḵīḵāsalātl‐un laḵ Israel laḵ bagwānumḵ dum ūtlas Elisha ḵā nāwālāq; kīyos wūtl tā lāh dāḵwuk ek īdā matsū, hī ga mūtlī Naaman ḵā Syrian.
28Lah daḵw wīlī da qazītlī laḵa kāpīkawāzī yiḵs la ī wūklilā ḵīk, lah daḵw kūtāḵ yakia‐yī,
29La glāḵwumgalītl kās klāqa‐wilsīk lāḵā gūqila, lā lālaās laḵ māhyīwāyas gūqilas dāḵwas, kās zukāḵū dī lāḵs dis.
30La mīs gla lāh sau laḵ nukukīh daḵwas kās le lāḵīs lā la ā.
31La gāḵāḵā laḵ Capernaum, gūqiles Galilee, la kākūklā‐mas daḵwuk ḵā Sunday nāhwā.
32Lah daḵw ḵunyas as kākūklā‐mazum nāhwes; kā īs watldum āḵs tloqīmasā ī.
33¶ La mī sa bagwānum laḵa kāpīkāwāzī yiḵā uḵnūgwāde sa qīxdum a sa kīsī ek devil, la hāsil lāqāla,
34Nīkia, qātlas gatul gāḵunūh; mā zau nūhwūs yūkl Jesuts Nazareth? gāḵās kās kīyo‐hwīdā masa ūs gāḵunūh? kauklila mun klūkl, sū um māyā‐untl tsa Ike Gīkumī.
35Lī Jesus klūlgiātluk nīkia, qīklātla la ga, kās gāḵā ūs lokau lāq: gil mī sa devil zuḵ ulsas laḵ nukukīh dāḵwas, la lokau lak, kīs yilqā mas uk.
36Lah daḵw nāhwa um kāyāḵās, nīnākiaula, mā sūḵ da wātldum īḵ? kā ūs tloqīmasa īḵ weḵā ḵā kīs ek devil, wa la mīs gāḵau.
37Wa la kukātlaulāyū laḵa nāhwā awīnāgwīs awīstālīsa.
38¶ Wa la glāḵwulītl laḵa kāpīka‐wāzī, lā la‐īkl laḵ gūqas Simon: lā tī abumpas kunum as Simon kulqātla sa zulqā zihkūlum, lah dāḵw hawāḵulāk kā ī,
39Wa la glāwanū‐zilītlāk, kās kyil‐tagiātlī ḵā zulqā; la bos: wa hīh‐īdā mīs glāḵwulītl kās aāḵsīlāh‐īdī lah daḵwuk.
40¶ Wa yiḵs la ā sī da klīsula linza nāqila, nāhwāh dāḵw mī sī da zihkā nūq yisā ūgwakātlā mas zihkūlum gāḵ dāḵwus lak; la kluḵ‐wīd tsīs ayāsūs lākīḵs wīla ī, la ek‐īdā mas lah daḵwuk.
41Gla wa demons gāḵau laḵa kīnum, qaqātl‐tse nīkiā, sū um Ḵwanūq sa Ike Gīkumī: la ās yākiālah daḵwuk, kīs hītlkālāk yākuntālāh daḵwā; kā īḵs kauklilāh daḵwa ā kīḵs hī mā ī da Christ.
42Wa gil mīs nāh‐īda, gāḵ gāḵa‐wulsa kās le lā ḵā lūbīs awīnāgwīs: lī da kīkakaula ālek, wa gāḵ lak, wāh zilgwātluk kā kīsīs boh daḵws.
43Au mīs nīk lah daḵwuk, kīsī gin īs glīḵsālā sa ek zikiālum yisa gīkāsā sa Ike Gīkumī laḵa ātl‐ūgwile gūq‐gagwīsa: kāḵ gin hī mī gin yālākum gītlī.
44Wa la mīs glīḵsāla laḵa kīkāpīkawāzes Galilee.
Currently Selected:
Luke 4: Kwak
Highlight
Share
Copy
Want to have your highlights saved across all your devices? Sign up or sign in
Historical texts first published by the British and Foreign Bible Society 1882-1897. These texts were digitised for the Canadian Bible Society.
