John 8
8
1Li Jesus lāḵ nagē’s Olives.
2Kaāla kyas tiḵs, gāḵa ī ītīd la‐īkl lāḵā temple, nāhwā mīs gāḵī da bagwānum lāk, lā qāgā lītl kās kākūklā mas īk.
3Gāḵī da kyī‐kyāta gla wī da Pharisees la‐īklila sa zidāk nukululzuqā, lāh dāḵw glāḵ wālītlas lāḵā nuḵ zau lītl.
4Lāh dāḵw nīk yik, Gīkumī nukululzuq gāda zidākig.
5Nīk wūtlī Moses lāḵā law kā nupā sa wī sa hī qīh‐īdī, wa mums kyālā tasī kig?
6Ga um wātldum‐k‐dākw sīk, gwānāk, kāh dāḵws hītlā ḵa ā suk kās sīnā tuk: au mī sī Jesus qūmtā lītl kyātīd sīs zimālāk zanāyī lāḵā awīnāgwītl.
7Lāh dāḵw nānītlīl wuklāk, wa la hyītilītl, kās nīkī lāh daḵwuk, yiḵī da kīyos a yēkīnī lāh dāḵwūkl, wī gā hī gil nup īduq.
8La ītīd qūmtālītl kās kyātīdī sīs zimālāk zānāyī lākā awīnāgwītl.
9Wa yik dākwuk yiḵs lāh dāḵwa ī wūklila ḵīk, lāwilsila nātl numūqa um kyā gālāgīwāla ḵā qilsqilyāq wīlā wilsā; la hī gā ītl āwīmī Jesus gla wa zidāk glā wītl lāḵīs glā wīlas lāḵā nuḵ zau lītl.
10Lī Jesus hyītilītla kās nīkīk, zidāk wī dī lā lī? Kīyos a bagwānum yākmū‐tūklā?
11Lī da zidāk nīk yā kīyos bagwānum a Gī: Lī Jesus nīkya, kīs um ḵa un yākmū tūkl, hulāgā gēgiklila lāgā lāq qātluḵ yekīnāyī.
12¶ Wa la ītīdī Jesus yākagātl lāh dāḵwuḵ nīkya, nūgwa um nāqstawī sa hēstālīs īk, yiḵī da lēgī kla gāḵun kīs klī kāsā‐kl lāḵā pudikilā, lā glā‐kl uḵnūgwād klisa nāqātlē sa qilā.
13Lā gītl tsī da Pharisees nīk yik, qilī kyāla ma ā kūs zikyātlila; kīs tūḵ aulūs zikyālum ā kūs.
14Lī Jesus nānāḵmī kās nīkī lāh dāḵwuk, wāh mī lāḵ gin qilī kyāla um lāḵ zikyātlila la mīs gla aula mun zikyālum; kāḵ gin kauklila mī gā ḵun gāyā nāqila sa, gla wun la‐ās klā; lā glā tas kīs dāḵw kauklila ḵun gāyā nāqila sa, glū ḵā un la‐ās kla.
15Dādalītāh dāḵwa ā kūs lāḵā ulzī, kīyos un dādalītā sū lāḵ bagwānum.
16Kēglā lā ḵun, kun klū dādalīta lāḵ, aulā lā ḵun dādalīta īnīla ḵā; kāḵ gin kīsīg numūq mā, mālūqī gā glin gla wī da Umpa ḵā yālākum nūqa un.
17Kēglā kyātātla ma ā ḵa ās lāḵūs law yā kūs yikīḵs aula ī zikyāluma sī da mālūq bībagwānum a.
18Nūgwā mī sī da qilix um zikyātlilun, lā ḵā ī da Umpa ḵā yālākum nūqa un zikyātlilun.
19Lā gītl dāḵws nīk yik, wī zī lī Ausa? lī Jesus nanāḵma ya, kīs dāḵwa ā kūs kauklila gāḵun kīs ḵa ā ḵun Umpa, gil mī lāḵs dē kūs kauklila gāḵun, lāh dāḵw lāḵs di ḵa ās kauklila um ḵa ā ḵun Umpa.
20Ga mīs wātldāmī lē las lāḵā ulgwāglīlas lā ḵīs laīnāyī kākūklā mas lāḵā temple: wa kīyoza mīs bagwānum wāt‐īduk, kā īḵs kīs ma ī gāḵ‐āklilī glīkā yas.
21Lī Jesus īzāqā lāh dāḵwuk, lē‐kl gin lā ḵun la‐ās klā, lāh dāḵw tā klis ālē‐kl gāḵun, lā klis tlil‐kl lā ḵīs yekīnā‐yūs, yiḵun la‐ās kla kīyos dāḵwis qīh‐īda ās gāḵā.
22La nīkī da Jews, qilī gīla zau kla ūḵwā? kā ūḵs nīkya īḵ yiḵun la‐ās kla kīyos dāḵwis qīh‐īda ās gāḵā?
23La nīkya lāh dāḵwuk, gāyā nāqilāh dāḵws lā ḵwā bunīḵ, gāyā nāqila tun lāḵā īkī: gāyūtl dāḵws lā ḵwā awīnāgwīs īḵ, kīs tun gāyūtl lā ḵwā awīnāgwīs īḵ.
24Hī mī sin lā gītl nīk dāḵwūklāḵs, tlil‐kdāḵwī klā kūs lā ḵūs yēkīnāyā kūs; kā īḵs hīgama ī kā sū ūqis dākw‐kl nūgwā mā, tlil‐kdāḵw tā klis lā ḵūs yēkīnāyā kūs.
25Lā gītl dāḵwas nīk ik, ungwā zaus? lī Jesus nīk dāḵwik; īsa ī glun hī mun wātldumk sē mī lūkl qātlila ma ā.
26Kīnum ī da wātldum lāḵa un glū dādalītāyū wūkl: lā glā tī aulī da yālākum nūqa un; wa yiḵī da wuglitl um lākī hī mun lā wātldum ḵwā awīnāgwīs īḵ.
27Kīs dāḵw ta kauklila kīḵs hē ī qāqīxālasī da Umpa.
28Wa lī Jesus nīk lāh dāḵwuk, gil‐k‐dāḵw mī kla kūs uḵūstūd kluḵ Kwanūqa sa bagwānum, lāh dāḵw klis kautl‐āklilā‐kl kīḵs nūgwā mā ī, glūḵ gin kīyos īg qīgīlas qilīx ma, hī gā mī kākūklā māzumā sa Umpa gāḵun lin wātldum nūqs.
29Wa yiḵī da yālākum nūqa un kapētla mī gla wun, kīsī bo wun kun numūq mī, kāḵ gin hīmunātla mīg uḵā ekyā lākī.
30Yiḵs lā ī nīk sīk kīnum tī da la ūqis uk.
31Wa lī Jesus nīk ḵā Jews yiḵā la ūqis uk, gilhdāḵw mī klā kūs kapētlāk sē um gla wun wātldum, lāh dāḵw klis aulā‐kl nūs disciples‐kl.
32Lāh dāḵw klis kauklilā‐kl ḵā aulā, lā klī da aulā ūmīstā mas klūkl.
33¶ Wa lāh dāḵw nānāḵmīk, gāyau nūh lāḵ Abraham, kī zū yaula mī sunūh wulq lāḵ numūq bagwānum a; mā sīs nīkītlā ūs, lāh dāḵw ums ūmīstā ma tsū‐kl?
34Lī Jesus nānāḵmī lāh dāḵwuk, aulī gin nīk yūkl, yiḵī da nāhwē uḵuḵ yekīnāyī, hī um wulq kākūs yēkīnāyī.
35Wa kīs tī da kākū hīmunītl um lāḵā gūq, lā tī da Kwanūqī hīmunītl ma.
36Wa gil mī kla sī da Ḵwanūq ūmīstā mas klūkl, lāh dāḵw klis aulā‐kl ūmīstā‐kl.
37Kauklila mun klāḵs gāyau īḵ lāḵ Abraham, lā glā tas kyīlākīḵsda gāḵun, kā un wātldum āḵs kīsa ī hītl‐āklil lūkl.
38Hī mī gin wātldum ī da dūqitlā un gla wun Umpa: lāh dāḵw ḵa ās hī um qīgīlīs wuglitl dāḵwa ūs lā ḵīs umpa ūs.
39Lāh dāḵw nānāḵmī kās nīkīk, hī munūh umpī Abraham: lī Jesus nīk lāh dāḵwuk gilhdāḵw mī lāḵā kūs sāsums Abraham, lāh dāḵw lāḵs uḵ lā ḵuḵ qīgīlas wūtlas Abraham.
40Lāh dāḵw glā tas au um kyīlākīḵsda gāḵun, ḵā bagwānum nīkūklā sī da aula, ḵun wuglitlī lāḵ God: kīs wūtlī hī qīgīlī Abraham.
41Uḵ dāḵw sīḵ qīgīlas as ausā, lāh dāḵw nīk yik, kī sunūh būhwilzīnīta, numūq munūh Umpa, yiḵ God.
42Lī Jesus nīk lāh dāḵwuk, gil mī lāḵā kūs hī Umpī God, lāh dāḵw lāḵs dis tlāhwila nū‐qun, kāḵ gin gāyūtlīg gāyā nāqila ḵād lāḵ God; kīs um ḵa ā wī sun qilīx um gāḵā, yālāk‐īda ā glin.
43Mās dāḵw zīs kī‐sītlā ūs ayūsilā ḵun yākundas? kēgl kā īs kīyozīnīh dāḵw ūs qīh‐īdaās hūklīlā ḵun wātldum.
44Gāyūtl dāḵwa ā kūs lā ḵīs ūmpa us ī satan, hī mī sī da mūzutlā sīs ūmpa ūs hī ums qayūs kās qīgīlas ūs; qātlila ma ā kyīlākyā, kīs ḵād glāḵwātla lāḵ aula, kā īḵs kīyosa ī aula lākī, gil ma ā klīlqāla, nīk tī sīs hus māk, kā īḵs klīqisa ā, ūmp ḵā ās klīqizālazī.
45Wa kā īḵs aula un wātldum ī, hī mī sis kīsītl dāḵwūs ūqis gāḵun.
46Ungwī lāh dāḵwūkl ḵā nīk lā ḵā gāḵun klāḵ gin uḵē gāḵ yēkīnāyī? gil um lāḵ wīsun nīk sa aula, mās dāḵw tīs kīsītla ūqis gāḵun?
47Yiḵī da gāyūtla lāḵ God hūklīlā tīḵ wātldum as God, hīk dākw mī sis lāgītl kīs hūklīlāk, kāk dāḵwuḵs kīsa ā kūs gāyūtl lāḵ God.
48Lī da Jews nānāḵmī nīk yik, kīsā unūh nukāḵ‐gānūh nīkī gāḵs Samaritan ik zuq ma ā kūsa, glūḵs uḵnūgwāda ā kūsa sa demon a?
49Lī Jesus nānāḵmā ya, kīsī gin uknūgwādis demon a, au mī gā glin māyāhyilā ḵun Umpa, lāh dāḵw tas kīs māyāhyila gāḵun.
50Kīsī gā glun uḵ‐īḵsda kun hyīlā sa wī: numūqa ā glasa uḵ‐īḵsdē dādalītā ḵād.
51Aulā tun nīkūkl gil mī kla sa numūq bagwānum āḵīla‐kl ḵun wātldum, hī wē ḵā tā klī dūḵwā‐klilā kluḵ wānumgīlē.
52Lī da Jews nīk yik, la munūh awulgaāklilāḵs uḵnūgwāda ma ā kūsa sā demon: la mā ā sī tlilī Abraham ūtla, gla wī da prophets wūtla; lā tas nīkyā dā, gil mī kla sa numūq bagwānum āḵīlā‐kl ḵun wātldum kīs tā klī puḵāklilā īnūḵ kluḵ wānumgīlē.
53Awīla kāwāyā sī tsinūh ūmp wūtlā ī Abraham ūtla ā ḵā lē tlilā? gla wī da prophets wūtla la um ḵād tlilā ungwāsā mas zau sīḵs bagwānum īnayā kūs?
54Lī Jesus nānāḵmī, gil mī lāḵ gin qilīx um lāḵ hyīlā lāḵ gin bagwānum īnīg, kīyos lāḵ tā qayū lāk sun hyīlā īnī lāḵā, hī mun Umpa hyāhyīli‐nūsā mas gāḵun; yiḵīs qayūh dāḵwa ūs hī um God tūs.
55Kīs dāḵw tas kauklilā ki: lā glā tun kauklilā kī: wa gil um lāḵ wī sun nīk lāḵ kī sun kauklilā kī, lā lāḵun sū lāḵ qīx lāḵs klīqisa: lā glā tun kauklilā kī, āḵīla ḵa āḵ wātlduma sī
56Yiḵīs ūmp wūtla ūsī Abraham ūtla ekīkula ūtla kū dūqila ḵun nālā: dūqila mūtlīk, lūtlī ekī‐kula.
57Wa la nīk dāḵwī da Jews āk, kīs ma ā kūs sikyā skum gūs tauḵ unḵīla, dūqīlā sīḵ Abraham ūtla?
58Lī Jesus nīk lāh dāḵwuk, aulī gin nīkūkl, gālā ḵāwā yūtlin klas Abraham ūtlāḵs kīs ma ūtla gāḵ bagwānum a.
59Wa lāh dāḵw dumgilsā ḵā tīsum kās nupulāk, au mī sī Jesus wunh‐īda, lā lāwilsī lāḵā temple, kēkundāla umk.
Currently Selected:
John 8: Kwak
Highlight
Share
Copy
Want to have your highlights saved across all your devices? Sign up or sign in
Historical texts first published by the British and Foreign Bible Society 1882-1897. These texts were digitised for the Canadian Bible Society.
